Revised Common Lectionary (Complementary)

Dee 40 Psalm

To daen Hauptmusikaunt, en Psalm fonn Doft

¹ Sejchalijch luad ekj fa däm Herr Gott, un Hee buach sikj dol un head mein Hiele.

² En hee neem mie ut daut schrakjlijet Deepet erut, un fonn daut blottjet Leem, un hee stald miene Feet opp en Steen, hee deed miene Staupe ennsaulwe.

³ Un Hee haft en niehet Leet enn mien Mul jejäft, preis to Gott; fäl woare daut seene un woare ferjchte, un woare enn däm Herr Gott fetruehe.

⁴ Jesäajent es dee Maun dee däm Herr Gott sien Fetruehe moakt, en dee sikj nijch no dee Stollte dreit, oda soone dee tosied dreihe no Leaje.

⁵ O Herr Gott mien Gott, du hast fäl jedone, soogoa diene wunndaboare Woakje un diene Jedanke onns jäajenäwa; doa es kjeene dee enne Reaj fa die kaun ennstale, dan dee sent meeha aus kjenne jetalt woare.

⁶ Opfa en Schlachtofa wusst du nijch, du hast miene Uare opjemoakt; du hast nijch jefroacht no Braunt Opfa en Sind Opfa.

⁷ Donn säd ekj, Kjikj, ekj kom; daut es fonn mie jeschräwe enn daut Roll fonn daut Buak.

⁸ Ekj ha Fejneaje dien Welle to doone, O mien Gott, un dien Jesats es enn daut bennaschtet fonn mie.

⁹ Ekj ha Jerajchtijchkjeit jeprädijcht enn dee groote Fesaumlunj, See, ekj woa nijch trigj hoole met miene Leppe to räde; O Herr Gott, du weetst.

¹⁰ Ekj ha diene Jerajchtijchkjeit nijch festoake enn mien Hoat; ekj räd fonn diene Jerajchtijchkjeit un diene Radunk; ekj da diene Leeftolijchkjeit un diene Woarheit nijch festoake fonn dee groote Fesaumlunj.

¹¹ Hoole diene empfintlijche Erboarmunje nijch fonn mie, O Herr Gott, lot diene Leeftolijchkejit un diene Woarheit emma äwa mie oppausse.

5 Nu passead daut aus daut Folkj am drengd Gott sien Wuat to heare, daut hee biem See Jenetsaret stunnt,

² en sach twee Boots aum Eewa stone; oba dee Fescha weare jegone en wossche area Nats.

³ Hee steach enn eent fonn dee Boots enenn daut Siemoon sient wea, en fruach am auf hee wudd en enjkstje fomm Eewa wajch foare; en hee sad sikj dol en deed dee Mensche unjarechte fom Boot.

⁴ En aus hee opphead met raede, saed hee to Siemoon: "Foa enopp wua daut deep es, en lot daut Nat erauf Fesch to jriepe"

⁵ Siemoon auntwuad en saed: "Meista, wie ha de Nacht aewa jeoabeit en ha nusscht jejraepe; oba opp dien Wuat woa ekj daut Nat rauf lote."

⁶ En aus see dit jedone haude, kreaje see ne groote menj Fesch, so daut aeare Nats aunfunge tweitoriete.

⁷ En see wonge aeare Poatna dee enn daut aundret Boot weare daut see sulle kome en an halpe. En dee kjeeme en felde beid Boote soo daut dee aunfunje unjatogone.

⁸ Aus Siemoon Peeta daut sach, foll hee dol bie Jesus siene Kjneehe en saed: "Go fonn mie wajch, Herr, dan ekj sie en sindja Mensch",

⁹ dan hee en dee aundre met am weare erstaunt aewa dee mause Fesch dee see jejraepe haude:

¹⁰ uk beid Joakopp en Jehaun, Tsebedaeus siene Saens, dee Poatna weare met Siemoon. En Jesus saed to Siemoon: "Engst die nich, fonn nu aun woascht du Mensche jriepe".

¹¹ En see brochte dee Boots nom Eewa, feleete aules en foljde am no.