Old/New Testament
परमेश्वर निर्माता आणि चिरंजीव आहे
41 परमेश्वर म्हणतो,
“दूरवरच्या देशांनो, शांत व्हा आणि माझ्याकडे या.
राष्ट्रांनो, शूर व्हा,
येऊन माझ्याशी बोला.
आपण एकत्र जमून कोणाचे
बरोबर आहे ते ठरवू.
2 माझ्या पुढील प्रश्नांना उत्तरे द्या:पूर्वेकडून येणाऱ्या माणसाला कोणी उठविले?
चांगुलपणा त्याच्याबरोबर आहे.
तो त्याच्या तलवारीच्या जोरावर राष्ट्रांना पराभूत करतो मग त्यांची जणू माती होते.
तो तीर सोडतो आणि राजांना जिंकतो.
वाऱ्याने गवताची काठी उडावी तसे ते दूर पळतात.
3 तो सैन्याचा पाठलाग करतो पण त्याला कधीच ईजा होत नाही
पूर्वी कधीही न गेलेल्या ठिकाणी तो जातो.
4 ह्या गोष्टी कोणी घडवून आणल्या? हे कोणी केले?
सुरवातीपासून लोकांना कोणी बोलाविले?
मी, परमेश्वराने, या गोष्टी केल्या आरंभापासून
मी म्हणजे परमेश्वर आहे, आरंभापूर्वीही मी येथे होतो
आणि सर्व संपल्यावर मीच येथे असेन.
5 अती दूरच्या सर्व स्थळांनो,
पाहा आणि भिऊन असा!
पृथ्वीवरच्या दूरवरच्या सर्व ठिकाणांनो,
भीतीने थरथर कापा! इकडे
या आणि माझे ऐका.”
आणि ते आले.
6 “कामगार एकमेकांना मदत करतात. ते बळकटी येण्यासाठी एकमेकांना उत्तेजन देतात. 7 एकजण मूर्ती करण्यासाठी लाकूड कापतो. तो सोन्याचे काम करणाऱ्याला उत्तेजन देतो. दुसरा हातोडीने धातू मऊ करतो. तो ऐरणी वर घाव घालणाऱ्याला उत्तर देतो हा शेवटचा कामगार म्हणतो, ‘हे काम चांगले झाले. सोने आता निघून येणार नाही.’ नंतर तो खिळ्याने मूर्ती पायावर पक्की बसवितो. मग मूर्ती खाली पडू शकत नाही आणि ती कधीही सरकत नाही.”
फक्त परमेश्वरच आपले रक्षण करू शकतो
8 परमेश्वर म्हणतो, “इस्राएल, तू माझा सेवक आहेस.
याकोब, मी तुझी निवड केली.
तू अब्राहामच्या वंशातील आहेस. आणि अब्राहामवर प्रेम केले.
9 पृथ्वीवर खूप लांब,
दूरच्या देशात होतास,
पण मी तुला बोलाविले
व सांगितले, ‘तू माझा सेवक आहेस.’
मी तुझी निवड केली
आणि मी कधीच तुझ्याविरूध्द् गेलो नाही.
10 काळजी करू नकोस मी तुझ्याबरोबर आहे,
घाबरू नकोस, मी तुझा देव आहे.
मी तुला मदत करीन.
मी माझ्या चांगुलपणाच्या
उजव्या हाताने तुला आधार देईन.
11 बघ! काही लोक तुझ्यावर रागावले आहेत.
पण ते लज्जित होतील.
तुझे शत्रू नाहीसे होतील व कायमचे निघून जातील.
12 तू तुझ्याविरूध्द् असणाऱ्या लोकांना शोधशील
पण ते तुला सापडू शकणार नाहीत.
ते संपूर्णपणे नाहीसे होतील.
13 मी परमेश्वर तुझा देव आहे,
मी तुझा उजवा हात धरतो आहे,
मी तुला सांगतो:
‘घाबरू नकोस मी तुला मदत करीन.’
14 बहुमोल यहुदा, घाबरू नकोस.
इस्राएलमधील माझ्या लाडक्या लोकांनो, भिऊ नका.
मी खरोखरच तुम्हाला मदत करीन.”
परमेश्वराने स्वतःच ह्या गोष्टी सांगितल्या.
“जो तुम्हाला वाचवितो तोच
इस्राएलचा पवित्र देव हे बोलला.
15 मी तुम्हाला कोऱ्या मळणीयंत्राप्रमाणे केले आहे.
त्या यंत्राला खूप तीक्ष्ण दाते आहेत.
शेतकरी त्याचा उपयोग टरफलांपासून धान्य वेगळे करण्याकरिता करतात.
त्याचप्रमाणे तुम्ही डोंगर पायाखाली तुडवून चिरडून टाकाल.
तुम्ही टेकडयांची अवस्था धान्याच्या भुसकटाप्रमाणे कराल.
16 तुम्ही त्या फेकून द्याल
आणि वाऱ्याबरोबर वाहत जाऊन त्या सगळीकडे विखुरल्या जातील.
नंतर तुम्ही परमेश्वराबद्दल आनंद मानाल.
तुम्हाला इस्राएलच्या पवित्र (देवाबद्दल) अभिमान वाटेल.
17 “गरीब आणि गरजू पाण्याचा शोध घेतात.
पण त्यांना पाणी मिळू शकत नाही. ते तहानेलेले आहेत.
त्यांच्या तोंडाला कोरड पडली आहे.
मी त्यांनी केलेली आळवणी ऐकेन.
मी इस्राएलचा देव, त्यांना वाऱ्यावर सोडणार नाही.
18 वैराण टेकड्यांवर मी नद्या वाहायला लावीन
आणि दऱ्यांतून झऱ्याचे पाणी वाहायला लावीन.
मी वाळवंटाचे रूपांतर पाण्याने भरलेल्या सरोवरात करीन.
त्या शुष्क भूमीवर पाण्याचे झरे वाहतील.
19 वाळवंटात गंधसरू, बाभूळ, ऑलिव्ह (तेल) सरू, देवदारू
आणि भद्रदारू हे वृक्ष वाढतील.
20 लोक हे सर्व पाहतील
आणि परमेश्वराच्या सामर्थ्यामुळेच
हे सर्व झाले आहे हे त्यांना कळेल.
हे सर्व घडवून आणणारा एकमेव पवित्र (देव) आहे
हे लोकांना, हे सर्व पाहिल्यावर कळेल.”
परमेश्वराचे खोट्या देवांना आवाहन
21 परमेश्वर, याकोबाचा राजा म्हणतो, “या आणि तुमचे काय मुद्दे आहेत ते मला सांगा तुमचे त्याबद्दलचे पुरावे मला दाखवा आणि मग आपण काय बरोबर आहे ते ठरवू. 22 तुमच्या मूर्तीनी (खोट्या देवांनी) यावे व काय घडत आहे ते सांगावे. सुरवातीला काय झाले? भविष्यात काय घडणार आहे? ते आम्हाला सांगा. आम्ही लक्षपूर्वक ऐकू. मग नंतर काय घडणार आहे ते आम्हाला कळेल. 23 काय घडेल हे समजण्यासाठी कोणत्या गोष्टी आम्ही पाहाव्या ते आम्हाला सांगा. मग आमचा तुमच्यावर खरोखरचे देव म्हणून विश्वास बसेल. काहीतरी चांगले किंवा वाईट करा म्हणजे आम्हाला तुम्ही प्रत्यक्षात आहात, जिवंत आहात हे दिसेल व आम्ही तुम्हाला अनुसरू.
24 “बघा! तुम्ही शून्य किंमतीचे आहात तुम्ही काहीच करू शकत नाही फक्त कवडी किंमतीची माणसेच तुमची पूजा करू इच्छितात.”
परमेश्वर, स्वतःच खरा परमेश्वर आहे, हे सिध्द् करतो
25 “मी उत्तरेकडील एका माणसाला [a] उठविले
तो उगवत्या सूर्याच्या दिशेकडून म्हणजे पूर्वेकडून येत आहे.
तो माझी उपासना करतो.
कुंभार ज्याप्रमाणे चिखल तुडवितो, त्याप्रमाणे तो विशिष्ट माणूस राजांना तुडवेल.
26 “हे सर्व घडण्यापूर्वी आम्हाला कोणी सांगितले?
त्याला आम्ही देव म्हणावे, तुमच्या कोणत्या मूर्तीने हे सांगितले का?
नाही. त्या मूर्तीपैकी कोणीही आम्हाला काहीही सांगितले नाही.
त्या मूर्ती एक शब्दसुध्दा् बोलत नाहीत.
आणि आपण बोललेले ते खोटे देव ऐकू शकत नाहीत.
27 सियोनला ह्या गोष्टीबद्दल सांगणारा पहिला मी म्हणजेच परमेश्वर आहे.
मी यरूशलेमला दूताबरोबर संदेश पाठविला.
‘पाहा! तुझे लोक परत येत आहेत.’
28 मी त्या खोट्या देवांना पाहिले.
काहीही सांगण्याइतके
ते शहाणे नाहीत.
मी त्यांना प्रश्न विचारले,
पण त्यांनी एकही शब्द उच्चारला नाही.
29 ते सगळे देव कवडीमोलाचे आहेत.
ते काही करू शकत नाहीत.
त्या मूर्ती शून्य किंमतीच्या आहेत.
परमेश्वराचा खास सेवक
42 “माझ्या सेवकाकडे पाहा.
मी त्याला आधार देतो.
मी ज्याला निवडले आहे असा तो एक आहे
आणि मी त्याच्यावर खूष आहे.
मी माझा आत्मा त्याच्यात घालतो.
तो न्यायमार्गाने राष्ट्रांना न्याय देईल.
2 तो रस्त्यात आवाज चढवणार नाही.
तो रडणार अथवा किंचाळणार नाही.
3 तो सभ्य असेल तो पिचलेला बांबूसुध्दा् मोडणार नाही.
मिणमिणणारी वातसुध्दा् तो विझविणार नाही.
तो प्रामाणिकपणाने न्याय देईल आणि सत्य शोधून काढेल.
4 जगाला न्याय प्रस्थापित करीपर्यंत तो दुर्बळ होणार नाही
वा चिरडला जाणार नाही.
दूरदूरच्या ठिकाणचे लोक त्याच्या शिकवणुकीवर विश्वास ठेवतील.”
परमेश्वर जगाचा अधिपती व निर्माता आहे
5 परमेश्वराने, खऱ्या देवाने या गोष्टी सांगितल्या: (परमेश्वराने आकाश निर्माण केले. परमेश्वराने ते जगावर पसरले. पृथ्वीवरील प्रत्येक गोष्ट त्यानेच निर्माण केली. पृथ्वीवरील सर्व लोकात त्याने प्राण घातला, चालणाऱ्या प्रत्येक माणसात चैतन्य घातले.)
6 “मी, परमेश्वराने, तुला योग्य गोष्टी करण्यासाठी बोलाविले आहे.
मी तुझा हात धरीन आणि तुझे रक्षण करीन.
मी लोकांबरोबर केलेल्या कराराची तू खूण असशील.
सर्वांना प्रकाश देणाऱ्या दिव्यासारखा तू असशील.
7 आंधळ्यांचे डोळे तू उघडशील आणि ते पाहू शकतील.
खूप लोक तुरंगात आहेत, त्यांना तू मुक्त करशील.
खूप लोक अंधारात राहतात, त्यातून तू त्यांना बाहेर काढशील.
8 “मी परमेश्वर आहे
माझे नाव यहोवा,
मी माझे गौरव दुसऱ्यांना देणार नाही.
माझ्याकरिता असलेली स्तुती मी मूर्तीच्या (खोट्या देवांच्या) वाट्याला येऊ देणार नाही.
9 काही गोष्टी घडतील असे मी सुरवातीलाच सांगितले होते
त्या गोष्टी घडल्या
आणि आता काही गोष्टी घडायच्या पूर्वीच मी त्याबद्दल सांगत आहे
आणि भविष्यात तसेच घडेल.”
देवाचे स्तुतिस्तोत्र
10 परमेश्वरासाठी नवीन स्तोत्र गा.
दूरवरच्या देशांतील सर्व लोकांनो,
समुद्रावरून सफर करणाऱ्या सर्वांनो,
समुद्रातील सर्व प्राण्यांनो,
दूरच्या ठिकाणी राहणाऱ्या लोकांनो, परमेश्वराची स्तुती करा.
11 वाळवंटांनो, नगरांनो, केदार मधील शेतांनो,
परमेश्वराचे स्तुतिस्तोत्र गा.
सेलातील लोकांनो, आनंदाने गा.
तुमच्या उंच डोंगरकड्यावरून गा.
12 परमेश्वराचे गौरव करा.
दूरवरच्या देशातील लोकांनो, त्याची स्तुती करा.
13 परमेश्वर शूर सैनिकाप्रमाणे बाहेर जाईल लढण्यास सज्ज असलेल्या माणसाप्रमाणे तो असेल.
तो खूप उत्तेजित होईल.
तो आरोळी ठोकेल आणि मोठ्याने ओरडेल.
तो त्याच्या शत्रूंचा पराभव करील.
देव खूप संयमी आहे
14 “बराच वेळ मी काही बोललो नाही.
मी संयम ठेवला आणि गप्प राहिलो.
पण आता प्रसूतिवेदना होणाऱ्या स्त्रीसारखा मी मोठ्याने ओरडेन.
मी खूप जोराने व मोठ्याने श्वासोच्छवास करीन.
15 मी टेकड्या आणि पर्वत नष्ट करीन.
तेथे वाढणारी सर्व झाडेझुडपे मी सुकवून टाकीन.
मी नद्यांच्या जागी कोरडी जमीन निर्माण करीन.
तळी आटवीन.
16 आंधळ्यांना कधीही माहीत नसलेल्या मार्गाने मी घेऊन जाईन.
पूर्वी कधीही ते गेले नव्हते अशा स्थळी मी त्यांना नेईन.
मी त्यांच्यासाठी अंधार प्रकाशात बदलीन.
खडबडीत जमीन गुळगुळीत करीन.
मी कबूल केलेल्या गोष्टी करीन.
मी माझ्या लोकांचा त्याग करणार नाही.
17 पण काही लोकांनी मला अनुसरायचे थांबविले आहे,
त्यांच्याजवळ सोन्याने मढविलेल्या मूर्ती आहेत.
ते त्यांना म्हणतात, ‘तुम्हीच आमचे देव आहात.’
ते त्या खोट्या देवांवर विश्वास ठेवतात,
पण त्या लोकांची निराशा होईल.
देवाचे म्हणणे ऐकण्यास इस्राएलचा नकार
18 “तुम्ही बहिऱ्यांनी माझे म्हणणे ऐकावे.
आंधळ्यांनी नजर उचलून मला पाहावे.
19 ह्या सर्व जगात, सर्वात आंधळा माझा सेवक आहे.
मी ज्याला जगात पाठवितो तो माझा दूत सर्वात बहिरा आहे.
माझा स्वतःचा माणूस परमेश्वराचा सेवक सर्वांत अधिक आंधळा आहे.
20 माझ्या सेवकाने काय करायला हवे ते त्याला दिसते
पण ते माझी आज्ञा पाळत नाही.
तो कानाने ऐकू शकतो
पण माझे म्हणणे ऐकण्यायचे तो नाकारतो.”
21 सेवकाने चांगले व्हावे व परमेश्वराच्या अद्भुत शिकवणुकीचा
परमेश्वराच्या प्रामाणिकपणाखातर आदर करावा असे परमेश्वराला वाटते.
22 पण लोकांकडे पाहा.
दुसऱ्यांनी त्यांना पराभूत करून लुटले आहे.
सर्व तरूण घाबरले आहेत.
ते तुरूंगात बंद केले गेले आहेत.
दुसऱ्या लोकांनी त्यांच्याकडून पैसा काढून घेतला आहे.
त्यांना वाचविणारा कोणीही नाही.
दुसऱ्यांनी त्यांचा पैसा घेतला
आणि “तो परत दे” असे म्हणायला तेथे कोणीही नव्हते.
23 तुमच्यातील कोणी देवाचे म्हणणे ऐकले आहे का? नाही. पण तुम्ही ते लक्षपूर्वक ऐकावे व काय घडले आहे त्याचा विचार करावा. 24 याकोबाची व इस्राएलची संपत्ती लुटायला कोणी लावली? परमेश्वरानेच त्यांना तसे करण्याची परवानगी दिली. आपण परमेश्वराच्या विरूध्द् वागून पाप केले आहे. म्हणून परमेश्वराने लोकांना आपली संपत्ती लुटू दिली. इस्राएलमधील लोकांना परमेश्वराच्या इच्छेप्रमाणे जगायचे नव्हते. त्यांनी परमेश्वराची शिकवण ऐकली नाही. 25 म्हणून परमेश्वर त्यांच्यावर रागावला. देवाने त्यांच्याविरूध्द् मोठी युध्दे् घडवून आणली. इस्राएलच्या लोकांभोवती जणू आग भडकावी तसे हे होते. पण काय घडत आहे त्यांना कळले नाही. ते जणू जळत होते पण काय होत होते ते समजावून घेण्याचा त्यांनी प्रयत्न केला नाही.
1 पौल, सिल्वान आणि तीमथ्य यांच्या द्वारे देव जो पिता त्यामध्ये तसेच प्रभु येशू ख्रिस्तामध्ये दृढ असलेल्या थेस्सलनीकाच्या मंडळीस,
देवाची कृपा व शांति लाभो.
थेस्सलनीकाकरांचा विश्वास आणि जीवन
2 आम्ही नेहमीच प्रार्थनामध्ये तुमची आठवण करुन तुम्ही सर्वांसाठी देवाचे आभार मानतो. 3 आम्ही आमचा देव व पित्यासमोर तुमचे विश्वासाचे कार्य, तुम्ही प्रेमाने केलेले श्रम, आणि आपल्या प्रभु येशू ख्रिस्तावरील दृढ आशेने सोशिकपणे धरलेला धीर याची सतत आठवण करतो.
4 माझ्या बंधूनो, देवाने प्रीतित केलेली तुमची निवड ही आम्हाला माहीत आहे. 5 कारण आमची सुवार्ता तुमच्याकडे केवळ शब्दांनी आली नाही तर पवित्र आत्म्याने व पूर्ण खात्रीने आली हे तुम्हांला माहीत आहे, आम्ही तुमच्यामध्ये कसे राहिलो तुम्हांला माहीत आहे. ते तुमच्या फायद्यासाठी होते. 6 आणि तुम्ही आमचे व प्रभूचे अनुकरण करणारे झाला, पवित्र आत्म्याकडून मिळणाऱ्या आनंदात तुम्ही मोठ्या कष्टाने संदेश स्वीकारलात.
7 त्याचा परिणाम म्हणजे तुम्ही सर्व विश्वासणाऱ्यासाठी जे मासेदोनियात व अखियात होते त्यांच्यासाठी आदर्श असे झालात 8 कारण तुमच्याकडून गाजविण्यात आलेला संदेश केवळ मासेदिनिया आणि अखियातच ऐकला गेला असे नाही तर तुमचा देवावरील विश्वास सगळीकडे माहीत झाला आहे. म्हणून आम्हांला काही सांगण्याची गरज नाही. 9 कारण ते स्वतःच आमच्याविषयी सांगत आहेत म्हणजे कशा प्रकारे तुम्ही आमचे स्वागत केले तसेच तुम्ही मूर्तिपासून देवाकडे कसे वळलात व खऱ्या आणि जिवंत देवाची सेवा करण्यासाठी कसे वळलात. 10 आणि आता ज्याला देवाने मेलेल्यांतून उठविले त्या त्याच्या स्वर्गातून येणाऱ्या पुत्राची तुम्ही वाट पाहत आहात. तोच येशू देवाच्या येणाऱ्या क्रोधापासून आपले रक्षण करतो.
2006 by World Bible Translation Center