Old/New Testament

6 Hee jinkj fonn doa wajch, en kjeem no siene Fodastaut, en siene Jinje weare met am met.

² Aus dee Saubat kjeem, deed hee enn aeare Sienagoog unjarechte, en fael dee daut heade, weare erstaunt, en saede: "Fonn wua haft dis Maun aul dit, en waut es dise Weisheit dee am jejaeft es? En aul dee majchtje Wunnda dee derch am paseare?

³ Es dit nich dee Temmamaun, Marie aea Saen, en Brooda aun Jakoobus, en Jooses, en Judas, en Siemoon? en sent siene Sestre nich hia mank onns?" En see oajada sikj aewa am.

⁴ Jesus saed to an: "En Profeet es nich oone Ea bute enn siene Fodastaut, en mank siene Fewaunte en Famielje."

⁵ En hee kunn doa nich fael majchtje Woakje doone bute siene Henj opp en poa Kranke opplaje en daen heele.

⁶ En hee wunndad sikj aewa aea Onngloowe.

Hee jinkj enn dee Darpa runnt omm en lead.

⁷ Hee roopt dee Twalw no sikj, en funk aun daen rut to schekje, twee bie twee, en jeef an Follmacht aewa onnreine Jeista,

⁸ en befool an daut see nusscht met naeme sulle buta en Gonstok, kjeen Broot, kjeen Jelttausch, uk nich Jelt em Gort.

⁹ Binjt junt de Schoo aun, trakjt oba nich twee Wanikjs aun."

¹⁰ En hee saed to an: "En wuaemma jie enn en Hus enenn kome, blieft doa bott jie wieda reise.

¹¹ En enn wautfonne Staed see junt nich oppnaeme, uk nich no junt horche, got fonn doa wajch en scheddat daen Stoff fonn june Feet fa en Zeichnes jaeajen an."

¹² See jinje en praedjde daut Mensche sulle Buesse doone,

¹³ en see dreewe fael beese Jeista rut, en saulwde fael Kranke met Eelj en heelde daen.

¹⁴ Donn kjreach Kjeenich Heroodes fonn am to heare, dan sien Nome wea wiet en breet bekaunt, en see saede: "Jehaun dee Taufa es fom Doot oppjestone, doawaeajen wirkje dee kjraftkje Woakje enn am".

¹⁵ Oba aundre saede: "Hee es Elia", en noch aundre saede: "Hee es en Profeet, soo aus eena fonn dee Profeete".

¹⁶ Oba aus Heroodes doafonn head, saed hee: "Daut es Jehaun, daem ekj de Kopp aufneem".

¹⁷ Dan Heroodes selfst haud Jehaun jefange jenome, en am jebunje en em Jefenknes jestoppt omm sien Brooda Filip siene Fru Heroodias, dan hee haud sikj met aea befriet.

¹⁸ Jehaun haud to Herodes jesajcht: "Daut es nich rajcht daut du dien Brooda siene Fru hast.

¹⁹ Nu Heroodias hilt daut jaeajen am, en wull am jearen doot moake, oba kunn nich;

²⁰ dan Heroodes enjst sikj fa Jehaun, wiel hee wist daut Jehaun en jerajchta en heilje Maun wea, en wan hee am head wort hee seeha Onnrueijch, oba horcht doch jearen no am.

²¹ Aus nu en pausende Dach kjeem opp Heroodes sien Jeburtsdach, muak hee en Owentkost fa siene Huachbeaumte, Beriemde, en Faeastona enn Galilaea.

²² Aus dee Heroodias aeare Dochta enenn kjeem en daunst, jefoll Heroodes daut seeha, uk daen dee bie am weare. En dee Kjeenich saed to daut Maeakje: "Froag mie no wautemma du west, ekj woa die daut jaewe."

²³ Hee fespruak aea daut met en Schwua: "Wautemma du woascht fonn mie froage woa ekj die jaewe, bott daut haulwet fonn mien Kjeenichrikj."

²⁴ See jinkj rut en fruach aeare Mutta: "No waut saul ekj froage?" See saed: "Jehaun dee Taufa sien Kopp."

²⁵ See kjeem fuats trig, en saed: "Ekj wel nu fuats Jehaun dee Taufa sien Kopp opp ne Plot."

²⁶ Dee Kjeenich wea seeha betriebt doaraewa, oba waeajen daut Schwua, en daen dee bie am saute, wull hee aea daut nich aufsaje.

²⁷ En platslich schekjt dee Kjeenich en Henkja, en jeef befael daut sien Kopp sull jebrocht woare. Dee jinje nom Jefenknes en hakjte Jehaun daen Kopp auf,

²⁸ en brochte daen Kopp opp ne Schiew, en hee jeef daut Maeakje daen, en daut Maeakje jeef aeare Mutta daen.

²⁹ Aus siene Jinja daut heade, jinje see en neeme sien Lief en laede daut enn en Grauf.