Revised Common Lectionary (Complementary)

Dee 31 Psalm

To dän haupt Musikaunt, en Psalm fonn Doft.

¹ Ekj socht Tooflucht enn die, O Herr Gott; lot mie niemols to schaund kome, rad mie enn diene Jerajchtijchkjeit.

² Beaj dien Ua dol no mie, rad mie schwind, sie en stoakja Steen to mie fa en Fasting Hus fa mie, mie to rade.

³ Dan du best mien groota Steen, un miene Fastinj, leid un lenk mie omm dien Nome haulwe.

⁴ Brinj mie ut daut Nat daut see fa mie festoake ha, dan du best miene Krauft.

⁵ Ekj äwajäw mien Jeist enn dien Henj enenn, dan du hast mie aufjeleewat, O Herr Gott, dee Woarheits Gott.

¹⁹ Woo Groot es dien Goots daut du oppjelajcht hast fa dän dee die ferjchte; Du hast jeoabeit fa dän dee fer Menscheit enn die fetruede.

²⁰ Du woascht dän festäakje enn daut Jeheemet fonn dien Doasenne, fonn Mensche aea Plone; du woascht dän bedakje enn ne Bood fonn daut Sträwe met Tunje.

²¹ Jesäajent es dee Herr Gott, dan hee haft wunndaboa jeoabeit met sien Erboarme to mie enn ne beloagada Grootstaut.

²² Dan ekj säd enn mien Haust, ekj sie aufjeschnäde fonn diene Uage; sejchalijch hast du miene Jebäde jeheat aus ekj to die schreajch.

²³ O hat däm Herr Gott leef, aul jie siene Heilje; dee Herr Gott deit dee Truehe oppbewoare, un deit dee Stollte trigj tole emm folle.

²⁴ Sie stoakj, un Hee woat dien Hoat stoakje, aul jie dee enn däm Herr Gott hope.

¹⁶ Dan ekj schaem mie nich met daut Evanjeelium, dan daut es dee Krauft Gottes aul dee seelich to moake dee doaraun jleewe, de Jude daut easchte en uk de Grieche.

¹⁷ Dan doarenn es Gott siene Jerachtichkjeit jeoppenboat fom Gloowe tom Gloowe, so auset jeschraewe steit, "Dee Jerachte saul derch sien Gloowe laewe".

²² ne Jerachtichkjet fonn Gott derch daen Gloowe aun Jesus Christus fa aul daen dee jleewe; dan doa es kjeen unjascheet,

²³ wiel aulamaun haft jesindicht en sent kort jekome aun Gott siene Harlichkjeit;

²⁴ en sent oone fedeenst jeracht jemoakt derch Gott siene Jnod derch dee Radunk dee enn Jesus Christus es;

²⁵ daem Gott hanjestalt haft aus en Jnodestool derch daen Gloowe enn Jesus sien Bloot, fa en Bewies fonn siene Jerachtichkjeit enn daem daut hee dee Sind fonn ferhaea haud enn siene Jedult febie gone lote;

²⁶ en fa en Bewies fonn siene Jerachtichkjeit enn dise Tiet, daut hee Jeracht sull senne, en uk daem Jeracht moake dee aun Jesus jleeft.

²⁷ Wua es nu dan daut puche? Daut es utjeschlote. Derch waut fonn Jesats? Fonn Woakje? Nae! oba derch daut Jesats fom Gloowe.

²⁸ Aulso raekjen wie doamet daut en Mensch Jeracht woat derchem Gloowe oone dee Jesatses Woakje.

²⁹ Es hee bloos de Jude aea Gott? Es hee nich uk de Heide aea Gott? Yo, hee es uk de Heide aea Gott.

³⁰ Sentamol doa mau een Gott es dee de Beschnaedne jeracht moakt emm Gloowe, en de Oonbeschnaedne derchem Gloowe.

³¹ Doo wie dan derch daen Gloowe daut Jesats fenichte? Mucht daut nich senne! Nae, wie jrinde daut Jesats.

²¹ Nich aula dee mie Herr! Herr! nane woare enn daut Himelsrickj enenn kome, bloos dee, dee mien himlischa Foda sien Wele doone.

²² Fael woare to mie saje aun jan Dach: 'Herr! Herr! Ha wie nich enn dien Nome profitseit, en enn dien Nome beese Jeista erut jedraewe, en enn dien Nome fael besondasch groote Woakje jedone?'

²³ Dan woa ekj to an saje: 'Ekj ha junt noch nie jekjant, wajch met junt, jie Beesewichta!'

²⁴ Doaromm, waea emma dise miene Raed heat, en daut deit, woat soo aus en kluaka Maun senne dee sien Hus opp gooda Steengrunnt bud.

²⁵ Dee Raeajen kjeem, en daut Wota kjeem, en dee Wint blosd, en toobd romm dut Hus, oba daut foll nich, dan daut wea opp Steen jebut.

²⁶ En waea emma dise miene Raed heat, en deit dee oba nich, woat soo senne aus en Noa, dee sien Hus oppem Saunt bud.

²⁷ Dee Raeajen kjeem, en daut Wota kjeem, en dee Wint blosd, en toobd romm daut Hus, en daut foll, en daut faule wea met Jewault!"

²⁸ Nu pasead daut, aus Jesus utjeraet haud, daut daut Folkj sikj erstaund aewa siene Lea;

²⁹ dan hee lead soo aus eena dee Follmacht haud, en nich soo aus aeare Schreftjeleade.