Old/New Testament

⁴ त्यांतले काही वाळवंटात फिरले.
    ते राहण्यासाठी जागा शोधत होते पण त्यांना शहर सापडले नाही.
⁵ ते खूप भुकेले आणि तान्हेले होते
    आणि अशक्त होत होते.
⁶ नंतर त्यांनी परमेश्वराला मदतीसाठी हाक मारली
    आणि त्याने त्यांना त्यांच्या संकटातून वाचवले.
⁷ देव त्यांना सरळ जेथे त्यांना राहायचे होते त्या शहरात घेऊन गेला.
⁸ परमेश्वराला त्याच्या प्रेमाबद्दल आणि
    तो ज्या अद्भुत गोष्टी लोकांसाठी करतो त्याबद्दल धन्यवाद द्या.
⁹ देव तान्हेल्या आत्म्याचे समाधान करतो.
    देव भुकेल्या आत्म्याला चांगल्या वस्तूंनी भरतो.

¹⁰ देवाची काही माणसे कैदी होती
    आणि काळ्याकुटृ तुरुंगात गजांच्या आडबंद होती.
¹¹ का? कारण ते देवाने सांगितलेल्या गोष्टीं विरुध्द भांडले.
    त्यांनी परात्पर देवाचा उपदेश ऐकायला नकार दिला.
¹² त्या लोकांनी केलेल्या गोष्टींबद्दल देवाने त्यांचे आयुष्य कठीण केले.
    ते अडखळले आणि पडले.
    त्यांना मदत करायला तेथे कुणीही नव्हते.
¹³ ते लोक संकटात होते म्हणून त्यांनी परमेश्वराला मदतीसाठी हाक मारली
    आणि त्याने त्यांना त्यांच्या संकटापासून वाचवले.
¹⁴ देवाने त्यांना त्यांच्या अंधार कोठडीतूनबाहेर काढले,
    ज्या दोराने त्यांना बांधले होते तो दोर देवाने तोडला.
¹⁵ त्याच्या प्रेमाबद्दल आणि तो लोकांसाठी
    ज्याअद्भुत गोष्टी करतो त्याबद्दल परमेश्वराला धन्यवाद द्या.
¹⁶ देव आपल्याला आपल्या शत्रूंचा पराभव करायला मदत करतो.
    देव त्यांचे तांब्याचे दरवाजे मोडू शकतो.
    देव त्यांच्या दरवाज्यावरचे लोखंडीगज तोडू शकतो.

¹⁷ पापयुक्त जीवन पध्दतीमुळे काही लोक मूर्ख बनतात.
    आणि अपराधी भावनेमुळे त्यांना पीडा होते.
¹⁸ त्या लोकांनी खायचे नाकारले
    आणि ते जवळ जवळ मेले.
¹⁹ ते संकटात होते म्हणून त्यांनी परमेश्वराला मदतीसाठी हाक मारली.
    आणि त्याने त्यांना संकटातून वाचवले.
²⁰ देवाने आज्ञा केली आणि
    त्यांना बरे केले, म्हणून ते लोक थडग्यात जाण्यापासून बचावले.
²¹ परमेश्वराला त्याच्या प्रेमाबद्दल व तो लोकांसाठी
    करत असलेल्या अद्भुत गोष्टींबद्दल धन्यवाद द्या.
²² परमेश्वराने जे काही केले त्याबद्दल त्याला धन्यवाद म्हणून बळी अर्पण करा.
    परमेश्वराने केलेल्या गोष्टी आनंदाने सांगा.

²³ काही लोक बोटीतून समुद्रापार जातात.
    त्यांचे व्यवसाय त्यांना महासागरापार घेऊन गेले.
²⁴ त्या लोकांनी परमेश्वर काय करु शकतो ते पाहिले.
    त्याने समुद्रावर ज्या अद्भुत गोष्टी केल्या त्या त्यांनी पाहिल्या.
²⁵ देवाने आज्ञा केली आणि जोराचा वारा वाहायला लागला,
    लाटा उंच उंच जायला लागल्या.
²⁶ लाटांनी त्यांना खूप उंच आकाशापर्यंत उंच नेले
    आणि खोल समुद्रात खाली टाकले.
वादळ इतके भयंकर होते की लोकांचे धैर्य नाहीसे झाले.
²⁷ ते अडखळत होते आणि प्यायलेल्या माणसासारखे पडत होते.
    खलाशी म्हणून असलेले त्यांचे कसब निरुपयोगी होते.
²⁸ ते संकटात सापडले म्हणून त्यांनी परमेश्वराला मदतीसाठी हाक मारली
    आणि त्याने त्यांना संकटापासून वाचवले.
²⁹ देवाने वादळ थांबवले. त्याने लाटांना शांत केले.
³⁰ समुद्र शांत झाला म्हणून खलाशी आनंदित झाले.
    देवाने त्यांना सुरक्षितपणे त्यांच्या इच्छित स्थळी आणून पोहोचवले.
³¹ परमेश्वराला त्याच्या प्रेमाबद्दल
    आणि तो लोकांसाठी करीत असलेल्या अद्भुत गोष्टींबद्दल धन्यवाद द्या.
³² देवाची मोठ्या सभेत स्तुती करा.
    वयोवृध्द प्रमुख एकत्र येतात तेव्हा त्याची स्तुती करा.

³³ देवाने नदीचे वाळवंटात रुपांतर केले.
    देवाने झऱ्यांचे वाहाणे बंद केले.
³⁴ देवाने सुपीक जमिनीचे क्षारयुक्त ओसाड जमिनीत रुपांतर केले.
    का? कारण त्या ठिकाणी वाईट लोक राहात होते.
³⁵ देवाने वाळवंटाचे पाण्याची तळी असलेल्या जमिनीत रुपांतर केले.
    देवाने कोरड्या जमिनीतून पाण्याचे झरे वाहायला लावले.
³⁶ देवाने भुकेल्या लोकांना चांगल्या प्रदेशातून नेले
    आणि त्यांनी तिथे राहाण्यासाठी शहर वसवले.
³⁷ त्या लोकांनी त्यांच्या शेतात बी पेरले त्यांनी त्यांच्या शेतात द्राक्षं पेरली
    आणि त्यांना चांगले उत्पन्न आले.
³⁸ देवाने त्या लोकांना आशीर्वाद दिला.
    त्यांचे कुटुंब वाढले.
    त्यांच्या जवळ खूप जनावरे होती.
³⁹ अरिष्टे आणि संकटे यांमुळे त्यांची कुटुंब लहान
    आणि अशक्त राहिली.
⁴⁰ देवाने त्यांच्या प्रमुखाला लज्जित केले
    आणि ओशाळवाणे वाटायला लावले
आणि त्याला खाली पाहायला लावले.
    देवाने त्यांना रस्ते नसलेल्या वाळवंटातून हिंडायला लावले.
⁴¹ पण नंतर देवाने त्या गरीब लोकांची संकटातून मुक्तता केली
    आणि आता त्यांची कुटुंब मेंढ्यांच्या कळपासारखी मोठी आहेत.
⁴² चांगले लोक हे बघतात आणि आनंदी होतात.
    पण दुष्ट लोक ते बघतात आणि काय बोलावे ते त्यांना सुचत नाही.
⁴³ जर एखादा माणूस शहाणा असला तर त्याला या गोष्टी आठवतील
    नंतर त्याला देवाचे प्रेम म्हणजे खरोखर काय ते कळून येईल.

⁷ देव त्याच्या मंदिरात बोलला,
    “मी युध्द जिंकेन आणि विजयाबद्दल आनंदी होईन.
मी ही जमीन माझ्या माणसांत वाटून टाकीन.
    मी त्यांना शखेम आणि सुक्कोथाचे खोरे देईन.
⁸ गिलाद आणि मनश्शे माझी असतील.
    एफ्राईम माझे शिरस्त्राण असेल.
    यहुदा माझा राजदंड असेल.
⁹ मावब माझे पाय धुण्याचे पात्र असेल.
    अदोम माझी पादत्राणे नेणारा सेवक असेल.
    मी पलिष्ट्यांचा पराभव करीन आणि विजयाबद्दल हर्षनाद करीन.”

¹⁰ मला शत्रूच्या किल्ल्यात कोण नेईल?
    मला अदोमशी लढायला कोण नेईल?
¹¹ देवा, फक्त तूच मला या गोष्टी करायला मदत करु शकतोस.
    पण तू आम्हाला सोडून गेलास.
    तू आमच्या सैन्याबरोबर गेला नाहीस.
¹² देवा, आम्हाला आमच्या शत्रूंचा पराभव करायला मदत कर.
    लोक आम्हांला मदत करु शकत नाहीत.
¹³ फक्त देवच आम्हाला बलवान करु शकतो.
    देव आमच्या शत्रूंचा पराभव करु शकतो.

⁶ “माझ्या शत्रूंनी वाईट गोष्टी केल्या त्याबद्दल त्यांना शिक्षा कर.
    ते चुकले आहेत हे सिध्द करण्यासाठी एखादा माणूस शोध.
⁷ माझा शत्रू चुकला आणि तो अपराधी आहे हे न्यायाधीशांना ठरवू दे.
    माझा शत्रू जे काही बोलतो त्यामुळे त्याची परिस्थिती अधिकच बिघडते.
⁸ माझ्या शत्रूला लवकर मरु दे.
    त्याचा व्यवसाय दुसऱ्या माणसाला मिळू दे.
⁹ माझ्या शत्रूच्या मुलांना अनाथ
    आणि त्याच्या बायकोला विधवा कर.
¹⁰ त्यांना त्यांचे घर गमावू दे
    आणि त्यांना भिकारी होऊ दे.
¹¹ माझ्या शत्रूंच्या धनकोंना त्याच्याकडचे सगळे घेऊ दे
    आणि परक्यांना त्याच्या सर्व श्रमांचे फळ घेऊ दे.
¹² माझ्या शत्रूंशी कुणीही दयाळू असू नये असे मला वाटते.
    त्याच्या मुलांना कुणी दया दाखवू नये असे मला वाटते.
¹³ माझ्या शत्रूचा संपूर्ण नाश कर.
    पुढच्या पिढीला त्याचे नाव सर्व गोष्टीवरुन काढून टाकू दे.
¹⁴ परमेश्वराला माझ्या शत्रूच्या वडिलांच्या पापांची आठवण करुन दिली जाईल असे मला वाटते,
    त्याच्या आईची पापे कधीही पुसली जाऊ नयेत असे मला वाटते.
¹⁵ परमेश्वराला त्या पापांची सदैव आठवण राहील अशी मी आशा करतो.
    आणि तो लोकांवर माझ्या शत्रूला पूर्णपणे विसरुन जायची शक्ती देईल अशी मी आशा करतो.
¹⁶ का? कारण त्या दुष्ट माणसाने कधीही काहीही चांगले केले नाही,
    त्याने कधीच कुणावर प्रेम केले नाही.
    त्याने गरीब, असहाय्य लोकांचे आयुष्य कष्टी केले.
¹⁷ त्या दुष्ट माणसाला दुसऱ्या लोकांचे वाईट कर
    असे सांगायला आवडायचे म्हणून त्या वाईट गोष्टी त्या माणसालाच होऊ दे.
तो दुष्ट माणूस लोकांचे भले होवो
    असे कधीही म्हणाला नाही, म्हणून त्याचेही भले होऊ देऊ नकोस.
¹⁸ शाप हेच त्याचे कपडे असू दे.
शाप हेच त्याचे पिण्याचे पाणी असू दे.
    शाप हेच त्याच्या शरीरावरचे तेल असू दे.
¹⁹ शाप त्या दुष्ट माणसांच्या शरीराभोवती गुंडाळण्याचे वस्त्र असू दे,
    आणि शापच त्यांच्या कमरे भोवतीचा पट्टा असू दे.”

²⁰ परमेश्वर या सगळ्या गोष्टी माझ्या शत्रूंच्या बाबतीत करील अशी मी आशा करतो.
    जे लोक मला ठार मारायचा प्रयत्न करीत आहेत,
    त्या सर्वांना परमेश्वर या गोष्टी करेल अशी मी आशा करतो.
²¹ परमेश्वरा, तू माझा प्रभु आहेस म्हणून
    तुझ्या नावाला गौरव प्राप्त होईल अशा रीतीने मला वागव.
माझ्यावर तुझे खूप प्रेम आहे म्हणून मला वाचव.
²² मी फक्त एक गरीब, असहाय्य माणूस आहे.
    मी खरोखरच दुखी: आहे आणि माझे ह्रदयविदीर्ण झाले आहे.
²³ दिवसाच्या शेवटी येणाऱ्या लांब सावल्यांप्रमाणे माझे आयुष्य संपले आहे असे मला वाटते.
    कुणीतरी झटकून टाकलेल्या किड्याप्राणे मी आहे असे मला वाटते.
²⁴ मी भुकेला असल्यामुळे माझ्या गुडघ्यातली शक्ती क्षीण झाली आहे.
    माझे वजन घटते आहे आणि मी बारीक होत आहे.
²⁵ वाईट लोक माझा अपमान करतात.
    ते माझ्याकडे बघतात आणि त्यांच्या माना हलवतात.
²⁶ परमेश्वरा, देवा, मला मदत कर.
    तुझे खरे प्रेम दाखव आणि माझा उध्दार कर.
²⁷ नंतर त्या लोकांना तू मला मदत केल्याचे कळेल.
    तुझ्या शक्तीनेच मला मदत केली हे त्यांना कळेल.
²⁸ ते वाईट लोक मला शाप देतात.
    परंतु परमेश्वरा, तू मला आशीर्वाद देऊ शकतोस.
    त्यांनी माझ्यावर हल्ला केला म्हणून त्यांचा पराभव कर नंतर मी, तुझा सेवक आनंदी होईन.
²⁹ माझ्या शत्रूंना लाज आण.
    त्यांना त्यांची लाजच अंगरख्या प्रमाणे घालायला लाव.
³⁰ मी परमेश्वराला धन्यवाद दिले.
    खूप लोकांसमोर मी त्याची स्तुती केली.
³¹ का? कारण परमेश्वर असहाय्य लोकांच्या मदतीसाठी उभा राहातो
    जे लोक त्यांना ठार मारायची शिक्षा देतात त्यांच्यापासून देव त्यांना वाचवतो.