Old/New Testament

12 To dee Tiet jinjk Jesus aum Saubat derch en Kornflekj, en siene Jinja hungad, en funje aun dee Oare to plekje, en aete.

² Oba aus dee Farisaea daut sage, saede see to am: 'Kjikj! diene Jinja doone waut aun Saubat nich erlaupt es."

³ Hee saed oba to an: "Ha jie nich jelaest waut Doft en dee met am, deede aus an hungad?

⁴ Woo see em Gotteshus enenn jinje en aute daut Broot daut Gott jeweit wea, daut am nich erlaubt wea to aete, uk nich daen met am, oba wea bloos fa dee Priesta?

⁵ Oda ha jie nich enn daut Jesats jelaest daut dee Priesta em Tempel aum Saubat daen Saubat feonnreinje, en doch nich Schuldich sent?

⁶ Ekj saj junt, en jratre aus dee Tempel es hia.

⁷ Wan jie oba jekjant haude waut daut meent: 'Ekj wel leewa Erboarme ha aus Opfa', dan wudd jie dee Onnschuldje nich fedaumt ha.

⁸ Dan dee Menschesaen es uk Herr aewa daen Saubat."

⁹ Aus hee fonn doa wajch deed, kjeem hee enn ne Sienagoog enenn.

¹⁰ En kjikj! doa wea en Maun met ne fedreajde Haunt, en see frauge am: "Esset erlaubt aum Saubat to heele?" omm daut see ne Uasoak haude am to beschuldje.

¹¹ Hee saed to an: "Waut fonn Mensch es doa mank junt, dee mau een schop haft, en daut aum Saubat em Growe felt, dee daut nich wudd tohoole kjriehe en rut haewe?

¹² Woo fael meeha es en Mensch dan weat aus en Schop. Aulsoo esset erlaubt aum Saubat Goodet to doone."

¹³ Donn saed hee to daen Maun: "Strakj diene Haunt ut!" en hee strakjt daen ut, en dee wea doajestalt, jesunt soo aus dee aundre.

¹⁴ Dee Farisaea jinje rut, en hilde Rot jaeajen am, woo see am ommbrinje kunne.

¹⁵ Oba Jesus wist daut, en reisd fonn doa wajch. En fael foljde am hinjaraun, en hee heeld an aule,

¹⁶ en hee woarnd an aula daut see am nich sulle oppenboa moake,

¹⁷ dautet mucht erfelt woare waut derch daen Profeet Jesaja jesajcht wea:

¹⁸ "Kjikjt! Mien Deena daem ekj jewaelt ha, mien Leefsta, met daem ekj seeha tofraed sie; ekj woa mien Jeist opp am laje, en hee woat dee Natsjoone daut Jerecht bekaunt moake.

¹⁹ Hee woat nich striede oda schriehe, en kjeena woat siene Stem oppe Gause heare.

²⁰ En enjekjnekjtet Rua woat hee nich tweibraeakje, en Flaus daut reakjet woat hee nich utlasche, bott Jerajchtichkjeit woat jewonne ha.

²¹ En dee Natsjoone woare aeare Hopninj enn sien Nome sate."

²² Donn brochte see am eenem dee met en beesa Jeist besaete wea, dee Blint uk Stomm wea, en hee heeld am, soo daut dee seene en raede kunn.

²³ En daut gaunse Follkj wea erstaunt, en saed: "Es dit nich Doft sien Saen?"