Old/New Testament

Jesustaca huañuchingapajmi ima shina japinata yuyarishcacuna

26 Cai tucuita huillashca q'uipami Jesusca, Paipaj yachacujcunataca cashna nirca:

² –Pascuapajca, ishqui punllallami illan. Chaitaca, yachanguichijllatami. Chai punllapimi, Runa Aichayuj ñucataca, japishpa chacatangacuna– nircami.

³ Chai punllacunallatajmi, curacunata mandajcunapish, Mandashcata yachachijcunapish, israelcunata cunaj yuyajcunapish, curacunata mandaj Caifás shuti curapaj jatun huasi canllapi tandanacurca. ⁴ Chaipi tandanacushpami, Jesusta ima shina pacalla japishpa huañuchinata cashna yuyarinacurca: ⁵ «Cai fiesta punllapica ama japishunchij, ñataj gentecuna jatarishpa ñucanchijtaraj imata ruranman» nircacunami.

Betaniapimi Jesuspaj umapi aceiteta tallishca

⁶ Jesusca Betaniapica, leproso nishca Simonpaj huasipimi carca. ⁷ Chaipimi shuj huarmica, achca cullquihuan randishca mishquiman ashnacujta alabastro botellapi apashpa shamurca. Jesús micushpa tiyacujpimi, chai mishquiman ashnacujtaca, Paipaj umapi tallirca. ⁸ Yachacujcuna chaita ricushpaca, p'iñarishpami cashna nircacuna:

–¿Ima nishpataj cai mishquiman ashnacujtaca, chashna yanga tallinchu, imamí? ⁹ Caitaca, achca cullquipi c'atushpachari, huajchacunaman cunchijman carca– nishpami rimarcacuna.

¹⁰ Jesús chaita uyashpaca, cashnami nirca:

–¿Ima nishpataj cai huarmitaca, chashna p'iñashpa rimanguichij? Paica, ñucapajca allitamari ruran. ¹¹ Huajchacunaca mana illangachu, ashtahuanpish ñucaca mana cancunahuan causacushallachu. ¹² Cai huarmica, ñuca huañujpi pambanapajmi, mishquiman ashnacujtaca, ñaupashpa ñucapi tallin. ¹³ Cai pachapica, maipipish cai alli huillaita huillacushpaca, cai huarmi ñucapaj cashna allita rurashcatapish parlangacunami. Chashnami tucui uyajcuna caitaca yachangacuna, chashnatajmi canga– nircami.

Jesustaca Judas Iscariotemi huashalla japichina tucushca

¹⁴ Chai q'uipami, Paipaj chunga ishqui yachacujcunamanta Judas Iscarioteca, curacunata mandajcunapajman rirca. ¹⁵ Paicunatami Judasca:

–Jesusta cancunaman japichijpica, ¿mashnatataj cusha ninguichij?– nirca. Chashna nijpimi paicunaca quimsa chunga cullquita curcacuna.

¹⁶ Chai punllamantami Judasca, Jesusta ima shina japichinata yuyacurca.

Jesusca Pai huañushcata yuyarishpa micunatami callarichishca

¹⁷ Levadura illaj tandata micuna callari fiesta punllami, Jesuspaj yachacujcuna Paipajman c'uchuyashpaca:

–Pascua punllapi micunata Can micuchunca, ¿maipitaj allichigrichun ningui?– nishpa tapurcacuna.

¹⁸ Chaita tapujpimi, Jesusca cashna nirca:

–Jerusalenman richij. Chaipi causaj shuj runapaj huasiman rishpaca: “Yachachijca, ‘Ñuca punllami ñalla chayamucun. Cambaj huasipimi, ñuca yachacujcunandij Pascuapi micunataca micusha nini’ ninmi” nigrichij– nircami.

¹⁹ Chashna nijpimi yachacujcunaca, Jesús nishca shinallataj, Pascuapi micunataca allichircacuna.

²⁰ Ña tutayajpica, Jesusca Paipaj chunga ishqui yachacujcunandijmi, micungapaj tiyarirca. ²¹ Ña micucushpami, Jesusca:

–Cancunapuramanta shujmari, ñucataca huañuchichun japichinguichij, chashnatajmi canga– nirca.

²² Chashna nijpica, yachacujcunaca tucuicuna achcata llaquirinacushpami:

–Apunchij Jesús, ¿ñucachu cantaca japichisha, imashi?– nishpa tapurcacuna.

²³ Shina tapujpimi, Jesusca cashna nirca:

–Cunan ñucahuan cai platopi maquita satijmi, ñucataca japichinga. ²⁴ Runa Aichayuj ñucataca, Dios Quillcachishcapi nishca shinami huañuchingacuna. Runa Aichayujta japichij runaca, ¡ai, imachari tucunga! Chai runaca, mana huacharishca cashpachari, alli canman carca– nircami.

²⁵ Shina nijpimi, Paita japichij Judasca:

–Yachachij, shinashpaca, ¿ñucachu cantaca japichisha?– nirca.

Chashna nijpimi Jesusca:

–Ari, canllataj chashna ninguica– nircami.