Old/New Testament

⁴ “अय्यूब, बतावा तू कहाँ रह्या, जब मइँ भुइँया क रचना किहे रहेउँ?
    अगर तू एँतना समुझदार अहा तउ मोका जवाब दया।
⁵ अय्यूब, अगर तू एँतना हाज़िर जवाब अहा तउ मोका बता कि इ संसारे क विस्तार कउन तय किहेस?
    कउन इ संसार क नापइ वाला सूत स नापेस?
⁶ इ धरती क नींव काहे पइ धरी गइ अहइ?
    कउन धरती क नींव क रुप मँ सवन त जियादा महत्व क पाथर क धरेस ह
⁷ जब परमेस्सर अइसा करत रहेन तउ भोर क तारन एक संग खुस होइके गाना गाएन।
    अउर सरगदूतन खुस होअके चिल्ला उठेन।

⁸ “अय्यूब, जब सागर धरती क गरम स फूट बहत निकरा,
    तउ कउन ओका रोकइ बरे दुआर क बँद किहे रहा।
⁹ उ समइ मइँ बादरन स समुददर क ढाँपि दिहेउँ
    अउ अंधियारा मँ सागर क लपेट दिहे रहेउँ (जइसे गदेला क चादर मँ लपेटा जात ह।)
¹⁰ सागर क चउहद्दी मइँ निहचित किहे रहेउँ
    अउर ओहमाँ ताला डाइके दुआरन क पाछे रख दिहे रहेउँ।
¹¹ मइँ समुददरे स कहेउँ, ‘तू हिआँ तलक आइ सकत ह मुला अउर जियादा आगो नाहीं।
    तोहार घमण्डी लहरन हिआँ पइ रुकि जइहीं।’

¹² “अय्यूब, का तू कबहुँ आपन जिन्नगी मँ भोर क हुकुम दिहा ह निकरि आवइ
    अउर दिन क सुरु करइ क?
¹³ अय्यूब, का तू कबहुँ भिन्सारे क प्रकास क धरती पइ छाइ जाइ क कह्या ह
    अउर का कबहुँ ओहसे दुस्टन क लुकाइ क जगहिया क तजि देइ क मजबूर करइ क कह्या ह?
¹⁴ जब भिंसारे क प्रकास धरती पइ पड़त ह
    तउ धरती क रूप व आकृति अइसा प्रगट होत ह
जइसे नरम मिट्टी क मुहर स दबाइ स होत ह।
    एकर रूप रेखा ओढ़नन क सलवटन क नाईं उभरत ह।
¹⁵ दुस्ठ लोगन स प्रकास लइ लीन्ह गवा ह।
    नीक अउर ओन बाजूअन क जउन कि उ पचे बुरा करम करइ बरे उठाएस तोड़ दीन्ह ग रहेन।

¹⁶ “अय्यूब, बतावा का तू कबहुँ सागर क गहिर तहे मँ गवा अहा
    जहाँ स सुरु होत हका तू कबहुँ सागर क स्त्रितों पइ चला अहा?
¹⁷ अय्यूब, का तू कबहुँ उ फाटकन क लख्या ह, जउन मउते क लोक लइ जात हीं?
    का तू कबहुँ ओन फाटकन क लख्या जउन मउत क अँधियार जगह क लइ जात हीं?
¹⁸ अय्यूब, तू जानत अही कि इ धरती केतँनी बड़ी अहइ?
    तू मोका बतावा अउर तू इ सब कछु जानत अहा।

¹⁹ “अय्यूब, प्रकास कहाँ स आवत अहइ?
    अउर अँधियारा कहा स आवत ह?
²⁰ अय्यूब, का तू प्रकास अउ अँधियारा क अइसी जगह लइ जाइ सकत ह जहाँ स उ सबइ आए होइँ?
    जहाँ उ सबइ रहत हीं हुआँ पइ जाइ क मारग का तू जानत अहा?
²¹ अय्यूब, मोका निहचय अहइ कि तोहका सारी बातन मालूम अइँ काहेकि तू बहोत ही बूढ़ा अहा।
    जब वस्तुअन क रचना भइ रही तब तू हुआँ रह्या।

²² “अय्यूब, का तू कबहुँ ओन भण्डार क कोठरियन मँ गना अहा
    जहाँ मइँ बरफ अउ ओलन क धरा करत हउँ?
²³ मइँ बरफ अउ ओलन क विपत्ति क समइ मँ अउ जुद्ध
    अउर लड़ाई क समइ मँ उपयोग करइ बरे बचाए राखत हउँ।
²⁴ अय्यूब, का तू कबहुँ अइसी जगह गवा अहा, जहाँ स सूरज उगत ह
    अउ जहाँ स पुरवइया सारी धरती पइ छाइ जाइ बरे आवत ह
²⁵ अय्यूब, भारी बर्खा बरे अकास मँ कउन नहर खोदेस ह,
    अउर कउन गरजनवाले बिजली क रस्ता बनाएस ह
²⁶ अय्यूब, कउन हुआँ भी पानी बरसाएस,
    जहाँ कउनो भी नाहीं रहत ह
²⁷ उ बर्खा उ खानी भुइँया क खूब देर क पानी देत ह
    अउ घास जामब सुरु होइ जात ह।
²⁸ अय्यूब, का बर्खा क कउनो बाप अहइ?
    ओस क बूँदन क कउन बनावत अहइ?
²⁹ अय्यूब, बरफ क महतारी कउन अहइ?
    आकास क पाला क कउन पइदा करत ह?
³⁰ पानी जमिके चट्टान जइसा कठोर बन जात ह,
    अउर सागर क ऊपर क सतह जम जावा करत ह।

³¹ “अय्यूब, सप्तर्षि तारन क का तू बाँध सकत ह?
    का तू मिरगसरा का बन्धन खोल सकत ह?
³² अय्यूब, का तू तारा समूहन (कहकसाँ) क ठीक वेला पइ निकार सकत ह?
    का तू भालू क ओकरे बच्चन क संग अगुअइ कइ सकत ह?
³³ का तू ओन नेमन क जानत ह, जउन नभ पइ सासन करत हीं?
    का तू ओन नेमन क धरती पइ लागू कइ सकत ह?

³⁴ “अय्यूब, का तू गोहराइके बादरन क आदेस दइ सकत ह,
    कि उ पचे भारी बर्खा क साथ घेरि लेइँ।
³⁵ अय्यूब बतावा, का तू बिजुरी क जहाँ चाहत्या पठइ सकत अहा?
    अउर का तोहरे निअरे आइके बिजुरी कही अय्यूब,
    ‘हम हिआँ अही बतावा तू का चाहत ह?’

³⁶ “मनई क मन मँ विवेक क कउन राखत ह?
    लोगन क चिजियन क समझइ बरे छमता कउन देत ह?
³⁷ अय्यूब कउन आपन बुद्धि स बादरन क गनेस ह?
    कउन आकास क पानी क चाम थेले क उंडेल सकत ह?
³⁸ बर्खा धूरि क कीचंड़ बनाइ देत ह
    अउर माटी क लौदा आपुस मँ चिपक जात हीं।

³⁹ “अय्यूब, का तू सिंह क आहार पाइ सकत ह?
    का तू मुखान सेरनी क बच्चन क पेट भरि सकत ह?
⁴⁰ उ सबइ सेर आपन खोहन मँ पड़ा रहत हीं
    अउर सिकार बरे झाड़ी मँ दुबक क घात लगनवइ बरे बइठा रहत हीं।
⁴¹ अय्यूब, कउआ क कबेला चारा पाए बगइर एहर ओहर भटकत भए परमेस्सर क दुहाइ देत हीं।
    कउन ओनका चारा देत ह?

39 “अय्यूब का तू जानत अहा कि कब पहाड़ी बोकरियन बियात हीं?
    का तू कबहुँ लख्या जब हिरणी बियात ह
² अय्यूब, का तू जानत ह पहाड़ी बोकरियन अउ महतारी हरिणियन केतँने महीने आपन बच्चन क गर्भ मँ राखत हीं?
    का तोहका पता अहइ कि ओनकर बियाइ क उचित समइ का अहइ?
³ का तू जानत ह क उ पचे बच्चा क जनम दइ बरे कब झुकत ह।
    का तू जानत ह कि उ पचे आपन बच्चन क कब जनम देत ह।
⁴ पहाड़ी बोकरियन अउर हरिणि महतारी क बच्चन खेतन मँ हट्टा कट्टा होइ जात हीं।
    फुन उ पचे आपन महतारी क तजि देत हीं, अउर फुन लउटिके वापस नाहीं अउतेन।

⁵ “अय्यूब, जंगली गदहन क कउन अजाद छोड़ देत ह?
    कउन ओनकर रस्सन क खोलेस अउर ओनका बन्धन स अजाद किहेस?
⁶ इ मइँ परमेस्सर हउँ जउन बनेर गदहा क घर क रुप मँ रेगिस्तान दिहेउँ।
    मइँ ओनका रहइ बरे उजाड़ धरती दिहेउँ।
⁷ बनेर गदहा सोर स भरा भवा सहरन क लगे नाहीं जात ह
    अउर कउनो भी मनई ओका काम करवावइ बरे नाहीं साधत ह।
⁸ बनेर गदहन पहाड़न मँ घूमत हीं
    अउर उ पचे हुअँइ घास चरत रहत हीं।
    उ पचे हुअँइ पर हरिअर घास चरइ क हेरत रहत हीं।

⁹ “अय्यूब, बतावा, का कउनो जंगली साँड़ तोहरी सेवा बरे राजी होइ?
    का उ तोहरे चरही मँ राति क रुकी?
¹⁰ अय्यूब, का तू जंगली बर्धा पइ जुआ रख पइ आपन खेत जोतँवाइ सकत ह?
    का घाटी क तोहरे वास्ते जोतँइ बरे उ पचन पइ जुआ रखइ जाब्या?
¹¹ जंगली साँड़ बहोत मजबूत होत ह।
    मुला का तू आपन काम करइ बरे ओन पइ भरोसा कइ सकत ह?
¹² का तू ओह पइ भरोसा कइ सकत ह कि उ तोहार अनाज बटोरइ
अउर ओका दाँवइ मँड़ाइ^[a] क खरिहाने मँ लिआवइ।

¹³ “सुतुरमुर्ग जब खुस होत ह उ आपन पंख फड़फड़ावत ह।
    मुला ओकर पंख सारस क पंख जइसे नाहीं होतेन।
¹⁴ मादा सुतुरमुर्ग धरती पइ अण्डा देत ह।
    सबइ अण्डा रेत मँ गरम होइ जात ह।
¹⁵ मुला सुतुरमुर्ग बिसरि जात ह कि कउनो ओकरे अण्डन पइ चलिके कुचर सकत ह,
    या कउनो बनेर पसु ओनका तोड़ सकत ह।
¹⁶ मादा सुतुरमुर्ग आपन नान्ह बच्चन पइ कठोर होइ जात ह
    जइसे उ पचे ओकर बच्चन नाहीं अहइँ।
    अगर ओकर बच्चन मरि भी जाइँ तउ भी ओका चिन्ता नाहीं होतह, अउर ओकर सब काम अकारथ होत ह।
¹⁷ परमेस्सर सुतुरमुर्ग क विवेक नाहिं दिहेस,
    अउर उ ओका कउनो समझदारी नाहीं दिहस ह।
¹⁸ मुला जब सुतुरमुर्ग दउड़इ क उठत ह
    तब ध्धोड़न अउ ओकरे सवार पइ हँसत ह।

¹⁹ “अय्यूब, बतावा का तू ध्धोड़न क बल दिहा
    अउर का तू ही ओकर गटई पइ फहरती अयाल जमाया ह?
²⁰ अय्यूब, बतावा जइसे टिड्डी कूद जात ह तू वइसे धोड़ा क कुदाया ह
    घोड़ा ऊँची अवाजे मँ हिनहिनात ह अउर लोग डेराइ जात हीं।
²¹ घोड़ा घुस अहइ कि उ बहोत बलवान बाटइ अउर आपन खुरे स धरती क खतन रहत ह।
    जुदध मँ जात भवा घोड़ा तेज दौड़ जात ह।
²² घोडा डरे क हँसी उड़ावत ह काहेकि उ कबहुँ नाहीं डेरात।
    घोड़ा कबहुँ भी जुदध स मुँह नाही मोड़त ह।
²³ घोड़ा क बगल मँ तरकस थिरकत रहत हीं।
    घोड़सवारन क भलन अउ हथियार धूपे मँ चमचामत रहत हीं।
²⁴ घोड़ा बहोत उत्तेजित अहइ, मैदान पइ उ तेज चाल स दउड़त ह।
    घोड़ा जब बिगुल क आवाज सुनत ह तब उ सान्त खड़ा नाहीं रहि सकत।
²⁵ बिगुल क ध्वनी पइ घोड़ा हिन ‘हिनावत’ ह।
    उ बहोत ही दूर स जुद्ध क सूँघ लेत ह।
    उ सेना क सनापती क आदेस अउर जुध्या क हाहाकार अउ जयजयकार क सुन लेत ह।

²⁶ “अय्यूब, का तू बाज क सिखाया आपन पखनन क फइलाउब अउर दक्खिन कइँती उड़ि जाब।
²⁷ अय्यूब का तू उकाब क उड़इ क
    अउर ऊँच पहाड़न मँ आपन झोंझ बनावइ क आग्या देत ह।
²⁸ उकाब चट्टाने पइ रहा करत ह।
    ओकर किला चट्टान होत ह।
²⁹ उकाब किला स आपन सिकार पइ निगाह राखत ह।
    उ बहोत दूर स आपन सिकार क लखि लेत ह।
³⁰ गिद्ध क बच्चन लहु चाटा करत हीं।
    जहाँ भी ल्हासन पड़ा होत हीं हुवाँ गिद्ध बटुर जात हीं।”

⁸ “अय्यूब का तू सोचत अहा कि मइँ निआउ स पूरा नाहीं हउँ।
    का तू मोका बुरा काम करइ क दोखी मानत अहा ताकि तू इ देखाँइ सका कि तू उचित अहा?
⁹ अय्यूब, बतावा का मोर सस्त्र एँतना सक्तीसाली अहइँ जेतँना कि मोर (परमेस्सर) सस्त्र अहइ!?
    का तू आपन वाणी क ओतँना ऊँच गरजिके बोल सकत ह जेतँना मोर वाणी अहइ!?
¹⁰ अगर तू वइसा कइ सकत ह तउ तू खुद क आदर अउर महिमा द्या
    अउ ओढ़ना क तरह वफादारी क सान क ओढ़ ल्या।
¹¹ अय्यूब, अगर तू मोरे समान अहा, तउ अभिमानी लोगन स घिना करा।
    अय्यूब तू ओन अंहकारी लोगन पइ आपन किरोध बरसावा अउ तू ओनका विनम्र बनाइ दया।
¹² हाँ, अय्यूब, ओन अंहकारी लोगन क लखा अउर तू ओनका विनम्र बनाइ दया।
    ओन दुस्टन क तू कुचर दया जहाँ भी उ पचे खड़ा होइँ।
¹³ तू सबहिं घमण्डियन क माटी मँ गाड़ दया
    अउर ओनकइ देहन पइ कफन लपेटिके तू कब्रन मँ धइ दया।
¹⁴ अय्यूब, अगर तू एँन सबइ बातन क कइ सकत ह तउ मइँ तहार परसंसा करब
    काहेकि तू खुद क बचाइ सकत ह।

¹⁵ “अय्यूब, लखा मइँ उ बहमोथ (जलगजे)^[b] क पैदा किहेउँ।
    अउर उ मइँ ही ह जउऩ तोहका बनाएउँ ह।
    उ बहमोथ उहइ तरह घास खात ह, जइसे गइया घास खात ह।
¹⁶ बहमोथ क बदन मँ बहोत ताकत होत ह।
    ओकरे पेटे क माँसपेसियन बहोत ताकतवर होत हीं।
¹⁷ बहमोथ क पूँछ मजबूत अइसी होत ह जइसे देवदार क बृच्छ खड़ा रहत ह।
    ओकरे गोड़े क माँसपेसियन बहोत मजबूत होत हीं।
¹⁸ बहमोथ क हाड़न काँसा क तरह मजबूत होत हीं,
    अउर गोड़ ओकरे लोहे क ढूड़न जइसे।
¹⁹ बहमोथ महानतम पसु अहइ जेका मइँ बनाएउँ ह।
    हिआँ तलक कि ओकर सिरजनहार भी ओका लगे तरवार लइ क जात ह।
²⁰ बहमोथ ओन घासे क खात ह जउन पहाड़े पइ उपजात ह
    जहाँ बनेर पसु खेलत हीं।
²¹ बहमोथ कमल क पउधन क नीचे सोवत रहत ह
    अउ कीचंड़ मँ सरकणडन क आड़ मँ छूपा रहत ह।
²² कमल क पउधन बहमोथ क आपन छाया मँ छिपावत हीं।
    उ बेंत क पेड़न क खाले रहत ह, जउन नदी क निचके उगत हीं।
²³ अगर नदी मँ बाढ़ आइ जाइ तउ भी जलगज परात नाहीं ह।
    अगइ यरदन नदी भी ओकरे मुँहे पइ थपड़ियावइ तउ भी उ डेरात नाहीं ह।
²⁴ बहमोथ क कउनो भी हुक लगाइ क नाहीं पकड़ सकत ह।
    कउनो भी ओका जाली मँ नाहीं फँसाइ सकत।