Old/New Testament

41 యెహోవా చెబుతున్నాడు:
“దూర దేశాల్లారా, మౌనంగా ఉండి నా దగ్గరకు రండి.
దేశాల్లారా, ధైర్యంగా ఉండండి.
    నా దగ్గరకు వచ్చి మాట్లాడండి.
మనం కలిసికొందాం.
    ఎవరిది సరియైనదో నిర్ణయించేద్దాం.
² ఈ ప్రశ్నలకు నాకు జవాబు చెప్పండి: తూర్పునుండి వస్తోన్న ఆ మనిషిని మేల్కొలిపింది ఎవరు?
    మంచితనం నాతో కూడ నడుస్తుంది.
అతడు తన ఖడ్గం ఉపయోగించి రాజ్యాలను ఓడిస్తాడు.
    వారు ధూళి అవుతారు. అతడు తన విల్లును ఉపయోగించి రాజులను జయిస్తాడు.
    వారు గాలికి కొట్టుకొని పోయే పొట్టులా పారిపోతారు.
³ అతడు సైన్యాలను తరుముతాడు, ఎన్నడూ బాధనొందడు.
    అతడు అంతకు ముందు ఎన్నడూ వెళ్లని స్థలాలకు వెళ్తాడు.
⁴ ఈ సంగతులు జరిగేట్టు చేసింది ఎవరు? ఇది ఎవరు చేశారు?
    ఆదినుండి మనుష్యులందరినీ పిలిచింది ఎవరు?
యెహోవాను నేనే ఈ సంగతులను చేశాను.
    యెహోవాను నేనే మొట్ట మొదటి వాడ్ని ఆరంభానికి ముందే నేను ఇక్కడ ఉన్నాను.
    అన్నీ ముగింపు అయన తర్వాత కూడ నేను ఇక్కడ ఉంటాను.
⁵ దూర దూర స్థలాలూ, మీరంతా
    చూచి భయపడండి.
భూమ్మీద దూరంగా ఉన్న స్థలాలూ,
    మీరంతా భయంతో వణకండి.
మీరంతా దగ్గరగా రండి,
    నా మాటలు వినండి.

⁸ యెహోవా చెబుతున్నాడు: “ఇశ్రాయేలూ, నీవు నా సేవకుడివి
    యాకోబూ, నిన్ను నేను ఏర్పరచుకొన్నాను.
    నీవు అబ్రాహాము వంశంవాడివి. అబ్రాహామును నేను ప్రేమించాను.
⁹ భూమిమీద నీవు చాలా దూరంగా ఉన్నావు.
    నీవు చాలా దూర దేశంలో ఉన్నావు.
అయితే నేను నిన్ను పిలిచి,
    నీవు నా సేవకుడివి.
నేను నిన్ను ఏర్పరచుకొన్నాను.
    నేను నీకు విరోధంగా తిరుగలేదు అని చెప్పాను.
¹⁰ దిగులుపడకు, నేను నీతో ఉన్నాను.
    భయపడకు, నేను నీ దేవుణ్ణి.
నేను నిన్ను బలంగా చేశాను.
    నేను నీకు సహాయం చేస్తాను.
నేను మంచితనపు కుడిహస్తంతో నిన్ను బలపరుస్తాను.
¹¹ చూడు, కొంతమంది మనుష్యులు నీ మీద కోపంగా ఉన్నారు.
    కానీ వాళ్లు సిగ్గుపడతారు.
నీ శత్రువులు అదృశ్యమై నశిస్తారు.
¹² నీ విరోధుల కోసం నీవు వెదకుతావు.
    కానీ నీవు వారిని కనుగొనలేవు.
నీకు విరోధంగా యుద్ధం చేసినవాళ్లు
    పూర్తిగా కనబడకుండా పోతారు.
¹³ నేను యెహోవాను,
    నీ దేవుణ్ణి నేను నీ కుడిచేయి పట్టుకొన్నాను.
నీవు భయపడవద్దు, నేను నీకు సహాయం చేస్తాను.
    అని నేను నీతో చెబుతున్నాను.
¹⁴     ప్రశస్తమైన యూదా, భయపడకు. ప్రియమైన నా ఇశ్రాయేలు ప్రజలారా భయపడవద్దు.
నిజంగా నేను మీకు సహాయం చేస్తాను.”

²⁵ “ఉత్తరాన నేను ఒక మనిషిని మేల్కొలిపాను.
    సూర్యోదయమయ్యే తూర్పు దిశనుండి అతడు వస్తున్నాడు.
    అతడు నా నామాన్ని ఆరాధిస్తాడు.
కుమ్మరి మట్టి ముద్దను తొక్కుతాడు. అదే విధంగా ఈ ప్రత్యేక మనిషి రాజులను అణగదొక్కుతాడు.

42 “నా సేవకుణ్ణి చూడండి!
    నేను అతన్ని బలపరుస్తాను.
    నేను ఏర్పరచుకొన్నవాడు అతడే.
    అతని గూర్చి నేను ఎంతో ఆనందిస్తున్నాను.
నా ఆత్మను నేను అతనిలో ఉంచాను.
    జనాలన్నింటికి అతడు న్యాయం చేకూరుస్తాడు.
² అతడు వీధుల్లో కేకలు వేయడు
    అతడు గట్టిగా అరిచి శబ్దం చేయడు.
³ అతడు సౌమ్యుడు. అతడు నలిగిన గడ్డిపరకను గూడ విరువడు.
    మిణుకు మిణుకు మంటున్న మంటనుగూడ అతడు ఆర్పడు.
    అతడు న్యాయాన్ని ప్రయోగించి ఏది సత్యమో తెలుసుకొంటాడు.
⁴ లోకానికి న్యాయం చేకూర్చేవరకు
    అతడు బలహీనం కాడు, నలిగిపోడు.
దూర స్థలాల్లోని ప్రజలు అతని ఉపదేశాలను విశ్వసిస్తారు.”

⁶ “మీరు సరైనది చేయాలని నిన్ను పిలిచింది నేనే, యెహోవాను.
    నేను నీ చేయి పట్టుకొంటాను. నేను నిన్ను కాపాడుతాను.
ప్రజలతో నాకు ఒక ఒడంబడిక ఉంది అని తెలియజేసేందుకు నీవే ఒక సంకేతం.
    నీవు ప్రజలందరి కోసం ప్రకాశించే వెలుగుగా ఉంటావు.
⁷ గుడ్డివాళ్ల కళ్లు నీవు తెరుస్తావు. వాళ్లు చూడగలుగుతారు.
    అనేక మంది ప్రజలు చెరలో ఉన్నారు. ఆ ప్రజలను నీవు విడుదల చేస్తావు.
    అనేక మంది ప్రజలు చీకట్లో జీవిస్తున్నారు. ఆ బందీ గృహంనుండి నీవు వారిని బయటకు నడిపిస్తావు.

¹⁰ యెహోవాకు క్రొత్త కీర్తన పాడండి.
    భూమి మీద చాలా దూరంలో ఉన్న సర్వ ప్రజలారా,
    సముద్రాల్లో ప్రయాణం చేసే సర్వ ప్రజలారా,
    మహా సముద్రాల్లోని సర్వ ప్రాణులారా,
    దూర స్థలాల్లో ఉన్న సర్వ ప్రజలారా యెహోవాను స్తుతించండి!
¹¹ అరణ్యాలు, పట్టణాలు కేదారు పొలాలు
    యెహోవాను స్తుతించండి
సెలా నివాసులారా ఆనందంగా పాడండి.
    మీ పర్వత శిఖరం మీదనుండి పాడండి.
¹² యెహోవాకు మహిమ ఆపాదించండి.
    దూర దేశాల్లోని ప్రజలంతా ఆయనను స్తుతించాలి.
¹³ యెహోవా ఒక పరాక్రమ సైనికునిలా బయలుదేరుతున్నాడు.
    ఆయన యుద్ధం చేయటానికి సిద్ధంగా ఉన్న వానిలా ఉంటాడు. ఆయన చాలా ఉర్రూతలూగుతూంటాడు.
ఆయన గట్టిగా కేకలు వేసి అరుస్తాడు.
    ఆయన తన శత్రువులను ఓడిస్తాడు.

¹⁴ “చాలా కాలంగా నేను మౌనంగా ఉన్నాను.
    నేను అలానే మౌనంగా ఉండి, నన్ను నేను నిగ్రహించుకొన్నాను.
కానీ ఇప్పుడు శిశువును కంటున్న స్త్రీలా నేను గట్టిగా అరుస్తాను.
    నేను కఠినంగా, గట్టిగా ఊపిరి పీలుస్తాను.
¹⁵ కొండలను, పర్వతాలను నేను నాశనం చేస్తాను.
    అక్కడ మొలిచే మొక్కలన్నింటిని నేను ఎండిపోయేట్టు చేస్తాను.
నదులను నేను పొడి నేలగా చేస్తాను.
    నీటి మడుగులను నేను ఎండిపోయేట్టు చేస్తాను.
¹⁶ గుడ్డివారికి ఇదివరకు తెలియని మార్గంలో నేను వారిని నడిపిస్తాను
    ఆ గుడ్డివారు ఇదివరకు ఎన్నడూ తిరుగని బాటలలో నేను వారిని నడిపిస్తాను.
చీకటిని నేను వారికి వెలుగుగా చేస్తాను.
    కరకు నేలను నేను చదును చేస్తాను.
నేను వాగ్దానం చేసే పనులను నేను చేస్తాను.
    నా ప్రజలను నేను విడువను.
¹⁷ కానీ కొంతమంది మనుష్యులు నన్ను వెంబడించటం మానివేశారు.
    బంగారపు పూత పూయబడిన విగ్రహాలు వారికి ఉన్నాయి. ‘మీరే మా దేవుళ్లు’ అని వారు ఆ విగ్రహాలతో చెబుతారు.
ఆ ప్రజలు వారి అబద్ధపు దేవుళ్లను నమ్ముతారు.
    కానీ ఆ ప్రజలు నీరాశ చెందుతారు.”

¹⁸ “చెవిటి ప్రజలారా నా మాట వినాలి.
    గుడ్డి మనుష్యులారా మీరు కళ్లు తెరిచి, నన్ను చూడాలి.
¹⁹ ప్రపంచం అంతటిలోకెల్లా నా సేవకుడు^[a] ఎక్కువ గుడ్డివాడు.
    నేను ప్రపంచంలోకి పంపించిన నా సేవకుడు మహా చెవిటివాడు.
నేను ఒడంబడిక చేసుకొన్న ఆ వ్యక్తి యెహోవా సేవకుడు అందరికంటె మహా గుడ్డివాడు.
²⁰ ఈ సేవకుడు తాను ఏమి చేయాలో అది చూడాలి.
    కానీ అతడు నాకు విధేయత చూపడం లేదు.
అతడు తన చెవులతో వినగలడు.
    కానీ అతడు నా మాట వినుటకు నిరాకరిస్తున్నాడు.”
²¹ యెహోవా తన సేవకుని ఎడల న్యాయం చూపగోరుతున్నాడు.
    కనుక అద్భుతమైన ఉపదేశాలను యెహోవా తన ప్రజలకు చేస్తాడు.
²² అయితే ప్రజలను చూడండి
    ఇతరులు వారిని ఓడించి, వారి దగ్గర దొంగిలించారు.
యువకులంతా భయపడ్తున్నారు.
    వారు చెరలో బంధించబడ్డారు.
మనుష్యులు వారి ధనం వారి దగ్గర్నుండి దోచుకొన్నారు.
    వారిని రక్షించేందుకు ఏ మనిషిలేడు.
ఇతరులు వారి డబ్బు దోచుకొన్నారు.
    “దానిని తిరిగి ఇచ్చేయండి” అని చెప్పగల వాడు ఒక్కడూ లేడు.