Old/New Testament
इस्साकार क सन्तान
7 इस्साकार क चार पूत रहेन। ओनकर नाउँ तोला, पूआ, यासूब, अउ सिम्रोन रहेन।
2 तोला क पूत उज्जी, रपयाह, यरीएल, यहमै, यिबसाम अउर समूएल रहेन। उ पचे सबहिं अपने परिवारन क प्रमुख रहेन। उ पचे मनसेधू अउ ओनकर सन्तान जोधा रहेन। ओनकर परिवार बाढ़त रहेन अउ जब दाऊद राजा भवा, तब हुवाँ बाईस हजार छ: सौ मनई जुद्ध बरे तइयार रहेन।
3 उज्जी क पूत यिज़ह्याह रहा। यिज़ह्याह क पूत मीकाएल, ओबद्याह, योएल, यिस्सिय्याह, रहेन। उ पचे सबहिं पाँचहु अपने परिवारन क प्रमुख रहेन। 4 ओनके परिवार क इतिहास इ बतावत ह कि ओनके लगे छत्तीस हजार जोधा जुद्ध क बरे तइयार रहेन। ओनकर बड़ा परिवार रहा। काहेकि ओनकर बहोत स मेहरारुअन अउ बच्चन रहेन।
5 परिवार इतिहास इ बतावत ह कि इस्सकार क सबहिं परिवार समूहन मँ सत्तासी हजार सक्तीसाली फउजी रहेन।
बिन्यामीन क सन्तान
6 बिन्यामीन क तीन पूत रहेन। ओनकर नाउँ बेला, बेकेर अउ यदीएल रहेन।
7 बेला क पाँच पूत रहेन। ओनकर नाउँ एसबोन, उज्जी, उज्जीएल, यरीमोत, अउ इरी रहेन। उ पचे अपने परिवारन क प्रमुखन रहेन। ओनकर परिवार इतिहास बतावत ह कि ओनके लगे बाईस हजार चौंतीस फउजी रहेन।
8 बेकेर क पूत जमीरा, योआस, एतीएजेर, एल्योएनै, ओम्री, यरेमोत, अबिय्याह, अनातोत अउ आलेमेत रहेन। उ पचे सबहिं बेकेर क बच्चा रहेन। 9 ओनकर परिवार इतिहास बतावत ह कि परिवार प्रमुख कउन रहेन अउर ओनकर परिवार इतिहास इ भी कहत ह ओनकर बीस हजार दुइ सौ फउजी रहेन।
10 यदीएल क पूत बिल्हान रहा। बिल्लन क पूत यूस, बिन्यामीन, एहद, कनान, जेतान, तर्सीस अउ अहीसहर रहेन। 11 यदीएल क सबहिं पूत अपने परिवार क प्रमुख रहेन। ओनकर सतरह हजार दुइ सौ फउजी जुद्ध बरे तइयार रहेन।
12 सुप्पीम अउ हुप्पीम ईर सन्तान रहेन। हूसी अहेर क पूत रहा।
नप्ताली क सन्तान
13 नप्ताली क पूत एसीएल, गूनी, येसेर अउ सल्लूम रहेन।
अउर इ सबइ बिल्हा क सन्तान रहेन।
मनस्से क सन्तान
14 इ सबइ मनस्से क सन्तान अहइँ। मनस्से क उसीएल नाउँ क पूत रहा। जउन ओकर अरामी रखैल स रहा। ओनकर माकीर भी रहा। माकीर गिलाद क बाप रहा। 15 माकीर हुप्पीम अउर सुप्पीम लोगन क एक मेहरारु स बियाह किहस। माका क दूसर मेहरारु क नाउँ सलोफाद रहा। सलोफाद क सिरिफ बिटियन रहिन। माकीर क बहिन क नाउँ भी माका रहा। 16 माकीर क मेहरारु माका क एक पूत भवा। माका अपने पूत क नाउँ पेरेस धरेस। पेरेस क भाई क नाउँ सेरेस रहा। सेरेस क पूत ऊलाम अउ राकेम रहेन।
17 ऊलाम क पूत बदान रहा।
इ सबइ गिलाद क सन्तान रहेन। गिलाद माकीर क पूत रहा। माकीर मनस्से क पूत रहा। 18 माकीर क बहिन हम्मोलेकेत क पूत ईसहोद, अबीएजेर, अउर महला रहेन।
19 समीदा क पूत अहयान, सेकेम लिखी अउर अनीआम रहेन।
एप्रैम क सन्तान
20 एप्रैम क सन्तानन क इ सबइ नाउँ रहेन। एप्रैम क पूत सूतेलह रहा। सूतेलह क पूत बेरेद रहा। बेरेद क पूत तहत रहा। तहत क पूत एलाद रहा। 21 एलाद क पूत तहत रहा। तहत क पूत जाबाद रहा। जाबाद क पूत सूतेलह रहा।
कछू मनइयन जउन गत नगर मँ बड़े भए रहेन, येजेर अउ एलाद क मार डाएन। इ एह बरे भवा कि येजेर अउ एलाद ओन लोगन क गइयन अउ भेड़िन चोरावइ गत गए रहेन। 22 एप्रैम एजेर अउ एलाद क बाप रहा। उ कइउ दिनन तलक रोवत रहा। काहेकि येजेर अउर एलाद मर गए रहेन। एप्रैम क परिवार ओका सांत्वना देइ आवा। 23 तब एप्रैम अपनी मेहरारु क संग तने क सम्बंध किहस। एप्रैम क मेहरारु गर्भवती भइ अउ उ एक पूत क जन्म दिहस। एप्रैम अपने नवे पूत क नाउँ बरीआ धरेस काहेकि ओकरे परिवार क संग कछू बुरा भवा रहा। 24 एप्रैम क बिटिया सेरा रही। सेरा नीच बेथोरान अउ ऊँच बेथोरान अउर नीच उज्जेनसेरा अउ ऊँच उज्जेनसेरा बसाएस।
25 रेपा एप्रैम क पूत रहा। रेसेप रेपा क पूत रहा। तेलह रेसेप क पूत रहा। तहन तेलह क पूत रहा। 26 लादान तहन क पूत रहा अम्मीहूद लादान क पूत रहा। एलीसाम अम्मीहूद क पूत रहा। 27 नून एलीसामा क पूत रहा। यहोसू नून क पूत रहा।
28 इ सबइ उ नगर अउ प्रदेस अहइँ जहाँ एप्रैम क सन्तान रहत रहेन। बेतेल अउ एकरे नगिचे क गाँव पूरब मँ नारान, गेजेर अउ पच्छिम मँ एकरे निअरे क गावँ, अउ सेकम अउ अज्जा क रास्ते तलक क निअरवाले गांँव। 29 मनस्से क भुइँया क चउहद्दी पइ बेतसान, मगिदो अउ दोर नगर अउर ओनका नजिक सक सबहिं गाँव रहेन। इस्राएल क पूत यूसुफ क सन्तान एन नगरन मँ रहत रहिन।
आसेर क सन्तान
30 आसेर क पूत यिम्ना, यिस्वा, यिस्वी अउ बरीआ रहेन। ओनकर बहिन क नाउँ सरेह रहा।
31 बरीआ क पूत हेबरे अउ मलकीएल रहेन। मलकीएल बिर्जोत क बाप रहा।
32 हेबेर यपलेत, सोमेर होताम अउर ओनकर बहिन सू्आ क बाप रहा।
33 यपलेत क पूत पासक, बिम्हाल अउ अस्नात रहेन। इ सबइ यपलेत क बच्चन रहेन।
34 सेमरे क पूत अही, रोहगा, यहुब्बा अउ अराम रहेन।
35 सेमेर क भाई क नाउँ हेलेम रहा। हेलेम क पूत सो पह, यिम्ना, सेलेस अउ आमाल रहेन।
36 सोपह क पूत सूह, हर्नेपे, सूआल, बेरी, इम्रा, 37 बेसेर, होद, सम्मा, सिलसा, यित्रान अउ बेरा रहेन।
38 येतेर क पूत यपुन्ने, पिस्पा अउ अरा रहेन।
39 उल्ला क पूत आरह, हन्नीएल, अउ रिस्चा रहेन।
40 इ सबइ मनई आसेर क सन्तान रहिन। उ पचे अपने परिवारन क प्रमुख रहेन। उ पचे उत्तिम पुरुख रहेन। उ पचे योद्धा अउ महान प्रमुख रहेन। ओनके परिवारे क इतिहास बतावत ह कि छब्बीस हजार फउजी जुद्ध बरे तइयार रहेन।
राजा साऊल क परिवार इतिहास
8 बिन्यामीन बेला क बाप रहा। बेला बिन्यामीन क पहिला पूत रहा। अबेल बिन्यामीन क दूसर पूत रहा। अहरह बिन्यामीन क तीसर पूत रहा। 2 नोहा बिन्यामीन क चउथा पूत रहा अउर रापा बिन्यामीन क पाँचवाँ पूत रहा।
3 बेला क पूत अद्दार, गेरा, अबीहूद, 4 अबीसू, नामान, अहोह, 5 गेरा, सपूपान अउ हूराम रहेन।
6 एहूद क सन्तान इ सबइ रहेन। इ सबइ गेबा मँ अपने परिवारन क प्रमुख रहेन। उ पचे आपन घर तजइ अउर मानहत मँ रहइ क मजबूर कीन्ह गए रहेन। 7 एहूद क सन्तान नामान, अहिय्याह, अउर गेरा रहेन। गेरा ओनका घर तजइ क मजबूर किहस। गेरा उज्जा अउ अहीलूद क बाप रहा।
8 सहरैम आपन पत्नियन हसीम अउ बारा क मोआब मँ तलाक दिहस। इ करइ क पाछे, ओकर कछू दूसर गदेलन दूसर पत्नी स पइदा भएन। 9-10 सहर्रेम क योआब, सिब्या, मेसा, मल्काम, यूस, सोक्या, अउर मिर्मा ओकर मेहरारु होदेस स भएन। उ पचे अपने परिवारन क प्रमुख रहेन। 11 सहरेर्म अउर हसीम क दुइ पूत अबीतूब अउ एल्पाल रहेन।
12-13 एल्पाल क पूत एबेर, मिसाम, सेमेद, बरीआ अउ सेमा रहेन। सेमेद ओनो अउ लोद नगर अउ लोद क चारिहुँ कइँती नान्ह नगर बनाएस। बरीआ अउ सेमा अय्यालोन मँ रहइवाले परिवारन क प्रमुख रहेन। ओन पूतन गत मँ रहइवालन क ओका तजइ क मजबूर किहन।
14 बरीआ क पूत सासक अउर यरमोत, 15 जबद्याह, अराद, एदेर, 16 मीकाएल, यिस्पा अउ योहा रहेन। 17 एल्पाल क पूत जबद्याह, मुसुल्लाम, हिजकी, हेबर, 18 यिसमरै, थिजलीआ अउ योबाब रहेन।
19 सिमी क पूत याकीम, जिवी, जब्दी, 20 एलीएनै, सिल्लतै, एलीएल, 21 अदायाह, बरायाह अउ सिम्रात रहेन।
22 सासक क पूत यिसपान, यबेर, एलीएल, 23 अब्दोन जिक्री, हानान, 24 हनन्याह, एलाम, अन्तोतिय्याह, 25 यिपदयाह, अउर पनूएल रहेन।
26 यरोहाम क पूत समसैरे, सहर्याह, अतल्याह, 27 योरेस्याह, एलिय्याह, अउर जिवी रहेन।
28 इ सबइ सबहिं मनई अपने परिवारन क प्रमुख रहेन। उ पचे अपने परिवार क इतिहास मँ प्रमुख क रूप मँ अंकित रहेन। उ पचे यरूसलेम मँ रहत रहेन।
29 येयील गिबोन क बाप रहा। उ गिबोन नगर मं रहत रहा। ययील क मेहरारु क नाउँ माका रहा। 30 योयील क सबस बड़का पूत अब्दोन रहा। दूसर पूत सूर, कीस, बाल, नेर, नादाब, 31 गदोर, अह्यो, जेकेर अउर मिकोत रहेन, 32 मिकोत सिमा क बाप रहा। इ सबइ पूत भी यरूसलेम मँ अपने सम्बन्धियन क नगिचे रहत रहेन।
33 नेर, कीस, क बाप रहा कीस साऊल क बाप रहा। अउर साऊल योनातान, मल्कीसू, अबीनादाब अउर एसबाल क बाप रहा।
34 योनातान क पूत मरीब्बाल रहा। मरीब्बाल मीका क बाप रहा।
35 मीका क पूत पीतोन, मेलेक, तारे अउ आहाज रहेन।
36 आहाज यहोअद्दा क बाप रहा। यहोअद्दा आलेमेत, अजमावेत अउ जिम्री क बाप रहा। जिम्री मोसा क बाप रहा। 37 मोसा बिना क बाप रहा। रापा बिना क पूत रहा। एलासा रापा क पूत रहा अउर आसेल एलासा क पूत रहा।
38 आसेल क छ: पूत रहेन। ओनकर नाउँ अज्रीकाम, बोकरु, यिस्माएल, सार्याह, ओबद्याह अउर हानान रहेन। इ सबइ सबहिं पूत आसेल क सन्तान रहेन।
39 आसेल क भाई एसेक रहा। एसेक क कछू पूत रहेन। एसेक क इ सबइ पूत रहेन: ऊलाम एसेक क सब स बड़का पूत रहा। यूसा एसेक क दूसर पूत रहा। एलीपेलेत एसेक क तीसर पूत रहा। 40 ऊलाम क पूत बलवान जोधा अउर धनुस-बाण क प्रयोग मँ वुसल रहेन। ओनकर बहोत स पूत अउ पोता रहेन। सब मिलाइके डेढ़ सौ पूत अउ पोता रहेन। सब मिलाइके डेढ़ सौ पूत अउ पोता रहेन।
इ सबइ सबहिं मनई बिन्यामीन क सन्तान रहिन।
9 इस्राएल क लोगन क नाउँ ओनके परिवार क इतिहास मँ अंकित रहेन। उ सबइ परिवार इतिहास इस्राएल क राजा लोगन क इतिहास क पुस्तक मँ सम्मिलित भए रहेन।
यरूसलेम क लोग
यहूदा क लोग बन्दी बनाए गए रहेन अउर बाबेल क जाइ क मजबूर कीन्ह गए रहेन। उ पचे उ जगह पइ एह बरे लइ जावा गएन, काहेकि उ पचे परमेस्सर क बरे बिस्सास क जोग्ग नाहीं रहेन। 2 सब स पहिले लउटिके आवइबाले अउर अपने नगरन अउ अपने पहँटा मँ रहइवाले लोगन मँ कछू इस्राएली, याजक, लेवीबंसी अउ मन्दिर मँ सेवा करइवाले सेवक रहेन।
3 इ सबइ यरूसलेम मँ रहइवाला यहूदा, बिन्यामीन, एप्रैम अउर मनस्से परिवार समूह क लोग अहइँ।
4 ऊतै अम्मीहूद क पूत रहा। अम्मीहूद ओम्री क पूत रहा। ओम्री इम्री क पूत रहा। इम्री बानी क पूत रहा। बानी पेरेस क सन्तान रहा। पेरेस यहूदा क पूत रहा।
5 सीलोइ लोग जउन यरूसलेम मँ रहत रहेन, इ सबइ रहेन: असायाह, सब स बड़का पूत रहा। अउ असायाह क पूत रहेन।
6 जेरह लोग, जउन यरूसलेम मँ रहत रहेन, इ सबइ रहेन; यूएल अउर ओकर सम्बन्धी, उ सबइ सब मिलाइके छ: सौ नब्बे रहेन।
7 बिन्यामीन क परिवार समूह स जउन लोग यरूसलेम मँ रहेन, उ सबइ इ सब अहइँ: सल्लू मसुल्लाम क पूत रहा। मुसल्लाम होदब्याह क पूत रहा। होदब्याह हस्सनूआ क पूत रहा। 8 यिबनाय्याह यरोहाम क पूत रहा। एला उज्जी क पूत रहा। उज्जी मिवी क पूत रहा। मसुल्लाम सपत्याह क पूत रहा। सपत्याह रूएल क पूत रहा। रूएल यिब्निय्याह क पूत रहा। 9 बिन्यामीन क परिवार इतिहास बतावत ह कि यरूसलेम मँ ओनकर नौ सौ छप्पन मनई रहत रहेन। उ सबइ सबहिं मनई अपने परिवारन क प्रमुख रहेन।
10 इ सबइ उ सब याजक अहइँ जउन यरूसलेम मँ रहत रहेन: यदायाह, यहोयारीब, याकीन अउ अज़र्याह। 11 अज़र्याह हिलकिय्याह क पूत रहा। हिलकिय्याह मसुल्लाम क पूत रहा। मसुल्लाम सादोक क पूत रहा। सादोक मरायोत क पूत रहा। मरायोत अहीतूब क पूत रहा। अहीतूब परमेससर क मन्दिर क बरे बिसेस उत्तरदायी अधिकारी रहा। 12 यरोबाम क पूत अदायाह भी रहा। यरोहाम पसहूर क पूत रहा पसहूूर मल्किय्याह क पूत रहा अउर हुवाँ अदोएल क पूत मासै रहा। अदोएल जहजेस क पूत रहा। जेरा मसुल्लाम क पूत रहा। मसुल्लाम मसिल्लीत क पूत रहा। मसिल्लीत इम्मेर क पूत रहा।
13 हुवाँ एक हजार सात सौ साठ याजकन रहेन। उ पचे अपने परिवारन क प्रमुख रहेन। उ पचे परमेस्सर क मन्दिर मँ सेवा करइ क कार्य क बरे उत्तरदायी रहेन।
14 लेवी क परिवार समूह स जउन लोग यरूसलेम मँ रहत रहेन, उ पचे इ सबइ अहइँ: हस्सूब क पूत समायाह, हस्सूब अज्रीकाम क पूत रहा। अज्रीकाम हसब्याह क पूत रहा। हसब्याह मरारी क सन्तानन क पूत रहा। 15 यरूसलेम मँ बकबक्कर, हरेस, गालाल अउ मत्तन्याह भी रहेन। मत्तन्याह मीका क पूत रहा। मीका जिक्री क पूत रहा। जिक्री आसाप क पूत रहा। 16 ओबद्याह समायाह क पूत रहा। समायाह गालाल क पूत रहा। गालाल यदूतून क पूत रहा अउर आसा क पूत बेरेक्याह यरूसलेम मँ रहत रहा। आसा एल्काना क पूत रहा। एल्काना नेतोपा लोगन क लगे गाँवअन मँ रहत रहा।
17 इ सबइ उ सब दुआरपाल अहइँ जउन यरूसलेम मँ रहत रहेन: सल्लूम, अक्कूब, तल्मोन, अहीमान अउर ओनकर सम्बंधी। सल्लूम ओनकर प्रमुख रहा। 18 अब इ सबइ मनई पूरब कइँती राजा क दुआर क ठीक बगल पढ़ाव डालि रहत रहेन। उ सबइ दुआरपाल लेवी परिवार समूह स रहेन। 19 सल्लूम कोरे क पूत रहा। कोरे एब्यासाप क पूत रहा। एब्याहसाप कोरह क पूत रहा। सल्लूम अउ ओकर भाई दुआरपाल रहेन। उ पचे कोरे परिवार स रहेन। ओनका पवित्तर तम्बू क दुआर क रच्छा करइ क कार्य करइ रहा। उ पचे एका वइसे ही करत रहेन जइसे एनकर पुरखन एनके पहिले किहे रहेन। ओनके पुरखन क इ कार्य रहा कि उ पचे पवित्तर तम्बू क दुआर क रच्छा करइँ। 20 पुराने जमाने मँ, पीनहास दुआरपालन क निरिच्छक रहा। पीनहास एलीआज़र क पूत रहा। यहोवा पीनहास क संग रहा: 21 मेसेलम्याह क पूत जकर्याह पवित्तर तम्बू क दुआर क दुआरपाल रहा।
22 सब मिलाइके दुइ सौ बारह मनई पवित्तर तम्बू क दुआर क रच्छा बरे चुने गए रहेन। ओनकर नाउँ ओनके परिवार इतिहास मँ ओनके नान्ह नगरन मँ लिखे। भए रहेन। दाऊद अउ समूएल नबी ओन लोगन क चुनेन, काहेकि ओन पइ बिस्सास कीन्ह जाइ सकत रहा। 23 दुआरपालन अउर ओनकर सन्तानन क जिम्मेदारी यहोवा क मन्दिर, पवित्तर तम्बू क रच्छा करब रहा। 24 हुवाँ चारिहुँ कइँति दुआर रहेन: पूरब, पच्छिम, उत्तर अउर दर्खियन। 25 दुआरपालन क सम्बन्धियन क, जउन नान्ह नगर मँ रहत रहेन, समइ-समइ पइ आइके ओनका मदद करइ पड़त रही। उ पचे आवत रहेन अउर हर बार सात दिन तलक दुआरपालन क सहायता करत रहेन।
26 दुआरपालन क चार प्रमुख दुआरपाल हुवाँ रहेन। उ पचे लेवीबंसी मनई रहेन। ओनकर कर्त्तव्य परमेस्सर क मन्दिर क कमरन अउ खजाना क देखभाल करब रहा। 27 उ पचे रातिभर परमेस्सर क मन्दिर क रच्छा मँ खड़े रहत रहेन अउर परमेस्सर क मन्दिर क हर रोज भिंसारे खोलइ क ओनकर काम रहा।
28 कछू दुआरपालन क काम मन्दिर क सेवा मँ काम आवइवाली तश्तरियन क देखभाल करब रहा। उ पचे एन तस्तरियन क तब गनत रहेन जब उ पचे भीतर लाई जात रहिन। उ पचे एन तस्तरियन क तब भी गनत् रहेन जब उ पचे बाहेर जात रहिन। 29 दूसर दुआरपाल रस्मी-सामग्री अउर ओन बिसेस तस्तरियन क देखभाल क बरे चुने जात रहेन। उ पचे आटा, दाखरस, तेल, सुगन्धि अउर बिसेस तेल क भी देखरेख करत रहेन। 30 किन्तु सिरिफ याजक ही बिसेस तेल क मिलावइ क काम करत रहेन।
31 एक मतित्याह नाउँ क लेवीबंसी रहा जेकर काम भेंट मँ उपयोग क बरे रोटी पकाउब रहा। मतित्याह सल्लूम क सब स बड़ा पूत रहा। सल्लूम कोरह परिवार क रहा। 32 दुआरपालन मँ स कछू जउन कहात परिवार क रहेन, हर एक सबित क मेज पइ रखी जाइवाली रोटी क तइयार करइ क काम करत रहेन।
33 उ पचे लेबीवंसी जउन गायक रहेन अउर अपने परिवारन क प्रमुख रहेन, मन्दिर क कमरन मँ ठहरत रहेन। ओनका दूसर काम नाहीं करइ पड़त रहेन। काहेकि उ पचे मन्दिर मँ दिन-रात काम क बरे उत्तरदायी रहेन।
34 इ सबइ लेवीबंसी अपने परिवारन क प्रमुख रहेन। उ पचे अपने परिवारन क इतिहास मँ प्रमुख क रूप मँ अंकित रहेन। उ पचे यरूसलेम मँ रहत रहेन।
राजा साऊल क परिवार इतिहास
35 यीएल गिबोन क बाप रहा। यीएल गिबोन नगर मँ रहत रहा। यीएल क मेहरारु क नाउँ माका रहा। 36 यीएल क सब स बड़का पूत अब्दोन रहा। दूसर पूत सूर, कीस, बाल नेर, नादाब, 37 गदोर, अह्यो, जकर्याह अउर मिल्कोत रहेन। 38 मिल्कोत सिमाम क बाप रहा। यीएल क परिवार अपने सम्बन्धियन क संग यरूसलेम मँ रहत रहा।
39 नेर कीस क बाप रहा। कीस साऊल क बाप रहा अउर साऊल योनातान, मल्कीस अबीनादाब अउर एसबाल क बाप रहा।
40 योनातान क पूत मरीब्बाल रहा। मरीब्बाल मीका बाप रहा।
41 मीका क पूत पीतोन, मेलेक, तहरे अउर अहाज रहेन, 42 आहाज जदा क बाप रहा। जदा यारा क बाप रहा। आलेमेत, अजमावेत अउर जिम्री क बाप रहा। जिम्री मोसा क बाप रहा। 43 मोसा बिना क पूत रहा। रपायाह बिना क पूत रहा। एलासा रपायाह क पूत रहा अउर आसेल एलासा क पूत रहा।
44 आसेल क छ: पूत रहेन। ओनकर नाउँ रहेन: अज्रीकाम, बोकरू, इस्माएल, सार्याह, ओबद्याह, अउर हनान। उ पचे आसेल क बच्चन रहेन।
ईसू क खोज
22 दूसरे दिन सब मनइयन क भीड़ जउन झील क पार बच गइ रही, इ देखेस कि हुवाँ एक ठु नाव अकेले रही अउर अपने चेलन क साथ ईसू उ नाव प नाहीं सवार भवा बल्कि ओकर चेलन अकेल्ले ही रवाना भएन। 23 तिबिरियास क कई ठु नाव उ जगह प आइके रूकिन जउने जगह प उ पचे पर्भू क धन्यबाद दिहे क बाद रोटी खाए रहेन। 24 इ तरह जब उ भीड़ देखेस कि न तउ हुवाँ ईसू अहइ अउर न तउ ओनकइ चेलन अहइँ, तउ उ पचे नाव प चढ़िके अउर ईसू क दूँढ़त कफ़रनहूम क तरफ चल पड़ेन।
ईसू जीवन क रोटी
25 जब उ पचे ईसू क झील क दूसरे पार पाएन तउ ओसे कहेन, “हे गुरू, तू हियाँ कब आया?”
26 ऍकरे जबाव मँ ईसू ओनसे कहेस, “मइँ तोहका सच्ची बात बतावत अहउँ, तू पचे मोका इ बरे नाहीं खोजत अहा कि तू सब अदभुत कारजन देखे अहा, मुला तू पचे इ बरे मोका दूँढ़त अहा, काहेकि तू सब पेट भरिके रोटी खाए अहा। 27 उ खाना क बरे मेहनत न करइ चाही जउन खराब होइ जाइ मुला ओकरे बरे जतन करइ चाही जउन हमेसा उत्तिम बना रहत ह अउर अनन्त जीवन देत ह, जउन तोहका सबक मनई क पूत देई। काहेकि परमपिता ओका मानके आपन मोहर ओह पइ लगाइ दिहे अहइ।”
28 मनइयन ईसू स पूछेन, “परमेस्सर क कारज क बरे हम सब का करी?”
29 ईसू ओनका इ जवाब दिहेस, “जउन परमेस्सर चाहत ह कारज इ अहइ कि तू पचे ओह पइ बिसवास करा जेहिका उ भेजे अहइ।”
30 तउ उ पचे ओसे कहेन, “फिन तू कउन स अद्भुत कारज देखॉवत अहा जेहिका देखिके हम तोह पर बिसवास करी? तू कउन स कारज देखॉवत अहा? 31 हमार पूर्वजन रेगिस्तान मँ मन्ना[a] खाएन, जइसे कि पवित्तर सास्तरन मँ लिखा बा, ‘परमेस्सर ओनका खाइ क बरे सरग स रोटी दिहेस।’(A)”
32 एह पइ ईसू ओनसे कहेस, “मइँ तोहका सच बतावत अहउँ कि मूसा नाहीं, मुला मोर परमपिता तोहका सरग स सच्ची रोटी देत ह। 33 उ रोटी जउन परमेस्सर देत ह, उ सरग स उतरी अहइ, अउर इ संसार क जीवन देत ह।” 34 तउ उ पचे ओसे कहेन, “हे पर्भू, अब हम पचे क उ रोटी द्या अउर हमेसा देत रहा।”
35 ईसू ओनसे कहेस, “मइँ उ रोटी अहउँ जउन जीवन देत ह। जउन मनई मोरे पास आवत ह, उ कबहूँ भूखा नाहीं रहत अउर जउन मोरे मँ बिसवास करत ह, उ कबहूँ पियासा नाहीं रहत। 36 मइँ तोह सबन क पहले स बताइ चुका अहउँ कि तू मोका देख लिए अहा, तबहूँ मोहमाँ बिसवास नाहीं करत्या। 37 एक एक मनई जेहिका परमपिता मोका सौंपे अहइ, मोरे पास आई जउन मोरे पास आवत ह, मइँ ओका कबहूँ न लौटाउब। 38 मइँ सरग स अपनी मर्जी स काम करइ नाहीं आइ अहउँ, मइँ तउ ओकर मरजी क पूरा करइ आइ बाटेउँ, जउन मोका हिआँ भेजे अहइ। 39 अउर उ भेजइवाले क इच्छा इ बाटइ कि जेका जेका उ मोका सौपे अहइ, ओहमाँ म एकउ क न खोइ देउँ अउर आखिरी दिन ओनका सबका जिन्दा कइ देउँ। 40 इहइ मोरे परमपिता क इच्छा अहइ कि हर एक मनई जउन पूत क देखत ह अउर ओहमाँ बिसवास करत ह, अनन्त जीवन पाई अउर आखिरी दिन मइँ ओका जियाइ देइ।”
41 इ सुनिके यहूदियन ईसू प बड़बड़ाय लागेन, काहेकि उ कहत रहा, “मइँ उ रोटी अहउँ जउन सरग स उतरी अहउँ।” 42 अउर उ पचे कहेन, “का इ यूसुफ क पूत ईसू न अहइ का हम एनके महतारी बाप क नाहीं जानित? फिन इ कइसे कहत बा कि ‘मइँ सरग स उतरा हउँ’?”
43 एकरे जवाब मँ ईसू ओनसे कहेस, “एक दूसरे प बड़बड़ाब छोड़ द्या, 44 मोरे लगे तब तलक कउनो नाहीं आइ सकत जब तक मोका भेजइवाला परमपिता ओका मोरे तरफ न खींचइ। मइँ आखिरी दिन ओका फिन जियाइ देब।
Awadhi Bible: Easy-to-Read Version. Copyright © 2005 Bible League International.