Revised Common Lectionary (Complementary)

⁹ O ferjcht däm Herr Gott, jie Heilje, dan dee, dee am ferjchte fältet aun nuscht.

¹⁰ Dee junje Leiw ha Noot jeläde un sent hunjrijch, oba dee däm Herr Gott seakje fältet aun nuscht Goodet.

¹¹ Komt, horjcht no mie, miene Säns, un ekj woa junt däm Herr Gott siene Forjcht ennleare.

¹² Wäa es dee Maun dee Laewe wel ha, dee goode Doag leef haft soo daut hee Goodet seene kaun?

¹³ Hool diene Tunj fonn Beeset, un diene Leppe fonn Faulscheit;

¹⁴ Drei die wajch fonn Beeset; seakj Fräd un joag daut hinjaraun.

⁷ Donn kjeem doa ne Fru fonn Samaria Wota to hole. Jesus saed to aea: "Jeff me to drinkje."

⁸ Siene Jinga oba weare no dee Staut jegone Aete to kjeepe.

⁹ Dee Samarietische Fru saed donn to am: "Wu kjemt daut, daut du, en Jud, mie, ne samarietische Fru, no en Drunk Wota frajchst?" Dan de Jude habe nuscht met de Samarieta to doone.

¹⁰ Jesus auntwuad en saed to aea: "Wan du de Gottesgow kjansd, en waea dit es dee die frajcht: 'jef mie to drinkje!' dan wusscht du am jefroagt habe, en hee wudd die laewendjet Wota jejaeft habe".

¹¹ Dee Fru saed to am: "Herr, du hast hea nuscht wuamet du schappe kaunst, en dee Borm es deep; fonn wua hast du daut laewendje Wota?

¹² Du best doch nich jrata, best du, aus uns Foda Joakopp de onns dis Borm jeef, ut daen he selfst, uk siene Saens en sien Fee jedrunke ha?"

¹³ Jesus auntwuad en saed to aea: "Waea fonn dit Wota drinkjt, daem woat wada darschte;

¹⁴ Oba waea fonn daut Wota drinkjt waut ekj jaewe woa, woat niemols wada darschte; oba daut Wota waut ekj jaeawe woa, woat en daem ne aewaranende Kjwal, waut nehecht kjwalt enn daut eewjet Laewe."

¹⁵ Dee Fru saed to am: "Herr, jef mie daut Wota, daut mie nich meeha darschte woat, en ekj nich meeha bruck kome en schape!"

¹⁶ Jesus saed to aea: "Go roop dien Maun, en komm haea."

¹⁷ De Fru saed to am: "Ekj hab kjeen Maun." Jesus saed to aea: "Daut hast du Rajcht wan du sajchst, Ekj hab kjeen Maun.

¹⁸ Dan du hast fief Manne jehaut, en daen du nu hast es nich dien Maun. En daem hast du de Woarheit jeraet."

¹⁹ De Fru saed to am: "Herr, ekj woa enn daut du en Profeet best.

²⁰ Onnse Fodasch habe up disen Boajch aunjebaet, en jie saje daut enn Jerusalem es de Staed wua Mensche sulle aunbaede."

²¹ Jesus saed to aea: "Fru, jleew mie, de Tiet woat kome wan jie nich opp disen Boajch, uk nich enn Jerusalem daem Foda woare aunbaede.

²² Jie weete nich waut jie aunbaede; wie weete waut wie aunbaede, dan daut Heil kjemt fonne Jude.

²³ Oba doa woat ne Stund kome, en es nu aul, wan dee woarhauftje Aunbaeda daem Foda em Jeist en enne Woarheit woare aunbaede; dan de Foda seakjt no soone Aunbaeda.

²⁴ Gott es Jeist, en dee am aunbaede, motte aunbaede em Jeist en enne Woarhiet."

²⁵ De Fru saed to am: "Ekj weet daut dee Mesias kjemt, dee doa Christus heet. Wan dee kome woat, dee woat onns aules dietlich moake."

²⁶ Jesus saed to aea: "Ekj, dee met die raed, sie dee Mesias."