Revised Common Lectionary (Complementary)

Dee 86 Psalm

En Jebäd von Doft.

¹ O Herr Gott, beaj dien Ua rauf; doo mie auntwuate, dan ekj sie Oam un derftijch.

² Bewoa miene Seel, dan ekj sie jettlijch; O Du mien Gott, rad dien Deena dee enn Die fetrut.

³ Sie mie jnädijch, O Herr, dan ekj schrie jieda Dach no die.

⁴ Jef Fräd to dien Deena siene Seel; dan ekj häw miene Seel opp to die O Herr.

⁵ Dan Du, O Herr best goot un reed to fejäwe; un rikj enn Erboarme to aul dän dee die aunroope.

⁶ Jef Ua, O Herr, to mien Jebäd; horjch no daut schriehe fonn mien deemietjet aunbäde.

⁷ Ekj woa Die aunroope enn dän Dach fonn mien Trubbel, dan Du woascht mie auntwuate.

⁸ Kjeene mank dee Jetta es soo aus Du best, O Herr; uk kjeen soone Woakje aus diene.

⁹ Aul dee Natsjoone dee Du jemoakt hast sele kome un fer die aunbäde; jo, Herr, dee sele dien Nome feharlijche.

¹⁰ Dan Du best Groot, un deist wundaboare Dinje, Du auleen best Gott.

¹¹ O Herr Gott, doo mie unjarejchte enn dien Wajch; ekj woa enn diene Woarheit waundle, doo mien Hoat toop binje dien Nome to ferjchte.

¹² Ekj woa die danke met mien gaunset Hoat, O Herr mien Gott, un ekj woa dien Nome fa emma feharlijche.

¹³ Dan dien Erboarme to mie es groot, un dee hast miene Seel fonn dän läajchste Hal jerat.

¹⁴ O Gott, dee Stoakje sent jäajen mie oppjestonen, un dee Soldote fonn dee Jewaultje ha mien Laewe jesocht, un ha die nijch fer äare Uage jesat.

¹⁵ Oba Du, O Gott, best Gott, foll Metliet, un rikj enn Erboarme en Woarheit.

¹⁶ O drei die no mie un sie mie jnädijch, jef dien Deena Krauft, un rad däm Sän fonn dien Deenstmejal.

¹⁷ Jef mie en Teakjen fa Goots, soo daut dee, dee mie hause seene kjenne un sikj schaeme, O Herr Gott, wiels Du hast mie jeholpe, un Du hast mie jetreest.

5 Oba en jewessa Maun met Nome Ananias en siene Fru Safiera, fekoffte en Aejendom,

² en hee hilt fa sikj selfst en Poat fom Pries, en siene Fru wea met am met doenn, en brochte en jewesset Poat, en laede daut fer dee Apostel aeare Feet.

³ Oba Peeta saed: "Ananias, wuaromm haft Soton dien Hoat jefelt daut du daem Heilje Jeist faealeaje susst, en Poat fonn daen Pries fa daut Launt trigtohoole?

⁴ Wea daut nich dient soo lang aus du daut eajensd, en hauts du nich Macht doaraewa ausset fekofft wea? Wuaromm esset enn dien Hoat enenn jekome soont to doone? Du hast nich to Mensche jeloage, oba to Gott."

⁵ Aus Ananias daut head, foll hee han en storf; en aul dee, dee duat heade kjeeme unja ne groote Angst.

⁶ Dee junge Mana stunde opp en wekelde sien Lief enn, en druage am rut en begrowde am.

⁷ Onnjefaea dree Stunnd lota, kjeem siene Fruh enenn, wist oba nich waut paseat wea.

⁸ En Peeta fruach aea: "Saj mie, fekofft jie daut Launt fa soo en soo fael?" En see saed: "Jo, fa soo fael."

⁹ En Peeta saed to aea: "Wuaromm word jie junt eenich daem Herr sien Jeist to feseakje? Kjikj! de feet dee dien Maun befgroft ha sent bie de Daea, en woare die rut droage!"

¹⁰ En see foll platslich han bie siene Feet en storf; en dee junje Mana kjeeme, funge aea Doot, en druage aea rut en begrowde aea besied aea Maun.

¹¹ En ne groote Angst kjeem aewa dee gaunse Jemeent, uk aul dee, dee daut heade.