Revised Common Lectionary (Complementary)
Dee 118 Psalm
1 Jäft Dank to däm Herr Gott, dan Hee es goot; wiels sien Erboarme es fa emma.
2 Lot Iesrael nu saje daut sien Erboarme fa emma es.
14 Dee Herr Gott es miene Krauft un mien Leet, un Hee es miene Radunk.
15 Dee Stem fonn Froo senne un dee Radunk es enn dee Jerajchte äare Woninj; däm Herr Gott siene rajchte Haunt deit majchtich oabeide.
16 Däm Herr Gott siene rajchte Haunt es je-eat; däm Herr Gott siene rajchte Haunt deit majchtich oabeide.
17 Ekj woa nijch stoawe, oba ekj woa läwe un däm Herr Gott siene Woakje bekaunt moake.
18 Dee Herr Gott haft mie seeha jestroft; oba Hee haft mie nijch to dän Doot äwajäft.
19 Moak dee Jerajchtijchkjeits Puate op fa mie, ekj woa doa derjch gone; ekj woa däm Herr Gott danke.
20 Dit es däm Herr Gott siene Puat; dee Jerajchte woare doaderjch gone.
21 Ekj woa die danke, dan du hast mie jeauntwuat, un best miene Radunk.
22 Dee Steen dän dee Bülied auntsied schmeete es dee Akjsteen jeworde.
23 Dit es fonn däm Herr Gott, un daut es wunndafoll enn onse Uage.
24 Dit es dee Dach dän dee Herr Gott jemoakt haft; wie woare onns freihe, un froo senne doarenn.
28 Oba lot aum Saubat auset dicht biem easchta Dach enne Waeakj kjeem, kjeeme Marie Magdaleena en dee aundre Marie omm daut Grauf to beseene.
2 En kjikj! doa pasead en grootet Eadbaebe; dan daem Herr sien Enjel kjeem utem Himel, en rolld daen Steen wajch en sad sikj doa enopp.
3 Sien Aunseene wea soo aus en Blits, en siene Kjleeda weare soo wit aus Schnee.
4 Ut Angst fa am, tsetade dee Wajchta en folle han soo aus wan see Doot weare.
5 En dee Enjel saed to dee Fruhes: "Aengst junt nich, dan ekj weet daut jie Jesus seakje dee jekjrietsicht wea.
6 Hee es nich hia, dan hee es oppjestone soo aus hee saed; komt, seet dee Staed wua hee jelaeaje haft.
7 En got schwind en fetalt siene Jinja daut hee fom Doot oppjestone es, en kjikjt! hee jeit fer junt no Galilaea. Doa woa jie am seene. Kjikjt! Ekj ha junt jesajcht!"
8 En see jinje schwind fom Grauf wajch enn Angst en groote Freid, en rande dee Jinja daut to fetale.
9 En seet! Jesus bejaeajend an en saed: "Ekj jrees junt!" En see kjeeme no am, en hilde am aune Feet, en baede am aun.
10 Donn saed Jesus to an: "Aengst junt nich. Got en sajcht miene Breeda daut see no Galilaea gone, doa woare see mie seene."
Copyright © 2001 by Elmer Reimer