Old/New Testament

³ “देवा, तुझा मला खरोखरच पाठिंबा आहे हे मला दाखव.
    दुसरे कुणीही मला पाठिंबा देणार नाही.
⁴ तू माझ्या मित्रांच्या मनाची कवाडे बंद करुन टाकलीस
    आणि आता त्यांना काही कळत नाही.
    कृपा करुन तू त्यांना विजयी होऊ देऊ नकोस.
⁵ लोक काय म्हणतात ते तुला माहीत आहे
    ‘एखादा माणूस मित्राला ^[a] मदत करण्यासाठी स्वतःच्या मुलांकडे दुर्लक्ष करतो’
    परंतु माझे मित्र मात्र माझ्या विरुध्द गेलेत.
⁶ देवाने माझे नाव म्हणजे सर्वासाठी एक शिवी केली.
    लोक माझ्या तोंडावर थुंकतात.
⁷ दु:ख आणि यातना यांनी मी जवळ जवळ आंधळा झालो आहे,
    माझे शरीर छायेप्रमाणे अतिशय बारीक झाले आहे.
⁸ यामुळे चांगले लोक फार व्यथित झाले आहेत.
    देवाची पर्वा न करणाऱ्या लोकांमुळे निष्पाप लोक व्यथित होतात.
⁹ पण चांगली माणसे मात्र न्यायाने जीवन जगत राहातात.
    निष्पाप लोक अधिक सामर्थ्यवान होतात.

¹⁰ “पण तुम्ही सर्व एकत्र या आणि या सगळ्यात माझीच चूक आहे हे मला दाखवून द्या.
    तुमच्या पैकी कुणीही विद्वान नाही.
¹¹ माझे आयुष्य संपत चालले आहे.
    माझ्या योजना धुळीला मिळवल्या गेल्या आणि माझी आशा नष्ट झाली.
¹² माझे मित्र गोंधळून गेले आहेत.
    त्यांना रात्र दिवसासारखी वाटते.
    अंधार प्रकाशाला पळवून लावतो असे त्यांना वाटते.

¹³ “थडगेच माझे नवीन घर असेल अशी मी आशा करतो.
    अंधाऱ्या थडग्यांत माझे अंथरुण घालण्याची इच्छा मी धरतो.
¹⁴ ‘तू माझा जन्मदाता आहेस’ असे मी थडग्याला
    आणि किड्यांना ‘माझी आई’ किंवा ‘बहीण’ म्हणू शकेन.
¹⁵ परंतु मला जर तेवढी एकच आशा असेल, तर मला मुळीच आशा नाही.
    मला जर तेवढी एकच आशा असेल तर लोकांना मी आशे शिवायच दिसेन.
¹⁶ माझी आशा माझ्याबरोबरच मरेल का?
    ती सुध्दा मृत्युलोकात जाईल का?
    आम्ही बरोबरच मातीत जाऊ का?”

² “ईयोबा, तू बोलणे केव्हा बंद करणार आहेस?
    शांत राहा आणि लक्ष दे. आम्हाला काही बोलू दे.
³ आम्ही पशूसारखे मूर्ख आहोत असे तू का मानतोस?
⁴ ईयोबा तुझा राग तुलाच अधिक त्रासदायक होत आहे.
    केवळ तुझ्यासाठी लोकांनी हे जग सोडून जावे का?
    देव केवळ तुझ्या समाधानासाठी डोंगर हलवेल असे तुला वाटते का?

⁵ “हो दुष्ट माणसाचा प्रकाश नाहीसा होईल.
    त्याचा अग्नी पेटणे बंद होईल.
⁶ त्यांच्या घरातला प्रकाश अंधकारमय होईल.
    त्यांच्या जवळचा दिवा विझेल.
⁷ त्याची पाऊले पुन्हा दमदारपणे व भरभर पडणार नाहीत.
    तो हळु हळु चालेल आणि अशक्त बनेल.
    त्याच्या दुष्ट मसलती त्याचा अधःपात करतील.
⁸ त्याचेच पाय त्याला सापळ्यात अडकवतील.
    तो आपणहून सापळ्यात जाईल आणि त्यात अडकेल.
⁹ सापळा त्याची टाच पकडेल.
    त्याला घटृ पकडून ठेवेल.
¹⁰ जमिनीवरची दोरी त्याला जाळ्यात अडकवेल.
    सापळा त्याची त्याच्या मार्गातच वाट बघत असेल.
¹¹ दहशत चहुबाजूंनी त्याची वाट पाहात आहे.
    भीती त्याच्या प्रत्येक पावलावर पाठलाग करीत आहे.
¹² वाईट संकटे त्याच्यासाठी भुकेली आहेत.
    विध्वंस आणि अरिष्ट तो पडण्याचीच वाट पहात आहेत.
¹³ भयानक रोग त्याची कातडी खाऊन टाकेल.
    तो त्याचे हातपाय कुजवेल.
¹⁴ दुष्ट माणूस त्याच्या घराच्या सुरक्षिततेपासून दूर नेला जाईल.
    त्याला भयाच्या राजापुढे हजर करण्यासाठी दूर नेले जाईल.
¹⁵ त्याच्या घरात काहीही शिल्लक राहाणार नाही.
    का? कारण त्याच्या घरात सर्वत्र जळते गंधक विखरण्यात येईल.
¹⁶ त्याची खालची मुळे सुकून जातील
    आणि वरच्या फांद्या मरतील.
¹⁷ पृथ्वीवरील लोकांना त्याची आठवण राहाणार नाही.
    आता त्याची आठवण कुणालाही येणार नाही.
¹⁸ लोक त्याला प्रकाशापासून दूर अंधारात ढकलतील.
    लोक त्याचा पाठलाग करुन या जगातून पळवून लावतील.
¹⁹ त्याला मुले आणि नातवंडे असणार नाहीत.
    त्याच्या कुटुंबातले कुणीही जिवंत असणार नाही.
²⁰ पश्र्चिमेकडचे लोक जेव्हा या दुष्ट माणसाचे काय झाले ते ऐकतील तेव्हा त्यांना धक्का बसेल.
    आणि पूर्वेकडचे लोक भयाने बधीर होतील.
²¹ दुष्ट माणसाच्या घराचे खरोखरच असे होईल.
    जो माणूस देवाची पर्वा करीत नाही त्याच्याबाबतीत असेच घडेल.”

² “तुम्ही मला किती वेळ त्रास देणार आहात?
    आणि शब्दांनी मला मोडणार आहात?
³ तुम्ही आतापर्यंत दहा वेळा माझा अपमान केला आहे.
    तुम्ही माझ्यावर हल्ला करता तेव्हा अजिबात लाज, शरम बाळगीत नाही.
⁴ मी पाप केले असेल तर तो माझा प्रश्न आहे.
    तुम्हाला त्याचा उपद्रव होत नाही.
⁵ तुम्ही माझ्यापेक्षा चांगले आहात एवढेच तुम्हाला दाखवायचे आहे,
    माझी संकटे माझ्या चुकीमुळेच निर्माण झाली आहेत असे तुम्ही (उगीचच) म्हणता.
⁶ परंतु देवानेच माझ्यावर अन्याय केला आहे.
    त्यानेच मला पकडण्यासाठी सापळा रचला.
⁷ ‘त्याने मला दुखवले’ असे मी ओरडतो.
    पण मला उत्तर मिळत नाही.
मी मदतीसाठी जोरात ओरडलो तरी न्यायासाठी असलेले
    माझे रडणे कुणाला ऐकू येत नाही.
⁸ मी पुढे जाऊ नये म्हणून देवाने माझ्या मार्गात अडथळा आणला.
    त्याने माझा मार्ग अंधारात लपविला.
⁹ देवाने माझी प्रतिष्ठा धुळीला मिळवली.
    त्याने माझ्या डोक्यावरचा मुकुट काढून घेतला.
¹⁰ माझा सर्वनाश होईपर्यंत देव मला चाऱ्ही बाजूंनी झोडपतो.
    एखादे झाड मुळासकट उपटून काढावे
    त्याप्रमाणे त्याने माझ्या आशा उपटून नेल्या.
¹¹ त्याचा क्रोध मला जाळीत आहे.
    तो मला त्याचा शत्रू म्हणतो.
¹² देव त्याचे सैन्य माझ्यावर हल्ला करण्यासाठी पाठवतो.
    ते माझ्याभोवती मोर्चा उभारतात.
    ते माझ्या डेऱ्याभोवती छावणी टाकतात.

¹³ “देवाने माझ्या भावांना माझा द्वेष करायला भाग पाडले.
    माझ्या सर्व मित्रांमध्ये मी परका झालो आहे.
¹⁴ माझे नातलग मला सोडून गेले.
    माझे मित्र मला विसरले.
¹⁵ माझ्या घरी येणारे पाहुणे आणि माझ्या दासी मला परका
    आणि परदेशातला समजतात.
¹⁶ मी माझ्या नोकराला बोलावतो पण तो उत्तर देत नाही.
    मी मदतीसाठी याचना केली तरी माझा नोकर उत्तर देणार नाही.
¹⁷ माझी बायको माझ्या श्वासाच्या वासाचा तिरस्कार करते.
    माझे भाऊ माझा तिरस्कार करतात.
¹⁸ लहान मुलेदेखील मला चिडवतात.
    मी त्यांच्याजवळ जातो तेव्हा ते माझ्याबद्दल वाईटसाईट बोलतात.
¹⁹ माझे जवळचे मित्रदेखील माझा तिरस्कार करतात.
    माझे ज्यांच्यावर प्रेम आहे ते लोक देखील माझ्याविरुध्द् गेले आहेत.

²⁰ “मी इतका कृश झालो आहे की माझी कातडी हाडांवर लोंबते.
    आता माझ्यात जिवंतपणाचा मागमुसही उरलेला नाही.

²¹ “माझी दया येऊ द्या. मित्रांनो, तुम्हाला माझी दया येऊ द्या!
    का? कारण देव माझ्यावर उलटला आहे.
²² देव जसा माझा छळ करीत आहे तसा तुम्ही पण माझा छळ का करीत आहात?
    मला सतत त्रास देण्याचा तुम्हाला कंटाळा येत नाही का?

²³ “मी जे बोलतो ते कुणीतरी लक्षात ठेवून पुस्तकात लिहून ठेवावे असे मला वाटते.
    माझे शब्द पाषाणात कोरुन ठेवायला हवेत असे मला वाटते.
²⁴ मी जे बोलतो ते लोखंडी कलमाने शिश्यावर
    किंवा पाषाणावर कोरुन कायम करायला हवे असे मला वाटते.
²⁵ माझा बचाव करणारा कोणी तरी आहे याची मला खात्री आहे.
    तो हयात आहे हे मला माहीत आहे.
आणि शेवटी तो या पृथ्वीतलावर येऊन उभा राहील
    आणि माझा बचाव करील.
²⁶ मी जेव्हा माझे शरीर सोडून जाईन तेव्हा
    आणि माझी कातडी नष्ट होईल तेव्हा सुध्दा मी देवाला पाहू शकेन.
²⁷ मी देवाला माझ्या डोळ्यांनी बघेन.
    अन्य कुणी नाही, तर मी स्वतःच त्याला पाहीन.
    आणि त्यामुळे मी किती हुरळून गेलो आहे ते मी सांगू शकत नाही.

²⁸ “तुम्ही कदाचित् म्हणाल: ‘आपण ईयोबचा छळ करु.
    त्याला दोषी ठरवण्यासाठी काहीतरी कारण शोधून काढू.’
²⁹ परंतु तुम्हाला स्वतःलाच तलवारीची भीती वाटायला हवी का?
    कारण देव दोषी माणसांना शिक्षा करतो.
देव तुम्हाला शिक्षा करण्यासाठी तलवारीचा उपयोग करेल.
    नंतर तुम्हाला कळेल की न्यायाचीसुध्दा वेळ यावी लागते.”