Revised Common Lectionary (Complementary)

⁷ Wiels ekj ha Schaund erfoare omm dienet haulwe, Schaund haft mien Jesejcht bedakjt.

⁸ Ekj sie en Utlenda jeworde to miene Breede, un en Framda to miene Mutta äare Kjinje.

⁹ Dan daut Iewa fa dien Hus haft mie fetäat, un dee Schaund fonn dän dee die Schende deede es opp mie jefolle.

¹⁰ Aus ekj miene Seel met Fauste deemietijcht, wea daut uk to miene Schaund;

¹¹ Ekj trock mie Saktseijch aun; un dee muake Spott fonn mie.

¹² Soone dee enn dee Puat saute, räde fonn mie; un ekj wea dee Besopne äa Leet.

¹³ Oba waut mie daut aunbelanjt, mien Jebäd es to die, O Herr Gott, enn ne aunjenäme Tiet, O Gott! Enn dee Butamote fonn dien Erboarme, doo mie auntwuate, enn dee Woarheit fonn diene Radunk.

¹⁴ Rad mie fonn ut daut Blott, soo daut ekj nijch sinkje woa; lot mie jerat woare fonn dän dee mie hausse; en fonn ut dee deepe Wotasch.

¹⁵ Lot dee Äweschwamunj nijch äwa mie kome, un lot daut Deepet mie nijch oppschlucke, un lot nijch dee Kul too gone äwa mie.

¹⁶ Hea mie, O Herr Gott, dan dien Erboarme es goot, drie die no mie enn dee Butamote fonn diene leeftolje Erboarmunje.

¹⁷ En doo dien Jesejcht nijch festäakje fonn dien Deena; dan ekj sie enn Trubbel, horjch schwind no mie.

¹⁸ Komm dijcht bie no miene Seel; rad dee; rad mie wäajen miene Fiend.

⁵ Dan hee haft nich dee komende Welt, fonn dee wie raede, de Enjel unjadon jemoakt.

⁶ Oba doa haft eena opp ne Staed opp earnst jezeicht: "Waut es dee Mensch, daut du aun am denkjst? oda en Menschesaen daut du am be-oobachde sust?

⁷ Du hast am en bestkje laeaja jemoakt aus Enjel, en hast am met Harlichkjet en Ea jekroont;

⁸ Du hast aules unja siene Feet unjadon jemoakt." Dan en daem daut hee am aules unja de Feet jedone haft, haft hee nusscht jelote daut nich unja siene Feet unjadon es. Oba, nu see wie noch nich aules am unjadon.

⁹ Oba wie seene Jesus, dee fa en stootje laeaja jemoakt wea aus dee Enjel, fa daut Liede derchem Doot, nu met Harlichkjeit en Ea jekroont, daut hee derch Gott siene Jnod daen Doot schmakje sull fa aula Maun.