Old/New Testament

² “ईयोब, तुझे त्रस्त झालेले विचार मला तुला उत्तर द्यायला भाग पाडत आहेत.
    माझ्या मनात कोणते विचार चालले आहेत ते मी तुला लगेच सांगायला हवे.
³ तुझ्या उत्तरांनी तू आमचा अपमान केला आहेस परंतु मी शहाणा आहे.
    उत्तर कसे द्यायचे ते मला माहीत आहे.

^4-5 “वाईट मनुष्याचा आनंद जास्त काळ टिकत नाही तुला हे माहीत आहे.
    आदाम या पुथ्वीतलावर आला त्या अतिप्राचीन काळापासूनचे हे सनातन सत्य आहे.
    जो माणूस देवाची पर्वा करीत नाही तो फारच थोडा काळ सुखी होतो.
⁶ दुष्ट माणसाचा अहंकार गगनाला जाऊन भिडेल
    आणि त्याचे मस्तक ढगांपर्यत पोहोचू शकेल.
⁷ परंतु त्याच्या विष्ठेप्रमाणे त्याचा मात्र नाश झालेला असेल.
    जे लोक त्याला ओळखतात ते विचारतील, ‘तू कुठे आहे?’
⁸ तो एखाद्या स्वप्नासारखा ^[a] उडून जाईल व तो कोणालाही सापडणार नाही.
    त्याला घालवून देण्यात येईल आणि एखाद्या दु:स्वप्नासारखा तो विसरलाही जाईल.
⁹ ज्या लोकांनी त्याला पाहिले होते, त्यांना तो पुन्हा दिसणार नाही.
    त्याचे कुटुंब पुन्हा कधी त्याच्याकडे बघणार नाही,
¹⁰ दुष्ट माणसाने गरीब लोकांकडून जे काही घेतले होते ते त्याची मुले परत करतील.
    दुष्ट माणसाचे स्वतःचे हातच त्याची संपत्ती परत करतील.
¹¹ तो तरुण होता तेव्हा त्याची हाडे मजबूत होती.
    परंतु आता इतर अवयवांप्रमाणे त्यांची सुध्दा माती होईल.

¹² “दुष्टाला वाईट गोष्टी चांगल्या वाटतात.
    तो त्यांची चव नीट कळावी म्हणून त्या आपल्या जिभेखाली ठेवतो.
¹³ दुष्ट माणसाला वाईट गोष्टी आवडतात म्हणून तो त्यांना सोडीत नाही.
    गोडगोळीसारखे तो त्या आपल्या तोंडात ठेवतो.
¹⁴ परंतु त्या वाईट गोष्टीच त्याच्या पोटात विष होतील.
    त्याच्या आत त्याचे सर्वाच्या विषासारखे कडू जहर होईल.
¹⁵ दुष्ट माणसाने श्रीमंती गिळली तरी तो ती ओकून टाकेल.
    देव त्याला ती ओकायला भाग पाडेल.
¹⁶ दुष्ट माणसाचे पेय म्हणजे सर्पाचे विष.
    सर्पाचा दंशच त्याला मारुन टाकील.
¹⁷ नंतर दुष्ट मनुष्य मधाने आणि दुधाने भरुन
    वाहाणाऱ्या नद्या बघण्याचे सौख्य अनुभवू शकणार नाही.
¹⁸ दुष्ट माणसाला त्याचा नफा परत करणे भाग पडेल.
    त्याने जे सुख मिळवण्यासाठी कष्ट केले ते सुख भोगण्याची परवानगी त्याला मिळणार नाही.
¹⁹ का? कारण त्याने गरीबांना कष्ट दिले.
    त्यांना वाईट वागवले.
त्याने त्यांची काळजी घेतली नाही.
    त्यांच्या वस्तू हिसकावून घेतल्या.
    दुसऱ्यांनी बांधलेली घरे त्याने बळकावली.

²⁰ “दुष्ट माणूस कधीही समाधानी नसतो.
    त्याची श्रीमंती त्याला वाचवू शकत नाही.
²¹ तो खातो तेव्हा काहीही शिल्लक ठेवीत नाही.
    त्याचे यश टिकणार नाही.
²² दुष्ट मनुष्याकडे जेव्हा भरपूर असेल तेव्हा तो संकटांनी दबून जाईल.
    त्याच्या समस्या त्याच्यावर कोसळतील.
²³ दुष्ट माणसाने त्याला हवे तितके खाल्ल्यानंतर
    देव त्याचा क्रोधाग्नी त्याच्यावर फेकेल.
    देव दुष्टावर शिक्षेचा पाऊस पाडेल.
²⁴ दुष्ट मनुष्य तलवारीला भिऊन पळून जाण्याचा प्रयत्न करेल.
    परंतु पितळी बाण त्याचा बळी घेईन.
²⁵ पितळी बाण त्याच्या शरीरातून आरपार जाईल.
    त्याचे चकाकणारे टोक त्याचे आतडे भेदील
    आणि तो भयभीत होईल.
²⁶ त्याच्या खजिन्याचा नाश होईल.
    मानवाने उत्पन्न केला नाही असा अग्नी त्याचा नाश करेल.
    अग्नी त्याच्या घरातल्या सर्व वस्तूंचा नाश करेल.
²⁷ दुष्ट माणूस अपराधी आहे हे स्वर्ग सिध्द करेल.
    पृथ्वी त्याच्याविरुध्द् साक्ष देईल.
²⁸ देवाच्या क्रोधाने निर्माण झालेल्या पुरात
    त्याच्या घरातली चीजवस्तू वाहून जाईल.
²⁹ दुष्ट माणसाच्या बाबतीत हे करायचे असे देवाने ठरवले आहे.
    देवाने ठरवलेले हे त्याचे प्रारब्ध आहे.”

² “मी काय म्हणतो ते ऐक.
    माझे सांत्वन करण्याची ती तुझी पध्दत असू दे.
³ मी बोलेन तेव्हा तू थोडा धीर धर.
    माझे बोलणे संपल्यावर तू माझी थट्टा करु शकतोस.

⁴ “मी लोकांविरुध्द तक्रार करीत नाही.
    मी अधीर झालो आहे त्याला काही कारण आहे.
⁵ माझ्याकडे बघितल्यावर तुला धक्का बसेल.
    तुझे हात तोंडावर ठेव आणि माझ्याकडे अचंब्याने बघत रहा.
⁶ माझ्यावर आलेल्या प्रसंगांचा विचार करायला लागलो म्हणजे मला भीती वाटते
    आणि माझ्या शरीराचा थरकाप होतो.
⁷ दुष्ट माणसांना जास्त आयुष्य का असते?
    ते वृध्द आणि यशस्वी का होतात?
⁸ दुष्ट माणसे आपली मुले बाळे मोठी होत असलेली बघतात.
    आपली नातवंडे बघायला ती जिवंत राहतात.
⁹ त्यांची घरे सुरक्षित असतात आणि त्यांना भय नसते.
    दुष्टांना शिक्षा करण्यासाठी देव आपली छडी वापरीत नाही.
¹⁰ त्यांचे बैल प्रजोत्पादनात असफल होत नाही.
    त्यांच्या गायींना वासरे होतात आणि वासरे जन्मतःच मृत्युमुखी पडत नाहीत.
¹¹ दुष्ट लोक आपल्या मुलांना कोकरा प्रमाणे बाहेर खेळायला पाठवतात.
    त्यांची मुले सभोवती नाचत असतात.
¹² ते तंतुवाद्याच्या आणि वीणेच्या आवाजावर गातात आणि नाचतात.
¹³ दुष्ट लोक त्यांच्या आयुष्यात यशाचे सुख अनुभवतात.
    नंतर ते मरतात आणि दु:खी न होता थडग्यात जातात.
¹⁴ परंतु दुष्ट लोक ‘आम्हाला एकटे सोड.
    तू आम्हाला जे करायला सांगतोस त्याची आम्हाला पर्वा नाही’ असे देवाला सांगतात.
¹⁵ आणि दुष्ट लोक म्हणतात, ‘सर्वशक्तिमान देव कोण आहे?
    आम्हाला त्याची चाकरी करण्याची गरज नाही.
    त्याची प्रार्थना करण्यात काही अर्थ नाही.’

¹⁶ “दुष्ट लोकांचा त्यांच्या यशात स्वतःचा काही वाटा नसतो हे खरे आहे.
    मी त्यांच्या उपदेशाप्रमाणे वागू शकत नाही.
¹⁷ परंतु देव दुष्ट माणसांचा प्रकाश किती वेळा मालवू शकतो?
    किती वेळा त्यांच्यावर संकटे कोसळतात?
    देव त्यांच्यावर रागावून त्यांना शिक्षा करतो का?
¹⁸ देव दुष्ट लोकांना वाऱ्यावर गवत
    किंवा धान्याची टरफले उडवून देतो का?
¹⁹ पण तू म्हणतोस ‘देव वडिलांच्या पापाबद्दल मुलाला शिक्षा करतो.’
    नाही देवाने दुष्टालाच शिक्षा करायला हवी.
    तेव्हाच त्या दुष्टाला कळेल की त्याला त्याच्या पापाची शिक्षा मिळत आहे.
²⁰ पापी माणसाला शिक्षा भोगू दे.
    त्याला सर्वशक्तिमान देवाच्या रागाचा अनुभव घेऊ दे.
²¹ दुष्टाचे आयुष्य संपल्यावर तो मरतो.
    तो मागे राहिलेल्या कुटुंबाची पर्वा करीत नाही.

²² “देवाला कुणीही ज्ञान शिकवू शकत नाही.
    देव मोठ्या पदावर असलेल्या लोकांचाही न्यायनिवाडा करतो.
²³ एखादा माणूस संपूर्ण आणि यशस्वी जीवन जगल्यानंतर मरतो.
    त्याने अत्यंत सुरक्षित आणि स्वास्थ्यपूर्ण जीवन जगलेले असते.
²⁴ त्याचे शरीर चांगले पोसलेले होते
    आणि त्याची हाडे मजबूत होती.
²⁵ परंतु दुसरा माणूस अत्यंत हालाखीचे जीवन जगतो व मरतो.
    त्यांचे अंतःकरण कडवट झालेले असते.
    त्याने काहीही चांगले भोगलेले नसते.
²⁶ शेवटी हे दोघेही बरोबरच मातीत जातील.
    किडे त्यांना झाकून टाकतील.

²⁷ “पण तू कसला विचार करीत आहेस ते मला माहीत आहे.
    कोणत्या डावपेचांनी मला दु:ख द्यायची तुझी इच्छा आहे हे मला माहीत आहे.
²⁸ तू कदाचित् म्हणशील ‘मला चांगल्या माणसाचे घर दाखव.
    आता मला दुष्ट माणसे कोठे राहतात ते दाखव.’

²⁹ “तू प्रवाशांबरोबरच बोलला असशील
    आणि तू त्यांच्याच गोष्टी खऱ्या धरुन चालशील.
³⁰ संकटे कोसळतात तेव्हा दुष्ट माणसे त्यातून वाचतात.
    देवाच्या क्रोधातून ते सहीसलामत सुटतात.
³¹ दुष्टांनी केलेल्या वाईट कृत्यांबद्दल त्यांना कुणी शिक्षा करत नाही.
    त्यांच्या तोंडावर कुणी त्याबद्दल टीका करीत नाही.
³² दुष्ट माणूस स्मशानात गेल्यावर
    तेथील रक्षक त्याच्या थडग्याची देखभाल करतो.
³³ म्हणून दरीतली माती देखील दुष्ट माणसाठी सुखावह असेल.
    व त्याच्या अंत्ययात्रेत हजारो लोक सामील होतील.

³⁴ “म्हणून तुमच्या पोकळ शब्दांनी तुम्ही माझे सांत्वन करु शकणार नाही.
    तुमची उत्तरे माझ्या उपयोगाची नाहीत.”