Old/New Testament

²¹ Donn kjeem Peeta no am, en saed: "Herr, wan mien Brooda sikj jaeajen mie fesindicht, woo foaken saul ekj am fejaewe - bott saewen mol?"

²² Jesus saed to am: "Ekj saj die, nich saewen mol, oba saewen mol tsaewentich mol.

²³ Doaromm es daut Himelsrikj soo aus en Kjeenich dee feraeakjne wull met siene Sklowe.

²⁴ Aus hee aunfunk, wort eena fer am jebrocht dee am Teandusent schuldich wea.

²⁵ En wiel hee nusscht haud tom betole, befool dee Herr daut am sull fekofft woare met siene Fru en Kjina, en aules waut hee haud, en dee Schult betole.

²⁶ Oba hee foll am fere Feet en prachad am en saed: 'Sie nich bossich aewa mie, ekj woa die aules betole!'

²⁷ Daem Sklow sien Herr wea ennalich bewaeacht en leet am gone, en fejeef am aul siene Schult.

²⁸ Oba dee Sklow jinkj rut, en funk eena fonn siene Metsklowe, dee am hunndat kjleenet Jelt schuldich wea, en kjreach am aum Hauls to hoole, en warjd am en saed: 'Betol mie waut du mie schuldich best'.

²⁹ Sien Metsklow foll am fere Feet, en prachad am en saed: 'Sie nich bossich aewa mie, ekj woa die boolt aules betole'.

³⁰ Oba hee wull nich, en stoppt am em Jefenkjnes enenn bott hee am aules betole wudd.

³¹ Aus dee aundre Metsklowe sage waut paseat wea, weare dee seeha truarich, en kjeeme en fetalde aea Herr aules daut paseat wea.

³² Donn roopt dee Herr daen Sklow, en saed to am: 'Du beesa Sklow, ekj fejeef die aul diene Schult wiel du mie prachre deetst;

³³ Sust du die nich erboarmt ha aewa dien Metsklow, soo aus ekj mie aewa die erboarmd?'

³⁴ En dee Herr wea seeha doll, en aewajeef am daen dee am kwaele wudde bott hee aules wudd betolt ha waut hee schuldich wea.

³⁵ Soo woat mien himlischa Foda uk to junt doone, wan jie nich en jieda sien Brooda fonn hoate fejaewe."