Old/New Testament

63 देवा, तू माझा देव आहेस
    आणि तू मला खूप हवा आहेस.
माझा आत्मा आणि माझे शरीर तुझ्यासाठी शुष्क,
    बरड आणि पाणी विरहित जमिनी प्रमाणे तहाननेले आहे.
² होय, मी तुला तुझ्या मंदिरात पाहिले.
    मी तुझी शक्ती आणि तुझे गौरव पाहिले.
³ तुझे प्रेम आयुष्यापेक्षा चांगले आहे.
    माझे ओठ तुझी स्तुती करतात.
⁴ होय, मी जीवनात तुझी स्तुती करीन
    तुझ्या नावासाठी मी माझे बाहू प्रार्थनेत उभारीन.
⁵ चांगले अन्न खाल्ल्याप्रमाणे मी तृप्त होईन,
    आणि माझे तोंड तुझी स्तुती करील.
⁶ अंथरुणावर झोपल्यावर मला तुझी आठवण येईल,
    मध्यरात्री मी तुझी आठवण काढेन.
⁷ तू मला खरोखरच मदत केली आहेस.
    तू माझे रक्षण केलेस म्हणून मी आनंदी आहे.
⁸ माझा आत्मा तुला धरुन ठेवतो
    आणि तू माझा हात धरतोस.

64 देवा, माझे ऐक, माझ्या शत्रूंनी मला घाबरविले आहे.
    त्यांच्यापासून मला वाचव.
² माझे माझ्या शत्रूंच्या गुप्त योजनांपासून रक्षण कर.
    त्या दुष्ट लोकांपासून मला लपव.
³ त्यांनी माझ्याबद्दल अगदी वाईट खोटं सांगितलं आहे.
    त्यांच्या जिभा धारदार तलवारी सारख्या आहेत.
    त्यांचे कटू शब्द बाणाप्रमाणे आहेत.
⁴ ते लपून बसतात आणि त्यांचे बाण एका साध्याभोळ्या
    आणि प्रामाणिक माणसावर फेकतात.
⁵ वाईट करण्यासाठी ते एकमेकांना प्रोत्साहन देतात व सापळे रचण्याबाबत चर्चा करतात.
    “आपले सापळे कोणीही बघणार नाही” असे ते एकमेकांना सांगतात.
⁶ लोक अतिशय कुटिल असू शकतात.
    लोक काय विचार करतात ते कळणे अवघड आहे.
⁷ परंतु देवदेखील त्याचे “बाण” मारु शकतो
    आणि त्यांना काही कळण्या आधीच वाईट लोक जखमी होतात.
⁸ वाईट लोक इतर लोकांना त्रासदायक गोष्टी करण्याच्या योजना आखतात.
    परंतु देव त्यांच्या योजना निष्फळ बनवतो
आणि त्या त्रासदायक गोष्टी त्यांच्याच वाट्याला येतील असे करतो.
    आणि नंतर जो कोणी त्यांना पाहातो तो मस्तक विस्मयाने हलवतो.
⁹ देवाने काय केले ते लोक पाहातील.
    ते इतरांना देवाबद्दल सांगतील,
त्यामुळे सगळ्यांना देवाबद्दल अधिक काही कळेल
    आणि त्याला आदर देण्याचे ही त्यांना कळेल.
¹⁰ परमेश्वराची सेवा करण्यास चांगल्या व्यक्तिला आनंद वाटतो.
    तो देवावर विसंबून राहातो.
    चांगल्या प्रामाणिक लोकांनी हे पाहिल्यावर ते देवावर विश्वास ठेवतात.

65 सियोनातील देवा, मी तुझी स्तुती करतो.
    मी कबूल केल्याप्रमाणे तुला अर्पण करीत आहे.
² तू केलेल्या गोष्टींबद्दल आम्ही लोकांना सांगतो.
    आणि तू आमची प्रार्थना ऐकतोस.
    तू तुझ्याकडे येणाऱ्या प्रत्येकाची प्रार्थना ऐकतोस.
³ जेव्हा आमची पापे आम्हांला खूप जड होतात
    तेव्हा तू माफ करतोस आणि त्यांची भरपाई करतोस.
⁴ देवा, तू तुझ्या लोकांची निवड केलीस.
    आम्ही तुझ्या मंदिरात येऊन तुझी प्रार्थना करावी यासाठी तू आमची निवड केलीस आणि आम्ही खूप आनंदी आहोत.
तुझ्या मंदिरातल्या आणि तुझ्या पवित्र राजवाड्यातल्या
    सगळ्या सुंदर विस्मयकारक गोष्टी आमच्या जवळ आहेत.
⁵ देवा, आम्हाला वाचव.
    चांगले लोक तुझी प्रार्थना करतात आणि तू त्यांच्या प्रार्थनेला उत्तर देतोस.
तू त्यांच्यासाठी आश्चर्यकारक गोष्टी करतोस.
    सर्व जगभरचे लोक तुझ्यावर विश्वास ठेवतात.
⁶ देवाने त्याच्या शक्तीने पर्वत निर्माण केले.
    आपण त्याची शक्ती आपल्या भोवती सर्वत्र पाहतो.
⁷ देवाने उन्मत्त झालेल्या खवळलेल्या समुद्राला शांत केले.
    देवाने पृथ्वीवर लोकांचे “महासागर” निर्माण केले.
⁸ सर्व जगातील लोक तू केलेल्या विस्मयजनक गोष्टींनी आश्चर्यचकित झाले आहेत.
    सूर्योदय आणि सुर्यास्त आम्हाला खूप आनंदी बनवतात.
⁹ तू जमिनीची काळजी घेतोस तू तिच्यावर सिंचन करतोस
    आणि तिला धान्य उगवायला सांगतोस.
देवा तू झरे पाण्याने भरतोस
    आणि पिकांना वाढू देतोस.
¹⁰ तू नांगरलेल्या जमिनीवर पाऊस पाडतोस.
    तू शेतजमीन पाण्याने भिजवतोस.
तू जमीन पावसाने भुसभुशीत करतोस.
    आणि तू त्यावर छोट्या रोपट्यांना उगवू देतोस.
¹¹ तू नवीन वर्षाची सुरुवात चांगल्या हंगामाने करतोस
    तू भरपूर पिकांनी गाड्या भरतोस.
¹² वाळवंट आणि डोंगर गवताने भरले आहेत.
¹³ आणि कुरणे मेंढ्यांनी झाकली गेली आहेत.
    दऱ्या धान्यांनी भरल्या आहेत.
प्रत्येक जण आनंदाने गात आहे आणि ओरडत आहे.