Revised Common Lectionary (Complementary)

Dee Psalme V

Dee 107 Psalm

¹ Jäft däm Herr Gott Dank, dan Hee es Goot, dan sien Erboarme es duarhauft fa emma.

² Lot däm Herr Gott siene Jerade soo saje; dän Hee jerat haft fonn däm Fient siene Henj;

³ un dän toop jesaumelt haft fonn dee Lenda, fomm Ooste un fomm Waste; fom Nuade un fomm Siede.

⁴ See waundade enne Wiltnis, enn en Wiltnis Wajch, see funge kjeena Städ wua see wone kunne;

⁵ hungrich un darschtich, äare Seel deed enn an feschmachte;

⁶ un see schrieeje no däm Herr Gott enn äa Älend; Hee rad an fonn äare Loag.

⁷ Un hee leid an enn dän rajchte Wajch; no ne Grootstaut wua see läwe kunne.

⁸ Lot dän däm Herr Gott danke fa sien Erboarme; un siene Wundasch to dee Menschen Säns.

⁹ Dan Hee deit dee darschtja Seel tofräd stale un felt dee hungrije Seel met Goots.

¹⁰ Soone dee em Diestra waundre un en dee Doodes Schaute, dee Jefangne sent enn Älend un Iesa –

¹¹ Wiels see Gott siene Wead jäajenaun weare, un deede däm Aula Hejchsta sien Rot feachte,

¹² Un Hee deed äa Hoat deemootje derch schwoare Oabeit; see stolpade un doa wea kjeen halpe,

¹³ Donn roopte see däm Herr Gott aun en äare Noot; Hee rad an ut äare Noot;

¹⁴ Hee brocht an rut fonn Dunkelheit un dän Doodes Schaute, un bruak äare Kjäde uteneen.

¹⁵ Lot dän däm Herr Gott Dank jäwe fa sien Erboarme, un siene Wundasch to dee Mensche Säns.

¹⁶ Dan Hee haft dee Puate fonn Brons jebroake, un Hee schneet dee Iesa Stange en twei.

¹² Donn raed Jesus wada to an: "Ekj sie daut Licht fa de Welt: dee waut mie nofoljcht woat, woat nich em Diestra gone, oba woat daut Laeweslicht habe."

¹³ Donn saede dee Farisaea to am: "Du jefst Zeichnes fonn die selfst, dien Zeichnes es nich Woa."

¹⁴ Jesus auntwuad en saed to an: "Wan ekj uk fonn mie selfts zeije doo, es mien Zeichnes doch Woa, wiel ekj weet fonn wua ekj kom en weet uk wua ekj han go; oba jie weete nich fonn wua ekj kom, uk nich wua ekj han go.

¹⁵ Jie rechte no Mensche Jedanke, ekj recht kjeenem.

¹⁶ En doch, wan ekj rechte doo, es mien Uadeel rajcht; wiel ekj sie nich auleen - mien Foda dee mie jeschekjt haft en ekj sent toop.

¹⁷ Sogoa en jun Jesats steit jeswchraewe daut wan twee Mensche Zeichnes jaewe es et Woarheit.

¹⁸ Ekj sie eena dee fonn mie Zeichnes jeft, en de Foda dee mie jeschekjt haft, jeft uk Zeichnes fonn mie.

¹⁹ Donn saede see to am: "Wua es dien Foda?" Jesus auntwuad: "Jie kjanne mie nich, uk nich mien Foda. Wan jie mie kjannde dan wudd jie mien Foda uk jekjannt habe."

²⁰ Dise wead raed hee biem Gotteskauste aus hee em Tempel leare deed; en kjeena laed Henj opp am wiel siene Stund wea noch nich jekome.