Old/New Testament
टोळांचा दृष्टांन्त
7 परमेश्वराने मला पुढील गोष्टी दाखविल्या: दुसरे पीक वाढण्यास सुरुवात व्हायच्या वेळेलाच. तो टोळ तयार करीत होता. पहिल्या पिकाची राजाची कापणी झाल्यानंतरचे हे दुसरे पीक होते. 2 टोळांनी देशातील सर्व गवत खाल्ले. त्यानंतर मी म्हणालो, “परमेश्वरा, माझ्या प्रभू, मी विनवणी करतो, आम्हाला क्षमा कर. याकोब जगू शकणार नाही तो फारच दुबळा आहे.”
3 मग ह्याबाबतीत परमेश्वराचे मनःपरिवर्तन झाले परमेश्वर म्हणाला, “ते घडणार नाही.”
अग्नीचा दृष्टांन्त
4 परमेश्वराने, माझ्या प्रभूने, मला पुढील गोष्टी दाखविल्या मी पाहिले की परमेश्वर देवाने अग्नीला न्याय देण्यास बोलाविले. अग्नीने मोठा डोह नष्ट केला व त्याने भूमी गिळण्यास सुरवात केली. 5 पण मी म्हणालो, “हे परमेश्वर देवा, थांब, मी तुझी करूणा भाकतो याकोब जगू शकणार नाही तो खूपच लहान आहे.” 6 मग परमेश्वराचे ह्या गोष्टीबाबत ह्रदयपरिवर्तन झाले. परमेश्वर प्रभू म्हणाला, “हीही घटना घडणार नाही.”
ओळंब्याचा दृष्टांन्त
7 परमेश्वराने मला पुढील गोष्टी दाखविल्या. परमेश्वर, त्याच्या हातात ओळंबा घेऊन एका भिंतीजवळ उभा होता (भिंत ओळंब्याने सरळ केलेली होती.) 8 परमेश्वर मला म्हणाला, “आमोस, तुला काय दिसते?”
मग माझा प्रभू म्हणाला, “पाहा, माझ्या माणसांमध्ये, इस्राएलमध्ये मी ओळंबा धरीन. मी त्यांच्या दृष्टपणाकडे दुर्लक्ष होऊ देणार नाही. मी वाईट डाग काढून टाकीन. 9 इसहाकच्या उच्च स्थानाचा नाश होईल. इस्राएलची पवित्र स्थाने धुळीला मिळतील. मी यराबाम घराण्यावर हल्ला करीन आणि त्यांना तलवारीने ठार मारीन.”
अमस्या आमोसला थांबविण्याचा प्रयत्न करतो
10 बेथेल येथील एक याजक अमस्या ह्याने, “इस्राएलचा राजा यराबाम ह्याला पुढील निरोप पाठविला. आमोस तुझ्याविरुध्द उठाव करावा म्हणून प्रयत्न करीत आहे. तो इतका बोलतोय की हा देश त्याचे सर्व शब्द मानू शकत नाही. 11 आमोस म्हणाला असे आहे, यराबाम तलवारीच्या वाराने मरेल, आणि इस्राएलच्या लोकांना त्यांच्या देशातून कैदी म्हणून बाहेर नेले जाईल.”
12 अमास्या आमोसला असेही म्हणाला, “अरे द्रष्ट्या, खाली यहूदात जा आणि तेथे जेव! तेथेच दे तुझे प्रवचन. 13 पण यापुढे बेथेलमध्ये संदेश देऊ करू नकोस. ही यराबामची पवित्र जागा आहे, हे इस्राएलचे मंदिर आहे.”
14 मग आमोस अमास्याला म्हणाला, “मी धंदेवाईक संदेष्टा नाही. मी संदेष्ट्यांच्या घराण्यातीलही नाही. मी गुरे राखत होतो. आणि उंबरांच्या झाडांची निगा राखत होतो. 15 मी मेंढपाळ होतो मेंढ्यांच्या मागे जात असतानाच परमेश्वराने माझा स्वीकार केला. परमेश्वर मला म्हणाला, ‘जा माझ्या लोकांना, इस्राएलला, संदेश सांग.’ 16 म्हणून परमेश्वराचा संदेश ऐका ‘इस्राएलविरुध्द संदेश सांगू नकोस, इसहाकच्या घराण्याविरुध्द प्रवचन देऊ नकोस’ असे तू मला सांगतोस. 17 पण परमेश्वर म्हणतो, ‘तुझी बायको गावची वेश्या होईल. तुझी मुलेमुली तलवारीने मरतील. दुसरे लोक तुमची भूमी घेऊन तिची आपापसात वाटणी करतील. तू परदेशात मरशील इस्राएलच्या लोकांना निश्चितच त्यांच्या देशातून कैदी म्हणून नेले जाईल.’”
पिकलेल्या फळाचा दृष्टांन्त
8 परमेश्वराने मला पुढील गोष्टी दाखविल्या मी एक उन्हाळी फळांची टोपली पाहिली. 2 परमेश्वराने मला विचारले, “आमोस, तुला काय दिसते?”
मी म्हणालो, “उन्हाळी फळांची टोपली.”
मग परमेश्वर मला म्हणाला, “माझ्या लोकांचा, इस्राएलचा, शेवट आला आहे. ह्यापुढे मी त्यांच्या पापाकडे दुर्लक्ष करणार नाही. 3 मंदिरातील गाण्याचे रूपांतर विलापिकेत होईल. परमेश्वर, माझा प्रभू असे म्हणाला. सगळीकडे प्रेतेच प्रेते असतील. लोक गुपचूप, प्रेते उचलतील आणि ढिगावर फेकतील.”
इस्राएलच्या व्यापाऱ्यांना फक्त पैसे मिळविण्यात स्वारस्य आहे
4 माझे ऐका! तुम्ही असहाय्य लोकांना तुडविता
ह्या देशातील गरिबांचा नाश करण्याचा तुम्ही प्रयत्न करीत आहात.
5 तुम्ही, व्यापारीलोक म्हणता,
“प्रतिपदा केव्हा संपेल? म्हणजे मग आम्ही आमचे धान्य विकू शकू.
शब्बाथ, केव्हा संपेल?
म्हणजे मग आम्हाला गहू विकता येईल?
आम्ही किंमत वाढवू शकतो
आणि माप लहान करू शकतो
तराजू आपल्या सोयीचे करून
आपण लोकांना फसवू शकतो.
6 गरीब कर्ज फेडू शकत नाहीत,
तेव्हा आपण त्यांना गुलाम म्हणून विकत घेऊ.
एका जोड्याच्या किंमतीत आपण
त्या असहाय्य लोकांना विकत घेऊ.
हो! आणि जमिनीवर सांडलेले गहू
आपण विकू शकू.”
7 परमेश्वराने वचन दिले आहे त्याने त्याच्या नावाची, याकोबच्या अभिमानाची शपथ घेऊन वचन दिले.
“त्या लोकांनी केलेली कृत्ये मी कधीही विसरणार नाही.
8 त्या कृत्यांमुळे सर्व भूमी हादरेल.
ह्या देशात राहणारा प्रत्येकजण मृतासाठी रडेल.
मिसरमधील नील नदीप्रमाणे,
संपूर्ण देश वर फेकला जाऊन खाली आदळेल.
देश हेलकावे खाईल.”
9 परमेश्वराने पुढील गोष्टीही सांगितल्या,
“त्या वेळी, मी सूर्याचा दुपारीच अस्त करीन.
स्वच्छ निरभ्र दिवशी, मी जगावर अंधार पसरवीन.
10 मी तुमचे उत्सव शोकदिनांत बदलीन.
तुमची सर्व गाणी ही मृतांसाठीची शोकागीते होतील.
मी प्रत्येकाला शोकप्रदर्शक कपडे घालीन.
मी प्रत्येक डोक्याचे मुंडन करीन.
एकुलता एक मुलगा गेल्यावर जसा आकांत होतो,
तसा मी करीन.
तो फारच कडू शेवट असेल.”
देवाच्या वचनांच्या उपासमारीची भयंकर वेळ येत आहे
11 परमेश्वर म्हणतो,
“पाहा! मी देशात उपासमार आणीन.
ते दिवस येतच आहेत लोकांना भाकरीची भूक नसेल.
ते पाण्यासाठी तहानेले नसतील
परमेश्वराच्या वचनांचे ते भूकेले असतील.
12 लोक मृतसमुद्रापर्यंत
आणि उत्तरेपासून पूर्वेपर्यंत भटकतील.
परमेश्वराचे वचन शोधत लोक इकडे तिकडे भटकतील.
पण त्यांना ते सापडणार नाहीत.
13 त्या वेळी, सुंदर तरुण-तरुणी
तहानेने दुर्बल होतील.
14 शोमरोनच्या पापाच्या [a] जोरावर त्यांनी वचने दिली.
ते म्हणाले, ‘दान, तुझा परमेश्वर जिवंत आहे, तितक्याच खात्रीपूर्वकआम्ही वचन देतो….’
आणि ते म्हणाले,
‘जितका बैर-शेबा परमेश्वर जिवंत आहे, तितक्याच खात्रीपूर्वक आम्ही वचन देतो….’
हे लोक पडतील,
आणि ते परत कधीही उठणार नहीत.”
परमेश्वर वेदीजवळ उभा असल्याचा दृष्टांन्त
9 मी प्रभूला वेदीजवळ उभे असल्याचे पाहिले तो म्हणाला,
“खांबांच्या माथ्यावर मार
मग इमारत अगदी उंबऱ्यापासून हादरेल.
खांब लोकांच्या डोक्यावर पाड.
कोणी जिवंत राहिल्यास,
मी त्याला तलवारीने ठार मारीन.
एखादा पळून जाईल, पण सुटणार नाही.
लोकांपैकी एकही सुटून
पळू शकणार नाही.
2 त्यांनी जमिनीत खोल खणले,
मी त्यांना तेथून ओढून काढीन.
ते आकाशात उंच गेले,
तरी मी त्यांना तेथून खाली आणीन.
3 ते जरी कर्मेल पर्वताच्या लपले,
तरी तेथून मी त्यांना शोधून काढीन.
व तेथून उचलून घेईन.
जर त्यांनी माझ्यापासून लपण्यासाठी समुद्राचा तळ गाठला,
तर मी सापाला आज्ञा करीन.
व तो त्यांना चावेल.
4 जर ते पकडले गेले.
आणि त्यांचे शत्रू त्यांना घेऊन गेले.
तर मी तलवारीला आज्ञा करीन.
आणि ती त्यांना तेथे ठार मारील.
मी त्यांच्यावर लक्ष ठेवीन हे खरे,
पण त्यांना त्रास कसा होईल हे मी पाहीन.
त्यांचे भले कसे होईल, हे मी पाहणार नाही.”
शिक्षा लोकांचा नाश करील
5 माझा प्रभू, सर्वशक्तिमान परमेशवर, जमिनीला स्पर्श करील
आणि ती वितळेल.
मग देशात राहणारे सर्व लोक मृतांसाठी शोक करतील
मिसरमधील नील नदीप्रमाणे
भूमीवर उठेल व खाली पडेल.
6 आकाशाच्यावर परमेश्वराने माड्या बांधल्या.
तो त्याचे आकाश पृथ्वीवर ठेवतो.
तो समुद्राच्या पाण्याला बोलवितो.
आणि पावसाच्या रूपात जमिनीवर ओततो, त्याचे नाव याव्हे [b] आहे.
इस्राएलच्या नाशाचे परमेश्वर वचन देतो
7 परमेश्वर असे म्हणतो:
“इस्राएल, तू मला कूशी लोकांप्रमाणे आहेस.
मी इस्राएलला मिसर देशातून बाहेर आणले.
पलिष्ट्यांना मी कफतोरमधून
आणि अरामींना कीर मधून आणले.”
8 परमेश्वर, माझा प्रभू, पापी राज्यावर (इस्राएलवर) लक्ष ठेवीत आहे.
परमेश्वर म्हणाला,
“मी इस्राएलला पृथ्वीतळावरून पुसून टाकीन.
पण याकोबच्या घराण्याचा मी संपूर्ण नाश करणार नाही.
9 इस्राएल राष्ट्रांच्या नाशाची आज्ञा मी देत आहे.
सर्व राष्ट्रांमध्ये मी इस्राएलच्या लोकांना पांगवीन.
पण पीठ चाळण्यासारखे ते असेल.
चाळणीतील पीठ हलविल्यावर, चांगले पीठ खाली पडते.
व चाळ चाळणीतच राहते, याकोबच्या घराण्याचे तसेच होईल.
10 “माझ्या लोकांतील पापी म्हणतात,
‘आमचे काही वाईट होणार नाही.’
पण त्या सर्वांना तलवारीने ठार मारले जाईल.”
राज्याच्या पुनर्बांधणीचे परमेश्वर वचन देतो
11 “दाविदचा तंबू पडला आहे.
पण त्या वेळी, मी तो तंबू पुन्हा उभारीन.
मी भिंतींतील भगदाडे बुजवीन, उद्ध्वस्त झोलेल्या वास्तू मी पुन्हा बांधीन.
मी त्या पूर्वाे होत्या, तशाच बांधीन.
12 [c] मग अदोममध्ये जिवंत असलेले लोक
आणि माझे नाव लावणारे लोक परमेश्वराकडे मदतीच्या आशेने पाहतील.”
परमेश्वर असे म्हणाला
व तो तसेच घडवून आणील.
13 परमेश्वर म्हणतो, “असे दिवस येत आहेत की नांगरणी करणारा कापणी करणाऱ्याला,
द्राक्षे तुडविणारा द्राक्षे तोडणाऱ्याला, गाठील.
टेकड्यां-डोंगरांतून गोड द्राक्षरस ओतला जाईल,
14 मी माझ्या लोकांना, इस्राएलला,
कैदेतून सोडवून परत आणीन.
ते उद्ध्वस्त झालेली गावे पुन्हा वसवतील.
आणि त्यांत वस्ती करतील.
ते द्राक्षांचे मळे लावतील.
आणि त्यापासून मिळणारा द्राक्षरस पितील.
ते बागा लावतील.
व त्यापासून मिळणारे पीक खातील.
15 मी माझ्या लोकांना त्यांच्या देशात रुजवीन.
आणि मी त्यांना दिलेल्या भूमीतून ते पून्हा उपटले जाणार नाहीत.”
परमेश्वराने, तुमच्या परमेश्वराने, हे सांगितले आहे.
सातवा शिक्का
8 कोकऱ्याने सातवा शिक्का उघडला. तेव्हा स्वर्गात अर्धा तासपर्यंत सर्वत्र शांतता होती. 2 आणि मी सात देवदूतांना देवासमोर उभे असलेले पाहिले. त्यांना सात कर्णे दिले होते.
3 दुसरा देवदूत आला आणि वेदीजवळ उभा राहिला. या देवदूताकडे सोनेरी धूप ठेवण्याचे भांडे होते, त्यांच्याकडे धूप प्रार्थनेसह अर्पण करण्यासाठी दिले होते. ह्या प्रार्थना देवाच्या पवित्र पवित्र लोकांच्या होत्या. देवदूताने त्याचे अर्पण सिंहासनासमोर सोनेरी वेदीवर ठेवले. 4 धुपाचा धूर देवदूताच्या हातातून देवाच्या सिंहासनासमोर गेला. धूर देवाच्या लोकांच्या प्रार्थनेसह गेला. 5 मग देवदूताने धुपाटणे घेऊन, वेदीवरील अग्नीने ते भरले व ते पृथ्वीवर टाकले तेव्हा विजा चमकू लागल्या. मेघांचा गडगडाट व इतर आवाज झाले. आणि भूकंप झाला.
सात देवदूत त्यांचे कर्णे वाजवितात
6 मग सात देवदूत त्यांचे कर्णे वाजविण्यास तयार झाले.
7 पहिल्या देवदूताने कर्णा वाजविला आणि रक्तमिश्रित गारा व अग्नि पृथ्वीवर टाकण्यात आले. तेव्हा पृथ्वीचा एक तृतीयांश भाग आणि एक तृतीयांश झाडे व सर्व हिरवे गवत जळून गेले.
8 दुसऱ्या देवदूताने त्याचा कर्णा वाजविला. तेव्हा अग्नीने जळत असलेल्या मोठ्या डोंगरासारखे काहीतरी समुद्रात टाकले गेले. आणि एक तृतीयांश समुद्राचे रक्त झाले. 9 आणि एक तृतीयांश समुद्रातील जीव मेले. आणि एक तृतीयांश जहाजे नष्ट झाली.
10 तिसऱ्या देवदूताने त्याचा कर्णा वाजविला तेव्हा एक मोठा तारा मशालीप्रमाणे पेटलेला आकाशातून पडला. तो तारा नद्यांच्या एक तृतीयांश भागावर पडला आणि झऱ्यांच्या एक तृतीयांश भागावर पडला. 11 त्या ताऱ्याचे नाव कडूदवणा आणि एक तृतीयांश पाणी कडू झाले. ते कडू असलेले पाणी पिऊन पुष्कळ लोक मेले.
12 चौथ्या देवदूताने त्याचा कर्णा वाजविला. तेव्हा सूर्याच्या एक तृतीयांश भागावर आघात झाला. चंद्राच्या एक तृतीयांश भागावर व ताऱ्यांच्या एक तृतीयांश भागावर आघात झाला. त्यामुळे त्याचा एक तृतीयांश भाग काळा झाला. दिवसाचा एक तृतीयांश काळा भाग झाला. रात्रीचा एक तृतीयांश भाग काळा झाला.
13 मी पाहत असताना, आकाशात उंचावर मी गरुडाला उडताना पाहिले. गरुड मोठ्या आवाजात म्हणाला, “संकट! संकट! संकट, पृथ्वीवर राहणाऱ्या लोकांवर संकट येत आहे. हे संकट तीन देवदूतांनी कर्णा वाजविल्यावर येईल.”
2006 by World Bible Translation Center