Revised Common Lectionary (Complementary)

Dee 35 Psalm

En Psalm fonn Doft

¹ O Herr Gott, sträw met dän dee met mie sträwe, kjriej met dän, dee jäajen mie kjrieje.

² Nem Schilt un Gort, un komm toop miene Jäajne to trafe.

³ Un nem daut Spies, un komm toop jäajen daen dee mie hinjaraun sent. Saj to miene Seel: "Ekj sie diene Radunk."

⁴ Lot dän dee miene Seel seakje, to schaund woare un sikj schäme, dee Beeset jäajen mie plone.

⁵ Lot dän soo senne aus Sprie fer dän Wint, dän däm Herr Gott sien Enjel wajch peesat.

⁶ Lot äa Wajch Dunkel un Jlepprijch senne, dän däm Herr Gott sien Enjel hinjaraun jajcht.

⁷ Dan dee ha ne Kul fa äa Nat festoake fa mie oone Uasoak; see ha oone Uasoak fa miene Seel jegroft.

⁸ Lot Fenijchte opp am kome, hee woat nijch weete; un lot sien Nat daut hee festoake haft, am selfst fange, lot am doa enenn faule un fenijchte.

⁹ Un miene Seel saul sikj freihe enn däm Herr Gott, dee woat sikj enn siene Radunk freihe.

¹⁰ Miene Knoakes woare aule saje: "O Herr Gott, wäa es soo aus du best, dee de Oame rade deit fonn dän dee stoakja sent aus hee, jo, dee Oame un dee Derftje fonn däm Plindra?"

5 See kjeeme no dee aundre Sied fomm See, enn dee gadareena Ommjaeajent.

² Platslich aus hee utem Schepp rut steach, kjeem am en Maun entjaeajen ut dee Jraewe dee met en beesa Jeist besaete wea,

³ dee mank dee Jraewe wond, en kjeena kunn am met Kjaede binje.

⁴ Foaken haude see am Henj en Feet met Kjaede jebunje, oba hee reet dee Kjaede en Spaunsel twei, en kjeena kunn am bandje.

⁵ En emma, Dach en Nacht wea hee mank dee Jraewe, en schreach, en schneet sikj met Steena.

⁶ Aus hee Jesus fonn wiet auf sach, rand hee am entjaeajen, en baed am aun,

⁷ schreach met ne lude Stem en saed: "Waut ha ekj met die to doone, Jesus, daen hechsta Gott sien Saen? Ekj schwea fer Gott daut du mie nich kwaele woascht!"

⁸ Jesus haud to am jesajcht: "Du onnreina Jeist, komm ut am rut!"

⁹ Donn fruach Jesus am: "Waut es dien Nome?" En hee saed: "Mien Nome es Dusende; dan wie sent fael."

¹⁰ En hee prachad am seeha daut hee an nich wudd ut dee Ommjaeajent rut schekje.

¹¹ Nu wea doa dicht bie aum Boajch ne groote Haed Schwien dee doa grosde;

¹² en dee Jeiste prachade am en saede: "Schekj onns enn dee Schwien enenn, daut wie doa enenn foare kjene."

¹³ En hee erlaubd an daut. En dee beese Jeista kjeeme ut daem Maun erut, en fuare enn de Schwien enenn, enn dee gaunse Haead, bie twee Dusent, moaracht aewa dee Kaunt enn daen See enenn, en fesoope doabenne.

¹⁴ En dee, dee de Schwien foodade, rande enne Staut enenn, en fetalde daut enne Staut uk enne Flekje, en aule kjeeme han tom seene waut paseat wea.

¹⁵ Dee kjeeme no Jesus en sage daem Maun dee met dusende beese Jeiste besaete wea, dee saut doa, aunjetrocke, enn kloara Festaunt.

¹⁶ En dee, dee daut jeseene haude, fetalde woo daut paseat wea met daem Maun dee besaete wea met dee beese Jeista, uk met dee Schwien.

¹⁷ En see prachade am daut hee aeare Ommjaeajent felote wudd.

¹⁸ Aus hee enn daut Schepp enenn steach, prachad dee Maun dee besaete wea am, daut hee met am met kunn.

¹⁹ Oba Jesus leet daut nich, oba saed to am: "Go no dien Hus en diene Famielje, en fetal an waut de Herr fa die jedone haft, en woo hee sikj aewa die erboarmd".

²⁰ En hee feleet en funk aun enn dee Teanstaede to fetale waut Jesus fa am jedone haud, en aule wunndad sikj doaewa.