Readings for Lent and Easter

12 Jesus ergo ante sex dies Paschae venit Bethaniam, ubi Lazarus fuerat mortuus, quem suscitavit Jesus.

² Fecerunt autem ei coenam ibi, et Martha ministrabat, Lazarus vero unus erat ex discumbentibus cum eo.

³ Maria ergo accepit libram unguenti nardi pistici pretiosi, et unxit pedes Jesu, et extersit pedes ejus capillis suis: et domus impleta est ex odore unguenti.

⁴ Dixit ergo unus ex discipulis ejus, Judas Iscariotes, qui erat eum traditurus:

⁵ Quare hoc unguentum non veniit trecentis denariis, et datum est egenis?

⁶ Dixit autem hoc, non quia de egenis pertinebat ad eum, sed quia fur erat, et loculos habens, ea quae mittebantur, portabat.

⁷ Dixit ergo Jesus: Sinite illam ut in diem sepulturae meae servet illud.