Old/New Testament
Jesustaca Judasmi japichishca
47 Jesús chashna rimacujpirajmi, achca runacuna chaiman chayamurcacuna. Jesuspaj chunga ishqui yachacujcunamanta Judas shuti runami ñaupashpa pushamurca. Paica chayashcahuanmi, Jesusta muchangapaj c'uchuyarca. 48 Pai c'uchuyajpica, Jesusca:
–Judas, ¿canca Runa Aichayuj Ñucataca muchashpachu japichingui, imamí?– nircami.
49 Jesusta japichinaman shamushcata ricushpami, Paihuan cajcunaca:
–Apunchij Jesús, ¿espadahuan macanacushunchu?– nishpa tapurcacuna.
50 Chashna nishpaca, Jesushuan cajcunamanta shujca, curacunata mandaj curapaj servij shuj runapaj alli lado rinrintami espadahuan p'itirca. 51 Chashna rurajpimi, Jesusca:
–Ña chailla, paicunataca saquichijlla– nishpa, chai runapaj rinrinta tuparishpa alliyachirca.
52 Alliyachishca q'uipaca, japinaman shamushca pushaj curacunatapish, Diospaj huasita cuidajcunata mandajcunatapish, cunaj yuyajcunatapish Jesusca cashnami nirca:
–¿Ñucataca shuhuata shinachu espadacunahuan, caspicunahuan japinaman shamunguichij? 53 Punllanta cancunahuan Diospaj huasipi cajpipish, Ñucataca manamari japircanguichijchu. Cunanca Ñucata japina cajpimi, amsapi mandacuj diablo yuyaita cushcamanta Ñucata japicunguichij– nircami.
Pedroca Jesusta ‘Mana rijsinichu’ nishcami
54 Cashna nijpi Jesusta ña japishpaca, curacunata mandaj curapaj huasimanmi pushashpa rircacuna. Pedroca, huasha huashallami caticurca. 55 Jesusta pushashca q'uipaca, huasi canllapimi ninata japichishpa muyundijta tiyarishpa cunucurcacuna. Pedropish paicunahuanmi tiyarishpa cunucurca. 56 Pedropish chaipi cunushpa tiyacujpi, shuj servij huarmi ricushpami:
–Riqui, cai runapishmari Paihuan carca– nirca.
57 Chashna nijpimi, Pedroca chai huarmitaca:
–Pitapishchari nicungui huarmi, mana rijsinichu– nirca.
58 Chaimanta ashalla q'uipaca, cutin shujtaj paita ricushpami:
–Canpish chai runacunapuratajmari cangui– nijpi, Pedroca chai runataca:
–¡Runa, ima tucungui! Mana chaipurachu cani– nircami.
59 Cutin shuj hora shinapica, shujtajpish Pedrotaca:
–Cai runapish chaihuantajmari carca. Paipish Galileallamantatajca– nircami.
60 Chashna nijpipish, Pedroca chai runataca:
–Imatapishchari nicungui, mana rijsinichu– nircami.
Pedro chashna nicujpiraj, ñapish galloca cantarcallami. 61 Gallo cantanca, Apunchij Jesús chainijmanta tigrarishpa ricujpimi, Pedroca: «Manaraj gallo cantajpimari, quimsa cutin Ñucataca ‘Mana rijsinichu’ ningui» nishcata yuyarirca. 62 Chaita yuyarishpami, Pedroca canllaman llujshishpaca, anchata llaquirishpa, jatunta huacarca.
Soldadocunami Jesusta macashpa asishcacuna
63 Chai q'uipaca, Jesusta charicujcunaca pugllashpa asishpami huajtarcacuna. 64 Ñahuita huatashpa, ñahuipi huajtashpaca:
–¿Pitaj Canta huajtanchij? Huillai– nircacunami.
65 Jesustaca mana rimanacunata rimashpami, achcata c'amircacuna.
Mandajcunapuralla tandanacushcamanmi Jesusta pushashcacuna
66 Chai q'uipami ña pacarijpica, israelcunata cunaj yuyajcunapish, pushaj curacunapish, Mandashcata yachachijcunapish tandanacurcacuna. Paicuna Jesusta, tandanacushca mandajcunapajman pushamujpimi, cashna nircacuna:
67 –¿Canca Quishpichij Cristochu cangui? Huillaiari– nishpa tapujpi, Jesusca cashnami nirca:
–Ari nijpipish, cancunaca mana cringuichijchu. 68 Cancunata Ñuca tapujpipish, mana cutichi tucunguichijchu, mana cacharinguichijmanpishchu. 69 Shina cajpipish Runa Aichayuj Ñucaca, cunanmantami Tucuita Rurai Tucuj Taita Diospaj alli ladopi tiyacugrini– nircami.
70 Chashna nijpi:
–Shinashpaca, ¿Canca Diospaj Churichu cangui?– nishpa, tucuicuna huaicashpa tapujpica:
–Ari, cancunapaj quiquin shimillahuantajmi ninguichij– nircami.
71 Shina nijpi paicunaca:
–Pai imalla nishcata uyajcunata ña mana tapunachu canchij. Paipaj quiquin shimillataj imata nijtaca, ña uyashcanguichijmi– nircacunami.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.