Old/New Testament

20 "Dan daut himlischet Rikj es soo aus Husmeista dee tiedich tsemorjenst rut jinkj Oabeide aun to naeme enn sien Wiengoade to oabeide.

² En hee wort sikj eenich met dee Oabeida fa een Selwastekj fa een Dach, en schekjt an rut enn sien Wiengoada enenn.

³ Aus hee bie klok naeajen rut jinkj sach hee aundre maesijch romm stone em Moakjtplauts,

⁴ en saed to an: 'Got jie uk em Wiengoada, en wautemma rajcht es, woa ekj junt jaewe'. En see jinje.

⁵ En bie klok twalw, en klok dree jinkj hee wada rut, en deed daut naemlije.

⁶ En onnjefaea klok fiew jinkj he rut en funk aundre dee bloos romm stunnde, en saed to an: 'Wuaromm sto jie hia daen Dach aewa en doone nusscht?'

⁷ See saede to am: 'Wiel kjeena onns aunjenome haft'. Hee saed to an: 'Got jie uk enn mien Wiengoade.'

⁸ Auset nu Owent wea, saed dee Herr fomm Wiengoode to sien Fewaulta: 'Roop dee Oabeida en jeef an aea Loon, en fang aun met daen dee daut latste kjeeme, en soo bott dee easchte.'

⁹ En aus dee kjeeme dee bie klok fiew aunjenome weare, kjreaje dee jieda een Selwastekj.

¹⁰ Aus dee kjeeme dee daut easchte weare, meende see daut see meeha wudde kjriehe; en dee kjreaje uk jieda een Selwastekj.

¹¹ Aus see daut kjreaje, brummelde see jaeajen daem Husmeista, en saede:

¹² 'Dise latste ha bloos eene Stunnd jeoabeit, en du hast daen met onns aewareen jetrokke. dee wie de Laust en Het jedroacht ha.'

¹³ , Oba hee auntwuad an en saed: 'Frint, ekj doo die kjeen schode; deetst du nich ennwelje met mie fa een Selwastekj?

¹⁴ Nem wat dient es en go; ekj wel dise latste daut naemlije jaewe aus die.

¹⁵ Es mie daut nich erlaubt met daut mienje to doone soo aus ekj wel? oda es dien Uag bees wiel ekj goot sie?'

¹⁶ Soo woare dee latste daut easchte sene, en dee easchte daut latste."