Old/New Testament

^4-5 “एका तू तब स जानत ह जब बहोत पहिले लोगन क धरती पइ पठवा ग रहा,
    दुट्ठ मनई क आनन्द बहोत दिन नाहीं टिकत ह।
    अइसा मनई जेका परमेस्सर क चिन्ता नाहीं अहइ उ तनिक समइ बरे आनन्द मँ भरि जात ह।
⁶ चाहे दुट्ठ मनई क अपमान
    अकासे तलक छू जाइ।
⁷ उ आपन तने क मल क नाई नस्ट होइ जाइ।
    उ सबइ लोग जउन ओका जानत हीं कइहीं, ‘उ कहाँ अहइ?’
⁸ उ अइसे बिलाइ जाइ जइसे सपन हाली ही कहूँ उड़ जात ह।
    फिन कबहुँ कउनो ओका लखि नाहीं सकी, उ नस्ट होइ जाइ,
    ओका राति क सपना क तरह हाँक दीन्ह जाइ।
⁹ उ सबइ मनई जउन ओका लखे रहेन फुन कबहुँ नाहीं लखेन।
    ओकर परिवार फुन कबहुँ ओका नाहीं लखि पाइ।
¹⁰ जउन कछू भी उ (दुट्ठ) गरीबन स लिहे रहा ओकार संतानन चुकइहीं।
    ओनका आपन हीं हाथन स धन लौटाए होइ।
¹¹ जब उ जवान रहा, ओकर सरीर मजबूत रही,
    मुला उ हाली ही धूलि होइ जाइ।

¹² “दुस्ट क मुहँ क दुस्टता बड़ी मीठी लागत ह,
    उ ओका आपन जिभिया क खाले छुपाइ लेइ।
¹³ बुरा मनई उ बुराई क थामे रही, ओकर दूर होइ जाब ओका कबहुँ नाहीं भाई,
    तउ उ ओका आपन मुँहे मँ थामे रही।
¹⁴ मुला ओकरे पेटे मँ ओकर भोजन जहर बन जाइ,
    उ ओकरे भीतर अइसे बन जाइ जइसे कउनो नाग क विख सा कडुवा जहर।
¹⁵ दुस्ट धन दौलत क लील जात ह मुला उ ओन सबका बाहेर उगिली।
    परमेस्सर दुस्ट क पेटे स ओन सबका उगालिवाइ।
¹⁶ दुस्ट मनई क विख चुसब साँपे क नाई होइ।
    मुला साँपे क विसैला जीभ ओका मारि डइहीं।
¹⁷ मुला दुस्ट मनई लखइ क आनन्द नाहीं लेइहीं
    अइसी ओन नदियन क जउन सहद अउर मलाई बरे बहा करत ह।
¹⁸ दुट्ठ क ओकर लाभ वापिस करइ क दबावा जाइ।
    ओका ओन चिजियन क आनन्द नाहीं लेइ दीन्ह जाइ जेनके बरे उ मेहनत किहे अहइ।
¹⁹ कहेकि उ दुस्ट मनई दीन मनई क चिन्ता नाहीं किहस।
    बलकि, उ दूसर लोगन क घरन क भी लइ लिहस जेका उ पचे आपन बरे बनाएस रहा।

²⁰ “दुस्ट मनई कबहुँ संतुट्ठ नाहीं होत ह।
    उ आपन सबहिं धन क लइ ले जात ह।
²¹ जब उ खात ह तउ कछू नाहीं तजत ह,
    तउ ओकर कामयाबी बनी नहीं रही।
²² जब दुस्ट जन क लगे भरपूर होइ तबहिं ओन पइ विपत्ती आइहीं
    अउर उ कस्ट क अनुभव करिहीं।
²³ दुस्ट जन उ सब कछू खाइ चुकी जेका उ खाइ चाहत ह।
    परमेस्सर आपन बरत भवा किरोध ओह पइ डाइ।
    उ दुस्ट मनई पइ परमेस्सर सजा बरसाइ।
²⁴ होइ सकत है कि उ दुस्ट लोहा क तरवार स बच निकरइ,
    मुला कहुँ स काँसा क बाण ओका मार गिरावइ।
²⁵ तीर खींचत लिहेस ह,
    अउर बिजुरि क नाई ओकरे पीठ मँ घुसत ह,
अउर ओकरे करेजा बाहर आ जात ह,
    अउर उ आंतकित होइके काँप उठत ह।
²⁶ ओकर सबहिं खजाना नस्ट होइ जइहीं,
    एक ठु अइसी आगी जेका कउनो नाहीं बारेस ओका नस्ट करी,
    उ आगी ओनका जउन ओकरे घरे मँ बचा अहइँ नस्ट कइ डाइ।
²⁷ सरग सिद्ध करी कि उ दुस्ट अपराधी अहइ,
    इ गबाही धरती ओकरे खिलाफ देइ।
²⁸ जउन कछू भी ओकरे घरे मँ अहइ,
    उ परमेस्सर क किरोध क बाढ़ मँ बहि जाइ।
²⁹ इ उहइ जेका परमेस्सर दुस्टन क संग करइ क जोजना रचत ह।
    इ उहइ जइसा परमेस्सर ओनका देइ क जोजना बनावत ह।”

⁴ “मोर सिकाइत मनइयन क खिलाफ नाहीं अहइ,
    मइँ काहे सहनसील नाहीं अहउँ ओकर खास वजह अहइ।
⁵ तू मोका लखा अउर चकित होइ जा,
    आपन सोक दिखाइ बरे आपन हाथ आपन मुँहे पइ धरा।
⁶ जब मइँ सोचत हउँ ओन सब क जउन मोर संग घटा
    तउ मोका डर लागत ह अउर मोर देह थर थर काँपत ह।
⁷ काहे बुरे लोगन क उमर लम्बी होत ह?
    काहे उ पचे बूढ़ाइ जात हीं अउर कामयाब होत हीं?
⁸ बुरे लोग आपन संतानन क आपन संग बढ़त भए लखत हीं।
    बुरे लोग आपन-आपन नाती पोतन क लखइ क जिअत रहत हीं।
⁹ ओनकर घर सुरच्छित रहत हीं अउर उ पचे डेरातेन नाहीं।
    परमेस्सर दुस्टन क सजा देइ बरे आपन सजा काम मँ नाहीं लिआवत ह।
¹⁰ ओकर साँड़ कबहुँ भी मिला कइ मँ नाहीं चुकत ह।
    ओनकर गइयन बछवन क जनम देइ बरे गाभिन होत।
    ओनकर गर्भ कबहुँ नाहीं गिरत हीं।
¹¹ बुरे लोग गदेलन क बाहेर खेलइ पठवत हीं मेमनन क जइसे,
    ओनकर गदेलन नाचत हीं चारिहुँ ओर।
¹² मजीरा, वीणा अउर बाँसुरी क धून पइ उ पचे गावत हीं अउर नाचत हीं।
¹³ बुरे लोग आपन जिन्नगी भइ कामयाबी क आनन्द लेत हीं।
    फुन बिना दुख भोगे उ पचे मरि जात हीं अउर आपन कब्रन क बीच चला जात हीं।
¹⁴ मुला बूरे लोग परमेस्सर स कहा करत हीं, ‘हमका अकेला तजि दया।
    अउर एकर हमका परवाह नाहीं कि तू हमसे कइसा जिन्नगी जिअइ चाहत ह।’
¹⁵ दुट्ठ लोग कहा करत हीं, ‘सर्वसक्तीमान परमेस्सर कउन अहइ?
    हमका ओकरी सेवा क जरुरत नाहीं अहइ।
    ओकरी पराथाना करइ क कउनो लाभ नाहीं।’

¹⁶ “दुस्ट मनई सोचत हीं कि ओनका आपन ही करण कामयाबी मिलत ह,
    मुला मइँ ओनकर विचारन क नाहीं अपनाइ सकत हउँ।
¹⁷ मुला का अइसा होत ह कि दुस्ट जन क प्रकास बुताइ जावा करत ह?
    केतनी दाई दुस्टन क दुःख घेरा करत हीं?
    का परमेस्सर ओनसे कोहाइ जात ह, अउर ओनका सजा देत ह?
¹⁸ का परमेस्सर दुस्ट लोगन क अइसे उड़ावत ह जइसे हवा तिनके क उड़ावत ह
    अउर तेज हवा अनाजे क भूसा उड़ाइ देत हीं?
¹⁹ मुला तू कहत ह: ‘परमेस्सर एक गदेला क ओकरे बाप क पापन्क सजा देत ह।’
    नाहीं, परमेस्सर क चाही कि बुरे जन क राजा देइ।
    तबहीं उ बूरा मनई जानी कि ओका ओकरे निज पापन बरे सजा मिलती अहइ।
²⁰ तू पापी क ओकरे आपन राजा क देखाँइ दया,
    तब उ सर्वसक्तीसाली परमेस्सर क कोप क अनुभव करी।
²¹ जब बुरा मनई क उमर क महीना खतम होइ जात हीं अउर उ मर जात ह:
    उ उ परिवार क परवाह नाहीं करत जेका उ पाछे तजि जात ह।

²² “कउनो मनई परमेस्सर क गियान नाहीं दइ सकत,
    उ ऊँच ओहदन क लोगन क भी निआउ करत ह।
²³ एक पूरा अउ सफल जिन्नगी क जिअइ क पाछे एक मनई मरत ह,
    उ एक सुरच्छित अउ सुखी जिन्नगी जिअत ह।
²⁴ ओकर लगे पिवइ बरे भरपूर दुध रहा।
    अब समइ तलक ओकर हाड़ तन्दुरुस्त रहीन।
²⁵ मुला कउनो एक अउर मनई कठिन जिन्नगी क पाछे दुःख भरे मने स मरत ह,
    उ जिन्नगी क कबहुँ कउनो रस नाहीं चाखेस।
²⁶ इ सबइ दुइनउँ मनई एक संग माटी मँ गड़ा सोवत हीं
    किरउनन दुइनउँ क एक संग ढाँपि लेइहीं।

²⁷ “मुला मइँ जानत हउँ कि तू का सोचत अहा,
    अउर मोका पता अहइ कि तोहरे लगे मोरा बूरा करइ क कुचाल अहइ।
²⁸ मोरे बरे तू इ कहा कहत ह, ‘अब कहाँ बाटइ उ महामानुस क घर?
    कहाँ बा उ घर जेहमाँ उ दुस्ट रहत रहा?’

²⁹ “मुला तू कबहुँ बटोहियन क नाहीं पूछ्‌या?
    का तू ओकर कहानियन पइ बिस्सास नाहीं किहस?
³⁰ उ दिन जब परमेस्सर कोहाइके सजा देत ह
    दुस्ट मनई सदा बच जात ह?
³¹ अइसा कउन मनई नाहीं जउन ओकरे समन्वा ही ओकरे करमन क बूराइ करइ।
    ओकरे पाप क सजा कउनो मनई ओका नाहीं देत ह।
³² जब कउनो मनई कब्र मँ लेइ जावा जात ह,
    तउ ओकरे कब्र क लगे एक पहरुवा खड़ा ह।
³³ उ दुट्ठ मनई बरे उ घाटी क माटी मुलायम होइ।
    अनगिनत लोग भी ओकर समन्वा कब्र गएन ह, अउर भी लोग ओहस मिली।

³⁴ “तउ आपन कोरे सब्दन स तू मोका चइन नाहीं दइ सकत्या,
    तोहार जवाब सिरिफ झुठा अहइँ।”