Old/New Testament
शोमरोन आणि इस्राएल यांना करावयाची शिक्षा
1 मीखाला परमेश्वराचे शब्द ऐकू आले. योथाम, आहाज व हिज्कीया यांच्या काळात हे घडले. हे सर्व यहूदाचे राजे होते. मीखा मोरेशेथचा होता. मीखाने शोमरोन व यरुशलेम यांच्याविषयी पुढील दृष्टांन्त पाहिले.
2 सर्व लोकांनो ऐका!
जग आणि त्यावरील प्रत्येकाने, ऐका!
माझा प्रभू परमेश्वर, त्याच्या पवित्र मंदिरातून येईल.
तुमच्याविरुध्दचा साक्षीदार म्हणून तो येईल.
3 पाहा परमेश्वर त्याच्या स्थानातून बाहेर येत आहे.
पृथ्वीवरील उच्चस्थाने तुडविण्यासाठी तो येत आहे.
4 विस्तवाजवळ ठेवल्यास मेण वितळते,
तसे त्याच्या पायाखाली पर्वत वितळतील.
दऱ्या दुभंगतील आणि उंच टेकड्यावरुन
वाहणाऱ्या पाण्याप्रमाणे वाहू लागतील.
5 का? ह्याला कारण याकोबचे पाप,
तसेच इस्राएल राष्ट्राची दुष्कर्मे आहेत.
शोमरोन, पापाचे कारण
याकोबने पाप करण्याचे कारण काय?
त्याला कारणीभूत आहे शोमरोन.
यहूदात उच्चस्थान कोठे आहे?
यरुशलेममध्ये.
6 म्हणून मी शोमरोनला भूमीवरील खडकांच्या ढिगाप्रमाणे करीन.
ती द्राक्ष लागवडीच्या जागेप्रमाणे होईल.
शोमरोनचे चिरे मी दरीत ढकलून देईल.
आणि तिथे पायांखेरीज काहीही शिल्लक ठेवणार नाही.
7 तिच्या सर्व मूर्तीचे तुकडे तुकडे केले जातील.
तिच्या वेश्येची संपत्ती (मूर्ती) आगीमध्ये भस्मसात होईल.
तिच्या सर्व खोट्या दैवतांच्या पुतळ्यांचा मी नाश करीन. का?
कारण शोमरोनने माझ्याशी विश्वासघात करुन सर्व धन मिळविले. [a]
म्हणून माझ्याशी एकनिष्ठ नसलेल्या लोकांमार्फत
तिची संपत्ती घेतली जाईल [b]
मीखाचे मोठे दु:ख
8 घडणाऱ्या गोष्टींबद्दल मला फार दु:ख होईल.
मी अनवाणी व वस्त्राशिवाय फिरेन.
मी कोल्ह्याप्रमाणे मोठ्याने आकांत करीन.
आणि शहामृगाप्रमाणे ओरडीन.
9 शोमरोनची जखम भरुन येऊ शकत नाही.
तिचा आजार (पाप) यहूदापर्यंत पसरला आहे.
तो माझ्या माणसांच्या वेशीपर्यंत पोहोचला आहे.
तो पार यरुशलेमपर्यंत पसरला आहे.
10 गथमध्ये हे सांगू नका.
अंकोत ओरडू नका.
बेथ-अफ्रामध्ये धुळीत लोळा.
11 शाफीरमध्ये राहणारे लोकहो,
तुम्ही नग्न आणि लज्जित होऊन आपल्या वाटेने फिरता.
सअनानवासी बाहेर पडणार नाहीत.
बेथ-एसलामधील लोक शोक करतील.
आणि त्या शोकाचे कारण (आधार) तुम्ही असाल.
12 मारोथमधील लोक सुवार्तेची वाट
पाहता पाहता दुर्बल होतील.
का? कारण संकट परमेश्वराकडून खाली
यरुशलेमच्या वेशीपर्यंत आले आहे.
13 लाखीशच्या महिले,
गाडी चपळ घोडा जुंप.
सियोनच्या पापाला लाखीशमध्ये सुरवात झाली.
का? कारण तू इस्राएलच्या पापांत सामील झालीस.
14 म्हणून तू गथांतल्या मोरेशथला
निरोपाचे नजराणे दिले पाहिजेस.
अकजीबची घरे
इस्राएलच्या राजाला फसवतील.
15 मोरेशमध्ये राहणाऱ्या लोकांनो,
तुमच्या विरुध्द एका व्यक्तीला मी आणीन.
तो तुमच्या मालकीच्या वस्तू घेईल.
इस्राएलचे वैभव (परमेश्वर) अदुल्लामला येईल.
16 म्हणून केसा कापा, मुंडन करा. [c] का?
कारण तुम्हाला प्रिय असलेल्या मुलांसाठी तुम्ही शोक कराल.
गरुडा प्रमाणे तुम्ही स्वतःचे डोक्याचे मुंडन करुन कराल.
गरुडा प्रमाण तुम्ही स्वतःचे डोक्याचे मुंडन करुन घ्या आणि दु:ख प्रगट करा.
का? कारण तुमच्या मुलांना तुमच्यापासून दूर नेले जाईल.
लोकांचे दुष्ट बेत
2 पाप करण्याचे बेत करणाऱ्यांवर संकट येईल.
ते लोक आपल्या शय्येवर दुष्ट बेत करीत पडतात
आणि सकाळी फटफटताच, योजलेली वाईट कर्मे करतात.
का? कारण त्यांच्या इच्छेप्रमाणे करण्याचे सामर्थ्य त्यांच्या हाती आहे म्हणून.
2 त्यांना शेते हवे असतात, म्हणून ते ती घेतात.
घरे हवी असतात, म्हणून घरे घेतात.
ते एखाद्याला फसवितात आणि त्याचे घर घेतात.
एखाद्याची फसवणूक करुन त्याची जमीन घेतात.
लोकांना शिक्षा करण्याची परमेश्वराच्या योजना
3 म्हणूनच परमेश्वर पुढील गोष्टी सांगतो.
“पाहा! ह्या कुटुंबाला संकटात टाकण्याचे मी योजीत आहे.
तुम्ही स्वतःला वाचवू शकणार नाही. [d]
तुमचे गर्वहरण होईल.
का? कारण वाईट वेळ येत आहे.
4 मग लोक तुमच्यावर गाणी रचतील.
लोक ही शोकगीते म्हणतील:
‘आमचा विनाश झाला!
परमेश्वराने आमची भूमी काढून घेतली आणि ती दुसऱ्यांना दिली.
हो खरेच! त्याने माझी जमीन काढून घेतली.
परमेश्वराने आमची शेते घेऊन आमच्या शत्रूंमध्ये त्यांची वाटणी केली.
5 म्हणून आता आम्ही जमिनीचे मोजमाप करुन
त्या जमिनीची वाटणी परमेश्वराच्या लोकात करु शकत नाही.’”
मीखाला उपदेश करण्यास मनाई
6 लोक म्हणतात, “आम्हाला उपदेश करु नको.
आमच्याबद्दल वाईट गोष्टी सांगू नकोस
आमचे काहीही वाईट होणार नाही.”
7 पण याकोबच्या लोकांनो,
मला ह्या गोष्टी सांगितल्याच पाहिजेत.
तुमच्या वाईट कृत्यांमुळे
परमेश्वराची सहनशीलता संपुष्टात येत आहे.
तुम्ही नीट वागलात,
तर मी तुमच्यासाठी चांगली बातमी आणीन.
परमेश्वराचे लोकच त्याचे शत्रू होतात
8 माझ्या लोकांनो, तुम्ही शत्रू म्हणून (परमेश्वराचे अथवा एकमेकाचे) उभे राहिलात.
स्वतःला सुरक्षित समजणाऱ्या, जाणाऱ्या येणाऱ्या लोकांचे तुम्ही कपडे चोरता.
पणे ते युध्दकैदी असल्यासारखे मानून
तुम्ही त्यांच्या वस्तू काढून घेता.
9 तुम्ही माझ्या लोकांच्या स्त्रियांकडून
चांगली घरे काढून घेतलीत.
त्यांच्या लहान मुलांपासून
माझे वैभव काढून घेतले.
10 उठा आणि चालते व्हा!
ही तुमची विसाव्याची जागा असणार नाही.
का? कारण तुम्ही ही जागा उद्ध्वस्त केलीत.
तुम्ही ती अस्वच्छ केलीत.
म्हणून तिचा नाश होईल.
आणि तो विनाश भयंकर असेल.
11 ह्या लोकांना माझे ऐकावयाचे नाही.
पण एखादा खोटे सांगू लागला,
तर ते स्वीकारतील.
जर खोटा संदेष्टा येऊन म्हणाला,
“भविष्यकाळात चांगले दिवस येतील, द्राक्षरस आणि मद्याचा सुकाळ होईल, तर ते त्या खोट्या प्रेषितावर विश्वास ठेवतील.”
परमेश्वर त्याच्या लोकांना एकत्र आणील
12 हो! खरेच! मी याकोबच्या माणसांना एकत्र आणीन.
वाचलेल्या इस्राएल लोकांना मी एकत्र करीन.
कुरणातील कळपाप्रमाणे वा मेंढवाड्यातील मेंढराप्रमाणे मी त्यांना एकत्र ठेवीन.
मग पुष्कळ लोकांच्या गोंगाटाने ही जागा भरुन जाईल.
13 फोडणारा लोकांना ढकलून पुढे जाईल व लोकांच्या पुढे चालेल.
तो वेशीचे दार फोडील आणि लोक ते गाव सोडतील.
त्या लोकांचा राजा त्यांच्यापुढे चालेल.
परमेश्वर सर्व लोकांच्या पुढे असेल.
इस्राएलचे नेते पापामुळे अपराधी ठरतात
3 मग मी म्हणालो, “याकोबच्या नेत्यांनो, इस्राएल राष्ट्रांच्या अधिकाऱ्यांनो, न्याय म्हणजे काय
हे तुम्हाला माहीत असावे!
2 पण तुम्ही चांगल्याचा तिरस्कार करता आणि वाईटावर प्रेम करता.
तुम्ही लोकांची चामडी सोलता.
त्यांच्या हाडांवरुन मांस ओढून काढता.
3 तुम्ही माझ्या माणसांचा नाश करीत आहात. [e]
तुम्ही त्यांची कातडी सोलता आणि हाडे मोडता.
भांड्यात घालण्यासाठी ज्याप्रमाणे मांस चिरतात, त्याप्रमाणे तुम्ही त्यांच्या हाडांचे तुकडे तुकडे करता.
4 आता, तुम्ही कदाचित परमेश्वराची प्रार्थना कराल.
पण तो तुम्हाला ओ देणार नाही.
नाही, परमेश्वर तुमच्यापासून तोंड लपवेल.
का? कारण तुम्ही दुष्कृत्ये करता.”
भोंदू संदेष्टे
5 भोंदू वा खोटे संदेष्टे परमेश्वराच्या लोकांना खोेट्यागोष्टी सांगत आहेत. परमेश्वर ह्या संदेष्ट्यांबद्दल पुढीलप्रमाणे उद्गार काढतो.
“हे संदेष्टे पोटाद्वारे चालतात.
जर लोकांनी ह्या संदेष्ट्यांना खायला घातले तर ते ओरडतात, शांती नांदेल.
पण जर लोकांनी त्यांना खायला दिले नाही तर हे संदेष्टे किंचाळतात, युध्दाला तयार राहा!
6 “म्हणून ही जणू काही तुमची रात्र आहे.
म्हणूनच तुम्हाला दृष्टांन्त होत नाहीत.
भविष्यात काय घडणार हे तुम्ही पाहू शकत नाही,
म्हणून तुम्ही जणू अंधारातच आहात.
संदेष्ट्यांच्या माथ्यांवरचा सूर्य मावळला आहे.
तेव्हा भविष्यात घडणाऱ्या गोष्टी ते पाहू शकत नाहीत.
म्हणजेच त्यांच्यापुढे जणू अंधार पसरलाय!
7 द्रष्टे लज्जित झालेत ज्योतिषी ओशाळलेत.
ते काहीच बोलणार नाहीत.
का? कारण परमेश्वर त्यांच्याशी बोलणार नाही.”
मीखा परमेश्वराचा प्रामाणिक संदेष्टा आहे
8 पण परमेश्वराच्या आत्म्याने मला अधिकार,
चांगुलपणा व सामर्थ्याने भरुन टाकले आहे.
मी याकोबला त्याच्या पापांबद्दल सांगीत.
हो! मी इस्राएलशी त्याच्या पापांविषयी बोलेन.
इस्राएलच्या नेत्यांना दोष द्यायला हवा
9 याकोबच्या नेत्यांनो आणि इस्राएलच्या शास्त्यांनो, माझे ऐका!
तुम्ही योग्य चालीरीतीचा तिरस्कार करता.
सरळ गोष्टीला
तुम्ही वाकडी करता.
10 लोकांना मारुन तुम्ही सियोनची उभारणी केली.
तुम्ही लोकांना फसवून यरुशलेम उभे केले.
11 यरुशलेमचे न्यायाधीश, न्यायालयात कोणी जिंकायचे,
हे ठरविण्यासाठी लाच घेतात.
यरुशलेममधील याजकांना लोकांना शिकवण
देण्यापूर्वी लोकांनी पैसे द्यावेच लागतात.
भविष्य बघण्यापूर्वीच संदेष्ट्यांना
पैसे चारावे लागतात.
आणि मग हे नेते अपेक्षा करतात की परमेश्वराने त्यांना मदत करावी.
ते म्हणतात, “आपले काहीही वाईट होणार नाही.
कारण परमेश्वर आपल्याबरोबरच राहतो!”
12 नेत्यांनो, तुमच्यामुळे सियोनचा नाश होईल.
ती नांगरट जमीन होईल.
यरुशलेम म्हणजे दगडधोड्यांची रास होईल.
मंदिर ज्या टेकडीवर आहे, ती टेकडी निर्जन होईल व त्यावर घनदाट रान माजेल.
दोन साक्षीदार
11 मग मला मोजमाप करण्यासाठी वापरण्यात येण्यासारखी काठी देण्यात आली. आणि मला सांगण्यात आले, “जा आणि देवाचे मंदिर, वेदी व तेथील उपासकांचे मोजमाप कर. 2 पण बाहेरचे अंगण सोडून दे. त्याचे मोजमाप करु नको. कारण ते विदेशी लोकांना दिलेले आहे. ते बेचाळीस महिने पवित्र शहर तुडवितील. 3 आणि मी माझ्या दोन साक्षीदारांना सामर्थ्य देईन. ते देवाचा संदेश 1,260 दिवस देतील. ते तागाची वस्त्रे [a] घालतील.”
4 हे दोन साक्षीदार म्हणजे दोन जैतुनाची झाडे आहेत. आणि पृथ्वीच्या प्रभुसमोर असणाऱ्या दीपसमया आहेत. 5 जर एखाद्या व्यक्तीने त्या साक्षीदारांना दुखविण्याचा प्रयत्न केला तर त्यांच्या तोंडातून अग्नि निघून त्यांच्या शत्रूंना भस्म करीत राहत असे. जो कोणी त्यांना इजा करण्याचा प्रयत्न करीत असे त्याला अवश्य मरावे लागे. 6 या साक्षीदारांना ते संदेश देत असताना पाऊस पडला तर तो थांबविण्याचे सामर्थ्य आहे. त्या साक्षीदारांना पाण्याचे रक्त करण्याचे सामर्थ्य आहे. पृथ्वीवर प्रत्येक प्रकारचे संकट पाठविण्याचे सामर्थ्य आहे आणि त्यांना पाहिजे तितके वेळा ते हे करु शकतात.
7 आणि जेव्हा दोन साक्षीदार त्यांचा संदेश देण्याचे संपवतील तेव्हा त्या अभांग दऱ्यातून येणारा प्राणी त्यांच्याशी लढाई करील. प्राणी त्यांचा पराभव करील व, त्यांना मारुन टाकील. 8 त्या साक्षीदारांची शरीरे मोठ्या शहराच्या रस्त्यावर पडतील. त्या शहरांचे नाव सदोम आणि इजिप्त असे आहे. शहरांच्या या नावांना विशेष अर्थ आहे. या शहरातच आपल्या प्रभूला वधस्तंभावर मारण्यात आले. 9 साडेतीन दिवसांपर्यंत प्रत्येक वंशाचे. जमातीचे, भाषेचे आणि राष्ट्राचे लोक त्या साक्षीदारांच्या शरीरांकडे पाहतील. पण त्यांना पुरण्यास नकार देतील. 10 पृथ्वीवर राहणारे लोक त्या दोन साक्षीदारांच्या मृत्यूने आनंद पावतील ते मेजवान्या आयोजित करतील व एकमेकांना भेटी पाठवतील. ते असे करतील कारण या दोन साक्षीदारांनी पृथ्वीवर राहणाऱ्या लोकांना अतोनात क्लेश दिले होते.
11 पण साडेतीन दिवसांनंतर देवाकडील जीवनाच्या श्वासाने त्या साक्षीदारांमध्ये प्रवेश केला. आणि ते त्यांच्या पायांवर उभे राहिले. ज्या सर्व लोकांनी त्यांना पाहिले ते सर्व घाबरुन गेले. 12 मग त्या दोन साक्षीदारांनी स्वर्गातून मोठा आवाज ऐकला. तो म्हणाला, “इकडे वर या!” मग ते दोन साक्षीदार ढगातून स्वर्गात गेले. त्यांच्या शत्रूंनी त्यांना वर जाताना पाहिले.
13 त्याच वेळेला मोठा भूकंप झाला. एक दंशाश शहर नष्ट झाले व भूकंपात सात हजार लोक मारले गेले. जे लोक मेले नाहीत ते खूप घाबरले होते. त्यांनी स्वर्गातील देवाला गौरव दिले.
14 दुसरे मोठे संकट संपले. तिसरे मोठे संकट लवकरच येत आहे.
सातवा कर्णा
15 सातव्या देवदूताने त्याचा कर्णा वाजविला. तेव्हा स्वर्गात मोठ्याने आवाज झाले. ते आवाज म्हणाले:
“जगाचे राज्य आता आमच्या प्रभुचे व त्याच्या ख्रिस्ताचे झाले आहे.
आणि तो अनंतकाळपर्यंत राज्य करील.”
16 मग जे चोवीस वडील सिंहासनावर बसले होते, ते आपल्या चेहऱ्यावर पडले व त्यांनी देवाची भक्ति केली. हे वडील देवासमोर त्यांच्या सिंहासनावर बसले. 17 ते म्हणाले:
“आम्ही तुझे आभार मानतो. सर्वसमर्थ प्रभु देवा,
तूच एक आहेस की जो तू आहेस व होतास.
आम्ही तुझे उपकार मानतो कारण तुझे महान सामर्थ्य वापरुन
सत्ता चालविण्यास सुरुवात केलीस
18 जगातील लोक रागावले
पण आता तुझा राग आला आहे,
आता मेलेल्या माणसांचा न्याय करण्याची वेळ आली आहे.
तुझे सेवक, संदेष्टे यांना बक्षीस देण्याची वेळ आली आहे.
आणि तुझ्या पवित्र लोकांना बक्षिस देण्याची वेळ आली आहे.
जे लहानमोठे लोक तुझा आदर करतात,
त्यांना बक्षिस देण्याची वेळ आली आहे.
जे पृथ्वीचा नाश करतात, त्यांचा नाश करण्याची वेळ आली आहे!”
19 मग देवाने स्वर्गातील मंदिर उघडले. तेव्हा तेथे कराराचा कोश दिसला आणि विजा चमकू लागल्या. गोंगाट, गडगडाट, भूकंप व गारांचे वादळ झाले.
2006 by World Bible Translation Center