Old/New Testament

सुलैमान बुद्धि क याचना करत ह

1 सुलैमान एक बहोत सक्तीसाली राजा बन गवा काहेकि यहोवा ओकरे परमेस्सर, ओकर संग रहा। यहोवा सुलैमान क बहोत जियादा महान बनाएस।

² सुलैमान इस्राएल क सबहिं लोगन स बातन किहस। उ सेना क सेनापतियन, सहस्रपतियन, निआवअधीसन, इस्राएल क सबहिं नेता लोगन अउर परिवारन क प्रमुखन स बातन किहस। ³ तब सुलैमान अउर सबहिं लोग ओकरे संग बटुरेन अउ उ ऊँच जगह क गएन जउन गिबोन नगर मँ रहा। परमेस्सर क मिलाप क तम्बू हुवाँ रहा। यहोवा क सेवक मूसा ओका तब बनाए रहा जब उ अउर इस्राएल क लोग रेगिस्ताने मँ रहेन। ⁴ दाऊद परमेस्सर क करार क सन्दूख क किर्यत्यारीम स यरूसलेम तलक लिआवा रहा। दाऊद यरूसलेम मँ एका रखइ बरे एक ठु जगह बनाए रहा। दाऊद यरूसलेम मँ करार क सन्दूख बरे एक तम्बू लगाइ दिहे रहा। ⁵ हूर क पूत ऊरी अउर ऊरी क पूत बसलेल एक काँसे क वेदी बनाए रहा। उ काँसे क वेदी गिबोन मँ पवित्तर तम्बू क समन्वा रही। एह बरे सुलैमान अउर उ सबइ लोग यहोवा स राय लेइ गिबोन गएन। ⁶ मिलाप क तम्बू मँ यहोवा क समन्वा काँसे क वेदी तलक सुलैमान गवा। सुलैमान एक हजार होमबलि वेदी पइ चढ़ाएस।

⁷ उ राति परमेस्सर सुलैमान क लगे आवा। परमेस्सर कहेस, “सुलैमान, मोहसे तू उ माँगा जउन कछू तू चाहत अहा कि मइँ तोहका देउँ।”

⁸ सुलैमान परमेस्सर स कहेस, “तू मोरे दाऊद क बरे बहोत कृपालु अहा। तू मोका, मोरे बाप क जगह पइ नवा राजा होइ बरे चुन्या ह। ⁹ यहोवा परमेस्सर, अब, तू जउन बचन मोरे पिता दाऊद क दिहा ह ओका बना रहइ द्या। तू मोका अइसी प्रजा क राजा बनाया, जउन पृथ्वी क रेत कणन क नाईं अनगिनत अहइँ। ¹⁰ तू मोका बुद्धि अउ गियान द्या। ताकि मइँ एन लोगन क सही रहा पइ लइ चल सकब। कउनो भी मनई तोहरी मदद क बिना तोहार ऍन महान लोगन पइ हुकूमत नाहीं कइ सकत ह।”

¹¹ परमेस्सर सुलैमान स कहेस, “तोहार रूख बिल्कुल ठीक अहइँ। तू धन या सम्पत्ति या सम्मान नाहीं माँग्या ह। तू इ भी नाहीं माँग्या ह कि तोहार दुस्मन मरि जाइँ। तू लम्बी उमिर भी नाहीं माँग्या ह। किन्तु तू अपने बरे बुद्धि अउ गियान मँग्या ह जेहसे तू मोर प्रजा क सम्बन्ध मँ बुद्धिमानी स निर्णय लइ सका, जेकर मइँ तोहका राजा बनाएउँ ह। ¹² एह बरे मइँ तोहका बुद्धि अउ गियान देब। मइँ तोहका धन, बैभव अउर सम्मान भी देब। तोहरे पहिले होइवाले राजा लोगन क लगे एतना धन अउर सम्मान कबहुँ नाहीं रहा अउर तोहरे पाछे होइवाले राजा लोगन क लगे भी ऍतना धन अउर सम्मान नाहीं होइ।”

¹³ तउ सुलैमान गिबोन क आराधना क जगह मँ गवा। जब सुलैमान उ मिलापवाले तम्बू क छोड़ेस अउ यरूसलेम लउट गवा अउ इस्राएल पइ राज्ज करइ लाग।

सुलैमान धन संग्रह अउर अपनी फउज खड़ी करत ह

¹⁴ सुलैमान घोड़न अउ रथ अपनी फउज क बरे एकट्ठा करब सुरू किहेस। सुलैमान क लगे एक हजार चार सौ रथ अउर बारह हजार घोड़सवार रहेन। सुलैमान ओनका रथ नगरन मँ रखेस। सुलैमान यरूसलेम मँ भी ओनमाँ स कछू क रखेस, अर्थात हुवाँ जहाँ राजा क निवास रहा। ¹⁵ सुलैमान यरूसलेम मँ बहोत सी चाँदी अउ सोना एकट्ठा किहस। उ ऍतना अधिक चाँदी अउ सोना एकट्ठा किहस कि उ चट्टानन स सामान्य होइ गवा। सुलैमान देवदारु क ऍतना लकड़ी बटोरेस कि उ पच्छिमी पहाड़ प्रदेस क गूलर क बृच्छ क नाई सामान्य होइ गइ। ¹⁶ सुलैमान, मिस्र अउर कुए स घोड़न मँगाएस। राजा क बइपारियन घोड़न कुए स बेसहेन। ¹⁷ सुलैमान क बइपारियन मिस्र स एक रथ चाँदी क छ: सौ सेकेल मँ अउर घोड़ा चाँदी क एक सौ पचास सेकेल मँ बेसहेन। तब बइपारियन घोड़न अउर रथन क हित्ती लोगन क राजा लोगन तथा अराम क राजा लोगन क हाथ बेच दिहस।

सुलैमान मन्दिर बनावइ क जोजना बनावत ह

2 सुलैमान यहोवा क नाउँ क प्रतिस्ठा क बरे एक मन्दिर अउर अपने बरे एक राजमहल बनावइ क निहचइ किहस। ² सुलैमान सत्तर हजार बोझ ढोवइया अउर पहाड़ी पहँटा मँ पाथर खनइ बरे अस्सी हजार मनइयन क चुनेस अउर उ तीन हजार छ: सौ मनई मजदूरन क निगरानी बरे चुनेस।

³ तब सुलैमान हूराम क सँदेसा पठएस। हूराम सोर नगर क राजा रहा। सुलैमान सँदेसा दिहे रहा,

“मोका वइसे ही मदद द्या जइसे तू मोरे बाप दाऊद क मदद दिहे रह्या। देवदार क बृच्छन स ओनका काठ पठए रह्या जेहसे उ पचे अपने रहइ क बरे महल बनाइ सके रहेन। ⁴ मइँ एक ठु मन्दिर बनाउब अउर ओका यहोवा आपन परमेस्सर क नाउँ क सम्मान देइ बरे अर्पित करब। हम पचे यहोवा क समन्वा सुगन्धित धूप जराब। हम पचे हमेसा पवित्तर रोटी क बिसेस मेज पई भेंट करब। हम पचे हर भिंसारे, हर सांझ, हर सबित क दिन मँ, हर नवा चन्द्र क दिन मँ अउर दूसर त्यौहार मँ जउन यहोवा हमार परमेस्सर हम पचन क मनावइ बरे आदेस दिहे रहा, मँ होमबलि भेंट चढ़ाउब। इ ओकर नेम अहइ जेका इस्राएल क लोगन क सदा पालन करइ चाही।

⁵ “जउन मन्दिर मइँ बनाउब उ महान होइ, काहेकि हमार परमेस्सर सबहिं देवतन स बड़ा अहइ। ⁶ किन्तु कउनो भी मनई सही अर्थ मँ हमरे परमेस्सर बरे भवन नाहीं बनाइ सकत। सरग हाँ, उच्चतम सरग भी परमेस्सर क अपने भीतर नाहीं रख सकत। मइँ सिरिफ एक जगह परमेस्सर क समन्वा सुगन्धि बारइ बरे बनाइ सकत हउँ।

⁷ “अब, मोरे लगे सोना, चाँदी, काँसा अउर लोहा क काम करइ मँ एक ठु कुसल मनई क पठवा। उ मनई क एकर गियान होइचाही कि बैगंनी, लाल अउ नीले ओढ़नन क उपयोग कइसे कीन्ह जात ह। उ मनई क हिआँ यहूदा अउ यरूसलेम मँ मोरे कुसल कारीगरन क संग नक्कासी करब होइ। मोर बाप दाऊद एन कुसल कारीगरन क चुने रहा। ⁸ मोरे लगे लबानोन देस स देवदार, चीर अउ चन्दन अउर सनोवर क लकड़ियन भी पठएन। मइँ जानत हउँ कि तोहार सेवक लबानोन स बृच्छन क काटइ मँ अनुभवी अहइँ। मोर सेवक तोहरे सेवकन क मदद करिहीं। ⁹ काहेकि मोका प्रचुर मात्रा मँ इमारती लकड़ी चाही। जउन मन्दिर मइँ बनावइ जात अहउँ उ बिसाल अउ अद्भुत होइ। ¹⁰ मइँ एक लाख पचीस हजार बुसल गेहूँ अउर एक लाख पचीस हजार बुसल जौ, एक लाख पन्द्रह हजार गैलन दाखरस अउर एक लाख पन्द्रह हजार गैलन तेल तोहरे ओन सेवकन क बरे दिहेउँ ह जउन इमारती लकड़ी बरे बृच्छन क काटत हीं।”

¹¹ तब सोर क राजा हूराम सुलैमान क जवाब दिहस। उ सुलैमान क एक ठु पत्र पठएस। पत्र मँ इ कहा गवा रहा:

“सुलैमान, यहोवा अपने लोगन स पिरेम करत ह। इहइ कारण अहइ कि उ तोहका ओनकर राजा चुनेस।” ¹² हूराम इ भी कहेस, “इस्राएल क यहोवा, परमेस्सर क बड़कई करा। उ धरती अउ अकास बनाएस। उ राजा दाऊद क बुद्धिमान पूत दिहस। सुलैमान, तोहका बुद्धि अउर समुझ दिहस ह। तू एक ठु मन्दिर यहोवा बरे बनावत अहा। तू अपने बरे भी एक राजमहल बनावत अहा। ¹³ मइँ तोहरे लगे एक ठु कुसल कारीगर पठउब। ओका बिभिन्न प्रकार क बहोत सी कलन क जानकारी अहइ। ओकर नाउँ हूराम-अबी अहइ। ¹⁴ ओकर महतारी दान क परिवार समूह क रही अउर ओकर बाप सोर नगर क रहा। हूराम-अबी सोना, चाँदी, काँसा, लोहा, पाथर अउ काठे क काम मँ कुसल अहइ। उ बैगनी, नीला, लाल ओढ़नन अउ कीमती मलमल ओढ़नन मँ कढ़ाई क काम मँ भी कुसल अहइ। उ हर कउनो डिज़ाईन क जेहका तू देखउब्या, कइ सकत ह। उ तोहरे कुसल कारीगरन क मदद करी अउर तोहरे बाप दाऊद क कुसल कारीगरन क मदद करी।

¹⁵ “तू गेहूँ, जौ, तेल अउर दाखरस पठावइ क जउन बचन दिहे रह्या, ओका पूरा करा अउर उ सबइ चिजियन क मोरे सेवकन क लगे पठइ द्या। ¹⁶ अउर हम लोग लबानोन देस स लकड़ी काटब। हम लोग ओतनि लकड़ी काटब जेतनी तोहका जरुरत अहइ। हम लोग समुद्दर मँ लकड़ी क लट्ठन क बेड़ा क उपयोग जापा नगर तलक लकड़ी पहोंचावइ बरे करब। तब तू लकड़ी क यरूसलेम लइ जाइ सकत ह।”

¹⁷ तब सुलैमान इस्राएल मँ बसइवाले सबहिं बाहरी लोगन क गनवाएस। (इ उ समइ क पाछे भवा जब दाऊद लोगन क गने रहा।) दाऊद, सुलैमान क बाप रहा। ओका 1,53,600 बाहरी लोग मिलेन। ¹⁸ सुलैमान 70,000 बिदेसियन क चिजियन ढोवइ बरे, 80,000 बिदेसियन क पहाड़न मँ पाथर काटइ बरे अउर 3,600 बिदेसियन क पहाड़न मँ पाथर काटइवाले मनईन क निरिच्छक बरे चुनेस।

सुलैमान मन्दिर बनावत ह

3 सुलैमान यहोवा क मन्दिर मोरिय्याह पर्वत पइ यरूसलेम मँ बनाउब सुरु किहस। पर्वत मोरिय्याह उ जगह अहइ जहाँ यहोवा सुलैमान क बाप दाऊद क दर्सन दिहे रहा। सुलैमान उहइ जगह पइ मन्दिर बनाएस जेका दाऊद तइयार कइ चुका रहा। उ जगह उ खरिहाने मँ रही जउन ओर्नान क रहा। ओर्नान यबूसी लोगन मँ स एक रहा। ² सुलैमान इस्राएल मँ अपनी हुकूमत क चउथे बरिस क दूसरे महीने मँ मन्दिर बनाउब सुरु किहस।

³ सुलैमान परमेस्सर क मन्दिर क नेवं क निर्माण क बरे जउने माप क उपयोग किहेस, इ उ अहइ: नेंव साठ हाथ लम्बी अउर बीस हाथ चउड़ी रही। सुलैमान पुराने हाथ क माप क ही उपयोग तब किहस जब उ मन्दिर क मापेस। ⁴ मन्दिर क सामने क दुआर मण्डप बीस हाथ लम्बा अउर बीस हाथ ऊँच रहा। सुलैमान दुआर मण्डप क भीतरी हींसा क निखालिस सोना स मढ़वाएस ⁵ सुलैमान बड़े कमरन क देवार पइ सनोवर लकड़ी क बनी चौकोर सिल्लियन धरेस। तब उ सनोवर क सिल्लियन क निखालिस सोना स मढ़ेस अउर उ निखालिस सोने पइ खजूरे क बृच्छ क चित्र अउ जंजीरन बनाएस। ⁶ सुलैमान मन्दिर क सुन्नरता क बरे ओहमाँ बहुमूल्य रतन लगाएस। जउने सोने क उपयोग सुलैमान किहस उ र्पैम स आवा रहा। ⁷ सुलैमान मन्दिर क भीतरी भवन क सोना स मढ़ दिहस। सुलैमान छते क कड़ियन चौखटन, देवारन अउर दरवाजन पइ सोना मढ़वाएस। सुलैमान देवारन पइ करूब सरगदूतन क खुदवाएस।

⁸ तब सुलैमान सब स जियादा पवित्तर जगहिया बनाएस। सब स जियादा पवित्तर जगहिया बीस हाथ लम्बी अउर बीस हाथ चउड़ी रही। इ ओतनी ही चउड़ी रही जेतना पूरा मन्दिर रहा। सुलैमान सब स जियादा पवित्तर जगहिया क देवारन पइ सोना मढ़वाएस। सोना क वजन लगभग बीस हजार चार सौ किलोग्राम रहा। ⁹ सोना क कीलन क वजन पाँच सौ पचहत्तर ग्राम रहा। सुलैमान ऊपरी कमरन क सोना स मढ़वाएस। ¹⁰ सुलैमान दुइ करूब सरगदूत सब स जियादा पवित्तर जगह पइ धरइ बरे बनाएस। कारीगरन करुब सरगदूतन क सोना स मढ़ दिहन। ¹¹ करूब (सरगदूतन) क हर एक पखना पाँच हाथ लम्बा रहा। पखनन क पूरी लम्बाई बीस हाथ रही। पहिले करूब सरगदूत क एक पखना कमरा क एक कइँती क देवार क छुअत रहा। दूसर पखना दूसरे करूब सरगदूत क पखना क छुअत रहा। ¹² दूसरे करूब सरगदूत क दूसर पखना कमरा क दूसरी कइँती क देवार क छुअत रहा। ¹³ करूब सरगदूत क पखना सब मिलाइके बीस हाथ फइले रहेन। करूब सरगदूत भीतर पवित्तर जगह कइँती लखत भए खड़े रहेन।

¹⁴ उ नीला, बैंगनी, लाल अउर कीमती ओढ़नन अउ कीमती सूती ओढ़नन स परदे^[a] क बनवाएस। परर्दे पइ करूबन क चित्र काढ़ दिहस।

¹⁵ सुलैमान मन्दिर क समन्वा दुइ खम्भन खड़ा किहस। खम्भन पैंतीस हाथ ऊँच रहेन। दुइनउँ खम्भन क सीर्स हींसा दुइ पाँच हाथ लम्बा रहा। ¹⁶ सुलैमान जंजीरन क हार बनाएस।। उ जंजीरन क खम्भन क सीर्स पइ धरेस। सुलैमान सौ अनार बनाएस अउर ओनका जंजीरन स लटकाएस। ¹⁷ तब सुलैमान मन्दिर क समन्वा खम्भन खड़े किहस। एक खम्भा दाईं कइँती रहा। दूसर खम्भा बाईं कइँती रहा। सुलैमान दाई कइँती क खम्भा क नाउँ “याकीन” अउर बाईं कइँती क खम्भा क नाउँ “बोअज” रखेस।

चरवाहा अउर ओकर भेड़ी

10 ईसू कहेस, “मइँ तोहसे सच्ची बात बतावत अहउँ कि जउऩ मनई भेड़िन क बाड़े मँ दरवाजा स न घुसिके कउनो अउर रस्ते स घुसत ह तउ, उ चोर अहइ, लुटेरा अहइ। ² मुला जउन मनई दरवाजे स घुसत ह, उ भेड़िन क चरवाहा अहइ। ³ दरवाजे क रखवाला ओकरे बरे दरवाजा खोल देत ह, अउर भेड़न क ओकर आवाज सुनत हीं। अपनी भेड़िन क नाउँ लेइ लेइ पुकारत ह अउर ओऩका बाड़े स बाहर निकारत ह। ⁴ जब उ आपन सब भेड़ निकार लेत ह तउ ओऩके आगे-आगे चलत ह अउर भेड़िन सब ओका पिछुआय लेति हीं, काहेकि उ ओकर आवाज पहिचानात हीं। ⁵ भेड़ कबहूँ कउनो अजनबी मनई क नाहीं पिछुआय लेतिन। ओसे उ दूर भागत हीं, काहेकि उ अजनबी क आवाज नाहीं पहिचनतिन।”

⁶ ईसू नजीर देइके ओऩका सबका समझावा चाहत रहा, मुला ओन सबकी समझ मँ इ बात नाहीं आइ कि ईसू ओऩका बतावत अहइ।

ईसू नीक चरवाहा

⁷ तब ईसू ओनसे फिन कहेस, “मइँ तोहका सच्ची सच्ची बात बतावत अहउँ, कि भेड़िन क बरे दरवाजा मइँ अहउँ। ⁸ उ सबेन्ह जउन मोसे पहिले आइ रहेन, चोर अउर लुटेरा अहइँ। मुला भेड़िन ओनके बात नाहीं सुनिन। ⁹ मइँ दरवाजा अहउँ। जदि कउनो मोसे होइके भीतर घुसइ चाहत ह, तउ ओकर बचाव होइ, उ अन्दर जाइ सकत ह अउर बाहर जाइ सकत ह अउर ओका चारागाह मिल जाई। ¹⁰ चोर केवल चोरी करइ क बरे, कतल करइ क बरे अउर सत्यानास करइ क बरे आवत ह। मुला मइँ इ बरे आइ अहउँ कि सब मनई भरपूर जिन्नगी पाइ सकइँ।

¹¹ “मइँ अच्छा चरवाहा अहउँ। नीक चरवाहा भेड़िन क बरे आपन जान तक देइ देत ह। ¹² मुला जउन केराए क मजदूर होत ह, उ चरवाहा न होइ क कारण, भेड़िया क आवत देखिके भेड़िन क छाँड़िके भाग जात ह, काहेकि उ भेड़ ओकर तउ रहत नाहीं। भेड़िया ओनके ऊपर हमला कइके ओनका छितराय देत ह। ¹³ इ बरे भाग जात ह, काहेकि उ रोजमर्रा की मजूरी पर काम करत ह अउर ओका भेड़िन क गिन क कउनो परवाह नाहीं रहत।

^14-15 “मइँ नीक चरवाहा अहउँ। आपन भेड़िन क मइँ जानित ह अउर मोर भेड़िन मोका वइसे जानत हीं, जइसे परमपिता मोका जानत ह अउ मइँ परमपिता क जानित ह। अपनी भेड़िन क बरे मइँ आपन जान दइ देइत हउँ। ¹⁶ मोर अउर भेड़िन अहइँ जउन इ बाड़ा क न अहीं। मोका ओनहूँ क लियावइ क अहइ। ओनहूँ मोर आवाज सुनिहइँ अउर इहइ बाड़ा मँ आइके एकट्ठी होइ जइहीं। फिन एक भेड़िन क समूह क एक चरवाहा रही। ¹⁷ परमपिता मोसे इहइ बरे पिरेम करत ह काहेकि मइँ आपन जान देइ देइत ह। मइँ आपन जिन्नगी इ बरे दइ देइत ह जइसे मइँ एका फिन पाइ जाई। कउनो हमसे ऍका लइ नाहीं लेत ¹⁸ मइँ खुदइ अपनी इच्छा स ऍका दइ देइत ह। मोका ऍका फिन वापस लेइ क अधिकार भी अहइ। इ आदेस मोका परमपिता स मिला अहइ।”

¹⁹ एन सब्दन सुनिके यहूदियन मँ फिन स फूट पैदा होइ गइ। ²⁰ बहुत इ कहइ लागेन, “इ तउ पगलाइ गवा अहइ। एकरे ऊपर कउनो बुरी दुस्ट आतिमा सवार अहइ। तू सबेन्ह काहे बरे एका सुनत अहा।”

²¹ दूसर कछू मनई कहइ लागेन, “इ सब्दन अइसे मनई क नाहीं होइ सकत जेकरे ऊपर दुस्ट आतिमा सवार होइ। कउनो दुस्ट आतिमा कबहूँ कउनो आँधर क आँखी नाहीं दइ सकत।”

यहूदियन ईसू क विरोध करत हीं

²² फिन यरुसलेम मँ समर्पण क त्यौहार^[a] आइ गवा। जाड़ा का दिन रहा। ²³ ईसू मन्दिर मँ सुलैमान क दलान मँ ठहरत रहा।