Old/New Testament

² यहोवा तोहार राज्ज क अधिकार सिय्योन स स्थापित करी।
    तू आपन दुस्मनन पइ सासन करी।
³ तोहरे पराक्रम क दिन
    तोहरी प्रजा क लोग स्वेछा बलि बनिहीं।
तोहार जवान पवित्तर होइ स
    सुसोभित भिन्सारे क गर्भ स जन्मी ओसे क नाई तोहरे लगे अहइँ।

⁴ यहोवा एक वचन दिहस,
    अउर उ आपन मन नाहीं बदली।
“तू हमेसा बरे याजक अहा,
    जइसा मेल्कीसेदेक क समूह क याजक रहा।”

⁵ मोर सुआमी, तोहार मदद बरे तोहार निचके खड़ा रहत ह।
    ओकरे गुस्सा दिखावइ क दिन उ दूसर राजा लोगन क हराइ दिहे रहा।
⁶ परमेस्सर रास्ट्रन क निआउ करी।
    परमेस्सर उ महान धरती प नेता लोगन क हराइ दिहस।
    ओनकर मरी देहन स धरती भरि गइ रही।

⁷ राहे क झरना स पानी पिए क पाछे ही
    राजा आपन मूँड़ि उठाई अउर फुरइ बलवान होइ।

¹ यहोवा क गुण गावा।

यहोवा क आपन सम्पूर्ण मने स अइसी उ सभा मँ धन्यवाद करत हउँ
    जहाँ सज्जन मिला करत हीं।
² यहोवा महान करम करत ह।
    लोगन जउन ओन चिजियन क महत्व जानत हीं ओनका खोजत हीं।
³ यहोवा फुरइ इ महिमामय अउर अचरजे स भरा काम करत हीं।
    ओकरा खरापन सदा-सदा बना रहत ह।
⁴ परमेस्सर अद्भुत करम करत ह ताकि हम याद राखी
    कि यहोवा करुणा स भरा अउर दाया स भरा बाटइ।
⁵ उ आपन भगतन क भोजन देत ह।
    उ हमेसा आपन करार क याद राखत ह।
⁶ उ आपन लोगन क ओन भुइँया देइके
    जउन दूसर रास्ट्रन अहइ महान कारज देखाएस ह।
⁷ परमेस्सर जउन कछू करत ह उ बिस्सास योग्य अउर फुरइ बाटइ।
    ओकर सबहिं आग्यन नियावपूर्वक अहइँ।
⁸ परमेस्सर क आग्यन सदा ही बना रइहीं।
    परमेस्सर क ओन आदेसन क देइ क प्रयोजन फुरइ अउ निस्पच्छ रहेन।
⁹ उ आपन लोगन क मुक्त करत ह।
    उ ओनसे एक करार किहेस ह जउन सदा-सदा रहइ।
    परमेस्सर क नाउँ अचरजे स भरा अउर पवित्तर अहइ।
¹⁰ विवेक भय अउर यहोवा क आदर स उपजत ह।
    उ पचे लोग बुद्धिमान होत हीं जउन यहोवा क आदर करत हीं।
    यहोवा क स्तुति सदा-सदा गाई जात रही।

¹ यहोवा क बड़कई करा।

अइसा मनई जउन यहोवा स डेरात ह अउर ओकर आदर करत ह उ बहोत सफल होइ।
    परमेस्सर क आदेस अइसे लोग क भावत हीं।
² धरती पइ अइसे मनई क संतानन मज़बूत होइहीं।
    अच्छे मनई क संतानन आसीर्बाद पाइहीं।
³ अइसे मनई क परिवार बहोत धनवान होइ।
    ओकर नीक करम सदा सदा बनी रही।
⁴ सच्चे लोगन बरे परमेस्सर अइसा होत ह जइसे अँधियारा मँ चमकत प्रकास होइ।
    उ सच्चा अहइ, अउर करुणा स भरा बाटइ अउर दाया स भरा बा।
⁵ इ मनई बरे नीक बाटइ कि उ दयालु अउर उदार होइ।
    मनई क इ उत्तिम अहइ कि उ आपन वादा मँ खरा रहइ।
⁶ अइसा मनई क पतन कबहुँ नाहीं होइ।
    एक सच्चा मनई क सदा याद कीन्ह जाइ।
⁷ सज्जन व्यक्ति बुरी खबरन स नाहीं डेरात।
    अइसा मनई यहोवा क भरोसे अहइ अउर आस्वस्त रहत ह।
⁸ अइसा मनई आस्वस्त रहत ह उ ससान नाहीं रहत।
    उ आपन दुस्मनन क हराइ देइ।
⁹ अइसा मनई दीन जनन क मुक्त दान देत ह।
    ओकर नीक करम जेका उ दीन लोगन बरे दिखावत ह उ सदा सदा बना रइहीं।
    उ बहोत सम्मानित कीन्ह जाइ।
¹⁰ कुटिल लोग ओका लखिहीं अउर कुपित होइहीं।
    उ पचे किरोध मँ आपन दाँतन क पिसिहीं अउर फुन लुप्त होइ जइहीं।
    दुट्ठ लोग ओका कबहुँ नाहीं पइहीं जेका उ सब स जियादा पावइ चाहत हीं।