Old/New Testament

20 Nu pasead daut een Dach aus hee em Tempel unjarechte deed, en daut Evanjeelium praedjd, daut dee Huagapriesta en Schreftjeleade kjeeme, met dee Aelteste toop,

² en saede to am: "Saj onns, derch waut fonne Follmacht deist du dise Dinje? oda waea haft die dise Follmacht jejaeft?"

³ Hee auntwuad en saed: "Ekj woa ju uk ne Froag stalle, en sajcht mie:

⁴ Jehaun siene Taufe, wea dee fom Himel, oda fonn Mensche?"

⁵ See bedochte sikj daut soo bie sikj selfst: "Wan wie saje, fom Himel, dan woat hee saje: Wuaromm jleewd jie am dan nich?

⁶ En wan wie saje: fonn Mensche, dan wudd daut Follkj onns steenje, dan dee weare aula aewazeicht daut Jehaun en Profeet wea."

⁷ Aulsoo auntwuade see en saede: "Wie weete nich fonn wua hee wea."

⁸ En Jesus saed to an: "Dan saj ekj junt uk nich wua miene Follmacht haea kjemt."

⁹ Donn funk hee aun dee Mensche derch dit Jlikjnes to saje: "En jewessa Maun plaunt en Wiengoada en pakt daen ut aun Wiengoadna, en reisd wajch opp ne lange Tiet.

¹⁰ Auset Tiet wea schekjt hee sien Sklow no dee Wiengoadna daut dee am sulle fonn dee Frucht brinje; oba dee Wiengoadna fekjielde daem en schekjte am ladich wajch.

¹¹ Donn schekjt hee noch een Sklow; oba daem fekjielde see uk, en beleidjde am en schekjte am ladich wajch.

¹² En wada schekjt hee en dredda, oba daem deede see uk fewunnde en schmeete am rut.

¹³ Donn saed dee Herr dee daem Wiengoode eajend: 'Waut saul ekj doone? Ekj woa mien leefsta Saen schekje, feleicht woare see fa daem Respakjt jabe.'

¹⁴ Oba aus dee Wiengoadna daem sage, schluage see Rot unja sikj en saede: 'Dit es de Oaw, wel wie daem dootmoake daut daut Oawgoot onnst kaun senne'.

¹⁵ Aulso schmeete see am ut daem Wiengoode rut en muake am doot. Waut woat nu dan de Herr fom Wiengoade doone met daen?

¹⁶ Hee woat kome en dee Wiengoadna ommbrinje, en woat daen Wiengoade aundre aewajaewe." Aus dee daut heade saede see: "Mucht daut nich senne!"

¹⁷ Hee kjikjt an aun en saed: "Waut es dit dan daut jeschraewe steit: 'Dee Steen daen de Buelied auntsied jesat ha es dee Akjsteen jeworde?

¹⁸ Waea opp daen Steen felt woat to Biete jebroake woare, oba opp waem dee felt woat to Pulwa jekjwatscht woare."

¹⁹ Don proowde dee Huagapriesta en Schreftjeleade enn dee selwje Stund am enn aeare Henj to kjriehe, oba see aengste sikj fa daut Follkj, dan see wiste daut hee dit Jlikjnes jaeajen an jesajcht haud.

²⁰ See pauste jeneiw opp en schekjte Spiejoone dee sikj sulle faeastale aus seeha From, omm am faust to kjriehe met waut hee saed, daut see am dan kunne aewajaewe aun daem Rejiera siene Follmacht.

²¹ Dee frauge am: "Leara, wie weete daut du rajcht leare en raede deist, en deist nich de Persoon aunseene, oba leascht enn Woarheit Gott sien Wajch.

²² Esset rajcht fa onns daem Kjeisa Taks to tole oda nich?"

²³ Oba hee moakjt aeare Lest en saed to an:

²⁴ "Wiest mie en Selwastekj; waems Jesecht en Ennschreft es daut?" See saede: "Daem Kjeisa sient."

²⁵ Hee saed to an: "Dan jaeft daem Kjeisa waut daem Kjeisa sient es, en Gott waut Gott sient es."

²⁶ En dee kunne am nich fer de Mensche jriepe met siene Wead, en fewunndada sikj aewa siene Auntwuate en weare stel.