Old/New Testament

13 उ दिना, दाऊद क परिवार अउ यरूसलेम मँ रहइवाला लोगन बरे एक ठु सोता ओकरे पापन बरे क धोइ देइ अउर लोगन क सुद्ध करइ बरे फूटब।

लबार नबी भविस्स मँ नाहीं

² सर्वसक्तीमान यहोवा कहत ह, “उ दिना, मइँ धरती प स सबहिं मूर्तियन क नाउँ हटाइ देब। अउर लोग ओनकर नाउँ भी याद नाहीं रखिहीं। अउर मइँ लबार नबियन अउर असुद्ध आतिमा क इ भुइँया स हटाइ देब। ³ जदि कउनो मनई भविस्सबानी करत ह तउ ओका सजा मिली। हिआँ तलक कि ओकरे माता-पिता, ओकर आपन महतारी अउर आपन बाप ओहसे कइहीं, ‘तू यहोवा क नाउँ झूठ बोल्या ह। एह बरे तोहका मरि जाइ चाही।’ ओकर आपन महतारी अउर ओकर आपन बाप भविस्सवाणी करइ क कारण ओका छूरी भोकं देइहीं। ⁴ उ समइ नबी आपन भविस्सवाणी अउर आपन दर्सन क खातिर लज्जित होइ जइहीं। उ पचे लोगन क धोखा देइ बरे रोंएदार चो़गा नाहीं पहरिहीं। ⁵ उ सबइ लोग कइहीं, ‘मइँ नबी नाहीं हउँ मइँ एक किसान हउँ। मइँ बचपना स किसान क रूप मँ काम किहेउँ ह।’ ⁶ दूसर लोग कइहीं, ‘मुला तोहरे हाथन पइ घाव कइसे अहइँ?’ उ कही, ‘इ चोट मोका अपने मित्र के घरे लगी।’”

⁷ सर्वसक्तीमान यहोवा कहत ह, “तरवार, गड़रिया पइ चोट करा। मोरे मित्र क मारा। गड़रिया पइ वार करा अउर भेड़िन पराइ जइहीं अउर मइँ ओन छोटन क सजा देब।” ⁸ सर्वसक्तीमान यहोवा करत ह, “पूरी धरती क दुइ तिहाई लोग हटाइ जाइहीं अउर उ पचे मरिहीं, मुला एक तिहाई लोग बचा रइहीं। ⁹ मइँ इ एक तिहाई लोगन क आगी मँ डाइ देब। मइँ ओका उहइ तरह स सुद्ध करब जइसा चाँदी क सुद्ध कीन्ह जात ह। मइँ ओका अइसा परखब जइसा सोना क जाँचा जात ह। तउ उ पचे मोका आपन नाउँ स पुकारिहीं अउर मइँ ओका जवाब देब। मइँ कहब, ‘उ पचे मोर लोग अहा,’ अउर उ पचे कइहीं, ‘यहोवा मोर परमेस्सर अहइ।’”

निर्णय क दिन

14 लखा, यहोवा क एक दिन आवत ह जब तोहार कीमती चीज तोहरे समन्वा तोड़ि जाइहीं। ² मइँ सबहिं रास्ट्रन क यरूसलेम क खिलाफ लड़इ बरे एक संग लिआउब। सहर पइ अधिकार कीन्ह जाब्या, घरन क लूट लीन्ह जाब्या, मेहररुअन क बलात्कार होब्या; आधा लोग बन्दी क रूप मँ देस निस्कासन मँ जाइहीं, किन्तु बचा भवा लोग सहर स हटावा नाहीं जाब्या। ³ तब यहोवा जाब अउ ओन रास्ट्रन क विरुद्ध वइसा ही जुद्ध करब जइसा उ पहले किहे रहेन। ⁴ उ दिना, उ जइतून क पहाड़ पइ खड़ा होइ, जउन यरूसलेम क पूरब अहइ। जइतून क पर्वत एक गहिरा घाटी क दुआरा दुइ ठु हींसा मँ पूरब स पच्छिम तलक बटि जाइँ। एह बर आधा पर्वत उत्तर कइँती अउर आधा दक्खिन कइँती बढ़िहीं। ⁵ जइसे-जइसे उ पहाड़ी घाटी तू पचन क निगचे आइ, तू पचे पराइ जाइ क जतन करब्या। तू पचे उहइ समइ क नाईं पराब्या, जइसे तू पचे यहूदा क राजा उज्जियाह क सासन क समइ मँ भुइँडोल स पराइ ग रह्या। जब यहोवा, मोर परमेस्सर आइ, अउर ओकर सबहि पवित्तर ओकरे संग होइहीं।

⁶ उ दिना न गर्मी या न ठंडा या न ही पाला होइ। ⁷ उ लगातार दिन होइ। एक दिन जउन सिरिफ यहोवा ही जानत ह। हुवाँ न ही दिन होइ न रात। हुवाँ हमेसा उजियारा होइ हिवाँ तलक कि साँझ मँ भी। ⁸ उ समइ, यरूसलेम स लगातार पानी बही। उ धार बँटि जाइ अउर एक हींसा पूरब कइँती बही अउर एक हींसा पच्छिम क भूमध्म सागर तलक जाइ अउर पूरे साल गर्मी अउ सर्दी मँ बही ⁹ अउर यहोवा उ समइ संसार क राजा होइ। यहोवा एक अहइ। ओकर नाउँ “एक” अहइ। ¹⁰ समूचई भूइँया गेब स लइके रिम्मोन तलक जउन यरूसलेम क दक्खिन कइँती बाटइ, रब्बा मइदान क नाईं सपाट होइ जाब। किन्तु यरूसलेम आपन ऊँचा जगह पइ ही बिन्यामीन दुआर स पहिले दुआर, (जउन कोना क दुआर अहइ) अउर हननेल क मीनार स राजा क दाखरस निकारइवाला तलक रहब्या। ¹¹ प्रतिबंध उठाइ लीन्ह जाइ अउर लोग हुआँ आपन घर बनइहीं। यरूसेलम सुरच्छित होइ।

¹² मुला यहोवा ओन रास्ट्रन क सजा देइ जउन यरूसलेम क खिलाफ लड़ेन। उ ओनका भयंकर बीमारी लगाइ देइ। खड़ा खड़ा ओनकर बदन गलि जाइ। ओनकर आँखिन ओनके कोटरे मँ गलिहीं अउर ओनकर जीभ ओनके मुँहना मँ गली। ^13-15 उ खउफनाक बेरामी दुस्मनन क डेरन मँ होइ अउर ओनकर घोड़न, खच्चरन, ऊँटन अउर गदहन क ड खउफनाक बेरामी लगि जाइ।

उ समइ, उ सबइ लोग, फुरइ, यहोवा स डेरइहीं। उ पचे एक दूसर क गटइ दबइहीं। उ पचे एक दूसर पइ वार करइ बरे हथवा उठइहीं। यहूदा क लोग यरूसलेम मँ जुद्ध करिहीं, मुला उ पचे सहर क चारिहुँ कइँती क रास्ट्रन स धन पइहीं। उ पचे बहोत जियादा सोना, चाँदी अउर ओढ़ना पइहीं। ¹⁶ अउर सबइ रास्ट्रन स बचा भवा कछू लोग जउन यरूसलेम क खिलाफ जुद्ध करइ अइहीं, हर बरिस उ पचे राजा क अराधना करइ बरे, सर्वसक्तीमान यहोवा क उपासना क करइ बरे जइहीं, कुटीर क त्यौहार मनावइ जाइहीं। ¹⁷ अउर अगर धरती क कउनो परिवार क लोग राजा क, सर्वसक्तीमान यहोवा क उपासना करइ यरूसलेम नाहीं जइहीं, तउ उ पचे बर्खा स बंचित होइ जाइहीं। ¹⁸ अउर जदि मिस्र क कउनो परिवार नाहीं उठिहीं अउर नाहीं आइहीं, तउ ओनका उहइ महामारी जउन यहोवा दूसर रास्ट्रन बरे भेजे रहा जउन कुटीर क त्यौहार मनावइ बरे नाहीं आवत रहा, कस्ट पहोंचाउब। ¹⁹ इ सज़ा मिस्र बरे होइहीं अउर इ सज़ा उ समूचइ रास्ट्र बरे जउन कुटीर क त्यौहार मनावइ नाहीं आइ।

²⁰ उ दिना, “यहोवा बरे पवित्तर” घोड़ा क घंटियन पइ भी खुदा होइ। अउर यहोवा क मन्दिर पकावइ क बर्तन वेदी क समन्वा रखा भवा पियाला क समान होइ। ²¹ यहूदा अउ यरूसलेम क हर बर्तन सर्वसक्तीमान यहोवा बरे पवित्तर होइ। जउन कउनो बलिदान चढ़ावइ बरे आइ ओनमाँ स लेइ लेब अउर ओह मँ ही पकाउब्या।

उ दिना, सर्वसक्तीमान यहोवा क मन्दिर कउनो बइपारी नाहीं होइ।

नवा यरुसलेम

21 फिन मइँ एक नवा सरग अउर नवा धरती देखेउँ। काहे बरे पहिला सरग अउर पहली धरती खतम होइ ग रहेन। अउर कब क समुद्दर उ नाहीं रहा। ² मइँ यरुसलेम क उ पवित्तर नगरी नवा यरुसलेम क आकास क बाहर निकरिके परमेस्सर कइँती स नीचे उतरत देखेउँ। उ नगरी क अइसे सजावा ग रहा जइसे कउनो दुलहिन क ओकरे पति स मिलइ क बर सजावा ग होइ।

³ तबइ मइँ आकास मँ एक जोरदार आवाज़ सुनेउँ। उ कहत रही, “देखा अउर परमेस्सर क मन्दिर आदमियन क बीच मँ अहइ अउर उ ओनही क बीच मँ रही। उ पचे ओकर लोग रइहीं अउर परमेस्सर ओनकइ परमेस्सर होइहीं। अउ खुदइ परमेस्सर ओनकइ परमेस्सर होइहीं। ⁴ ओनकी आँख क एक-एक आँसू उ पोंछ ड़ाई। अउर हुवाँ अउर न तउ कबहुँ मउत होई न सोक इ बजह स केहू क रोवइ धोवइ क न पड़ी। काहे बरे कि उ सब पुरानी बात अब खतम होइ चुकी बाटिन।”

⁵ एकरे ऊपर जउन सिंहासन प बइठा रहा, उ बोला, “देखा मइँ सब कछू नवा कइ देत अहउँ।” उ फिन कहेस, “एका लिख ल्या काहे बरे कि इ वचन विसवास लायक अहइ अउर इ सच्चा अहइ।”

⁶ फिन उ मोसे बोला, “सब कछू पूरा होइ चुका अहइ। मइँ अलफा अहउँ अउर मइँ ओमेगा अहउँ। मइँ आदि अहउँ अउर मइँ अन्त अहउँ। जउन मनई जे पिआसा अहइ, मइँ ओका जीवन-जल क झरना स सेंत-मेत मँ खुले मन स जल पिआउब। ⁷ जउन विजयी होई, उ सब चीज क मालिक बनी। मइँ ओकर परमेस्सर होब अउर मोरे पूत होई, ⁸ मुला कायरन, अबिसवासियन, मूरखन, हत्यारन, व्यभिचारिय, जाद-टोना करइवालेन, मूरति क पूजा करइवालेन अउर झूठ बोलइवालन क भभकत गंधक क जलत झील मँ आपन हिस्सा बँटावइ क होई। इ दूसरी मउत बाटइ।”

⁹ फिन उ सात सरगदूतन मँ स एक, जेनके लगे सात आखिरी विनास क कटोरा रहेन्न, एक ठु आगे आवा अउर मोसे बोला, “हिआँ आवा! मइँ तोहका उ दुलहिन देखाइ देइ जउन मेमना क दुलहिन अहइ।” ¹⁰ अबहीं मइँ आतिमा क आवेस मँ रहे कि उ मोका एक बिसाल अउर ऊँचे पर्वत प लइ गवा। फिन उ मोका यरुसलेम क पवित्तर नगरी क दर्सन कराएस। उ परमेस्सर क तरफ स आकास स नीचे उतरत रहीं।

¹¹ उ परमेस्सर क महिमा स चमकत रही। उ बिल्कुल निर्मल यसब नामक महामूल्यावान रत्नन तरह चमकत रही। ¹² नगरी क चारिहुँ कइँती एक बड़ा क ऊँचा परकोटा रहा जेहमाँ बाहर दरवाजा रहेन। उ बारहउँ दरवाजन प बारह सरगदूत रहेन। अउर बारहउँ दरवाजा प इस्राएल क बारह कुलन क नाउँ छपा रहेन। ¹³ एहमाँ स तीन दरवाजन पूरब क तरफ रहेन, तीन दरवाजन उत्तर कइँती तीन दरावाजन दच्छिन कइँती अउर तीन दरवाजन पच्छिम कइँती रहेन। ¹⁴ नगर क परकोटा बारह नीव प बनावा ग रहा अउर ओनके ऊपर मेमना क बारह प्रेरितन क नाउँ छपा रहेन।

¹⁵ जउन सरगदूत मोसे बतियात रहा, ओकरे लगे सोना क बनी नापइ क एक छड़ी रही जउने स उ नगर क फाटक अउर परकोटा क नाप सकत रहा। ¹⁶ नगर क वर्गाकार बसावा ग रहा। इ जेतना लम्बा रहा, ओतना चौड़ाई रहा। उ सरगदूत उहइ छड़ी स नगर क नापेस। ओकर लम्बाई करीब बारह हजार स्टोडिया पाई गइ। ओकर लम्बाई, चौड़ाई अउर ऊँचाई एकई तरह रही। ¹⁷ सरगदूत फिन ओकरे परकोटा क नापेस। उ करीब 144 हाथ रहा। ओका मनई क हाथन क लम्बाई स नापा ग रहा जउन हाथ सरगदूतन क हाथ अहइ। ¹⁸ नगर क परकोटा यसब नाउँ क रत्नन क बना रहा अउर नगर क काँच क तरह चमकत सुद्ध सोना स बनावा ग रहा।

¹⁹ नगर क परकोटे क नींव हर तरह क बेसकीमती रत्नन स सुसज्जित रहिन। नींव क पहला पाथर यसाब क बना रहा, दूसरा नीलम स, तीसरा स्फटिक स, चउथा पन्ना स, ²⁰ पाँचवा गोमेद स छठा मानक स सातवाँ मणि स, आठवाँ पेरोज स, नवाँ पुखराज स, दसवाँ लहसनिया स, ग्यारहवाँ धूम्रकान्त स अउर बारहवाँ चन्द्रकान्ता मणि स बना रही। ²¹ बारहउँ दरवाजा, बारह मोतियन स बना रहेन, हर दरवाजा एक एक मोती स बना रहेन। नगर क गलियन साफ काँच जइसे सुद्ध सोने स बनी रहिन।

²² नगर मँ मइँ कउनो मन्दिर नाहीं देखाई पड़ा। काहे बरे कि सबसे सर्वसक्तिमान पर्भू परमेस्सर अउर मेमना ओकर मन्दिर मँ रहेन। ²³ उ नगर क कउनो सूरज या चाँद क जरुरत नाहीं रही जउन ओका रोसनी देइ काहे बरे कि उ परमेस्सर क महिमा स खुदइ प्रकासित रहा। अउर मेमना उ नगर क दिया बाटइ।

²⁴ सब जातियन क मनई इहइ दीपक क रोसनी क सहारे आगे बड़िहइँ। अउर इ धरती क राजा आपन सुन्दरता इ नगर मँ लइ अइहीं। ²⁵ दिन क समइ एकर दरवाजा कबहूँ बन्द न होइहीं अउ हुवाँ रात तउ कबहूँ होइ न करी। ²⁶ जातियन क वैभव अउर धन सम्पत्ति क उ नगर मँ लिआवा जाई। ²⁷ कउनो गन्दी चीज ओहमाँ घुसइ न पाई। अउर न तउ लज्जा भरा काम करइवालेन अउर झूठ बोलइवालेन ओहमाँ घुसइ न पाइही। ओहमाँ ओनहीं मनई घुसइ पाइहीं जउने क नाउँ मेमना जीवन क पुस्तक मँ लिख अहइ।