Old/New Testament

11 Shimuchiwakan ken naja, ijkiunisan ken naja nimuchiwa ken ne Mawaltijtuk.

Takamet wan siwatket

² Yek ankichijtiwit, ika ankielnamikit muchi tay nupal, wan ankichiwat muchi ijkiunisan ken nimetzinhilwij.

³ Nikneki ma shikmatikan ka ne Mawaltijtuk kitekimaka muchi ne takamet; ne takat kitekimaka isiwaw; ne Teut kitekimaka ne Mawaltijtuk. ⁴ Su se takat kitajtani Teut o tanutza ipal Teut tzuntzaktuk, kichiwa se pal ishpinawa ne itzuntekun. ⁵ Su se siwat kitajtani Teut o tanutza ipal Teut wan te nemi tzuntzaktuk, kichiwa se pal ishpinawa ne itzuntekun ika kenha ken su yaja mushintuskia, ⁶ ika su te mutzuntzakwa se siwat, ma mutzunshima nusan. Su se siwat nemi pal ishpinawa su mutzunshima, ma mutzuntzakwa.

⁷ Te yek ma mutzuntzakwa se ukich ika yaja ne itachialis wan ne itzitzinakalis ne Teut. Ne siwat, yaja ne itzitzinakalis wey ne ishulejyu, ⁸ ika te kiski ukich itech siwat sute siwat itech ukich, ⁹ wan ika ne Teut te kiketzki se ukich ipanpa ne siwat, sute se siwat ipanpa ne ukich. ¹⁰ Yajika ne siwat nemi pal kipia tatuktilis ijpak ne itzuntekun ipanpa ne tanawatianimet. ¹¹ Melka uni, te kanaj siwat su te kanaj ukich, nian nemi se ukich su te nemi se siwat, tik ne Tajtzin, ¹² ika ijkiunisan ken ne siwat kiski itech ne ukich, ijkiuni nusan ne ukich nemi ipanpa ne siwat, wan muchi kistuk itech ne Teut.

¹³ Ijtik anmejemet tay anhinat? Nemi yek ma kinutza ne Teut se siwat ká te mutzuntzakwa? ¹⁴ Hasta ne naturalezaj metzinmachtia ka su se takat kipia weyak itzunkal, tesu yek, ¹⁵ wan su se siwat kipia weyak itzunkal, muchi inat ka yek ika yaja kipia ne itzunkal ken tzuntzakka. ¹⁶ Su muita se ka kineki tasuma, tejemet te tikchiwat ijkiuni ijtik tejemet nian tik ne isejsennemit ne Teut.