Old/New Testament

Tej tyole Jesús juntl maj ka tuˈn tcyim

¹⁷ Tej chˈitk tpon tumel tuˈn t‑xiˈ Jesús tuj Jerusalén, ex ttxcoˈnxin ke cablaaj t‑xnakˈatzxin cyjunalxxin tuj be, bix e xiˈ tkbaˈnxin cyexin:

¹⁸ ―Cybintz nyola. Ko xeˈl tuj tnom te Jerusalén, jaaˈj chin xeˈla kˈoˈn tuj cykˈab ke nejenel cye pala bix ke txˈolbal ley. Ejeeˈ tzunxin chi kbalte tuˈn nbyeta, ¹⁹ bix cxeˈl cykbaˈn tuˈn nxiˈ kˈoˈna tuj cykˈab nmak xjal te Roma. Ejeeˈtzen xinj chi oquel xmucchante weya, inayena, jxjal Smaˈn tuˈn Dios tuˈn ntena cyuya xjal. Cxeˈl cykˈoˈn kej xjal yaaˈn judío lu tzˈuˈn wiˈja, bix chin cwel cybyoˈna twitz cruz. Pero te toxen kˈij ncyimlena oj njaw itzˈjtla juntl maj―tz̈i Jesús.

Tej t‑xiˈ tkane cytxu Juan bix Jacobo jun xtalbil te Jesús

²⁰ E pontzen twitz Jesús t‑xuˈl jxin Zebedeo cyuya talxuj, Juan bix Jacobo. E tajbexuj tuˈn t‑xiˈ tkanenxuj jun xtalbil, bix e cub majexuj twitzxin. ²¹ Bix e xiˈ tkbaˈnxin texuj:

―¿Alcye taja?

Aj ttzakˈbeˈnxuj:

―Oj toc tey te cawel, waja tuˈn cycawen kej caˈba wala lu tuyey, jun tuj tmankˈaba bix juntl tuj tneẍa―tz̈ixuj.

²² Pero aj ttzakˈbeˈn Jesús:

―Min tzˈel cyniˈya tiˈj ti jilel ntzaj cykanena weya. ¿Jacˈapatzen tziyˈx cyey cyuˈn oj tiyˈ aˈ cycˈuˈja tisenj at tuˈn tiyˈx wuˈna?―tz̈ixin.

Bix aj cytzakˈbeˈnxin:

―Cbinel ke kuˈn―tz̈i tzunkexin.

²³ E xiˈ tkbaˈnxin cyexin:

―Jax cyuˈna qˈuiyal aˈ cycˈuˈja cyuˈna tisenj weya. Yaltzen cykanbila weya, yaaˈn inayenwe chin kbalte al ccawel wuyena oj woca te cawel. Jatzen ma txiˈ kˈoˈn tuˈn Nmana te alcyekej tuˈn cycub ke ntxlaja tuˈn cycawen wuyena―tz̈ixin.

²⁴ Toctzen cybiˈn jlaajtlxin t‑xnakˈatz Jesús tyol Jacobo tuya Juan, bix oc chiˈl chˈinkexin. ²⁵ Pero e tzaj ttxcoˈn Jesús cykilcakexin, bix e xiˈ tkbaˈnxin cyexin:

―Cytzkiˈntl tzuna kej cawel te twitz txˈotxˈ nchi cawen tuˈn t‑xiˈ cyyeecˈan nim cyajwalel cye xjal. Bix cyiw nchi oc cyiˈ xjal tjakˈ cycawbil. ²⁶ Perotzen cyey cyxol, yaaˈntzen juˈ ctemela tewa. Al tzunj taj tuˈn tten nintzaj cyxola, cˈoquel tipen tiˈj tuˈn tajben cyey. ²⁷ Bix alcye taj tuˈn toc te nejenel cyxola, nejl cˈoquel te tajbel te cykilcatl cyey. ²⁸ Chi oquela tisen weya. Min in ula tuˈn cyajben xjal weya. Nuk oˈcx in ula tuˈn wajbena cye xjal, bix tuˈn t‑xiˈ nkˈoˈna nchunkˈlala tuˈn cycoˈpj nim xjal tuj tkˈab il―tz̈i Jesús.

Tej tul tnaabl cywitz caˈba mos̈ tuˈn Jesús

²⁹ Yajcˈatltzen, bix e pon Jesús cyuya t‑xnakˈatz tuj tnom te Jericó. Tejtzen cyetz Jesús tuj Jericó, nimxsen xjal oc lpe tiˈjxin. ³⁰ Attzen caˈba xjal mos̈ kˈuklcˈa ttziiˈ be. Tej cybintexin tzul Jesús, e jawxsen s̈‑inkexin:

―Taat, tiyˈjil David, kˈontza lastim keya―tz̈ikexin.

³¹ Kej xjal eteˈ tuya Jesús, oc ilente ke mos̈ tuˈn miˈn tzˈel cywiˈ. Pero mas el cys̈iˈnxin cywiˈxin, bix e xiˈ cykbaˈnxin juntl maj:

―¡Taat, tiyˈjil David, kˈontza lastim keya!―tz̈ikexin.

³² Tej toc tbiˈn Jesús ke mos̈, bix e weˈxin, bix e xiˈ tsmaˈnxin xjal tuˈn t‑xiˈ cyiiˈn ke mos̈ twitzxin, bix e xiˈ tkbaˈnxin cyexin:

―¿Ti cyaja tuˈn tbint wuˈna cyiˈja?―tz̈ixin.

³³ Bix aj cytzakˈbeˈnxin texin:

―Taat, kˈontza keya tuˈn kcyeˈyena―tz̈ikexin.

³⁴ Bix e jaw tlastim Jesús cyiˈjxin, bix oc tmocoˈnxin tbakˈ cywitzxin. Bix n‑ultl tnaabl tbakˈ cywitzxin, bix akˈ xeˈl lpekexin tiˈjxin.