Revised Common Lectionary (Complementary)

Dee 139 Psalm

To dän Haupt Musikaunt, een Psalm fonn Doft.

¹ O Herr Gott, Du hast mie unjasocht un mie jekjant.

² Du weetst mien Dolsette, un mien oppstone; Du festeist miene Jedanke fonn wiet auf.

³ Du deist mien Stijch derjch säwe, un mien dol laje, un best bekaunt met aul miene Wäaj.

⁴ Dan doa es nijch en Wuat opp miene Tunj, O Herr Gott, du weetst daut aules.

⁵ Du hast mie enn jeschlote hinje un uk fäare, un diene Haunt es opp mie jelajcht.

⁶ Soone Wissenschoft es to wundaboa fa mie, daut es soo huach, ekj kaun daut nijch erlange.

¹³ Dan Du hast mien Ennaschtet bejräpe; du deetst mie enn miene Mutta äa Muttalief toop wäwe.

¹⁴ Ekj woa die danke, dan ekj sie wundaboa met furchtboare Dinje; Diene Woakje sent wundaboa, un miene Seel weet daut seeha goot.

¹⁵ Miene Knoakes weare nijch fonn die festoakje aus ekj emm Jeheeme jemoakt wort, aus mie jewäft wort enn daut deepet fonne Ead.

¹⁶ Diene Uage sage mien Emfange; un aul miene Jlieda weare enn dien Buak dol jeschräwe aus dee jeformt weare, un doa noch kjeene mank an wea.

¹⁷ Un woo kjestlijch sent diene Jedanke to mie, O Gott! Woo groot es dee Somm doafonn!

¹⁸ Wan ekj dee talle sull, sent dee meeha aus daut Saunt; wan ekj oppwakj sie ekj noch bie die.

¹² Aules es mie jesatslich, oba nich aules es tom Goode; aules es mie jesatslich, oba ekj woa nusscht aewa mie harsche lote.

¹³ Aete fa de Moag, en de Moag fa daut Aete, oba Gott woat daut beides fenichte. Oba dee Kjarpa es nich fa Huararie, oba fa daem Herr, en de Herr fa daen Kjarpa;

¹⁴ en Gott haft beides, daem Herr fom Doot oppjewakjt, en woat onns uk oppwakje derch siene Krauft.

¹⁵ Weet jie nich daut june Kjarpa daem Herr siene Jlieda sent? saul ekj dan daem Herr siene Jliede naeme en moake Huarejliede met dee? Mucht daut nich senne!

¹⁶ Oda weet jie nich daut waea sikj met ne Hua to doone moakt es een Kjarpa met aea? dan hee sajcht: : "Dee twee woare een Fleesch senne".

¹⁷ Oba waea sikj daem Herr aunschlit es een Jeist.

¹⁸ Rant wajch fonn Huararie! Aule Sind dee en Mensch deit sent butarem Kjarpa; oba waea Hurarie drift, sindicht jaeajen sien eajna Kjarpa.

¹⁹ Oda weet jie nich daut jun Kjarpa en Tempel es fa daem Heilje Jeist dee enn ju wont, daen jie fonn Gott ha, en daut jie ju nich selfst eajne?

²⁰ Dan jie sent fa en deara Pries jekofft: doaromm feharlicht Gott enn jun Kjarpa.

⁴³ De naeakjste Dach wull Jesus no Gailaea gone, en funk Filip, en saed to am: "Folj mie no!"

⁴⁴ Filip wea fonn Betseeda, dee Staut wua uk Aundrees en Peeta haea kaume.

⁴⁵ Filip funk Natanael en saed to am: "Wie ha daen gefunge fonn daem Mooses em Jesats, uk de Profeete jeschraewe habe, Jesus fonn Natsaret, Joosef sien Saen."

⁴⁶ En Natanael saed to am: "Kaun doa fonn Natsaret irjent waut Goodet kome?" Filip saed to am: "Komm en see."

⁴⁷ Jesus sach Natanael no am kome, en saed fonn am: "Kjikjt! en woarhauftje Iesraeliet, enn daem kjeen Faulschet es!"

⁴⁸ Natanael saed to am: "Fonn wua kjanst du mie?" Jesus saed to am: "Eeha Filip die roopt, sach ekj die es du unja daen Fiejeboom weascht."

⁴⁹ Natanael saed to am: "Meista, du best de Gottes Saen, du best Israels Kjeenich!"

⁵⁰ Jesus auntwuud am en saed: "Du jleefst wiel ekj saed daut ekj die unja daen Fiejeboom sach? Du saust jratra Dinje aus daut seene."

⁵¹ En hee saed to am: "Enn Woarheit, enn Woarheit saj ekj die, jie woare fonn nu aun dem Himel seene op stone, en Gott siene Enjel erauf en enopp foare opp daen Menschesaen."