Old/New Testament
1 सुलैमान क स्रेस्ठ गीत।
सस्प्रेमिका क आपन प्रेमी क खातिर
2 ओकरे ओंठन क चुम्बनन स मोका ढाँपि लेइ द्या।
तोहार पिरेम दाखरस स भी मीठा अहइ।
3 तोहार इत्र क सुगन्ध मोहक अहइ,
मुला तोहार नाउँ मोरे बरे मूल्यवान इत्र स भी जियादा मोहक अहइ!
इहइ कारण अहइ कि कुँवरियन तोहसे पिरेम करत हीं!
4 हे मोर राजा, तू मोका आपन संग लइ ल्या।
हाली चला!
राजा मोका आपन कमरा मँ लइ आवा ह।
मनसेधू क बरे यरूसलेम क मेहररूअन
हम तोहमाँ आनन्दित अउ मगन अही।
हम मानत अही कि तोहार पिरेम दाखरस स उत्तिम अहइ।
अच्छा कारण क बरे कुँवरियन तोहसे पिरेम करत हीं।
मेहरारु क बचन मेहररुअन बरे
5 हे यरूसलेम क बिटियो,
मइँ करिया हउँ, मुला मइँ सुन्नर हउँ। मइँ केदार क तम्बुअन जइसा अउ सलमोन[a] क तम्बूअन क पर्दा जइसे करिया हउँ।
6 किन्तु मोका करिया मँ सामिल जिन करा।
इ सूरज अहइ जउन मोका करिया कइ दिहस ह।
मोर भइयन एकर कारण अहइँ।
उ मोका आपन अंगूरे क बगीचन क रखवारी करइ बरे मज़बूर किहेन ह।
एह बरे मइँ आपन क धियान नाहीं रखि सकेउँ।
मेहरारू क बचन मनसेधू क बरे
7 मइँ तोहका आपन पूरी आतिमा स पिरेम करत हउँ।
मोर सच्चा पिरेमी, मोका बतावा कि तू आपन भेड़िन क कहाँ चरावत अहा?
दुपहरिया मँ ओनका आराम करइ बरे कहाँ बइठावत अहा?
मोका अइसी एक ठु लड़िकी क लगे काहे होइ चाही
जउन घूँघट डारिके तोहरे मीतन क झुण्डन क रखवारी करत ह।
मनसेधू क बचन मेहरारू बरे
8 हे मेहररुअन सबन त सुन्नरी,
अगर तू नाहीं जानत ह मइँ कहाँ होब,
तउ भेड़ियन क पथ पाछा करा।
तोहार बोकरियन क बच्चन क गड़रियन क तम्बुअन क लगे चरा।
9 हे मोर प्रिय मइँ तोहार तुलना उ घोड़ी स करत हउँ
जउन घो़ड़िन फिरौन क रथ क हींचइवाल घोड़न क आकर्सित करत ह।
10 मइँ तोहार कल्पना चाँदी अउर रतन स सज़ा भवा घोड़ा स कइ सकत हउँ।
तोहार गाल खूबसूरत आभूसण अउर कर्नफूल स भवा अहइ।
तोहार गर्दन पइ माला बहोत सुन्नर लगत अहइँ।
11 जउन सोना अउर चाँदी क पत्तर लागत ह
खास तोहरे बरे बना अहइँ।
मेहरारू क बचन
12 जब राजा गद्दी पइ लेटत अहइ,
मोरे इत्र क सुगन्ध ओह तलक पहोंचत ह।
13 मोर प्रियतम रस गन्ध क कुप्पे जइसा अहइ।
उ मोरे सीते क बीच सारी रात सोइ।
14 मोर प्रिय मोरे बरे मेंहदी क फूलन क गुच्छन जइसा अहइ
जउन एनगदी क अंगूरे क बगीचे मँ फलत ह।
मनसेधू क बचन
15 मोर प्रिये, तू रमणीय अहा।
ओह, तू केतनी सुन्नर अहा।
तोहार आँखिन कबूतरन क जइसी सुन्नर अहइँ।
मेहरारू क बचन
16 हे मोर प्रियतम, तू केतना सुन्नर अहा।
हाँ, तू केतना मनमोहक अहा।
हमार बिछाउन केतना ताज़ा अउर आनन्दित महक प्रदान करत हीं।
17 हमार घरे क छत देवदारू क पउधन स बना अहइँ।
अउर देवारन सनोवर पउधन स बना अहइँ।
2 मइँ सारोन क केसर क पाटल जइसा हउँ।
मइँ घाटियन क कोका बेली हउँ।
मनसेधू क बचन
2 हे मोर प्रिये, दूसर जुवतियन तुलना मँ
तू वइसी ही अहा माना काँटन क झारी क बीच लिली अहा।
मेहरारू क बचन
3 मोर प्रिय, दूसर नउजवानन क बीच तू अइसे लागत अहा
जइसे जंगले क बृच्छन मँ कउनो सेब क पेड़।
मेहरारू क बचन मेहररूअन बरे
मोका आपन प्रियतम क छाया मँ बइठब नीक लागत ह;
ओकर फल मोका खाइ मँ बहोत मीठ लागत ह।
4 मोर प्रिय मोका मधुसाला मँ लइ आवा
अउर मोका आपन पिरेम क बारे मँ एक झण्डा क नाईं लहराइके स्पस्ट किह्या।
5 मइँ पिरेम क रोगी हउँ एह बरे किसमिस स मोका मज़बूत बनावा
अउर मीठा सेबन स मोका ताजा करा।
6 ओकरे बाँया हाथ मोर मुड़ि क पिआर स छुअत हीं,
अउर ओकर दाहिन हाथ सरीर क पिआर स छुअत हीं।
7 यरूसलेम क कुँवरियन कुरंगन अउ जंगली हिरनियन क साच्छी मानिके मोका बचन द्या,
पिरेम क जिन जगावा
अउ उसकावा जब तलक एकर इच्छा न होइ![b]
मेहरारू क बचन
8 मइँ आपन प्रियतम क अवाज अनकत हउँ।
इ पहाड़न स उछरत भइ
अउर पहाड़ियन स कूदत भइ आवत ह।
9 मोर प्रियतम कुरंग या जवान हरिन जइसा सुन्नर अहइ।
लखा, उ हमरी देवारे क पीछे खड़ा अहइ,
खिरकी स लखत अहइ, पर्दा क छेद स झाँकत अहइ।
10 मोर प्रियतम मोसे बोलत ह:
“हे मोर प्रिये, उठा, हे मोर सुन्नरी,
आवा कहूँ चली।
11 लखा, सीत-रितु बीत गइ अहइ।
बर्खा खतम होइ गइ अउ चली गइ अहइ।
12 धरती पइ फूल खिले भए अहइँ।
चिरइयन क गावइ क समइ आइ ग अहइ।
धरती पइ कबूतरे क अवाज गूँजत अहइ।
13 अंजीर क बृच्छन पइ अंजीर, पकइ लागेन हँ।
अंगूरे क बेल फूलत अहइँ अउर ओनकर भीती गन्ध फइलत अहइ।
मोर प्रिय उठा, हे मोर सुन्नर,
आवा कहूँ दूर चली।”
मनसेधू क बचन
14 हे मोर कबूतर, जउन ऊँच चट्टानन क सबइ गुफा मँ अउर पहाड़न मँ लुकान अहा,
मोका आपन मुँह देखावा
मोका आपन आवाज सुनावा काहेकि तोहार आवाज मीठ
अउ तोहार मुँह सुन्नर अहइ।
मेहरारू क बचन मेहररूअन बरे
15 जउन नान्ह लोखरियन दाख क बगियन क बिगाड़त ही
हमरे बरे ओनका धरा।
हमार अंगूर क बगियन अब फूलत अहइँ।
16 मोर प्रिय मोर अहइ
अउर मइँ ओकर हउँ।
मोर प्रिय आपन भेड़ी बोकरियन क
कोकाबेलियन क बीच चरावत ह,
17 हे प्रियतम, कुरंग स या जवान हरिन स रहा,
जब तलक दिन नाहीं ढल जात ह
अउर छाया लम्बी अउर खतम नाहीं होइ जात ह
पहाड़न पइ चला।
मेहरारू क बचन
3 हर राति आपन सेज पइ मइँ
आपन मने मँ ओका हेरत हउँ।
जउन मनसेधू मोर प्रिय अहइ,
मइँ ओका हेरेउँ ह, मुला मइँ ओका नाहीं पाएउँ।
2 अब मइँ उठब।
मइँ सहर क चारिहुँ गलियन, बजारन मँ जाब।
मइँ ओका हेरब जेका
मइँ पिरेम करत हउँ।
मइँ उ मनसेधू हेरेउँ
उ मोका नाहीं मिला।
3 मोका सहर क पहरेदारी मिलेन।
मइँ ओनसे पूछेउँ, “का तू उ मनसेधू क लख्या जेका मइँ पियार करत हउँ?”
4 पहरेदारन स मइँ अबहिं तनिक दूर गएउँ
कि मोका मोर प्रियतम मिलि गवा।
मइँ ओका धइ लिहेउँ।
मइँ ओका जाइ क अनुमति नाहीं दिहा
अउर मइँ ओका आपन मताहरी क घरे लइ आवा,
मइँ ओका उ कमरा मँ लइ आवा जहाँ पइ उ मोका जनम दिहे रहा।
मेहरारू क बचन मेहररूअन बरे
5 हे यरूसलेम क कुँवरियन,
कुरंगन अउ जंगली हिरणियन क साच्छी मानिके मोका बचन द्या,
पिरेम क जिन जगावा अउ उसकावा
जब तलक एकर इच्छा न होइ।
यरूसलेम क मेहररुअन बोलेस:
6 इ मेहरारु कउन अहइ
जउन धूल क बादर क संग रेगिस्तान स होत भए आवत हीं,
अउर गन्धरस अउर लोबान अउ उ सबइ तरह क खुसबू
जउन व्यपारियन रखत ह स सुगन्धित अहइ?
7 सुलैमान क पालकी क लखा।
ओन जात्र क पालकी क साठ फउजी घेरे भए अहइँ। इस्राएल क सक्तीसाली फउजी।
8 उ पचे सबहिं फउजी तरवारन स सुन्नर ढंग स सज्जित अहइँ।
जउन जुद्ध मँ निपुण अहइँ;
हर मनई क बगल मँ तरवार लटकत अहइ,
जउन राति क खउफनाक खतरन बरे तइयार अहइँ।
9 राजा सुलैमान लोगन स एक ठु पालकी
लेबानोन क देवदारू काठे स बनावाए रहा।
10 उ जात्रा क पालकी क बल्लन क चाँदी स बनाएस
अउर ओकर टेक सोना स बनावा गवा।
पालकी क गद्दी क उ बैंगनी ओढ़ना स ढाँपि दिहस
अउर इ यरूसलेम क बिटियन क जरिये पिरेम स बुना गवा रहा।
11 सिय्योन क बिटियो,
बाहेर आइके राजा सुलैमान क ओकरे मुकुट क साथ लखा
जउन ओका ओकर महतारी उ दिन पहिराए रही
जब उ बियाहा गवा रहा,
उ दिन उ बहोत खुस रहा।
पौलुस क प्रेरितन क मान्यता
2 चौदह साल बाद मइँ फिन स यरूसलेम गएऊँ बरनाबास मोरे साथे रहा अउर तीतुस क मइँ अपने साथे लइ लिहे रहेउँ। 2 मइँ परमेस्सर क दर्सन क कारण उहाँ गवा रहेउँ। मइँ गैर यहूदियन क बीच सुसमाचार क उपदेस देत रहत हउँ, उहइ सुसमाचार क आपन निजी सभा क बीच कलीसिया क मुखियन क सुनाएउँ। मइँ उहाँ ऍह बरे गए रहेउँ कि परमेस्सर खुद मोका दर्साये रहा कि मोका उहाँ जाइ चाही। ताकि जउन काम मइँ पिछले दिनन किहे रहेउँ, या जेका मइँ करत हउँ, उ बेकार न चला जाइ।
3 परिनाम सरूप तीतुस तक क, जउन हमरे साथे रहा, जद्यपि उ यूनानी अहइ फिन ओका खतना करावइ बरे विवस नाहीं कीन्ह गवा रहा। 4 मुला ओन झूठे भाइयन क कारण जउन लुके छिपा हमरे बीच गुप्तचर क रूप मँ मसीह ईसू मँ हमार स्वतन्त्रता क पता लगावइ बरे घुस आइ रहेन कि हमका दास बनाइ सकइँ, इ बात उठी। 5 मुला हम ओनकइ गुलामी मँ एक छन बरे घुटना नाहीं टेका ताकि उ सच जउन सुसमाचार मँ निवास करत ह, तोहरे भित्तर बना रहइ।
6 मुला जाना-माना सम्मानित लोगन स मोका कछू नाहीं मिला। उ कइसनेउ भी रहेन, मोका अइसेन कउनउ अन्तर नाहीं पड़त। बिना कउनउ भेद भाऊ क सबन मनई परमेस्सर क सामने एक जइसेन अहइँ। मुला ओन सम्मानित लोगन स मोका या मोरे सुसमाचार मँ कछू जोड़ावाइ गवा कउनउ लाभ नाहीं भवा। 7 मुला एन मुखियन देखेन कि परमेस्सर मोका वइसे ही एक विसेस काम सौंपे अहइ जइसे पतरस क परमेस्सर यहूदियन क सुसमाचार सुनावइ क काम दिहे रहा। मुला परमेस्सर गैर यहूदियन क सुसमाचार सुनावइ क काम मोका दिहे रहा। 8 परमेस्सर पतरस क एक प्रेरित क रूप मँ काम करइ क सक्ती दिहे रहा। पतरस गैर यहूदियन क बरे एक प्रेरित बा। परमेस्सर मोका भी एक प्रेरित क रूप मँ काम करइ क सक्ती दिहे बाटइ। मुला मइँ ओन मनइयन क प्रेरित अहउँ जउन यहूदी नाहीं अहइँ। 9 इही तरह उ पचे मोह पइ परमेस्सर क ओह अनुग्रह क समझ लिहेन अउर कलिसिया क स्तम्भ समछइ जाइ वाला याकूब, पतरस अउर यूहन्ना बरनाबस अउर मोसे साझेदारी क चिन्ह क रूप मँ हाथे मिलाए रहा। अउर उ पचे सहमत होइ गएन कि हम विधर्मियन क बीच उपदेस देत रही अउर उ सबइ यहूदियन क बीच। 10 ओ सबइ हमसे बस ऍतनई कहेन कि हम ओनके गरीबन क धियान रखी। अउर मइँ इही कामँ क न केवल करइ चाहत रहेउँ बल्कि एकरे बरे लालयित रहेउँ।
पौलुस क दिस्टि मँ पतरस अनुचित
11 मुला जब पतरस अन्ताकिया आवा तब मइँ खुलकेओकर विरोध किहेउँ काहेकि उ ठीक नाहीं रहा। 12 काहेकि याकूब द्वारा भेजा गवा कछू लोगन क इहाँ पहुँचे स पहिले उ गैर यहूदियन क साथे खात पियत रहा। मुला उन लोगन क आवइ क बाद उ गैर यहुदियन स अलग कइ लिहेस। उ ओन्हेन क डर स अइसेन किहेस जउन चाहत रहेन कि गैर यहूदियन क खतना होइ चाही। 13 दूसरे यहूदियन पतरस क इ देखावा मँ साथ दिहेन। इहाँ तक कि इ देखॉवइ क कारण बरनाबस तक भटक गवा। 14 मइँ जब इ देखेउँ कि सुसमाचार मँ छिपा हुआ सच क अनुसार उ पचे सीधे रस्ता पर नाहीं चलत रहेन तब सबक सामने पतरस स कहेन, “जब तू यहूदी होइ क भी गैर यहूदियन क जिन्नगी जिअत अहा। तउ गैर यहूदियन क यहूदियन क रीति पर चलइ क बरे विवस कइसे कइ सकत ह?”
15 हम तउ जनम स यहूदी अही। अउर हमार पापी गैर यहूदीयन स कउनउ सम्बन्ध नाहीं बा। 16 तबऊ हम इ जानित ह कि कउनो मनई क व्यवस्था क बिसय क पालन करइ क कारण नाहीं बल्कि ईसू मसीह मँ बिसवास क कारण नेक ठहरावा जात ह। मइँ इही बरे मसीह ईसू क बिसवास धारण किहे हई, ताकि इ बिसवासे क कारण हम नेक ठहरावा जाइ, न कि व्यवस्था क पालइ क कारण। काहेकि ओका पालई स तउ केऊ मनई धर्मी नाहीं होत।
17 मुला अगर हम जउन ईसू मसीह मँ अपने स्थित क कारण धर्मी ठहरावा जाइ चाहित ह। हमहूँ बिधर्मीयन क समान पापी पावा जाइ तउ एकर मतलब का इ नाहीं ना कि मसीह पापे क बढ़ावा देत ह। निस्चय ही नाहीं। 18 अगर जेकर तियाग मइँ कइ चुका हउँ उ व्यवसथा क फिन स उपदेस देइ लागउँ, तब तउ मइँ आज्ञा क उल्लंघन करइवाला अपराधी बन जाब। 19 काहेकि व्यवस्था क विधान स मइँ मर गएउँ ह ताकि परमेस्सर क बरे मइँ फिन स जी जाउँ मसीह क साथे मोका क्रूस पर चढ़ाइ दिहा गवा।
20 इही स अब आगे मइँ जिन्दा नाहीं अहउँ। मुला मसीह मोहमाँ जिन्दा अहइ। तउन एह सरीर मँ अब मइँ जउन जिन्नगी जिअत हउँ, उ हमार जिन्नगी नाहीं अहइ, उ तउ बिसवासे पइ टिका बा। परमेस्सर क ओह पूत (ईसू) बरे बिसवासे पर जउन मोसे पिरेम करत ह। अउर जे अपने आप क मोरे बरे अर्पित कइ दिहेस। 21 मइँ परमेस्सर क अनुग्रह क नाहीं नकारित ह, मुला अगर धार्मिक व्यवस्था क कारण परमेस्सर स नाता जोडाइ पाउत तउ मसीह बेकारइ आपन जान काहे देत।
Awadhi Bible: Easy-to-Read Version. Copyright © 2005 Bible League International.