Old/New Testament
30 Dee Wead fonn Agur, däm Jaka siene Sän, dee Laust; dee Kjrieja säd to Iteal un Ukal.
2 Sejcha sie ekj meeha hungsch aus irjent sestwäa; un ekj ha nich dee Festentnis fonn en Maun.
3 Ekj ha nich Weisheit jeleat, oba ekj weet dee Wissenschoft fonn Heilijchkjeit.
4 Wäa es enopp jefoare nom Himmel, un wäa es rauf jefoare? Wäa haft dee Wint toop jesaumelt enn siene Fuste? Wäa haft dee Wotasch toop jebunge enn sien Wanikj? Wäa haft dee Enj fonn dee Ead oppjehowe? Waut es sien Nome, un waut es sien Sän sien Nome? Sejchalijch weetst du!
5 Jiedat Wuat fonn Gott woat utjeprooft; Hee es en Schilt to dän dee enn am Tooflucht seakje.
6 Doo nich to siene Wead toolaje, soo daut Hee die nich schelle sull un du wuscht utjefunje woare aus en Läajna.
7 Ekj ha die jefroacht no twee Dinje, hool dee nich trigj fonn mie eeha ekj stoaw:
8 Nemm Nutslooset un ne Leaj wiet wajch fonn mie; jeff mie nich Oamoot oda Rikjdom; jeff mie mien poat fonn Broot jieda Dach;
9 Soo daut ekj nich foll woa un beschumle doo, un saje sull: "Wäa es dee Herr Gott?" oda daut ekj sull Oam senne un stäle doo, un mien Gott siene Nome schende wudd.
10 Doo nich schlajchtet fonn en Deena fetale to sien Meista, sest wudd hee die fluche un du wuscht schuldijch senne.
11 Ne Jenerazion deit äa Foda fluche, un deit äare Mutta nich säajne;
12 ne Jenerazioin dee enn äa eajne Senn Acht es, un doch nich rein jewosche fonn äa eajnet Drakj.
13 Doa es ne Jenerazion, O woo huachmootijch sent äare Uage, un dee Uagalette sent nehejcht jehowe;
14 ne Jenerazion dän äare Täne soo sent aus Schweate, un dee Baktäne soo aus Massasch dee Oame oppe Ead opp to schlucke, un dee Bederftje fonn mank Mensche.
15 Dee Blootworm haft twee Dajchte dee schriehe, Jeff! Jeff! Dree Dinje dee nich tofräd kjenne jestalt woare; feeha dee niemols saje: Jenuach!
16 Dee Hal, un daut Muttalief daut nich Kjinje to Welt brinjt; dee Ead dee nich met Wota jefelt woat; un daut Fia daut niemols sajcht, Jenuach!
17 Daut Uag daut Spos moakt fonn sien Foda, un siene Mutta nich jehuarsaum es – dee Krauje emm Tol woare sien Uag ut puakse, un dee Odla Säns woare daut oppfräte.
18 Doa sent dree Dinje dee to wundafoll sent fa mie: jo, feeha dee ekj nich weet:
19 Woo en Odla sikj benemt enne Himmels; woo ne Schlang sikj benemt opp en Steen; woo en Schepp oppem See foat; un woo en Maun sikj benemt met ne Junkfru.
20 Soo es ne Hua äa Wajch; see at un wescht äa Mul, un sajcht: "Ekj ha kjeen Beeset jedone".
21 Dee Ead scheddat wäajen dree dinje, jo, doa sent feeha daut see nich fedroage kaun:
22 Unja en Deena wan hee harscht; unja en Noa wan hee met Äte jefelt es met Noaring;
23 Unja wäa jehausst woat wan see befriet es; unja en Deenstmäakje dee en Oaw es to äa Meista.
24 Feeha Dinje sent kjleen oppe Ead, oba dee sent Weis aus dee, dee Weis jemoakt sent.
25 Dee Eemstje sent en Folkj dee nich stoakj sent, doch moake see äa Äte reed emm Somma;
26 Dee Eadschwien sent nich en majchtjet Folkj, doch moake see sikj tusijch mank Steene;
27 Dee Heischrakje ha kjeen Kjeenijch, doch gone dee jieda rut enn en Schwarm;
28 Du kaunst däm Äajdakjsel enne Haunt name, un dee es enn däm Kjeenijch sien Paulaust.
29 Doa sent dree Dinje dee goot sent enn Mascheare; jo, feeha dee goot sent emm gone:
30 En Leiw dee majchtijch mank dee Beeste; un hee dreit sikj nijch wajch fonn waut fer am es;
31 eena dee siene Lende ommgort haft; un en Kosebok; un en Kjeenijch wan siene Armee bie am es.
32 Wan du noarisch best jewast enn die selfst eare; oda wan du Beeset jedocht hast, laj diene Haunt opp dien Mul!
33 Sejchlaijch kjemt Glomms rut wan Malkj jeschliesat woat; un Bloot kjemt wan dee Näs jekwatscht woat; so kjemt Striet fäa wan Oaja jereitst woat.
31 Däm Kjeenijch Lemuel siene Wead, dee Laust dee siene Mutta am unjarejchte deed;
2 Waut, mien Sän? Un waut du Sän fonn mien Muttalief? Un waut, du Sän fonn mien Fespräakje?
3 Jeff diene Krauft nich to Frumensche, oda diene Wäaj Kjeenije to fenijchte.
4 Daut es nich fa Kjeenije, O Lemuel; daut es nich fa Kjeenije Wien to drinkje; uk nich fa Kjeenijchsäns no strenjet Drinkje to losste;
5 sest wan see drinkje un fejäte waut fäajeschräwe es, un daut Jerejcht fa dee Säns dee bedrekjt sent fedreit woat.
6 Jeff strenjet Jedrenkj to däm dee bottem Ommkome es; un Wien to dän dee Betta enn Seel sent;
7 Lot dän drinke un äare Oamoot fejäte, un sien Älend fejäte.
8 Moak dien Mul op fa dän dee Stomm sent, omm dän äa haulwe dee nich en Foda habe.
9 Moak dien Mul op; doo rajcht rejchte, un halp dee Oame en Derftje.
10 Wäa kaun ne goode Fru finje? Dee es fäl meeha weat aus deare Steene.
11 Äa Maun sien Hoat haft follet Fetruehe enn ar, so daut am nuscht fält aun Femeare.
12 See deit am Goots un nich Beeset aun enn aul dee Doag enn äa Läwe.
13 See seakjt Woll un Flaus; un see deit wellijch met äare Henj oabeide.
14 See es soo aus dee Jeschafts Schäp; see brinjt daut Äte fonn wiet auf.
15 See steit uk opp wanet noch Nacht es, un jeft Äte to äa Hushault, un ne Oppgow to äare Deenstmäakjes.
16 See haft en Flekj Launt bekjikjt un nemt daut; see deit en Wiengoade plaunte met dee Oabeit fonn äare Henj.
17 See haft äare Lende ommgort met Krauft, un haft äare Oarms stoakj jemoakt.
18 See schmakjt auf äa Toonäme Goot es; äare Laump jeit de Nacht nich ut.
19 See haft äare Henj opp daut Spenstock jelajcht; un äare Henj ha daut Spenneraut to hoole.
20 See strakjt äare Henj rut no dee Oame; jo, see reakjt äare Henj rut no dän dee bederftijch sent.
21 See haft nich Angst fa dee Schnee fa äa Hushault; dan äa Hushault es bekjleet met Schoarloch.
22 See moakt buntet Bedakjunj fa sikj selfst; äare Kjleede sent feinet Leiwaunt un Purpur.
23 Äa Maun es bekaunt enn dee Puate, wan hee sette deit mank dee Elteste emm Launt.
24 See moakt feine Leiwaunt Kjleede, en fekjaft see, un see deit Seide no dee Jeschaftslied brinje.
25 Macht un Ea sent äare Kjleeda; un see freit sikj to dän komende Dach.
26 See moakt äa Mul op enn Weisheit, un daut leeftoljet Jesats es opp äare Tung.
27 See jeft Oobacht opp dee Wäaj fonn äa Hushault, un at nich daut Broot fonn Mässijchkjeit.
28 Äare Kjinje stone opp un nane ar Jesäajent; äa Maun deit uk un deit ar lowe.
29 Fäl sent dee Dajchta dee weis haundle, oba du best bäta aus aul dee aundre.
30 Gonnst es lestijch, un Pracht es nuscht; oba nu Fru dee däm Herr Gott ferjchte deit saul jepreist woare.
31 Jäft ar dee Oabeit fonn äare Henj; un lot äare Woakje ar preise enn dee Puate.
11 Wudd daut jie mie enn miene Noarheit fa en Stoot kunne fedroage; aewens doo jie mie werklich fedroage.
2 Dan ekj sie iewrich aewa junt met en Gottes Iewa, dan ekj ha junt aun eenen fetrut, daut ekj junt Christus hanreakje kunn aus ne reine Junkfru.
3 Oba mie es angst, daut, soo aus dee Schlang Eewa derch siene Lest beduddeld, soo wudde feleicht june Jedanke feleit woare fonn dee Onnschult en Reinheit enn Christus.
4 Dan wan waea kjemt en praedicht en aundra Jesus daem wie nich jepraedicht ha, oda en aundra Jeist daem jie nich jekraeaje ha, oda en aundret Evanjeelium daut jie nich aunjenome ha, daem fedroag jie welich.
5 Dan ekj meen daut ekj nusscht weinja sie aus dee faeaschta Apostel.
6 Oba wan ekj emm raede nich je-eeft sie, enn Erkjantnes sie ekj, en wie sent enn aule Dinje junt jeoppenboat worde enn aule Waeaj.
7 Ha ekj jesindicht daut ekj mie jedeemieticht ha daut jie kunne nehecht jehowe woare, wiel ekj junt daut Evanjeelium emsonnst praedjd?
8 Ekj berowd aundre Jemeente en neem fonn ann Loon daut ekj junt deene kunn.
9 Aus ekj bie junt wea, en mie waut faeld, wea ekj kjeenem ne Laust, oba dee Breeda dee fonn Matsedoonian kjeeme muake daut opp; ekj hilt mie enn aulem junt nich ne Laust to senne, en woa mie soo hoole.
10 Soo aus dee Woarheit enn Christus es, kjeena enn dee Ommjaeajent fonn Achaja woat mie dit Puche wajch naeme.
11 Wuaromm? Wiel ekj junt nich leef ha? De Herr weet!
12 Waut ekj oba doo, woa ekj doone, daut ekj daen de Grunnt wajch naeme kaun dee no ne Uasoak seakje daut see puche kjenne, daut see muchte soo aus wie jefunge woare.
13 Dan soone sent faulsche Profeete, fefeararische Oabeide, dee Jestault aunaeme soo aus Christus siene Apostel.
14 En kjeen Wunnda; dan Soton selfst nemt Jestault aun soo en Lichtenjel.
15 Doaromm esset kjeen grootet Dinkj wan siene Deena jestault aunaeme soo aus Jerachtichkjeitsdeena; oba daen aea Enj woat doano senne aus aeare Woakje fedeent ha.
Copyright © 2001 by Elmer Reimer