Old/New Testament
सोर समुद्रावरील व्यापाराचे मोठे केंद्र
27 मला पुन्हा परमेश्वराचे शब्द ऐकू आले. तो म्हणाला, 2 “मानवपुत्रा, सोरसाठी शोकगीत गा. 3 तिच्याबद्दल पुढील गोष्टी सांग
“‘सोर, तू समुद्रावरचे प्रवेशद्वार आहेस.
तू खूप राष्ट्रांची जणू व्यापारी आहेस.
समुद्रकाठाने तू पुष्कळ देशांत प्रवास करतेस.
प्रभू, माझा परमेश्वर, पुढील गोष्टी सांगतो.
4 सोर, तू स्वतःला इतकी सुंदर समजतेस,
की जणू काही सौंदर्यांची खाणच!
तुझ्या शहराच्या सीमेवर भूमध्य समुद्र आहे.
तुझ्या जहाजाप्रमाणे, तुझ्या कर्त्यांनी, तुला सौंदर्यांने परिपूर्ण केले आहे.
5 तुझ्या तक्तपोशीसाठी
त्यांनी सनीरच्या सरुंचा उपयोग केला.
तुझ्या डोलकाठीसाठी
त्यांनी लबानोनचे गंधसरु वापरले.
6 त्यांनी तुझी वल्ही बाशानमधील
अल्लोन वृक्षापासून बनविली.
त्यांनी तुझ्या डेकवरील खोली
कित्ती बेटावरच्या बावस लाकडाची बनविली
व ती हस्तिदंताने सजविली.
7 तुझ्या शिडासाठी
त्यांनी मिसरचे सुंदर वेलबुट्टीदार तागाचे कापड वापले.
ते शीड तुझे निशाण होते.
तुझ्या खोलीचे पडदे निळे जांभळे होते.
ते पडद्याचे कापड एलीशाहून आणलेले होते.
8 सीदोन व अर्वद येथील लोक तुझ्या नावा वल्हवीत असत.
सोर, तुझे सुज्ञ लोक तुझे नावाडी होते.
9 गबालची वडील व कुशाल माणसे
तुझ्या जहाजावर डांबराने भेगा बुजविण्यासाठी होते.
सर्व समुद्रावरची जहाजे व त्यांचे नावाडी व्यवसायासाठी
तुझ्याकडे येत आणि तुझ्याशी व्यापार करीत.
10 “‘पारसी, लूदी व पूटी लोक तुझ्या सैन्यात होते. तेच तुझे लढवय्ये वीर होते. आपली शिरस्त्राणे आणि ढाली तुझ्या तटबंदीवर टांगीत त्यांनी तुझ्या शहराला मान व वैभव प्राप्त करुन दिले. 11 अर्वाद येथील पहारेकरी तुझ्या वेशीवर पहारा करीत. गम्मादचे लोक बुरुजांवर असत. ते आपल्या ढाली तुझ्या तटावर टांगीत त्यांनी तुझे सौंदर्य पूर्णत्वाला नेले.
12 “‘तार्शीश तुझा सर्वांत उत्तम ग्राहक होता. तुझ्याकडील उत्तमोत्तम वस्तूंच्या मोबदल्यात तो चांदी, लोखंड, कथील व शिसे देत असे. 13 यावान, तुबाल आणि काळ्या समुद्राजवळचे लोक तुझ्याबरोबर व्यापार करीत. तुझ्याजवळील वस्तूंच्या मोबदल्यात ते गुलाम व कास्य देत. 14 तोगार्मा राष्ट्रातील [a] लोक तुझ्याबरोबर घोडे, स्वारीचे घोडे व खेचरे ह्यांचा व्यापार करीत. 15 ददानी लोकसुद्धा तुझ्याशी व्यापार करीत. तू पुष्कळ ठिकाणी तुझ्या वस्तू विकत होतीस. त्या बदल्यात लोक तुला हस्तिदंत व टेंबुरणीचे लाकूड देत. 16 तुझ्याजवळ पुष्कळ चांगल्या वस्तू असल्याने अरामने तुझ्याबरोबर व्यापार केला. ते तुझ्या मालाच्या मोबदल्यात पाचू. जांभळे कापड, सुंदर वीणकाम, तागाचे उत्तम कापड, पोवळे आणि माणके देत.
17 “‘यहूदा व इस्राएल ह्यांचाही तुझ्याबरोबर व्यापार होता. ते तुझ्या वस्तूंच्या मोबदल्यात गहू. आँलिव्ह, अंजिराचा पहिला बहर, मध, तेल आणि उपशामक औषध देत. 18 दिमिष्क तुझा चांगला ग्राहक होता. तुझ्याकडील उत्तम वस्तूंसाठी त्याने तुझ्याबरोबर व्यापार केला. तुझ्या मालाच्या मोबदल्यात तो तुला हेल्बोनचा द्राक्षरस व पांढरी लोकर देत. 19 दिमिष्क तुझ्याबरोबर उसालच्या द्राक्षरसाचा व्यापार करी. त्या मोबदल्यात ते पोलाद, एक प्रकारची दालचिनी, ऊस देत. 20 ददानचा तुझ्याबरोबर खोगीराच्या कापडाचा व रपेट करावयास लागणाऱ्या घोड्यांचा मोठा व्यापार होता. 21 अरबस्तानचा व केदारच्या सर्व नेत्यांचा तुझ्याबरोबर कोकरे, एडके आणि बोकड्यांचा मोठा व्यापार होता. 22 शबा व रामा येथील व्यापारी तुझ्याबरोबर उत्तम मसाले सर्व प्रकारचे जवाहीर आणि सोने यांचा व्यापार करीत. 23 हारान, कन्रे एदेन, शबा, अश्शूर व किल्मद 24 येथील व्यापारी उंची वस्त्रे, निळ्या रंगाची वीणकाम केलेली वस्त्रे, निळ्या रंगाची वीणकाम केलेली वस्त्रे, वेगवेगळ्या रंगाचे गालिचे, घट्ट विणीचे दोर व गंधसरुच्या लाकडापासून बनविलेल्या वस्तू ह्यांचा व्यापार करीत. 25 तार्शीशची जहाजे तुझा विकलेला माल नेत.
“‘सोर, तू त्या मालवाहू जहाजाप्रमाणे आहेस.
संपत्तीने भरलेल्या समुद्रावरील जहाजाप्रमाणे आहेस.
26 तुझ्या नविकांनी तुला खोल समुद्रात नेले.
पण पूर्वेचा जोरदार वारा तुझा समुद्रातील जहाजाचा नाश करील.
27 आणि तुझी सर्व संपत्ती समुद्रात सांडले.
तुझी संपत्ती, विकायचा व विकत घेतलेला माल सर्व समुद्रात पडेल.
तुझी सर्व माणसे, नावाडी, खलाशी आणि डांबराने भेगा बुजविणारे
कारागीर समुद्रात पडतील.
तुझ्या शहरातील सर्व व्यापारी
आणि सैनिक समुद्रात बुडतील.
तुझ्या नाशाच्या दिवशीच हे घडले.
28 “‘तू, तुझ्या व्यापाऱ्यांना दुरवरच्या ठिकाणी पाठवितेस
तुझ्या खलाशाचे रडणे ऐकून ती ठिकाणे भीतीने थरथर कापतील.
29 जहाजावरील सर्व कामगार नावाडी, खलाशी,
जहाजावरुन समुद्रात उड्या घेतील व पोहून किनाऱ्याला लागतील.
30 त्यांना तुझ्या स्थितीमुळे दु:ख वाटेल ते रडतील.
ते डोक्यांत माती टाकतील, व राखेत लोळतील.
31 ते तुझ्यासाठी डोक्यावरचे सर्व केस कापतील.
शोकप्रदर्शक कपडे घालतील.
मृतासाठी करतात तसे ते तुझ्यासाठी शोक करतील.
32 “‘ते तुझ्यासाठी रडतील आणि ओक्साबोक्सी रडताना तुझ्याबद्दलचे पुढील शोकगीत गातील:
“‘सोरसारखे कुणी नाही.
सोरचा भर समुद्रात नाश झाला.
33 तुझे व्यापारी समुद्रापर करुन गेले.
तुझ्या प्रचंड संपत्तीने आणि तुझ्या मालाने तू अनेकांना तुप्त केलेस.
तू पृथ्वीवरील राजांना श्रीमंत केलेस.
34 पण आता तू समुद्र
व त्याचे खोल पाणी यामुळे फुटलीस.
तुझा माल व माणसे समुद्रात पडली.
35 समुद्रकाठी राहणाऱ्या लोकांना तुझ्याबाबत
धक्का बसला.
त्यांचे राजे फारच घाबरले.
त्यांच्या चेहऱ्यावरुनच, त्यांना केवढा धक्का बसला आहे, ते कळते.
36 दुसऱ्या राष्ट्रांतील व्यापारी धक्का बसल्यामुळे
आपापासात कुजबुज करत आहेत.
तुझ्या बाबतीत जे काही घडले, त्यामुळे लोक भयभीत होतील.
का? कारण तुझा शेवट झाला.
तुझा शेवट झाला.’”
सोर स्वतःला देवाप्रमाणे समजते
28 मला परमेश्वराचा संदेश मिळाला तो म्हणाला, 2 “मानवपुत्रा, ‘परमेश्वर, माझा प्रभू, पुढील गोष्टी सांगतो, असे सोरच्या राजाला सांग:
“‘तू फार गर्विष्ठ आहेस.
तू म्हणतोस “मी देव आहे.
समुद्राच्या मध्यभागी मी
देवाच्या आसनावर बसतो.”
“‘पण तू मानव आहेस, देव नाही.
तुला आपण देव आहोत असे फक्त वाटते.
3 तू स्वतःला दानीएलापेक्षा बुद्धिमान समजतोस
तू सर्व रहस्ये शोधू शकतोस असे तुला वाटते.
4 तू तुझ्या शहाणपणाने व अकलेने स्वतःसाठी
संपत्ती गोळा केली आहेस.
तुझ्या खाजिन्यांत तू चांदी-सोने ठेवले आहेस.
5 तुझ्या शहाणपणाने आणि व्यापारामुळे
तुझी संपत्ती वाढली
आणि आता तुला त्यांचाच गर्व झाला आहे.
6 “‘म्हणून परमेश्वर, माझा प्रभू, पुढील गोष्टी सांगतो:
सोर, तू स्वतःला देवासारखी मसजतेस!
7 मी परक्यांना तुझ्याविरुद्ध लढण्यासाठी आणीन.
ते राष्ट्रांमध्ये सर्वांत भयंकर आहेत.
ते तलवारी उपसतील आणि
तुझ्या शहाणपणाने मिळविलेल्या सर्व सुंदर गोष्टींचा नाश करतील.
तुझे वैभव ते लयाला घालवितील.
8 ते तुला थडग्यात पोहोचवतील समुद्रात
मेलेल्या नावाड्याप्रमाणे तुझी स्थिती होईल.
9 माणूस तुला ठार मारेल.
तरी तू त्याला “मी देव आहे.”
असे म्हणशील का? नाही तो तुला ताब्यात घेईल.
मग तुला समजेल की तू मानव आहेस, देव नव्हे!
10 परका तुला परदेशीयांसारखे [b] वागवेल आणि ठार करील.
माझ्या आज्ञेमुळे ह्या गोष्टी घडतील.’”
परमेश्वर, माझा प्रभू, असे म्हणाला.
11 मला परमेश्वराचे शब्द ऐकू आले तो म्हणाला, 12 “मानवपुत्रा, सोरच्या राजाविषयीचे पुढील शोकगीत गा. त्याला सांग ‘परमेश्वर, माझा प्रभू, पुढील गोष्टी सांगतो
“‘तू एक आदर्श माणूस होतास.
तू ज्ञानी होतास.
तू अतिशय देखणा होतास.
13 तू एदेनमध्ये राहात होतास.
एदेन हा देवाचा बाग आहे.
तुझ्याजवळ माणके, पुष्कराज,
हिरे, लसणा, गोमेद, सूर्यंकांत मणी,
नीलमणी, वैदूर्य पाच अशी सर्व प्रकारची मोल्यवान रत्ने होती,
आणि ती सर्व सोन्याच्या कोंदणात बसविलेली होती.
ज्या दिवशी तुला निर्माण केले त्याच दिवशी तुला हे सौदंर्य देण्यात आले.
देवाने तुला सामर्थ्यशाली केले.
14 तू एक अभिषिक्त करुब होतास
तुझे पंख माझ्या सिंहासनावर पसरत.
मी तुला देवाच्या पवित्र पर्वतावर ठेवी.
तू रत्नांतून हिंडत होतास आणि अग्नीप्रमाणे तळपत होतास.
15 मी तुला निर्मिले, तेव्हा तू सज्जन व प्रामाणिक होतास.
पण नंतर तू दुष्ट झालास.
16 तुझ्या व्यापाराने तुला खूप संपत्ती मिळवून दिली खरी,
पण त्याने तुझ्यात क्रूरपणा निर्माण झाला, आणि तू पाप केलेस.
म्हणून मी तुला एखाद्या घाणेरड्या गोष्टीसारखी वागणूक दिली.
मी तुला देवाच्या पर्वतावरुन फेकून दिले.
तू एक खास अभिषिक्त करुब देवदूत होतास,
तुझे पंख माझ्या सिंहासनावर पसरत होते,
पण मी तुला, अग्नीप्रमाणे तेजस्वी असलेल्या
रत्नांपासून, सक्तीने दूर केले.
17 तुझ्या सौंदर्यांने तुला गर्विष्ठ बनविले.
तुझ्या वैभवाने तुझ्या ज्ञानाचा नाश केला.
म्हणून मी तुला खाली जमिनीवर लोटले.
आता इतर राजे तुझ्याकडे डोळे विस्फारुन पाहतात.
18 तू खूप चुका केल्यास
तू कपटी व्यापारी झालास आणि अशा तऱ्हेने,
तू पवित्र स्थान अपवित्र केलेस.
म्हणून मी तुझ्यातील आगीनेच
तुला जाळीन.
जमिनीवर तू राख होऊन पडशील.
आता सर्वजण तुझी लाजिरवाणी स्थिती पाहू शकतात.
19 “‘तुझी अशी स्थिती पाहून
इतर राष्ट्रांतील लोकांना धक्का बसला.
तुझ्या बाबतीत जे घडले, ते पाहून लोक भयभीत होतील.
तुझा शेवट झाला!’”
सीदोनसाठी संदेश
20 मला परमेश्वराचा संदेश मिळाला, तो म्हणाला, 21 “मानवपुंत्रा, सीदोनकडे पाहा व माझ्यावतीने तिच्याविरुद्ध असलेला संदेश तिला दे. 22 सांग, ‘परमेश्वर, माझा प्रभू, पुढील गोष्टी सांगतो.
“‘सीदोन, मी तुझ्याविरुद्ध आहे!
तुझे लोक माझा मान राखायला शिकतील.
मी सिदोनला शिक्षा करीन.
मग लोकांना कळेल की मीच परमेश्वर आहे, मी पवित्र आहे.
व ते त्याप्रमाणे माझ्याशी आचरण करतील.
23 मी सीदोनला रोगराई व मृत्यू पाठवीन.
शहराबाहेरील तलवार (शत्रूसैनिक) तो मृत्यू आणील.
मगच त्यांना कळून चुकेल की मी परमेश्वर आहे.’
राष्ट्रे इस्राएलची चेष्टा करण्याचे सोडून देतील
24 “‘इस्राएलच्या सभोवतालच्या देशांनी इस्राएलचा तिरस्कार केला. पण त्यांचे वाईट होईल. मग इस्राएलच्या लोकांना बोचणारे तीक्ष्ण सुरे वा काटेरी झुडुपे उरणार नाहीत, व त्यांना समजून येईल की मीच परमेश्वर, त्यांचा प्रभू आहे.’”
25 परमेश्वर, माझा प्रभू, पुढील गोष्टी सांगतो: “मी इस्राएलच्या लोकांना इतर राष्ट्रांत विखुरविले. पण मी पुन्हा त्यांना एकत्र आणीन मग त्या राष्ट्रांना मी पवित्र असल्याचे कळेल व ते माझ्याशी त्याप्रमाणे वागतील. त्या वेळी, माझा सेवक याकोब याला मी दिलेल्या भूमीवर इस्राएल लोक राहतील. 26 ते त्या भूमीवर सुरक्षितपणे राहतील. ते घरे बांधतील व द्राक्षमळे लावतील. त्यांचा तिरस्कार करणाऱ्या सभोवतालच्या राष्ट्रांना मी शिक्षा करीन. मग इस्राएलचे लोक निर्भयपणे राहतील व त्यांना पटेल की मीच त्यांचा परमेश्वर देव आहे.”
मिसरबाबत संदेश
29 परागंदा अवस्थेच्या दहाव्या वर्षाच्या, दहाव्या महिन्याच्या बाराव्या दिवशी मला परमेश्वराचा संदेश मिळाला. तो म्हणाला, 2 “मानवपुत्रा, मिसरचा राजा फारो याच्याकडे पाहा, माझ्यावतीने त्याच्याबद्दल व मिसरबद्दल बोल. 3 त्याला सांग ‘प्रभू, माझा परमेश्वर, म्हणतो:
“‘मिसरचा राजा, फारो, मी तुझ्याविरुद्ध आहे.
तू नाईल नदीकिनारी पडून राहणारा प्रचंड समुद्रातला राक्षस आहेस.
तू म्हणतोस, “ही माझी नदी आहे!
मी ही नदी निर्मिली”
4-5 “‘पण मी तुझ्या जबड्यात गळ अडकवीन.
नाईल नदीतील मासे तुझ्या खवल्यांना चिकटतील.
मी तुला आणि त्या माशांना नदीतून ओढून बाहेर काढीन
व जमिनीवर टाकीन.
तेथून तुम्हाला कोणी उचलणार नाही
वा पुरणार नाही.
मी तुम्हाला पक्षी व हिंस्र पशू यांच्या स्वाधीन करीन.
तुम्ही त्यांचे भक्ष्य व्हाल.
6 मगच मिसरमध्ये राहणाऱ्या सर्व लोकांना
कळून येईल की मीच परमेश्वर आहे.
“‘मी ह्या गोष्टी का करीन.?
कारण इस्राएलचे लोक मिसरवर अवलंबून होते.
पण मिसर म्हणजे गवताचे कमकुवत पाते होता.
7 इस्राएलचे लोक मिसरवर विसंबले.
पण मिसरने फक्त त्यांचे हात आणि खांदे विंधले.
ते तुझ्या आधारावर राहिले.
पण तू त्यांची पाठ मोडून पिरगळलीस.’”
8 म्हणून, परमेश्वर, माझा प्रभू म्हणतो,
“मी तुझ्याविरुद्ध तलवार आणीन.
मी तुझी सर्व माणसे व सर्व प्राणी नष्ट करीन.
9 मिसर ओसाड होईल. त्याचा नाश होईल.
मग त्यांना समजेल की मी देव आहे.”
देव म्हणाला, “मी असे का करीन.? कारण तू म्हणालास ‘नदी माझी आहे. मी तिला निर्माण केले.’ 10 म्हणून मी (देव) तुझ्याविरुद्ध आहे. मी नाईल नदीच्या पुष्कळ पाटांच्या विरुद्ध आहे. मी मिसरचा संपूर्ण नाश करीन. मिग्दोलपासून सवेनेपर्यंतच नव्हे, तर कुशाच्या सीमेपर्यंतची तुझी सर्व गावे मी ओस पाडीन. 11 कोणी मनुष्य वा प्राणी मिसरमधून जाणार नाही. 12 चाळीस वर्षे कोणीही तेथे राहणार नाही. मी मिसऱ्यांना इतर राष्ट्रांत विखरुन टाकीन. मी त्यांना परदेशात रोवीन.”
13 प्रभू, माझा परमेश्वर, म्हणतो, “मी मिसरच्या लोकांना पुष्कळ राष्ट्रांत विखरुन टाकीन. पण 40 वर्षानंतर मी त्यांना पुन्हा एकत्र करीन. 14 मिसरच्या कैद्यांना मी परत आणीन. मी त्यास त्यांच्या जन्मभूमीत पथ्रोस देशात परत आणीन. पण त्यांचे राज्य महत्वाचे राहणार नाही. 15 ते अगदी कमी महत्वाचे राज्य होईल. ते कधीच इतर राष्ट्रांपेक्षा वरचढ होणार नाही. मी त्याला एवढे लहान करीन की ते दुसऱ्या राष्ट्रांवर सत्ता गाजविणार नाही. 16 आणि इस्राएलचे लोक पुन्हा कधीही मिसरवर विसंबणार नाहीत. इस्राएल लोकांना त्यांचे पाप आठवेल. मदतीसाठी देवाकडे न जाता आपण मिसरकडे गेलो हे त्यांना आठवेल आणि त्यांना समजेल की मीच परमेश्वर, प्रभू, आहे.”
मिसर बाबेलला मिळेल
17 परागंदा अवस्थेच्या सत्ताविसाव्या वर्षाच्या, पहिल्या महिन्याच्या (एप्रिलच्या) पहिल्या दिवशी, मला परमेश्वराचा संदेश मिळाला. तो म्हणाला. 18 “मानवपुत्रा, बाबेलचा राजा नबुखद्नेस्सर याने आपल्या सैन्याला सोरविरुद्ध जोराची लढाई करायला लावली. त्यांनी प्रत्येक सैनिकाचा गोटा केला. ओझी उचलून त्यांच्या खांद्याची सालटी निघाली. नबुखद्नेस्सरने व त्याच्या सैन्याने सोरचा पराभव करण्यासाठी खूप कष्ट घेतले. पण ह्या कष्टाचे फळ त्यांना मिळाले नाही.” 19 म्हणून परमेश्वर, माझा प्रभू म्हणतो, “मिसरची भूमी मी बाबेलचा राजा नबुखद्नेस्सर यास देईन. तो मिसरच्या लोकांना घेऊन जाईल. मिसरमधील मौल्यवान वस्तूही तो घेईल. हा नबुखद्नेस्सरच्या सैन्याचा मोबदला असेल. 20 मिसरची भूमी मी नबुखद्नेस्सराला त्याच्या मेहनतीचे बक्षीस म्हणून दिली आहे. का? कारण त्यांनी हे काम माझ्यासाठी केले.” परमेश्वर, माझा प्रभू, असे म्हणाला.
21 “त्याच दिवशी, मी इस्राएलाच्या लोकांना सामर्थ्यवान करीन. मग तू त्यांच्याशी बोलू शकशील आणि त्यांचे लक्ष तुझ्याकडे जाईल. [c] त्यांना मीच परमेश्वर आहे.” हे कळेल.
पत्नी आणि पती
3 त्याचप्रमाणे, पत्नींनो, आपल्या पतींच्या अधीन असा. यासाठी की, त्यांच्यापैकी काहींनी जर देवाची आज्ञा पाळली नाही तर काही न बोलताही आपल्या सदवर्तनाने त्यांची मने जिंकता येतील. 2 जेव्हा ते तुमचे शुद्ध आणि आदरयुक्त वागणे पाहतील 3 तुमची सुंदरता बाह्यस्वरुपाची नसावी म्हणजे वेगवेगळ्या प्रकारे केस सुशोभित करण्याने, सोन्याचे दागिने वापरण्याने किंवा चांगले कपडे घातल्याने आलेली नसावी. 4 त्याऐवजी तुमची सुंदरता अंतःकरणाची, जी कधीही नाश पावत नाही, अशी असली पाहिजे ती सौम्य, शांत स्वभावाची असली पाहिजे जी देवाच्या दृष्टीने अतिमौल्यवान आहे.
5 पूर्वीच्या काळातील ज्या पवित्र स्त्रिया होऊन गेल्या, त्यांनी अशाच प्रकारे आपल्या सर्व आशा देवावर केन्द्रीत करुन आपली स्वतःची सुंदरता वाढीस लावली त्या स्त्रिया आपल्या पतींच्या अधीन असत. 6 साराने अब्राहामाची आज्ञा पाळली आणि अब्राहामाला आपला मालक मानले. जर तुम्ही चांगली कामे करता व कशाचीही भिति मनात बाळगत नाही तर तुम्ही तिच्या म्हणजे सारेच्या मुली आहात.
7 तसेच पतींनो, तुम्ही आपल्या पत्नींबरोबर समंजसपणाने राहा. त्या जरी अबला असल्या तरी त्या देवाच्या कृपेमध्ये तुमच्याबरोबरच वारस आहेत हे लक्षात घेऊन त्यांच्याविषयी आदर बाळगा, म्हणजे तुम्ही ज्या प्रार्थना देवाला सादर करता त्यात कसलीही बाधा येणार नाही.
चांगल्या कामासाठी दु:ख सोसणे
8 शेवटी सारांश हा की, तुम्ही सर्वजण एकमेकांशी विचार व भावना यांच्या ऐक्याने, सहानुभूतीने आपल्या भाऊबहिणींशी प्रेमाने, दयाळूपणे आणि नम्रतेने राहा. 9 वाइटाची परतफेड वाइटाने करु नका, किंवा अपमानाची फेड अपमानाने करु नका. उलट, त्या व्यक्तीसाठी देवाकडे आशीर्वाद मागा. कारण देवाने तुम्हाला हे करण्यासाठीच बोलाविले होते. यासाठी की, तुम्हाला देवाचा आशीर्वादाचा वारसा मिळावा. 10 पवित्र शास्त्र म्हणते,
“ज्याला जीवनाचा आनंद उपभोगायचा आहे,
व चांगले दिवस पहावयाचे आहेत,
त्याने आपली जीभ वाईट बोलण्यापासून आवरली पाहिजे,
आणि त्याने आपल्या ओठांनी खोट्या गोष्टी बोलू नयेत.
11 दुष्टतेपासून त्याने दूर व्हावे व चांगले ते करावे.
त्याने शांतीचा शोध करुन ती मिळविली पाहिजे
12 जे नीतिमान लोक आहेत त्यांच्यावर प्रभुची नजर असते
आणि त्यांच्या प्रार्थना तो कान देऊन ऐकतो
पण जे वाईट गोष्टी करतात त्यांच्याकडे प्रभु पाठ फिरवितो.” (A)
13 जे चांगले ते करण्यास तुम्ही उत्सुक असाल तर अशी कोण व्यक्ती आहे जी तुम्हाला इजा करण्याचा प्रयत्न करील? पण, 14 जे योग्य ते करुनसुद्धा जर तुम्हांला दु:ख सहन करावे लागते, तर तुम्ही धन्य आहात. म्हणून “त्या लोकांची भीति बाळगू नका किंवा गर्भगळित होऊ नका” [a] 15 पण आपल्या अंतःकरणात ख्रिस्त हा प्रभु आहे असा आदर बाळगा तुमच्यामध्ये जी आशा आहे, तिच्याविषयी तुम्हांला कोणी विचारले तर त्याचे समर्थन करण्यास सदैव तयार राहा. 16 पण हे सौम्यतेने व आदराने करा. ख्रिस्तामध्ये जगत असताना तुमच्या चांगल्या वागणुकीवर जे आरोप करतात त्यांना लाज वाटेल, अशा रीतीने तुम्ही आपली विवेकबुद्धी शुद्ध राखा.
17 कारण चांगले काम करुनदेखील आपण दु:ख सोसावे अशी जर देवाची इच्छा असेल तर वाईट करुन दु:ख भोगण्यापेक्षा ते अधिक चांगले.
18 ख्रिस्तदेखील आपल्या पापांसाठी
एकदाच मरण पावला.
एक नीतिमान दुसऱ्या
अनीतिमानांसाठी मरण पावला.
यासाठी की, तुम्हाला देवाकडे जाता यावे.
त्याच्या आत्म्यासंबंधी म्हटले
तर त्याला पुन्हा जीवन दिले गेले.
19 आत्मिक रुपाने देखील ख्रिस्त बंदिवासात असलेल्या आत्म्यांकडे गेला व सुवार्ता सांगितली. 20 फार पूर्वी नोहाच्या काळात जेव्हा जहाज बांधले जात होते आणि देव धीराने वाट पाहत होता, त्यावेळी ज्यांनी देवाची आज्ञा पाळली नाही, तेच हे आत्मे होत. फक्त थोडकेच म्हणजे आठ लोकच जहाजात गेले व त्यांचा पाण्यापासून बचाव झाला. 21 ते पाणी आत्मा चिन्हात्मकरीत्या बाप्तिस्म्याचे ज्यामुळे आता तुमचे तारण होते त्याचे प्रतीक आहे. बाप्तिस्मा म्हणजे शरीरावरील धूळ काढणे नव्हे, तर तो देवाकडे शुद्ध विवेक मिळावा म्हणून केलेला करार आहे. हे सर्व येशू ख्रिस्ताच्या मरणातून पुन्हा उठण्यामुळे घडू शकले. 22 तो स्वर्गात गेलेला आहे आणि देवाच्या उजव्या हाताशी बसला आहे. देवदूत, अधिकार आणि सामर्थ्य हे सर्व त्याच्या अधीन आहेत.
2006 by World Bible Translation Center