Old/New Testament

सफाई क बारे मँ नेम

5 यहोवा मूसा स कहेस, ² “इस्राएल क मनइयन क हुकुम द्या कि उ हर एक व्यक्ति क चाहे उ मनसेधु या मेहरारू जउन चाम रोग स पीड़ित ह या जेकर सरीर स पीप बहत ह या जउन कि कउनो ल्हासे क छुअइ क करण असुद्ध होइ गवा अहइ छाउनी स दूर भेज द्या। ³ उ पचन्क छाउनी स बाहेर भेज दीन्ह जाइ चाही ताकि उ छाउनी क जउन कि मोरे निवास अहइ क उ पचन्क असुद्ध नाहीं कइ देइँ। मइँ तोहरे छाउनी मँ तू लोगन क बीच रहत हउँ।”

⁴ एह बरे इस्राएल क मनइयन परमेस्सर क हुकुम मानेन। उ पचे ओन मनइयन क सिबिर क बाहेर पठइ दिहन। उ पचे अइसा एह बरे किहन काहे की यहोवा मूसा क हुकुम दिहस।

अपराध बरे जुर्माना

⁵ यहोवा मूसा स कहेस, ⁶ “इस्राएल क लोगन क इ बतावा, अगर कउनो मनई अउ मेहरारू कउनो अइसा पाप करत ह जेका लोग करत, (कउनो पाप जेका दूसर क खिलाफ कीन्ह गवा ह तउ उ असल मँ परमेस्सर क खिलाफ पाप अहइ) तउ उ तरह क मनसेधू या मेहरारू अपराधी अहइ। ⁷ एह बरे उ मनई लोगन क खिलाफ आपन कीन्ह पाप क कबूलइ। तब उ मनई ओका जरूर सुधार करइ चाही जेका उ किहस ह उ भुगतान मँ पाँचवाँ हींसा जोरइ अउ ओकर भुगतान ओका करइ जेकर बुरा उ किहस ह। ⁸ मुला जउन मनई क उ बुरा किहा ह जदि उ मनई मरि जात ह अउर ओकर कउनो निचके क नातेदार भुगतान लेइ बरे न होइ तउ इ हाल मँ, बुरा करइ वाला मनई यहोवा क भुगतान करी। उ मनई पूरा भुगतान याजक क करी। भुगतान क बरे ओका एक ठू भेंड़ा क बलि अभिसेक क रूप मँ जरूर देइ चाही। याजक ओका बलि ओका अभिसेक करइ बरे देब्या। मुला याजक बचा भुगतान क आपन लगे रख सकत ह।

⁹ “जदि इस्राएल क कउनो मनई परमेस्सर क खास भेंट चढ़ावत ह तउ उ याजक जउन ओका अंगीकार कइ सकत ह ओका अपने लगे रख सकत ह। इ ओकर बाटइ। ¹⁰ एक मनइ क पवित्तर चीज ओका अपना अहइ (उ ओका दइ सकत ह या ओका आपन बरे रखइ सकत ह।) मुला जदि उ ओनका देत ह तउ उ याजक क होइ जाइ।”

सक्की भतार लोग

¹¹ तब यहोवा मूसा स कहेस, ¹² “इस्राएल क लोगन स इ कहा कउनो मनई क मेहरारु पतिव्रता नाहीं भी होइ सकत। ¹³ उ दूसर मनइयन क संग सोइ सकत ह अउ ऍका आपन भतारे स छुपाइ सकत ह। ओकर भतार ओका कबहुँ जान भी नाहीं सकत जउन बुराई उ किहेस ह होइ सकत ह कि कउनो गवाह भी नाहीं अहइ अगर उ आपन हरकत स नाहीं पकड़ा जाइ। अउर उ मेहरारु भी आपन भतार स आपन पाप क बारे मँ नाहीं कही। ¹⁴ मुला भतार संका करब सुरु कइ सकत ह कि ओकर मेहरारु ओकरे विरुद्ध पाप किहेस ह। उ ओकरे बरे जलन रख सकत ह, चाहे उ कउनो बुरा काम नाहीं किहेस ह जेकर कारण उ अविस्वासी होइ जाइ। ¹⁵ जदि अइसा होत ह तउ उ आपन मेहरारु क याजक क लगे लइ जाइ। भतार एक भेंट भी लइ जाइ। इ भेंट एपा क दसवाँ भाग जौ क आटा होइ। ओका जौ क आटे प तेल या सुगन्धि नाहीं डावइ चाही। इ जौ क आटा यहोवा क अन्न भेंट अहइ। इ एह बरे दीन्ह जात कि भतार ईर्ष्यालु अहइ। इ भेंट इ संकेत करी कि ओका बिस्सास अहइ कि ओकर मेहरारु पतिव्रता नाहीं अहइ।

¹⁶ “याजक मेहरारु क यहोवा क समन्वा लइ जाइ अउ मेहरारु यहोवा क समन्वा खड़ी होइ। ¹⁷ तब याजक कछू खास पानी लेइ अउ ओका माटी क काँड़ा मँ डाई। याजक पवित्तर तम्बू क फर्स स कछू माटी पानी मँ नाई। ¹⁸ याजक मेहरारु क यहोवा क समन्वा खड़ी रहइ बरे मजबूर करी। तब उ ओकर बार उघारी अउ ओकरे हाथे मँ अन्नबलि देइ। इ जौ क आटा होइ जउन जेका भतार जलन क कारण ओका दिहे रहा। उहइ टेमॅ याजक उ खास करुआ पानीवाला माटी क काँड़ा धरे रही। इ जल ही अहइ जउन मेहरारु क परेसानी पइदा करत ह (सिरिफ अगर उ पाप किहेस ह।)

¹⁹ “तब याजक मेहरारु क हिदायत देइ कि ओका झूठ नाहीं बोलइ चाही। ओका फुरइ बोलइ क बचन देइ चाही। याजक ओसे कही: ‘जदि तू दूसर मनई क संग नाहीं सोई अहा अउर तू आपन भतार क खिलाफ पाप नाहीं किहे अहा, जबकि तोहार बियाह ओकरे संग हुआ अहइ, तउ इ सराप जल तोहका नोस्कान न पहुँचाइ। ²⁰ मुला जदि तू आपन भतार क खिलाफ पाप किहा ह, जदि तू कउनो दूसर मनई क संग सोई अहा तउ तू सुद्ध नाहीं अहा। काहे? काहेकि जउन तोहरे संग सोवा इ बरे अहइ तोहार भतार नाहीं अहइ अउर उ तोहका असुद्ध बनाएन ह। ²¹ एह बरे जब तू इ खास जल क पिउबू तउ तोहका बहोत परेसानी होइ। तोहार पेट फूलि^[a] आइ अउर तू कउनो लरिका पइदा नाहीं कइ सकबिउ। जदि तू गोड़वा स भारी होबिउ तउ तोहार लरिका मरि जाइ। तब तोहार लोग तोहका तजि देइहीं अउर उ पचे तोहरे बारे मँ बुरी बात करिहीं।’

“तब याजक क मेहरारु स यहोवा क विसेस बचन देइ बरे कहइ चाही। मेहरारु क अंगीकार करइ चाही कि इ सबइ बुरी बातन ओका होइहीं, जदि उ झूठ बोली। ²² याजक क कहइ चाही, ‘तू इ जले क लेबिउ जउन तोहरे तन मँ परेसानी पइदा करी। जदि तू पाप किहा ह तउ तू लरिका क जनम नाहीं दइ सकबिउ अउर जदि तोहार कउनो लरिका गरभ मँ अहइ तउ उ जन्मइ स पहिले मरि जाइ।’ तब मेहरारु क कहइ चाही: ‘मइँ उ अंगीकार करत हउँ जउन आप कहत हीं।’

²³ “याजक क इ चिताउनियन क चाम-पत्र प लिखइ चाही। फुन ओका इ लिखावट क पानी मँ धोवइ चाही। ²⁴ तब मेहरारु उ पानी क पिई जउन परेसानी पइदा करत ह। उ पानी ओहमा जाइ अउर जदि उ अपराधी अहइ तउ ओका बहोत परेसानी पइदा करी।

²⁵ “तब याजक उ अन्नबलि जउन जलन बरे भेंट अहइ क ओहसे लेइ। उ ओका यहोवा क समन्वा उठाई अउर ओका वेदी तलक लइ जाइ। ²⁶ तब याजक आपन अंजुरी मँ अन्न भरी अउ ओका वेदी प धरी। तब उ ओका बारी। ओकरे पाछे उ मेहरारु स पानी पिअइ क कही। ²⁷ जदि मेहरारु भतार क खिलाफ पाप किहे होई तउ पानी ओका परेसान करी। पानी ओकरे सरीर मँ जाई अउर ओका बहोत कस्ट होइ। अउर कउनो बच्चा जउन ओकरे गरभ मँ होइ, पइदा होइ स पहिले मरि जाई अउर उ कबहुँ बच्चा क जन्म नाहीं दइ सकी। उ आपन लोगन क बीच अभिसाप होइ जाब्या। ²⁸ मुला जदि मेहरारु पति क खिलाफ पाप नाहीं किहे अहइ तउ उ पवित्तर अहइ। फुन याजक घोसणा करी कि उ अपराधी नाहीं अहइ। अउर लरिकन क जन्म देइ बरे जोग्ग होइ जाई।

²⁹ “इ तरह इ ईर्सा क बारे मँ कानून अहइ। तोहका इहइ करइ चाही जदि कउनो बीही मेहरारु आपन पति क खिलाफ पाप करत ह। ³⁰ या जदि कउनो मनई जलन करत ह अउ आपन मेहरारु क बारे मँ संका करत ह कि उ ओकरे खिलाफ पाप किहे अहइ तउ मनई क इहइ करइ चाही। याजक क कहइ चाही कि उ मेहरारु यहोवा क समन्वा खड़ी होइ। तब याजक इ सबहिं काम क करी। इहइ कनून बा। ³¹ भतार कउनो बुरा करइ क अपराधी नाहीं होइ। मुला मेहरारु कस्ट उठाइ, जदि उ पाप किहे अहइ।”

नाज़ीरी बंस

6 यहोवा मूसा स कहेस, ² “इ बातन इस्राएल क मनइयन स कहा: कउनो मनसेधू या मेहरारु कछू निस्चित समइ बरे आपन आप क परमेस्सर क अपर्ण कइ क कसम खाइ सकत ह। उ मनई नाज़ीरी कहा जाई। ³ उ टेम मँ मनई क कउनो दाखरस या कउनो जियादा नसीली चीज नाहीं पिअइ चाही। मनई क सिरका जउन दाखरस स बना होइ या कउनो जियादा नसीला पिअनी नाहीं पिअइ चाही। उ मनई क अंगूरे क रस नाहीं पिअइ चाही अउर न ही अंगूर या किसमिस खाइ चाही। ⁴ उ पवित्रीकरण क काल मँ उ मनई क अंगूर स बना कउनो चीज नाहीं खाइ चाही। उ मनई क अंगूरे क बिया या बोबला भी नाहीं खाइ चाही।

⁵ “पवित्रीकरण क काल मँ उ मनई क आपन बार नाहीं काटइ चाही। उ मनइ क उ टेमॅ तलक सुद्ध रहइ चाही जब तलक पवित्रीकरण क काल खतम न होइ। ओका आपन बार क लम्बा होइ देइ चाही। उ मनई क बार परमेस्सर क दीन्ह गवा पवित्रीकरण क बचन क एक खास हींसा अहइ। उ ओन बारन क परमेस्सर क भेंट क रूप मँ देई। एह बरे उ मनई आपन बारन क तब तलक लम्बा होइ देइ जब तलक अलग होइ क टेमॅ खतम होई।

⁶ “इ पवित्रीकरण क काल मँ इ कउनो नाज़ीर क कउनो ल्हासे क लगे नाहीं जाइ चाही। काहेकि उ मनई आपन क पूरी तरह स यहोवा क अर्पित कइ दिहे अहइ। ⁷ जदि ओकर आपन बाप, आपन महतारी, आपन भाई या आपन बहिन भी मरि जाइँ तउ भी ओका ओनका छुवइ न चाही। इ ओका अपवित्तर करी। ओका इ देखावइ चाही कि ओका अलग कीन्ह ग अहइ अउर आपन क पूरी तरह परमेस्सर क अर्पित कइ चुका अहइ। ⁸ जउन पूरा टेमॅ मँ उ अलग कीन्ह गवा उ पूरी तरह आपने यहोवा क अर्पित किहे रहा अहइ। ⁹ इ होइ सकत ह कि नाज़ीर कउनो दूसर मनई क संग होइ अउ दूसर मनई एकाएक मरि जाइ। जदि नाज़ीरी मरे भए मनई क छुई तउ उ अपवित्तर होइ जाइ। जदि अइसा होत ह तउ नाज़ीरी क मूँड़ स बार कटवावइ चाही। इ सबइ बार ओकरे खास दीन्ह गए बचन क हींसा रहेन। ओका आपन बारन क सतऍ दिन काटइ चाही काहे की उ दिन उ पवित्तर कीन्ह जात ह। ¹⁰ तब अठवें दिन ओका दुइ फाखता या कबूतरी क दुइ बच्चा याजक क लगे लइ आवइ चाही। ओका याजक बरे ओनका मिलापवाला तम्बू क दुआरे देइ चाही। ¹¹ तब याजक एक क कबूतरी पापबलि क रूप मँ भेंट करी। उ दूसरे कबूतरी क होमबलि क रूप मँ भेंट करी। अउर याजक उ मनई क ओकरे पाप बरे प्रायस्चित करब्या। (उ पाप किहेस काहे की उ ल्हास क लगे रहा।) उ समइ उ मनई फुन बचन देइ कि मूँड़े क बारन क यहोवा बरे भेंट करी। ¹² ऍकर इ अरथ भवा कि उ मनई क फुन पवित्रीकरण क काल मँ दूसर समइ बरे आपन आप क यहोवा क अर्पित कइ देइ चाही। उ मनई क एक बरिस क नर मेमना लावइ चाही। उ ऍका दोखबलि क रूप मँ देइ। ओकरे पवित्रीकरण क सब दिन बिसराइ दीन्ह जात अहइँ। उ मनई क नवा अलग होइके टेमॅ सुरु करइ क होइ। इ जरुर कीन्ह जाइ काहे की उ पवित्रीकरण पहिले काल मँ एक ल्हास क छुए रहा।

¹³ “जब मनई क अलग होइ क टेमॅ पूरा होइ जाइ तउ ओका इ जरुर करइ चाही। ओका मिलापवाला तम्बू क दुआर प जाइ चाही। ¹⁴ हुवाँ उ आपन भेंट यहोवा क देइ। ओकर भेंट होइ चाही:

¹⁶ “तब याजक इ चीजन क यहोवा क देइ। याजक पापबलि अउ होमबलि चढ़ाई। ¹⁷ याजक बे खमीरे क रोटी क टोकरी यहोवा क देइ। तब उ यहोवा क मेलबलि क रूप मँ भेड़ा क मारी। उ यहोवा क अन्नबलि अउ पयेबलि क संग ऍका देइ।

¹⁸ “नाज़ीर क मिलापवाला तम्बू क दुआर प जाइ चाही। हुवाँ ओका आपन बार कटवावइ चाही जेका उ यहोवा बरे बढ़ाए रहा। ओन बारन क मेलबलि क नीचे आगी क ऊपर रखई चाही।

¹⁹ “जब नाज़ीर आपन बारन क काटि चुकी तउ याजक ओका भेड़ा क एक ठु उसना भवा काँध अउ टोकरी स एक ठु बड़वार अउ एक ठु नान्ह क केक देइ। इ दुइनउँ केक बे खमीरे क बना होइहीं। ²⁰ तब याजक इ चीजन क यहोवा क अगवा हलाई। इ एक ठु उत्तोलनबलि अहइ। इ चीजन पवित्तर अहइँ अउ याजक क अहइँ। भेड़ा क छाती अउ जाँघ भी यहोवा क समन्वा हलावा जइहीं। इ चीजन भी याजक क बाटिन। ऍकरे पाछे नाज़ीरी दाखरस पी सकत ह।

²¹ “जदि कउनो मनई नाज़ीर होइ चाहत ह तउ ओका यहोवा क इ सबहिं भेंट देइ चाही। इ नेमॅ ओन मनइयन बरे अहइँ जउन नाज़ीर होइ क बचन लेत हीं। जदि कउनो मनई जियादा देइ क बचन देत ह तउ ओका आपन बचन क निभावइ बरे नाज़ीर क नेमॅ क मुताबिक करइ चाही।”

याजक क आसीर्बाद

²² यहोवा मूसा स कहेस, ²³ “हारून अउ ओकरे पूतन स कहा। इस्राएल क लोगन क आसीर्बाद देइ क तरीका इहइ अहइ, ओनसे कहा:

²⁷ इ तरह हारून अउ ओकर पूत इस्राएल क मनइयन क समन्वा मोर नाउँ लेइहीं अउ मइँ ओनका आसीर्बाद देब।”

बिया बोवइ क दिस्टान्त

(मत्ती 13:1-9; लूका 8:4-8)

4 फिन ईसू झील क तीरे उपदेस देइ लाग। ओकरे चारिहुँ ओर भारी भीर जमा होइ गइ। ऍसे उ झील मँ डारी भई नाउ प जाइके बइठा। सभई लोग झील क तीरे धरती प ठाड़ रहेन। ² उ ओनका ढेर कइ बतिया दिस्तान्त क संग सिकाएस। आपन उपदेस मँ कहेस,

³ “सुन ल्या! एक ठु किसान आपन बिया बोवइ गवा। ⁴ जब उ बिया बोवत रहा कछू बिया राह क किनारे गिर गवा। चिरियन आइन अउर चुन लिहन। ⁵ कछू बिया पथरही भुमियाँ प गिरा, जहँ थोड़ माटी रही। हाली स अँखुवाइ गवा काहेकि माटी गहरी नाहीं रही। ⁶ जब सूरज निकरा, उ सबइ पउधन झुराइ गएन। जर न पकड़ि पवावइ क कारण कुम्हिलाइ गएन। ⁷ अउर कछू बिआ काँटन मँ जाइ गिरेन। कँटही झाड़ी बाढ़ी अउर ओनका दहबोच लिहन। ऍहमाँ दाना नाहीं पइदा भवा। ⁸ कछू बिया बढ़िया खेतन मँ बिखराइ गएन। इ बढ़िया खेतनमाँ जामेन, बाढ़ेन अउर दाना पइदा करेन। इ बिया तीस गुना, साठ गुना अउर हिआँ तलक कि सउ गुना फसल भइ।”

⁹ तबइ उ कहेस, “तोहरे पास जेकरे कान होइ तउ उ सुन लेइ।”

ईसू कहत ह उ काहे दिस्टान्त बइपरत ह

(मत्ती 13:10-17; लूका 8:9-10)

¹⁰ फिन जब अकेल्ला रहा, तउ बारहु प्रेरितन अउर दूसर मनइयन ओकरे चारिहुँ कइँती रहेन, उ सबइ ओसे दिस्टान्त क बारे मँ पूछेन।

¹¹ ईसू ओनसे कहेस, “तू सबन्क परमेस्सर क राज्य भेद बताइ दीन्ह। मुला ओनके बरे जउन बाहेर क अहइँ सब बातन दिस्टान्त दीन्ह गइ अहइँ। ¹² एह बरे,

बिया बोवइ क दिस्टान्त क समझाउब

(मत्ती 13:18-23; लूका 8:11-15)

¹³ उ ओनसे कहेस, “का तू इ दिस्टान्त क समझ पउत्या नाहीं तउ अउ कउनो दिस्टान्त क कइसे समझ पउब्या? ¹⁴ बिया क बोवइया जउन बोवत ह, उ परमेस्सर क उपदेस अहइ। ¹⁵ कछू जने राहे क उ सब बिया क तरह अहइँ, जहाँ उपदेस बोइ गवा रहा। जब उ सुनत हीं, सइतान तुरंत ही आवत ह उ उपदेस क लइ जात ह, जउन बिया बोवा रहा।

¹⁶ “कछू जने उ बिया क तरह अहइँ जउन पथरही धरती मँ बोएन। बिया जब उ उपदेस सुनत हीं, उ पचे फउरन उपदेस खुसी स अपनाइ लेत हीं। ¹⁷ लेकिन उ सब आपन मँ जर नाहीं धरतेन उ सब तनिक समइया मँ रह पावत हीं। पाछे जब उपदेस क कारण बिपत आवत ह अउर खूबइ सतावा जात हीं उ पचे फउरन बिसवास खोइ देत हीं।

¹⁸ “अउर दूसर मिला कँटही झाड़ी मँ बिया क बोवइ क तरह अहइँ। ई मनइयन उपदेस क सुनत हीं। ¹⁹ मुला जिन्नगी क चिन्ता धन, लालच अउर दूसर चीजन्क इच्छा ओनके मनवा मँ आवत ही उपदेस क दबोच लेत हीं। फिन ओन प फर लागत नाहीं।

²⁰ “दूसर उ बिया क तरह अहइँ जउन बढ़िया भुइँया प बोइ ग अहइँ। ई पचे उ अहीं जउन बचन सुनत ही अउर अंगीकार करत हीं। ओन प फर लागत ह-कहुँ तीस कहुँ साठ अउर कहुँ सउ गुना या जिआदा।”