Old/New Testament

दाऊद क अलग-अलग ठउर प जाब

22 दाऊद गथ क तजि दिहस। दाऊद अदुल्लाम क गुफा मँ पराइ गवा। दाऊद क भइयन अउ रिस्तेदारन सुनेन कि दाऊद अदुल्लाम मँ रहा। उ पचे दाऊद क मिलइ हुआँ गएन। ² बहोत स मनई दाऊद क लगे होइ गएन। उ सबइ, जउन कउनो विपत्ति मँ रहेन या कर्जा मँ रहेन या संतुट्ठ नाहीं रहेन। दाऊद क संग होइ गएन। दाऊद क लगे चार सौ मनसेधू रहेन।

³ दाऊद अदुल्लाम क तजि दिहस अउर उ मोआब मँ बसा मिस्पा चला गवा। दाऊद मोआब क राजा स कहेस, “कृपा कइके मोरे महतारी बाप क आवइ द्या अउर आपन लगे तब तलक रहइ द्या जब ताई मइँ इ न समुझ सकउँ कि परमेस्सर मोरे संग का करइ जात अहइ।” ⁴ दाऊद आपन महतारी-बाप क मोआब क राजा क लगे तजि दिहस। दाऊद क महतारी बाप मोआब क राजा क लगे तब तलक ठहरेन जब तलक दाऊद किला मँ रहा।

⁵ मुला नबी गाद दाऊद स कहेस, “किला मँ जिन ठहरा। यहूदा पहँटा मँ जा।” ऍह बरे दाऊद हुआँ स चल पड़ा अउ हरथ क जंगल मँ गवा।

साऊल अहीमेलेक क परिवार क नसावत

⁶ साऊल जानि लिहेस कि दाऊद अउ ओकरे मनइयन क बारे मँ पता चल गवा अहइँ। साऊल गीबा मँ पहाड़ी प एक पेड़ क नीचे बइठा रहा। साऊल क हाथ मँ ओकर भाला रहा। साऊल क सबहिं अफसरन ओकरे चारिहुँ कइँती खड़ा रहेन। ⁷ साऊल आपन उ अफसरन स कहेस, जउन ओकरे चारिहुँ कइँती खडा रहेन, “बिन्यामीन क मनइयो, सुना। का तू पचे समुझत ह कि यिसै क पूत तोहका खेत अउ अंगूरे क बगिया देइ? का तू पचे समुझत ह कि उ तोहका तरक्की देइ अउर तू पचन्क हजार मनई अउ सौ मनइयन क ऊपर अफसर बनइ। ⁸ तू पचे मोरे खिलाफ जाल रचत बाट्या। तू पचे छिपी भइ चाल चल्या ह। तू पचन मँ स कउनो भी मोर पूत योनातान क बारे मँ नाहीं बताएस ह। तोहमाँ स कउनो भी इ नाहीं बताएस ह कि उ यिसै क पूत क संग क समझौता किहेस ह। तोहमाँ स कउनो भी मोर परवाह नाहीं करत। तोहमाँ स कउनो भी इ नाहीं बताएस कि मोर पूत योनातान दाऊद क हुस्काएस ह। योनातान मोर नउकर दाऊद स कहेस कि उ लुकाइ जाइ अउर मोहे प हमला करइ। अउर इ उहइ अहइ कि जउन दाऊद अब करत बाटइ।”

⁹ एदोमीत दोएग साऊल क अफसरन क संग खड़ा रहा। दोएग कहेस, “मइँ यिसै क पूत दाऊद क नोब मँ लखेउँ ह। दाऊद अहीतूब क पूत अहीमेलेक स भेंटइ आवा। ¹⁰ अहीमेलेक यहोवा स दाऊद बरे बिनती किहस। अहीमेलेक दाऊद क भोजन भी दिहस। अउर अहीमेलेक दाऊद क पलिस्ती गोलियत क तरवार भी दिहस।”

¹¹ ऍह बरे राजा याजक अहीतूब क पूत अउर ओकर सारा परिवार, याजकन जे नोब मँ रहत भवा, ओका अपन लगे अवइ बरे संदेस भेजेस, अउर उ पचे सबहिं राजा लगे आएन। ¹² साऊल अहीमेलेक स कहेस, “अहीतूब क पूत, अब सुनि ल्या।”

अहीमेलेक जवाब दिहस, “हाँ, महाराज।”

¹³ साऊल अहीमेलेक स कहेस, “तू अउर यिसै क पूत दाऊद मोरे खिलाफ छिपी योजना काहे बनाया? तू दाऊद क रोटी अउ तरवार दिहा। तू परमेस्सर स ओकरे बरे बिनती किह्या। अउर अब सोझइ, दाऊद मोह पइ हमला करइ क जोहत अहइ।”

¹⁴ अहीमेलेक जवाब दिहस, “दाऊद आप क बड़का पतियाइ क काबिल अहइ। तोहरे अफसरन मँ स कउनो ओतॅना पतियाइ क काबिल नाहीं जेतेना दाऊद बा। दाऊद तोहार आपन जमाई अहइ। अउर दाऊद अंगरच्छक क नायक अहइ। तोहार आपन परिवार दाऊद क सम्मान करत ह। ¹⁵ उ पहली दाई नाहीं रहा, कि मइँ दाऊद बरे परमेस्सर स बिनती कीन्ह। अइसी बात नाहीं। मोका या मोरे कउनो नातेदार प दोख जिन लगावा। हम पचे तोहार नउकर अही। मोका कछू भी पता नाहीं कि इ सब का होत बाटइ।”

¹⁶ मुला राजा कहेस, “अहीमेलेक, तू पचन क अउ तोहरे सबहिं नातेदारन क मरब अहइ।” ¹⁷ तब राजा आपन बगल मँ खड़ा भवा रच्छकन स कहेस, “जा अउ यहोवा क याजकन क मारि डावा। ऍह बरे इ करा काहेकि उ पचे दाऊद क पच्छ मँ अहइँ। उ पचे जानत रहेन कि दाऊद परान बाटइ, मुला उ पचे मोका बताएन नाहीं।”

मुला राजा क अफसरन यहोवा क याजकन क मारइ स इन्कार कइ दिहन। ¹⁸ ऍह बरे राजा दोएग क हुकुम दिहस। साऊल कहेस, “दोएग तू जा अउ याजकन क मारि डावा।” ऍह बरे एदोमीत दोएग गवा अउ उ याजकन क मारि डाएस। उ दिना दोएग सन क एपोद पहिरइवालन पचासी मनसेधू याजकन क मारि डाएस। ¹⁹ नोब याजकन क सहर रहा। दोएग सहर क सबहिं मनइयन क मारि डाएस। दोएग आपन तरवार क भाँजेस उ सबहिं मनसेधुअन, मेहररुअन, लरिकन अउ गदेलन क जपि दिहस। दोएग ओनकइ गइयन, खच्चरन अउ भेड़ी तलक क जपि दिहस।

²⁰ मुला एब्यातार हुआँ स बचि निकरा। एब्यातार अहीमेलेक क पूत रहा। अहीमेलेक अहीतूब क पूत रहा। एब्यातार बचिके निकरा अउ दाऊद स मिलि गवा। ²¹ एब्यातार दाऊद स कहेस कि साऊल यहोवा क याजकन क मारि डाएस ह। ²² तब दाऊद एब्यातार स कहेस, “मइँ एदोमी दोएग क उ दिना नोब मँ लखेउँ रहे। अउर मइँ जानत हउँ कि उ साऊल स कही। मइँ तोहरे बाप क परिवारे क मउत बरे जिम्मेदार हउँ। ²³ जउन मनई साऊल तोहका मारइ चाहत ह उ मोका भी मारइ चाहत ह। मोरे संग ठहरा। जिन डेराअ। तू मोरे संग बचा रहब्या।”

दाऊद कीला मँ

23 लोगन दाऊद स कहेन, “लखा, पलिस्ती कीला क खिलाफ जुद्ध करत बाटेन। उ पचे खरिहाने स अन्न लूटत अहइ।”

² दाऊद यहोवा स पूछेस, “का मइँ जाउँ अउ इ पलिस्तियन स लड़उँ?”

यहोवा दाऊद क जवाब दिहस, “जा अउ पलिस्तियन प हमला करा। कीला क बचावा।”

³ मुला दाऊद क मनइयन ओसे कहेन, “लखा, हम सबइ हिआँ यहूदा मँ अही अउर हम डेरान अही। तनिक सोचा कि हम पचे केँतना डेरान होबइ जब कीला जाब जे जगह पूरा पलिस्ती फउज स भरि अहइ।”

⁴ दाऊद फुन यहोवा स पूछेस। यहोवा दाऊद क जवाब दिहस, “कीला क जा। मइँ तोहार मदद पलिस्तियन क हरावइ मँ करब।” ⁵ ऍह बरे दाऊद अउ ओकर मनई कीला गएन। दाऊद क मनइयन पलिस्तियन स लड़ेन। दाऊद क मनइयन पलिस्तियन क हराएन अउ ओनकइ गइयन क लइ लिहन। इ तरह दाऊद कीला क मनइयन क बचाएस। ⁶ (जब एब्यातार दाऊद क लगे पराइके गवा रहा तबहिं एब्यातार आपन संग एक ठु एपोद संग लइ गवा रहा।)

⁷ लोगन साऊल क सूचना दिहेस कि अब दाऊद कीला मँ बाटइ। साऊल कहेस, “परमेस्सर दाऊद क पकड़इ बरे मोका एक अवसर दइ दिहस ह। दाऊद खुद जाल मँ फँस गवा अहइ। उ अइसे कस्बा मँ गवा अहइ जेहमाँ फाटक अउ छड़ अहइ।” ⁸ साऊल जुद्ध करइ बरे आपन सारी फउज क एक संग बोलाएस। उ पचे आपन तइयारी कीला जाइ अउ दाऊद अउ ओकरे मनइयन क पकड़ेन बरे किहस।

⁹ दाऊद क पता लाग कि साऊल ओकरे खिलाफ चाल चलत अहइ। दाऊद तब याजक एब्यातार स कहेस, “एपोद लइ आवा।”

¹⁰ दाऊद बिनती किहेस, “यहोवा इस्राएल क परमेस्सर, मइँ सुनेउँ ह कि साऊल कीला मँ जाइ अउ मोरे कारण ऍका नास करइ क चाल चलत बाटइ। ¹¹ का साऊल कीला मँ आइ? का कीला क मनई मोका साऊल क दइ देइहीं? यहोवा इस्राएल क परमेस्सर, मइँ आपक नउकर हउँ। कृपा कइके मोका बतावइँ।”

यहोवा जवाब दिहस, “साऊल आइ।”

¹² दाऊद फुन पूछेस, “का कीला क मनई मोका अउ मोरे मनइयन क साऊल क दइ देइहीं।”

यहोवा जवाब दिहस, “उ पचे अइसा करिहीं।”

¹³ ऍह बरे दाऊद अउ ओकर मनई कीला क तजि दिहेस। हुआँ लगभग छ: सौ मनई रहेन जउन दाऊद क संग गएन। दाऊद अउ ओकर मनई एक ठउर स दूसर ठउर टहरत रहेन। साऊल क पता लग गवा कि दाऊद कीला स बचि निकरा। ऍह बरे साऊल उ नगर क नाहीं गवा।

साऊल दाऊद क पाछा करत ह

¹⁴ दाऊद मरुभूमि क चला गवा अउर हुवाँ किला मँ ठहर गवा। दाऊद जिफ क रेगिस्तान क पहाड़ी देस मँ भी गवा। साऊल रोज दाऊद क हेरत रहा, मुला यहोवा साऊल क धरइ नाहीं देत रहा।

¹⁵ दाऊद जीप क रेगिस्तान होरेस मँ भी ठहरा रहा। उ ससान रहा काहेकि साऊल ओका मारइ आवत रहा। ¹⁶ मुला साऊल क पूत योनातान होरेस मँ दाऊद स भेंटइ गवा। योनातान परमेस्सर प पक्का बिस्सास धरइ बरे दाऊद क मदद किहेस। ¹⁷ योनातान दाऊद स कहेस, “डेराअ जिन। मोर बाप साऊल तोहका नाहीं पाउब। तू इस्राएल क राजा बनब्या। मइँ तोहरे बाद दूसर दर्जा प रहब। मोर बाप इ भी जानत हीं।”

¹⁸ योनातान अउ दाऊद दुइनउँ यहोवा क समन्वा समझौता किहन। तब योनातान घर चला गवा। अउर दाऊद होरेस मँ टिका रहा।

जिप क मनई दाऊद क बारे मँ साऊल क बतावत हीं

¹⁹ जिफ क मनई गीबा मँ साऊल क लगे आएन। उ पचे साऊल स कहेन, “दाऊद हम पचन क पहँटा मँ लुकान अहइ। उ होरेस क कीला मँ बाटइ। उ हकीला पहाड़ी प यसीमोन क दक्खिन मँ अहइ। ²⁰ महराज आप जब चाहइँ आवइँ। इ हम सबन क कर्तब अहइ कि हम पचे आपक दाऊद क दइ देइ।”

²¹ साऊल जवाब दिहेस, “यहोवा आप लोगन क मोर मदद बरे असीसइँ। ²² जा अउ ओकरे बारे मँ अउर जिआदा पता लगावा। पता लगावा कि दाऊद कहाँ रहत ह। अउर इ तोहा कि दाऊद क हुवाँ कउन लखेस ह। साऊल सोचेस, ‘दाऊद चतुर बाटइ। उ मोका भरमावइ क कोसिस करत बाटइ।’ ²³ लुकाइ क जउन ठउरन क प्रयोग दाऊद करत बाटइ, ओन सबहिं ठउरन क पता लगावा। अउर मोरे लगे वापिस लउटि आवा अउ मोका सब कछू बतावा। तबहिं मइँ तोहरे संग चलब। जदि दाऊद उ पहँटा मँ होइ तउ मइँ ओकर पता लगाउब। मइँ ओकर पता तब भी लगाइ लेब जदि मोका यहूदा क सबहिं परिवारन क तलासी लेइ क होइ।”

²⁴ तब जीप निवासी साऊल क अगवा अगवा जीप क लौटि आएन।

दाऊद अउर ओकर मनई मओन क रेगिस्तान मँ रहेन। उ पचे यसीमोन क दक्खिन मँ रेगिस्तानी पहँटा मँ रहेन। ²⁵ साऊल अउ ओकर मनई दाऊद क खोजइ गएन। मुला मनइयन दाऊद क होसियार किहेन। उ पचे बताएन कि साऊल ओनका हेरत अहइ। दाऊद तब माओन क रेगिस्तान मँ ढलान कइँती “चट्टान” प गवा। साऊल सुनेस कि दाऊद माओन क रेगिस्तान मँ गवा अहइ। ऍह बरे साऊल उ ठउर प दाऊद क धरइ गवा।

²⁶ साऊल पहाड़े क एक कइँती रहा। दाऊद अउ ओकर मनई उहइ पहाड़े क दूसर कइँती रहेन। दाऊद साऊल स दूर निकरइ बरे हाली करत रहा। साऊल अउ ओकर सिपाही पहाड़े क चारिहुँ कइँती अउ ओकरे मनइयन क धरइ जात रहेन।

²⁷ मुला साऊल क लगे एक दूत आवा। दूत कहेस, “हाली हाली करा। पलिस्ती हम पचन प हमला करत बाटेन।”

²⁸ ऍह बरे साऊल दाऊद क पाछा करब तजि दिहस अउ पलिस्तियन स लड़इ निकरि गवा। इहइ कारण बाटइ कि मनइयन उ ठउर क “फिसलनी क चट्टान” कहत हीं। ²⁹ दाऊद माओन क रेगिस्तान क तजि दिहेस अउ एनगोदी क लगे किला मँ गवा।

दाऊद साऊल क झेंपावत ह

24 जब साऊल पलिस्तियन क पाछा कइके भगाइ दिहस, तब मनइयन साऊल स कहेन, “दाऊद एनगोदी क लगे रेगिस्तानी इलाका मँ बा।”

² ऍह बरे साऊल पूरा इस्राएल क तीन हजार मनइयन क चुनेस। साऊल इ मनइयन क संग लिहस अउ दाऊद अउर ओकर मनइयन खोज करब सुरु किहेन। उ पचे जंगली बोकरियन क चट्टान क नचिके हेरेन। ³ साऊल सड़क क किनारे भेड़ी क बारा क लगे आवा। हुवाँ निअरे एक ठु गुफा रही। साऊल खुद गुफा मँ आराम करइ बरे गवा। दाऊद अउ ओकर मनई बहोत पाछे उ गुफा मँ लुकान रहेन। ⁴ मनइयन दाऊद स कहेन, “आजु उ दिन अहइ जेकरे बारे मँ यहोवा बात किहेन ह। यहोवा तोहसे कहे रहेन, ‘मइँ तोहार दुस्मनन क तोहका देब, तब तू जउन चाहा आपन दुस्मनन क संग कइ सकब्या।’”

तब दाऊद साऊल क लगे चुपचाप आवा। दाऊद साऊल क लबादे क एक कोना काट लिहस। साऊल दाऊद क नाहीं लखेस। ⁵ पाछे साऊल क लबादे क एक कोना काट लिहे क दाऊद क पछतावा भवा। ⁶ दाऊद आपन मनइयन स कहेस, “यहोवा मोका आपन सुआमी क संग कछु भी अइसा करइ स रोका। साऊल यहोवा क चुना भवा राजा अहइ। मोका साऊल क खिलाफ कछू भी नाहीं करइ चाही। उ यहोवा क चुन लीन्ह गवा राजा बाटइ।” ⁷ दाऊद इ बात आपन मनइयन क रोकइ बरे कहेस। दाऊद आपन मनइयन क साऊल प हमला करइ नाहीं दिहस।

साऊल गुफा तजि दिहस अउ आपन राहे प चला। ⁸ दाऊद गुफा स निकरा। दाऊद साऊल क जोर स पुकारेस, “मोर पर्भू, महराज।”

साऊल पाछे घूमिके लखेस। दाऊद आपन माथा भुइँया प धइके पैलगी किहेस। ⁹ दाऊद साऊल स कहेस, “आप काहे सुनत हीं। जब मनई इ कहत हीं कि ‘दाऊद आप प वार करइ क कुचाल गूँथत मथत बाटइ?’ ¹⁰ मइँ आप क चोट पहुँचावइ नाहीं चाहत हउँ। आप ऍका आपन आँखिन स लखत हीं। यहोवा आजु ऍका आप क गुफा मँ मोरे हाथे मँ दइ दिहे अहइँ। मुला मइँ आपक मारि डावइ स इन्कार किहेउँ ह। मइँ आप प दाया किहेउँ ह। मइँ कहेउँ, ‘मइँ आपन सुआमी क चोट नाहीं पहुँचाउब। साऊल यहोवा क चुना भवा राजा अहइ।’ ¹¹ मोरे हाथे मँ इ ओढ़ना क टूका क लखा। मइँ आप क लबादे क एक टूका काटि लिहेउँ ह। मइँ आप क मारि सकत हउँ, मुला मइँ इ नाहीं किहेउँ ह। अब मइँ चाहत हउँ कि आप ऍका समुझइँ। मइँ चाहत हउँ कि आप क खिलाफ कउनो कुचाल नाहीं बनावत हउँ। मइँ आपक कउनो बुराई नाहीं किहेउँ ह। मुला आप मोर पाछा करत हीं अउर मोका मारि डावइ चाहत हीं। ¹² यहोवा क निआव करइ द्या। यहोवा आप क उ अनिआव क सजा देइहीं जउन आप मोरे संग किहेन ह। मुला मइँ आपन आप आपस न जूझब। ¹³ पुरान कहावत अहइ:

“मइँ कछू भी बुरा नाहीं किहेउँ ह। मइँ बुरा मनई नाहीं हउँ। ऍह बरे मइँ आप प चोट नाहीं करब। ¹⁴ आप केकर पाछा करत बाटेन। इस्राएल क राजा केकरे खिलाफ लड़इ आवत अहइँ? आप अइसे कउनो क पाछा नाहीं करत बाटेन जउन आपक चोट पहुँचाइ। इ अइसा ही बाटइ जइसेन आप एक ठु मरा कूकुर या मच्छर क पाछा करत हीं। ¹⁵ यहोवा क निआव करइ द्या। ओनका आपन अउ मोरे बीच निर्णय करइ द्या। उ हालात क वास्तविक्ता क देखब अउर मोर मामला क वकालत करब। परमेस्सर मोका तोहार रच्छा करब।”

¹⁶ दाऊद आपन इ कहब खतम किहेस, साऊल पूछेस, “मोर पूत दाऊद, का उ तोहार आवाज अहइ?” तब साऊल रोवइ लाग। साऊल बहोत रोएस। ¹⁷ साऊल कहेस, “तू सही अहा अउर मइँ गल्ती पइ अहउँ। तू हमरे बरे नीक रह्या। मुला मइँ तोहरे बरे बुरा रहेउँ। ¹⁸ तू उ बतियन क बताया जेनका तू मोरे बरे किहा। यहोवा मोका तोहरे हवाला किहेस, मुला तू मोका नाहीं मारि डाया। ¹⁹ एहसे पता चलत ह कि मइँ तोहार दुस्मन नाहीं अहउँ। जदि कउनो आपन दुस्मन क धरत ह तउ उ ओका बच निकरइ नाहीं देत। उ आपन दुस्मन बरे नीक काम नाहीं करत। यहोवा तोहका ऍकर ईनाम देइँ काहेकि तू आजु मोरे बरे नीक रह्या। ²⁰ मइँ जानत हउँ कि तू नवा राजा बनब्या। तू इस्राएल क राज्ज क ऊपर करब्या। ²¹ अब मोसे एक प्रतिज्ञा करा। यहोवा क नाउँ लइके इ प्रतिग्या करा कि तू मोरे सन्तानन क न मरब्या। प्रतिग्या करा कि तू मोरे बाप क परिवार स मोर नाउँ मिटउब्या नाहीं।”

²² ऍह बरे दाऊद साऊल स प्रतिग्या किहस। दाऊद प्रतिग्या किहेस कि उ साऊल क परिवार क न मारी। तब साऊल लउटि गवा। दाऊद अउ ओकर मनई किला मँ चला गएन।

फरीसियन जइसा जिन बना

12 अउर फिन जब हजारन मनइयन क भारी भीड़ जुटि गइ तउ एक दुसरे क रौंदे जात रही तब ईसू पहिले आपन चेलन स कहइ लाग, “फरीसियन क खमीरे स, जउन ओनकइ कपट बा, बचा रहा। ² कछू छुपा नाहीं अहइ जउन परगट नाहीं कइ दीन्ह जाइ। अइसा कछू अनजाना नाहीं अहइ जेका बतावा नाहीं दीन्ह जाइ। ³ एह बरे हर उ बात जेका तू अँधियारे मँ कह्या ह, उजिआरे मँ सुनी जाइ। अउर एकांत खोली मँ जउन कछू भी तू चुप्पे स कउनो क काने मँ कह्या ह, घरे क छते स ऍलान कइ दीन्ह जाइ।”

परमेस्सर स डेराअ

(मत्ती 10:28-31)

⁴ “मुला मोर मीतो, मइँ तोहसे कहत हउँ ओनसे जिन डेराअ जउन तोहरे तन क मारि डाइ सकत हीं अउर ओकरे पाछे अइसा कछू नाहीं अहइ जउन ओनके बस मँ होइ। ⁵ मइँ तोहका देखाउब कि तोहका कउनो स डेराइ चाही। ओसे (परमेस्सर) डेराअ अउर तोहका मारिके नरक मँ नावइ क सक्ती राखत ह। हाँ, मइँ तोहका बतावत हउँ, बस उहइ स डेराअ।

⁶ “का दुइ पइसा मँ पाँच ठु चिरइयन नाहीं बिकतिन? फिन भी परमेस्सर ओहमाँ स एक क भी नाहीं बिसरत। ⁷ अउर लखा तोहरे मूँड़े प क एक एक बारि तलक गना भवा अहइँ। डेराअ जिन तू बहोत सी चिरइयन स कहूँ जिआदा कीमत क अहा।”

ईसू क नाउँ प जिन सर्मा

(मत्ती 10:32-33; 12:32; 10:19-20)

⁸ “मुला मइँ तोहसे कहत हउँ जउन कउनो मनई सबहीं क समन्वा मोका मानत ह, मनई क पूत भी उ मनई क परमेस्सर क दूतन क समन्वा मानी। ⁹ मुला ज जउन मोका दुसरे क समन्वा न मानी, ओका परमेस्सर क दूतन क समन्वा इन्कार कइ दीन्ह जाइ।

¹⁰ “अउर हर उ मनई क तो छमा कइ दीन्ह जाइ जउन मनई क पूत क खिलाफ कउनो सब्द बोलत ह, मुला जउन पवित्तर आतिमा क बुराई करत ह, ओका छमा नाहीं कीन्ह जाइ।

¹¹ “तउ जब उ पचे तोहका आराधनालय मँ, राज्य क करइवालन अउर अधिकारियन क समन्वा लइ जाइँ तउ फिकिर जिन कर्या काहे तू आपन क कइसे बचउब्या या तोहका का कछू कहे होइ। ¹² चिंता जिन करा काहेकि पवित्तर आतिमा तोहका सिखाइ कि उ समइया तोहका का बोलइ चाही।”

सुआरथ क खिलाफ चिताउनी

¹³ फिन भीड़ मँ स ओसे कउनो कहेस, “गुरु, मोरे भइया स मोरे बाप क धन दौलत क हींसा बाँटइ बरे कहि द्या।”

¹⁴ ऍह प ईसू ओसे कहेस, “अरे भले मनई, मोका तोहरे बरे निआववाला या पंच कउन बनएस ह” ¹⁵ तउ ईसू ओनसे कहेस, “होसियारी क संग आपन क लालच स दूर राखा। काहेकि जरूरत स जिआदा धन-दौलत होइ प जिन्नगी क आधार ओकर संग्रह नाहीं होत।”

¹⁶ फिन उ ओनका एक दिस्टान्त कथा सुनाएस: “कउनो धनी मनई क धरती प खूब पैदावार भइ। ¹⁷ उ आपन मनवा मँ सोचत भवा कहइ लाग, ‘मइँ का करुँ, मोरे लगे फसिल क रखइ बरे ठउर तउ अहइ नाहीं।’

¹⁸ “फिन उ बोला, ‘ठीक अहइ मइँ इ करब कि आपन अनाज क कोठिला गिराइके बड़का कोठा बनवाउब अउर आपन समूचा अनाज क अउर सामान हुवाँ रखब। ¹⁹ फिन आपन आतिमा स कहब, अरे मोर आतिमा अब बहोत स उत्तिम बस्तु, बहोत स बरिस बरे तोहरे लगे ऍकट्ठी अहइँ। घबरा जिन, खावा, पिआ अउर मउज उड़ावा!’

²⁰ “मुला परमेस्सर ओसे बोला, ‘अरे मूर्ख! इहइ राति मँ तोहार आतिमा तोहसे लइ लीन्ह जाइ। जउन कछू तू तइयार किहे अहा, ओका कउन लेइ?’

²¹ “लखा, उ मनई क संग भी कछू अइसा ही भवा ह, उ अपने बरे बटोरत ह मुला परमेस्सर क निगाह मँ उ धनी नाहीं।”

परमेस्सर क राज क महत्ता

(मत्ती 6:25-34,19-21)

²² तब उ आपन चेलन स कहेस, “एह बरे मइँ तोहसे हउँ, आपन जिन्नगी क फिकिर जिन करा कि तू का पहिनब्या? ²³ काहेकि जिन्नगी खइया स अउर तन ओढ़ना स जिआदा जरूरी अहइ। ²⁴ कउअन क लखा, न उ पचइ बोवत हीं, न ही उ पचे काटत हीं। न ओनके लगे भण्डारा बा अउर न आजु अन्न क कोठिला, फिन भी परमेस्सर ओनका भोजन देत ह। तू तउ चिरइयन स केतॅना जिआदा कीमती अहा। ²⁵ चिन्ता कइके, तू पचन मँ स कउन अइसा अहइ, जउन आपन उमिर मँ एक घड़ी भी अउर जोर सकत ह? ²⁶ काहेकि तू जदि छोटका काम क भी नाहीं कइ सकत्या तउ बाकी बरे काहे फिकिर करत ह?

²⁷ “कोका बेली क लखा, उ कइसे उगत हीं? न उ सबइ मेहनत करत हीं, न कताई, फिन भी मइँ तोहसे कहत हउँ कि सुलैमान आपन समूचे धन दौलत क संग ओहमाँ स कउनो एक क नाई नाहीं सज पाएस। ²⁸ एह बरे जब मैदान क घास क, जउन आज हिआँ बा अउर भियान ही ओका भार मँ झोंक दीन्ह जाइ, परमेस्सर अइसे ओढ़नन स सजावत ह तउ अरे ओ कम बिसवास करइया मनइयो! तोहका तउ उ केतॅना अउर जिआदा ओढ़ना पहिराइ।

²⁹ “अउर फिकिर जिन करा कि तू का खाब्या अउर का पीब्या। ऍनके बरे जिन सोचा। ³⁰ काहेकि संसार क अउर सबहीं मनई चीजन्क क पाछे धावत अहइँ मुला तोहार परमपिता तउ जानत ही अहइ कि तोहका इ चीजन्क जरूरत अहइ। ³¹ मुला तू तउ परमेस्सर क राज्य क चिन्ता करा। इ चीजन तउ तोहका दइ दीन्ह जइहीं।