Old/New Testament

Sòlda women yo pase Jezi nan betiz

(Mak 15:16-20; Jan 19:2-3)

²⁷ Apre sa, sòlda yo mennen Jezi nan palè gouvènè a. Tout sòlda te reyini, epi yo mete Jezi nan mitan. ²⁸ Yo dezabiye l, epi yo mete yon tòj wouj vyolèt sou li. ²⁹ Yo trese yon kouwòn ak branch pikan met sou tèt li. Yo mete yon baton nan men dwat li. Apre sa yo met ajenou devan l, epi yo t ap rele “Viv wa Juif yo!” pou yo te ka pase l nan betiz. ³⁰ Yo krache sou li. Yo pran baton ki te nan men l lan yo frape l nan tèt. ³¹ Apre yo pase l nan betiz kont yo, yo retire rad la sou li, epi yo mete rad pa l sou li. Apre sa yo pati avè l pou yo al krisifye l.

Yo klouwe Jezi sou yon kwa

(Mak 15:21-32; Lik 23:26-43; Jan 19:17-19)

³² Pandan yo sou wout pou y al krisifye Jezi a, yo kontre ak Simon, moun Sirèn. Yo fòse l pote kwa Jezi a. ³³ Lè yo rive kote yo rele Gòlgota a (Gòlgota vle di: Plas zo tèt), ³⁴ yo ba l bwè yon melanj diven ak yon bagay anmè. Lè Jezi goute l, li refize bwè l.

³⁵ Yo krisifye l epi yo fè tiraj osò^[a] pou yo ka separe ata rad ki te sou li. ³⁶ Sòlda yo te ret chita veye l. ³⁷ Te gen yon pannkat nan tèt kwa Jezi ki te di pouki yo touye l. Men sa k te ekri ladan l: nonm sa a, se Jezi, wa Jwif yo.

³⁸ Yo te pwofite menm okazyon an pou yo krisifye de bandi, youn sou bò dwat Jezi, lòt la sou bò gòch li. ³⁹ Moun ki t ap fè ale vini nan wout la t ap joure Jezi, epi yo t ap souke tèt yo. ⁴⁰ Yo t ap di: “Ou ta pral kraze tanp lan epi nan twa jou ou ap rebati l la? Ebyen, kounye a sove tèt! Si ou se pitit Bondye vre se pou desann kwa a!”

⁴¹ Chèf prèt yo, pwofesè lalwa yo ak lòt lidè Jwif yo, t ap pase Jezi nan betiz menm jan ak lòt moun yo. Yo t ap di: ⁴² “Li sove lòt moun, epi l pa ka sove pwòp tèt pa l. Si l se wa Izrayèl vre se pou l desann kwa a. Lè sa n ap kwè nan li. ⁴³ Li mete konfyans li nan Bondye. Enben, si Bondye vle l, se pou l delivre l kounye a! Dayè li te di ak bouch li: Mwen se pitit Bondye.” ⁴⁴ Menm bandi yo ki te krisifye ak Jezi t ap pase l nan betiz tou.

Jezi mouri

(Mak 15:33-41; Lik 23:44-49; Jan 19:28-30)

⁴⁵ Sòti midi pou rive twazè, li te fè nwa nan tout peyi a. ⁴⁶ Vè twazè, Jezi pouse yon gwo kri: “Eli, Eli, lema sabaktani!”^[b] Sa vle di: “Bondye m, Bondye m, pou kisa ou abandone m?”

⁴⁷ Kèk nan moun ki te kanpe la te tande lè l fè kri a, epi yo di: “Men l ap rele Eli.”^[c]

⁴⁸ Youn pami yo kouri pran yon eponj, li tranpe l nan yon diven ki gen gou vinèg, epi l mete sou tèt yon gòl pou Jezi te ka bwè l. ⁴⁹ Men tout lòt moun yo t ap di: “Padon kò w la! Kite l pou nou wè si Eli ap vin delivre l.”

⁵⁰ Jezi fè yon lòt gwo kri ankò, epi li rann dènye souf li.