Old/New Testament

यहूदा क राजा योसिय्याह

34 योसिय्याह जब राजा बना, आठ बरिस क रहा। उ यरूसलेम मँ इकतीस बरिस तलक राजा रहा। ² योसिय्याह आपन पुरखा दाऊद क तरह उहइ किहस जेका यहोवा नीक समुझत ह। योसिय्याह दाऊद क राह स नाहीं मुड़स, न दायाँ अउर न ही बायाँ। उचित काम करइ स नाहीं हटा। ³ जब योसिय्याह आठ बरिस तलक राजा रहि चुका, तउ उ परमेस्सर क, अपने पुरखा दाऊद क परमेस्सर क अनुसरण करइ लाग। योसिय्याह लरिका ही रहा जब उ परमेस्सर क आग्या क पालन सुरू किहस। जब योसिय्याह राजा क रूप मँ बारह बरिस क भवा, उ ऊँच जगहन, असेरा खम्भन पइ खुदी मूरतियन अउ यहूदा अउ यरूसलेम मँ ढरी मूरतियन क नस्ट करब सुरू कइ दिहस। ⁴ लोग बाल देवतन क वेदियन योसिय्याह क समन्वा तोर दिहन। तब योसिय्याह ओन सुगन्धित वेदियन क नस्ट कइ डाएन जउन ओन वेदियन क ऊपर रहेन जउन कि बाल क अर्पित कीन्ह गए रहेन। उ खुदी भवा अउर ढरी भवा मूरतियन क तोर डाएन अउर उ ओन मूरतियन क पीस कइ धूरि बनाइ दिहन। तब योसिय्याह ओन चूरा क ओन लोगन क कब्रन पइ छिड़केस जउन बाल देवतन क बलि चढ़ावत रहेन। ⁵ योसिय्याह ओन याजकन क हड्डियन तलक क बारेस जउन अपनी वेदियन पइ बाल देवतन क सेवा किहे रहेन। इ तरह योसिय्याह मूरतियन अउ मूरति पूजा क यहूदा अउ यरूसलेम स नस्ट किहस। ⁶ योसिय्याह इहइ काम मनस्से, एप्रैम, सिमोन अउ नप्ताली तलक क राज्जन क नगरन मँ किहस। उ उहइ काम ओन सबइ नजिक क नगरन क खण्डहर संग किहस। ⁷ योसिय्याह वेदियन अउर असेरा खम्भन क तोर दिहस। उ मूरतियन क पीटिके चूरा बनाइ दिहस। उ पूरे इस्राएल देस मँ ओन सुगन्धि वेदियन क काट डाएस जउन बाल क पूजा मँ काम आवाति रहिन। तब योसिय्याह यरूसलेम लउट गवा।

⁸ जब योसिय्याह यहूदा क राजा क रुप मँ अपने अट्ठारहवें बरिस मँ रहा, उ असल्याह क पूत सापान नगर क प्रमुख मासेयाह अउर योआहाज क पूत लिपिक योआह क अपने यहोवा परमेस्सर मन्दिर क मरम्मत करइ क बरे पठएस।

योसिय्याह यहूदा अउर मन्दिर क स्वच्छ रखइ बरे मन्दिर क फुन मरमत करइ क आदेस दिहस। ⁹ उ सबइ लोग महा याजक हिल्किय्याह क लगे आएन। उ पचे उ धन ओका दिहन जउन लोग परमेस्सर क मन्दिर बरे दिहे रहेन। लेवीबंसी दुआरपालन इ धन मनस्से, एप्रैम अउर बचे सबहिं इस्राएलियन स बटोरेन। उ पचे इ धन सारे यहूदा, बिन्यामीन अउर यरूसलेम मँ रहइवाले सबहिं लोगन स भी बटोरेन। ¹⁰ तब लेवीबंसी ओन मनइयन क इ धन दिहन जउन यहोवा क मन्दिर क काम क देख-रेख करत रहेन अउर निरीच्छकन ओन मजदूरन क इ धन दिहन जउन यहोवा क मन्दिर क फुन बनाइके स्थापित करत रहेन। ¹¹ उ पचे बढ़इयन अउ राज-मिस्तरियन क पहिले स कटी बड़की चट्टानन क बेसहइ क बरे अउर काठ खरीदइ क बरे धन दिहन। काठे क उपयोग भवनन क फुन स बनावइ अउ भवन क सहतीरन क बरे कीन्ह गवा। भूतकाल मँ यहूदा क राजा मन्दिरन क देखभाल नाहीं करत रहेन। उ सबइ भवनन पुराने अउर खंडहर होइ गए रहेन। ¹² लोग बिस्सासपूर्वक काम किहन। ओनकर निरीच्छक यहत अउ ओबद्याह रहेन। यहत अउ ओबद्याह लेवीबंसी रहेन अउर उ पचे मरारी क परिवार स रहेन। दूसर निरीच्छक जकर्याह अउर मसुल्लाम रहेन। उ पचे कहात क परिवार स रहेन। ¹³ जउन लेवीबंसी संगीत बाजा बजावइ मँ कुसल रहेन, उ पचे मजदूरन क अउर दूसर काम करइवाले कर्मचारियन क भी निरीच्छण करत रहेन। कछू लेवीबंसी सचिव, अधिकारी अउर दुआरपाल क काम करत रहेन।

व्यवस्था क पुस्तक मिली

¹⁴ लेवीबंसियन उ धन क निकारेन जउन यहोवा क मन्दिर मँ रहा। उ समइ याजक हिल्किय्याह यहोवा क व्यवस्था क उ किताब प्राप्त किहस जउन मूसा क जरिये दिन्ह गइ रही। ¹⁵ हिल्किय्याह सचिव सापान स कहेस, “मइँ यहोवा क मन्दिर मँ व्यवस्था क किताब पाएउँ ह।” हिल्किय्याह सापान क किताब दिहस। ¹⁶ सापान उ किताब क राजा योसिय्याह क लगे लिआवा। सापान राजा क खबर दिहस, “तोहरे सेबक हर काम करत अहइँ जउन तू करइ क कहया ह। ¹⁷ उ पचे यहोवा क मन्दिर स धन क निकारेन अउर ओका निरीच्छकन अउ मजदूरन क देत अहइँ।” ¹⁸ तब सापान राजा योसिय्याह स कहेस, “याजक हिल्किय्याह मोका एक ठु किताब दिहेस ह।” तब सापन राजा क मोजूदगी मँ किताब स पढ़ेन। ¹⁹ जब राजा योसिय्याह नेमन क पढ़े जात भए सुनेस, उ अपने ओढ़ना फार डाएस। ²⁰ तब राजा योसिय्याह हिल्किय्याह, सापान क पूत अहीकाम, मीका क पूत अब्दोन, सचिव सापान अउ सेवक असायाह क आदेस दिहेस। ²¹ राजा कहेस, “जा, मोरे बरे अउ इस्राएल अउ यहूदा मँ जउन लोग बचे अहइँ ओनके बरे यहोवा स याचना करा। जउन किताब मिली बाटइ ओकरे कथनन क बारे मँ पूछा। यहोवा हम लोगन पइ बहोत कोहान अहइ काहेकि हमार पुरखन यहोवा क कथनन क पालन नाहीं किहन। उ पचे उ सबइ काम नाहीं किहन जउन इ पुस्तक करइ क कहत ह।”

²² हिल्किय्याह अउर राजा क सेवकन नबिया हुल्दा क लगे गएन, हुल्दा सल्लूम क मेहरारु रही। सल्लूम तोखत क पूत रहा। तोखत हस्रा क पूत रहा। हस्रा राजा क ओढ़नन क देखरेख करत रहा। हुल्दा यरूसलेम क नवे हींसा मँ रहत रही। हिल्किय्याह अउर राजा क सेवक लोग हुल्दा क सब कछू बताएन जउन होइ चुका रहा। ²³ हुल्दा ओनसे कहेस, “इस्राएल क परमेस्सर यहोवा जउन कहत ह उ इ अहइ: राजा योसिय्याह स कहा: ²⁴ यहोवा जउन कहत ह उ इ अहइ, ‘मइँ इ जगह जउ हिआँ क निवासियन पइ बिपत्ति डाउब। मइँ सबहिं भयंकर बिपत्तियन क जउन यहूदा क राजा क समन्ना बाचेउँ किताबे मँ लिखी गई अहइँ, लिआउब। ²⁵ मइँ इ एह बरे करब कि लोग मोका छोड़ेन अउ दूसर देवतन क बरे सुगन्धि बारेन। ओन लोग उ सबइ बुरे कामन क कारण जउन उ पचे किहेन मोका किरोधित किहस। एह बरे मइँ आपन किरोध इ जगह पइ डारब। मोर किरोध उ आगी क नाईं होइ जेका बुझइ नाहीं जा सकत ह’

²⁶ “किन्तु यहूदा क राजा योसिय्याह स कहा। उ यहोवा स पूछइ क बरे तोहका पठएस। इस्राएल क यहोवा परमेस्सर, ‘जउन कथनन क तू कछू समइ पहिले सुन्याह, ओनके बारे मँ कहत ह: ²⁷ योसिय्याह तू पस्ताताप किहा अउर तू अपने क मोर समन्वा बिनम्र किहा। तू मोर समन्वा चिचियाएस जब तू सुनेस ह कि मइँ इ जगह अउर हिवाँ रहइवालन लोगन क खिलाफ, बोलेस रहा। एह बरे मइँ तोहार बिन्ती सुनेस ह। ²⁸ मइँ तोहका तोहरे पुरखन क लगे लइ जाब। तू अपनी कब्र मँ सान्तिपूर्वक जाब्या। तोहका ओन बिपत्तियन मँ स कउनो भी नाहीं लखइ क पड़िहीं जेनका मइँ इ जगह अउर हिआँ रहइवाले लोगन पइ लिआउब।’” हिल्किय्याह अउर राजा क सेवक योसिय्याह क लगे इ सँदेसा लइके लउटेन।

²⁹ राजा योसिय्याह अउर यहूदा अउ यरूसलेम क सबहिं अग्रजन क अपने लगे आवइ अउर मिलइ बरे बोलाएस। ³⁰ राजा, यहोवा क मन्दिर मँ गवा। यहूदा क सबहिं लोग, यरूसलेम मँ रहइवाले लोग, याजक, लेवीबंसी अउर सबहिं साधारण व असाधारण लोग योसिय्याह क संग रहेन। योसिय्याह ओन सब क समन्वा उ करार क किताब स वचन क बाँचेस जउन कि यहोवा क मन्दिर मँ मिली रही। ³¹ तब राजा अपने जगह पइ खड़ा भवा। उ यहोवा क संग वाचा किहस। उ यहोवा क अनुसरण करइ क अउर यहोवा क आदेसन, बिधियन अउर नेमन क आपन पूरे हिरदइ अउर आपन पूरे जान स पालन करइ क वाचा किहस। उ इ किताब मँ लिखे करार क सब्दन क पालन करइ क सहमत भवा। ³² तब योसिय्याह यरूसलेम अउ बिन्यामीन क सबहिं लोगन स परमेस्सर क वाचा क स्वीकार करइ क प्रतिग्या कराएस। यरूसलेम मँ लोग परमेस्सर, ओकर पुरखन क परमेस्सर क करार क पालन किहन। ³³ इस्राएल क लोगन क लगे बहोत स देस क मूरतियन रहिन। योसिय्याह ओन सबहिं भयानक मूरतियन क नस्ट कइ दिहेन। यहोवा ओन मूरतियन स घिना करत ह। योसिय्याह इस्राएल क हर एक मनई क अपने यहोवा परमेस्सर क सेवा मँ पहोंचाएस। जब तलक योसिय्याह जिअत रहा, लोग पुरखन क यहोवा परमेस्सर क आग्या क पालन करब बन्द नाहीं किहस।

योसिय्याह फसह पर्व मनावत ह

35 यरूसलेम मँ राजा योसिय्याह यहोवा क बरे फसह पर्व मनाएस। पहिले महीने क चौदहवे दिन फसह पर्व क मेमना मारा गवा। ² योसिय्याह आपन-आपन कार्य करइ बरे याजकन क चुनेस। उ याजकन क उत्साहित किहस, जब उ पचे यहोवा क मन्दिर मँ सेवा करत रहेन। ³ योसिय्याह ओन लेवीबंसियन स बातन किहस जउन इस्राएल क लोगन क उपदेस देत रहेन अउ जउन यहोवा क बरे पवित्तर बनाए गए रहेन। उ ओन लेवीबंसियन स कहेस: “पवित्तर सन्दूख क उ मन्दिर मँ रखा जेका दाऊद क पूत, इस्राएल क राजा सुलैमान बनाए रहा। पवित्तर सन्दूख क अपने काँधे पइ फुन एक जगह स दूसरे जगह पइ जिन लइ जा। अब यहोवा आपन परमेस्सर क सेवा करा अउर परमेस्सर क लोग, इस्राएलियन क सेवा करा। ⁴ अपने क, अपने परिवार समूहन क अनुसार मन्दिर क सेवा बरे तइयार करा। ओन कार्यन क करा जेनका राजा दाऊद अउ ओकर पूत राजा सुलैमान तोहका करइ क निर्देस लिखित रूप मँ दिहे रहा। ⁵ हरेक परिवार समूहन, पवित्तर ठउर मँ लेविबंसियन क परिवार समूह क संग खड़ा भवा ताकि तू पचे आपन देस क बचा भवा लोगन क प्रस्तुत कइ सकब। ⁶ फसह पर्व क मेमनन क मारा अउर यहोवा क बरे अपने क पवित्तर करा। मेमनन क अपने भाई इस्राएलियन क बरे तइयार करा। सब कछू वइसे ही करा जइसा करइ क आदेस यहोवा मूसा क जरिये दिहे रहा।”

⁷ योसिय्याह इस्राएल क लोगन क तीस हजार भेड़ी-बोकरियन फसह पर्व क बलि बरे दिहस। उ लोगन क तीन हजार गोरु भी दिहस। इ सबइ सबहिं जनावर राजा योसिय्याह क अपने जनावरन मँ स रहेन। ⁸ योसिय्याह क अधिकारियन भी, स्वेच्छा स लोगन क, याजकन क अउर लेवीबंसियन क फसह पर्व मँ उपयोग करइ बरे जनावरन अउ चिजियन दिहन। प्रमुख याजक हिल्किय्याह, जकर्याह अउ यहीएल मन्दिर क उत्त्तरदायी अधिकारी रहेन। उ पचे याजकन क दुई हजार छ: सौ मेमनन अउ बोकरन अउ तीन सौ बर्धन फसह पर्व बलि क बरे दिहन। ⁹ कोनन्याह भी समायाह, नतनेल अउ ओकरे भाइयन क संग अउ हसब्याह, यीएल अउ योजाबाद पाँच सौ भेड़िन-बोकरियन, पाँच सौ बर्धन फसह पर्व बलि क बरे लेवीबंसियन क दिहन। उ सबइ लोग लेवीबंसियन क प्रमुख रहेन।

¹⁰ जब हर एक चीज फसह पर्व क सेवा सुरू करइ स पहिले तइयार होइ गइ, तउ याजक अउर लेवीबंसी लोग जगहन पइ गएन। इ उहइ भवा जउन राजा क आदेस रहा। ¹¹ फसह पर्व क मेमनन मारे गएन। तब लेवीबंसियन जनावारन क खाल उतारेन अउ याजकन क रक्त दिहन। याजक लोग रक्त क वेदी पइ छिछकारेन। ¹² तब उ पचे जनावरन क अलग-अलग परिवार अमूहन क होमबलि मँ उपयोग क बरे दिहस। इ एह बरे कीन्ह गवा कि होमबलि उ तरह दीन्ह जाइ सकइ जउने तरह मूसा क नेमन सिखाए रहेन। ¹³ लेवीबंसियन फसह पर्व क बलियन क आगी पइ इ तरह भूँजेन जइसा ओनका आदेस दीन्ह गवा रहा अउर उ पचे पवित्तर भेटन क हाँड़ी, डेग अउ कड़ाहियन मँ पकाएन। तब उ पचे लोगन क हाली स माँस दिहन। ¹⁴ जब इ पूरा भवा तब लेवीबंसियन क अपने बरे अउर ओन याजकन क बरे माँस मिला जउन हारून क संतान रहेन। ओन याजकन क काम करत करत भए अँधियारा होइ तलक काम मँ बहोत जियादा लगाए गवा रखा। उ पचे होमबलि अउर बलिदानन क चर्बी क बारत भए कड़ी मेहनत किहन। ¹⁵ आसाप क परिवार क लेवीबंसी गायक ओन जगहन पइ पहोंचेन जेनका राजा दाऊद ओनके खड़े होइ क बरे चुने रहा। उ पचे आसाप, हेमान अउर राजा क नबी यदूतून रहेन। हर एक दुआरे पइ दुआरपाल अपनी जगह नाहीं छोड़ सकत रहेन काहेकि ओनकर लेवीबंसी भाइयन हर एक चीज ओनके फसह पर्व क बरे तइयार कइ दिहे रहेन।

¹⁶ उ दिन सब कछू यहोवा क उपासना क बरे वइसा ही कीन्ह गवा रहा जइसा राजा योसिय्याह आदेस दिहेस। फसह पर्व क त्यौहार मनावा गवा अउर होमबलि यहोवा क वेदी पइ चढ़ाई गइ। ¹⁷ इस्राएल क जउन लोग हुवाँ रहेन उ पचे फसह पर्व मनाएन अउर अखमीरी रोटी क पर्व सात दिन तलक मनाएस। ¹⁸ समूएल नबी दिन स ही फसह पर्व इ तरह नाहीं मनावा गवा रहा। इस्राएल क कउनो राजा कबहुँ इ तरह फसह पर्व नाहीं मनाए रहेन। राजा योसिय्याह, याजक, लेवीबंसी अउर इस्राएल अउ यहूदा क लोग, यरूसलेम मँ सबहिं लोगन क संग, फसह पर्व क बहोत ही बिसेस रुप म मनावा। ¹⁹ इ फसह पर्व योसिय्याह क राज्जकाल क अट्ठारहवे बरिस मनावा गवा।

योसिय्याह क मउत

²⁰ योसिय्याह जब मन्दिर क ओन अच्छे कामन क कइ चुका, तउ उ समइ मिस्र क राजा नको जुद्ध करइ बरे आपन फउज क परात नदी क बगल मँ स्थित ककमीस नगर पइ लइके आवा। नको मिस्र क राजा रहा। राजा योसिय्याह नको क खिलाफ लड़इ बाहेर निकरा। ²¹ किन्तु नको योसिय्याह क लगे दूत पठएस।

उ पचे कहेन, “राजा योसिय्याह, इ जुद्ध तोहरे बरे समस्या नाहीं अहइ। मइँ तोहरे बिरुद्ध लड़इ नाहीं आवा हउँ। मइँ अपने दुस्मनन स लड़इ आवा हउँ। परमेस्सर ओका हाली करइ क कहेस ह। परमेस्सर मोरी कइँती बाटइ एह बरे मोका परेसान करा। जदि तू मोरे खिलाफ लड़ब्या, परमेस्सर तोहका नस्ट कइ देइ।”

²² मुला योसिय्याह हटा नाहीं। उ नको स जुद्ध करइ क निहचइ किहस, एह बरे उ आपन भेस बदलेस अउ जुद्ध करइ गवा। योसिय्याह ओका सुनइ स इन्कार कइ दिहस जउन नको परमेस्सर क आदेस क बारे मँ कहेस। योसिय्याह मगिद्दो क मइदान मँ जुद्ध करइ गवा। ²³ जउने समइ योसिय्याह जुद्ध मँ रहा, उ बाणन स बेध दीन्ह गवा। उ अपने सेवकन स कहेस, “मोका दूर लइ चला। मइँ बुरी तरह घायल हउँ।”

²⁴ एह बरे सेवकन योसिय्याह क रथे स बाहेर निकारेन, अउर ओका दूसरे रथ मँ बइठाएन जेका उ अपने संग जुद्ध मँ लिआवा रहा। तब उ पचे योसिय्याह क यरूसलेम लइ गएन। राजा योसिय्याह यरूसलेम मँ मरा। योसिय्याह क हुवाँ दफनावा गवा जहाँ ओकरे पुरखन दफनाए गए रहेन। यहूदा अउ यरूसलेम क सबहिं लोग योसिय्याह क मरइ पर बहोत दुःखी रहेन। ²⁵ यिर्मयाह योसिय्याह क बरे कछू बहोत जियादा करुण गीत लिखेस अउर गाएस। आग भी सबहिं मेहरारु-मनसेधू गाएक ओन करूण गीतन क गावत हीं। योसिय्याह क दुःखी क गीतन इस्राएलियन बरे रीति बन गवा। उ पचे गीत करूण गीतन क संग्रह मँ लिखे अहइँ।

^26-27 दूसर जउन कछू योसिय्याह अपने राज्जकाल मँ, हुकुमत क सरू स आखीर तलक किहस, उ यहूदा अउर इस्राएल क राजा लोगन क इतिहास नाउँ क किताबे मँ लिखा गवा अहइ। उ किताब यहोवा क बरे ओकर भक्ति अउर उ यहोवा क नेमन क पालन कइसे किहस, हम लोगन क बतावत ह।

यहूदा क राजा यहोआहाज

36 यहूदा क लोग यरूसलेम मँ नवा राजा क रूप मँ योसियाह क पूत यहोआहाज क ताजपोसी किहेस। ² यहोआहाज जब यहूदा क राजा भवा, उ तेईस बरिस क रहा। उ यरूसलेम मँ तीन महीने राजा रहा। ³ तब मिस्र क राजा नको यहोआहाज क बन्दी बनाइ लिहस। नको यहूदा क लोगन क पौने चार टन चाँदी अउ पचहत्तर पौण्ड सोना दण्डरासि देइ क मजबूर किहस। ⁴ नको यहोआहाज क भाई क यहूदा अउ यरूसलेम क नवा राजा होइ क बरे चुनेस। यहोआहाज क भाई क नाउँ एल्याकीम रहा। तब नको एल्याकीम क एक नवा नाउँ दिहस। उ ओकर नाउँ यहोयाकीम रखेस किन्तु नको यहोआहाज क मिस्र लइ गवा।

यहूदा क राजा यहोआकीम

⁵ यहोआकीम उ समइ पच्चीस बरिस क रहा जब उ यहूदा क राजा भवा। उ गियारह बरिस तलक यरूसलेम मँ राजा रहा। यहोयाकीम उहइ किहेस जेका यहोवा बुरा समुझत अहा। उ अपने यहोवा परमेस्सर क बिरुद्ध पाप किहस।

⁶ बाबेल क राजा नबूकदनेस्सर यहूदा पइ हमला किहस। उ यहोयाकीम क बन्दी बनाएस अउर ओका काँसे क जंजीरन मँ डाएस। तब नबूकदनेस्सर राजा यहोयाकीम क बाबेल लइ गवा। ⁷ नबूकदनेस्सर यहोवा क मन्दिर स कछू चिजियन लइ गवा। उ ओन चिजियन क बावेल लइ गवा अउर अपने घर अर्थात राजमहल मँ रखेस। ⁸ यहोयाकीम जउन दूसर काम किहस, जउन भयंकर पाप उ किहस अउर हर एक काम जेका करइ क उ अपराधी रहा, इ सबइ काम यहूदा अउ इस्राएल क राजा लोगन क इतिहास नाउँ किताबे मँ लिखे अहइँ। यहोयाकीन, यहोयाकींम क जगह पइ नवा राजा भवा। यहोयाकीन, यहोयाकीम क पूत रहा।

यहूदा क राजा यहोयाकीन

⁹ यहोयाकीन जब यहूदा क राजा भवा, अट्ठारह बरिस क रहा। उ यरूसलेम मँ तीन महीने दस दिन राजा रहा। उ उ सबइ काम किहस जेका यहोवा दुआरा बुरा समुझा जात रहा। ¹⁰ बसन्त मँ राजा नबूकदनेस्सर कछू सेवकन क यहोयाकीन क धरइ क पठएस। उ पचे यहोयाकीन अउ यहोवा क मन्दिर मँ स कछू कीमती खजाना बाबेल लइ गएन। नबूकदनेस्सर सिदकिय्याह क यहूदा अउ यरूसलेम क नवा राजा होइ बरे चुनेस। सिदकिय्याह यहोयाकीन क सम्बन्धी रहा।

यहूदा क राजा सिदकिय्याह

¹¹ सिदकिय्याह जब यहूदा क राजा बना, इक्कीस बरिस क रहा। उ यरूसलेम मँ गियारह बरिस तलक राजा रहा। ¹² सिदकिय्याह उहइ किहेस जेका यहोवा दुआरा बुरा समुझा जात रहा। यिर्मयाह नबी यहोवा कइँती स सँदेसन ओका दिहस मुला उ अपने क बिनम्र नाहीं बनाएस अउर यिर्मयाह नबी जउन कहेस ओकर पालन नाहीं किहस।

यरूसलेम नेस्त नाबूद भवा

¹³ सिदकिय्याह नबूकदनेस्सर क खिलाफ विद्रोह किहस। कछू समइ पहिले नबूकदनेस्सर सिदकिय्याह स प्रतिग्या कराए रहा कि उ नबूकदनेस्सर क बिस्सासपात्र रही। सिदकिय्याह परमेस्सर क नाउँ लिहस अउर नबूकदनेस्सर क बरे बिस्सासपात्र बने रहइ क प्रतिग्या किहस मुला सिदकिय्याह बहोत अड़ियल रहा अउर उ आपन जिन्नगी बदलइ, इस्राएल क यहोवा परमेस्सर क लगे लउटइ अउ ओकरी आग्या मानइ स इन्कार कइ दिहस। ¹⁴ याजकन क सबहिं प्रमुखन अउ यहूदा क लोगन क प्रमुखन यहोवा क धोखा दिहेस। उ पचे रास्ट्रन क भयंकर करमन स भी बुरा करम किहस। ओन प्रमुखन लोगन यहोवा क मन्दिर क अपमान किहेन जेका उ यरूसलेम मँ अर्पित किहे रहा। ¹⁵ ओनके पुरखन क यहोवा परमेस्सर अपने लोगन क चितउनी देइ क बरे बार बार नबियन क पठएस। यहोवा इ एह बरे किहस कि ओका ओन पइ कृपालु रही अउर मन्दिर क लिए दुःख रहा। ¹⁶ किन्तु परमेस्सर क लोगन परमेस्सर क नबियन क मजाक उड़ाएन। उ पचे परमेस्सर क नबियन क सुनइ स इन्कार किहेस। उ पचे परमेस्सर क संदेस क नकार दिहेस। आखीर मँ परमेस्सर अपने लोगन पइ ऍतना कोहान कि ओका रोकइ क बरे कछू भी नाहीं रहा। ¹⁷ एह बरे परमेस्सर बाबेल क राजा क यहूदा क लोगन पइ हमला करइ बरे लिआवा। बाबेल क राजा जुवा मनइयन क मन्दिर मँ होइ प भी मार डाएस। उ यहूदा अउ यरूसलेम क लोगन पइ दया नाहीं किहस। बाबेल क राजा जुवा मनइयन, जुवा मेहररूअन अउ बूढ़ा मनइयन सबहिं लोगन क मारेस। परमेससर नबूकदनेस्सर क यहूदा अउ यरूसलेम क लोगन क दण्ड देइ दिहस। ¹⁸ नबूकदनेस्सर परमेस्सर क मन्दिर क, राजा अउ राजा क अधिकारियन क सबहिं कीमती चिजियन लइ लिहस।

¹⁹ नबूकदनेस्सर अउ ओकर फउज मन्दिर क आगी लगाइ दिहस। उ पचे यरूसलेम क चहारदीवारी गियाइ दिहन अउर राजा अउ ओकरे अधिकारियन क सबहिं घरन क बार दिहन। उ पचे यरूसलेम स हर एक कीमती चीज लिहन या ओका नस्ट कइ दिहन। ²⁰ नबूकदनेस्सर एकरे पाछे भी जिअत बचे लोगन क, बाबुल लइ गवा अउर ओनका दास होइ क मजबूर किहस। उ सबइ लोग बाबेल मँ दास क तरह तब तलक रहेन जब तलक फारस क सम्राट बाबेल क राज्ज क पराजित नाहीं किहस। ²¹ इ तरह यहोवा, इस्राएल क लोगन क जउन कछू यिर्मयाह नबी स कहवावा, उ सबइ ठीक घटित भवा। यहोवा यिर्मयाह क जरिये कहे रहा: “इ जगह सत्तर बरिस तलक सूनी अउ उजाड़ देस रही। इ भूइँया क सबइ सबित विस्राम क खुसी मनावइ बरे होइ जेका लोग नाहीं किहे रहा।”

²² इ तब पहिले बरिस भवा जब फारस क राजा कूस्रू हुकूमत करत रहा। यहोवा कूस्रू क हिरदइ क एक खास प्रायस्चित करइ बरे उत्तेजित किहेस ताकि जउन कछू यहोवा यिर्मयाह नबी क माध्यम स कहेस सबइ घटित सकतेन। जेहसे उ आदेस लिखेस अउर अपने राज्ज मँ हर एक जगह पइ पठएस:

²³ फारस क राजा कूस्रू इहइ कहत ह:

सरग क परमेस्सर यहोवा मोका पूरी पृथ्वी क राजा बनाएस ह। उ मोका अपने बरे एक मन्दिर यरूसलेम मँ बनावइ क जिम्मेदारी दिहस ह। अब तू सबहिं जउन परमेस्सर क लोग अहा, यरूसलेम जाइ क बरे अजाद ह्वा। यहोवा परमेस्सर तोहरे संग होइ।

19 तब पिलातुस ईसू क पकड़वाइके कोड़ा लगवाएस। ² फिन सिपाहियन काँटेदार टहनी क मोड़के मुकुट बनाएन अउर ओकरे मूँड़े प रख दिहेन। अउर ओका बैजनी रंग क कपड़ा पहिराएन। ³ अउर ओकरे पास आइ आइ क कहइ लागेन, “यहूदियन क राजा जिअत रह!” अउर ओका झापड़ मारइ लागेन।

⁴ पिलातुस एक बार फिन बाहेर आवा अउर ओनसे कहेस, “देख! मइँ तोहरे पास ओका फिन बाहर लियावत अही जइसे कि तू जान सका कि मइँ ओहमाँ कउनो खोट नाहीं पावा।” ⁵ फिन ईसू बाहेर आवा। उ काँटेन क मुकुट अउर बैजनी रंग क चोगा पहिरे रहा। तब पिलातुस कहेस, “इहइ अहइ उ मनई!”

⁶ जब उ पचे ओका देखेन तउ मुख्य याजकन अउर मन्दिर क पहरेदारन चिल्लाई क कहेन, “ऍका क्रूस पर चढ़ाइ द्या! एका क्रूस प चढ़ाइ द्या!”

पिलातुस ओनसे कहेस, “तू ऍका लइ जा अउर क्रूस प चढ़ाइ द्या, मइँ एहमाँ कउनो खोट नाहीं पाएउँ?”

⁷ यहूदियन जवाब दिहेन, “हमार व्यवस्था कहत ह कि एका मरइ क पड़ी काहेकि अपने क परमेस्सर क पूत होइ क दावा किहे अहइ।”

⁸ अब जब पिलातुस ओका इ कहत सुनेस तउ बहुत डेराइ गवा। ⁹ अउर फिन राज्यपाल क महल क अन्दर जाइके ईसू स कहेस, “तू कहाँ स आइ अहा?” मुला ईसू कउनो जवाब नाहीं दिहेस। ¹⁰ फिन पिलातुस ओसे कहेस, “का तू हमसे बात नाहीं करइ चाहत अहा? का तोहका पता नाहीं अहइ किइ मोरे अधिकार मँ अहइ कि तोहका मइँ छोड़ देउँ अउर तोहका क्रूस प चढ़ावइ क अधिकार मोका मिला अहइ।”

¹¹ ईसू ओका जवाब दिहेस, “तोहार मोरे ऊपर अधिकार तब तक नाहीं होइ सकत जब तलक परमेस्सर तोहका उ अधिकार नाहीं देत। इ बरे जउन मनइ तोहका मोरे हवाले किहे अहइ, उ तोहसे भी बड़ा पापी अहइ।”

¹² इ सनिके पिलातुस ओका छोड़इ क कउनो उपाय सोचइ लाग। मुला यहूदियन चिल्लाय लागेन, “जदि तू एका छोड़ देब्या तउ तू कैसर क दोस्त न अह्या कउनो मनई जउन खुदइ क राजा कहइ उ कैसर क विरोधी अहइ।”

¹³ जब पिलातुस इ सब्दन क सुनेस तउ उ ईसू क बाहेर उ जगह लइ गवा जउने क “पाथर क चउतरा।” कहा जात रहा। (इब्रानी भाखा मँ ऍका गब्बाता कहा गवा ह।) अउर हुवाँ निआव क आसन प बइठ गवा। ¹⁴ इ दिन फसह क त्यौहार क तैयारी क दिन^[a] रहा। दुपहरिया होइवाली रही। पिलातुस यहूदियन स कहेस, “इ रहा तोहार राजा।”

¹⁵ उ सबेन्ह चिल्लाएन, “ऍका लइ जा! ऍका लइ जा! ऍका क्रूस प चढ़ाय द्या!”

पिलातुस ओनसे कहेस, “का तू पचे चाहत अहा कि तोहरे राजा क मइँ क्रूस प चढ़ाउँ?”

इ सुनिके मुख्ययाजकन जवाब दिहेन, “कैसर क छोड़के हमार कउनो दूसर राजा नाहीं अहइ।”

¹⁶ फिन पिलातुस ओका क्रूस प चढ़ाइ क बरे ओनका सौंपि दिहेस।

ईसू क क्रूस प चढ़ावा जाब

(मत्ती 27:32-44; मरकुस 15:21-32; लूका 23:26-39)

इ तरीके स ईसू क हिरासत मँ लइ लीन्ह गवा।

¹⁷ आपन क्रूस उठाइके उ अइसी जगह प गवा जेका “खोपड़ी क जगह कहा जात ह।” (इब्रानी भाखा मँ ऍका “गुलगुता” कहा जात ह।) ¹⁸ हुवाँ स उ सबेन्ह ओका दुइ जने क साथे क्रूस प चढ़ाइ दिहेन। एक इ तरफ, दूसर दूसरी तरफ अउर बीज मँ ईसू रहा।

¹⁹ पिलातुस दोखपत्र क्रूस प लगाइ दिहस। जेहमॉ लिखा रहा, “ईसू नासरी, यहूदी क राजा।” ²⁰ तमाम यहूदियन उ दोखपत्र क पढ़ेन्ह, काहेकि जहाँ ईसू क क्रूस प चढ़ावा ग रहा, उ जगह सहर क लगे रही। अउर उ ऐलान इब्रानी, यूनानी अउर लातीनी भाखा मँ लिखा रहा।

²¹ तब मुख्य यहूदी याजकन पिलातुस स कहेन, “‘यहूदी क राजा’ न लिखा। मुला इ लिखा, ‘इ मनई कहे रहा यहूदी क राजा मइँ अहउँ।’”

²² पिलातुस जवाब दिहेस, “मइँ जउन कछू लिख दीन्ह, तउ लिख दीन्ह।”