Old/New Testament
3 “एखाद्याने बायकोशी घटस्फोट घेतल्यास ती त्याला सोडते आणि दुसऱ्याशी लग्न करते.
मग तो माणूस परत आपल्या बायकोकडे जाऊ शकतो का? नाही.
जर तो माणूस त्या बाईकडे परत गेला [a] तर तो देश ‘भ्रष्ट’ होतो.
यहूदा, खूप प्रियकर (खोटे देव) असलेल्या वारांगनेप्रमाणे
तू वागलीस आणि आता तुला माझ्याकडे परत यायचे आहे.”
हा परमेश्वराचा संदेश होता.
2 “यहूदा, टेकड्यांच्या उजाड माथ्यांकडे पाहा.
अशी एक तरी जागा आहे का की जेथे तू तूझ्या प्रियकराबरोबर (खोट्या देवांबरोबर) समागम केला नाहीस?
वाळवंटात वाट पाहाणाऱ्या अरबांप्रमाणे,
तू प्रियकराची वाट बघत रस्त्याच्या कडेला बसलीस.
तू देश ‘भ्रष्ट’ केलास. कसा?
तू खूप वाईट गोष्टी केल्यास.
तू माझा विश्वासघात केलास.
3 तू पाप केलेस म्हणून पाऊस पडला नाही.
वळवाचा पाऊस तर अजिबात पडला नाही.
पण तरी तुला लाज वाटत नाही.
वारांगनेप्रमाणे तुझ्या तोंडावर निर्लज्जपणाचे भाव आहेत.
तू तुझ्या कृत्यांबद्दल शरमिंदी होत नाहीस.
4 पण आता तू मला ‘पिता’ म्हणत आहेस.
तू म्हणालीस,
‘मी लहान असल्यापासून तू माझा मित्र आहेस.’
5 असेसुद्धा् म्हणालीस,
‘देव नेहमीच माझ्यावर रागावणार नाही.
देवाचा राग सतत राहणार नाही.’
“यहूदा, तू असे म्हणतेस,
पण तू करता येतील तेवढी दुष्कृत्ये केली आहेस.”
दोन वाईट बहिणी इस्राएल आणि यहूदा
6 योशीया यहुदावर राज्य करीत असताना, परमेश्वर माझ्याशी बोलला. परमेश्वर म्हणाला, “यिर्मया, इस्राएलने केलेली दुष्कृत्ये तू पाहिलीस ना? तिने माझा कसा विश्वासघात केले ते तू पाहिलेस. तिने प्रत्येक टेकडीवर आणि प्रत्येक हिरव्या झाडाखाली मूर्तींबरोबर व्यभिचार करुन पाप केले. 7 मी स्वतःशीच म्हणालो, ‘ही दुष्कृत्ये करुन झाल्यावर तरी इस्राएल माझ्याकडे परत येईल.’ पण ती माझ्याकडे परत आली नाही. इस्राएलने काय केले हे इस्राएलच्या विश्वासघातकी बहिणीने यहूदाने पाहिले. 8 इस्राएल विश्वासघातकी आहे आणि तिला मी दूर का पाठविले ते तिला माहीत आहे. तिने व्यभिचाराचे पाप केले म्हणून मी तिला घटस्फोट दिला हे तिला कळले आहे. पण ह्यामुळे तिची विश्वासघातकी बहीण भयभीत झाली नाही. यहूदाला भीती वाटली नाही. यहूदाने सुध्दा बाहेर जाऊन वारांगनेप्रमाणे व्यवहार केला. 9 आपण वारांगनेप्रमाणे वागत आहोत ह्याची यहूदाला पर्वा नव्हती म्हणून तिने तिचा देश ‘भ्रष्ट’ केला. दगड आणि लाकूड यांपासून तयार केलेल्या मूर्तींची पूजा करुन तिने व्यभिचाराचे पाप केले. 10 इस्राएलची विश्वासघातकी बहीण (यहूदा) मनापासून माझ्याकडे परत आली नाही. परत येण्याचे तिने फक्त ढोंग केले.” हा परमेश्वराकडून आलेला संदेश आहे.
11 परमेश्वर मला म्हणाला, “इस्राएल माझ्याशी निष्ठावंत नाही. पण विश्वासघातकी यहूदापेक्षा तिच्याकडे सबळ सबबी होत्या. 12 यिर्मया, उत्तरेकडे बघ आणि संदेश सांग:
“‘इस्राएलच्या बेइमान लोकांनो, परत या’
हा परमेश्वराकडून आलेला संदेश आहे.
‘मी तुमच्यावर संतापायचे सोडून देईन.
मी दयाळू आहे.’
हा परमेश्वराचा संदेश आहे.
‘मी कायमचा तुमच्यावर रागावणार नाही.
13 तुम्ही पाप केले आहे एवढे तुम्हाला समजले पाहिजे.
तुम्ही परमेश्वराच्या, तुमच्या देवाच्या,
विरुद्ध् गेलात तेच तुमचे पाप आहे.
तुम्ही दुसऱ्या राष्ट्रातील मूर्तींना प्रत्येक हिरव्या झाडाखाली पूजले.
तुम्ही माझ्या आज्ञा पाळल्या नाहीत.’”
हा परमेश्वराकडून आलेला संदेश आहे .
14 “तुम्ही लोक विश्वासघातकी आहात. पण माझ्याकडे परत या.” हा परमेश्वराचा संदेश होता. “मी तुमचा प्रभू आहे मी प्रत्येक नगरातील एक आणि प्रत्येक कुटुंबातील दोन माणसे घेईन आणि तुम्हाला सियोनला आणीन. 15 मग मी तुम्हाला नवे मेंढपाळ (शासनकर्ते) देईन. ते माझ्याशी निष्ठावान असतील. ते ज्ञान आणि समज ह्यांच्या सहाय्याने तुम्हाला मार्गदर्शन करतील. 16 त्या काळात, देशात तुमच्यापैकी बरेचजण असतील.” हा परमेश्वराकडून आलेला संदेश आहे .
“त्या वेळेला, लोक पुन्हा कधीही असे म्हणणार नाहीत, ‘परमेश्वराच्या कराराचा कोश आमच्याजवळ असण्याचे दिवस आम्हाला आठवतात.’ येथून पुढे ते त्या पवित्र कोशाचा विचारसुद्धा् करणार नाहीत. 17 त्या वेळेला यरुशलेम नगरीला ‘परमेश्वराचे सिंहासन’ म्हटले जाईल. परमेश्वराच्या नावाचा मान राखण्यासाठी सर्व राष्ट्रे यरुशलेममध्ये एकत्र येतील. ह्या पुढे ते त्यांच्या दुराग्रही आणि दुष्ट मनांचे अनुसरण करणार नाहीत. 18 त्या दिवसांत यहूदाचे घराणे इस्राएलच्या घराण्याला येऊन मिळेल. उत्तरेकडच्या प्रदेशातून ते गोळा होऊन येतील मी त्यांच्या पूर्वजांना दिलेल्या भूमीत ते येतील.”
19 मी, परमेश्वर, स्वतःशी म्हणालो,
“माझ्या स्वतःच्या मुलांप्रमाणे तुम्हाला वागवावे असे मला वाटते.
इतर कोणत्याही राष्ट्रापेक्षा, तुम्हाला, सुंदर व
आल्हाददायक भूमी द्यावी अशी माझी इच्छा आहे.
मला वाटले की तुम्ही मला ‘पिता.’
म्हणाल व नेहमीच मला अनुसराल.
20 पण तुम्ही पतीशी विश्वासघात करणाऱ्या पत्नीप्रमाणे आहात.
इस्राएलच्या घराण्यातील लोकांनो, तुम्ही माझा विश्वासघात करीत आहात.
हा देवाचा संदेश आहे .
21 उजाड टेकड्यांवरुन येणारा रडण्याचा आवाज तुम्ही ऐकू शकता.
इस्राएले लोक रडत आहेत.
ते दयेसाठी याचना करीत आहेत.
ते फार पापी झाले.
ते त्यांच्या परमेश्वर देवाला विसरले.”
22 परमेश्वर पुढे म्हणाला, “इस्राएलच्या लोकांनो, तुम्ही माझ्याशी विश्वसघात करता.
पण माझ्याकडे परत या.
माझ्याकडे परत या.
जरी तुम्ही विश्वासघातकी असलात तरी मी तुम्हाला क्षमा करीन.”
पण लोकांनी म्हणावे, “हो! आम्ही तुझ्याकडे येऊ
तूच परमेश्वर आमचा देव आहेस!”
23 टेकड्यांवर मूर्तींची पूजा करणे मूर्खपणाचे आहे.
डोंगरावर मोठ्या, दिखाऊ मेजवान्या करणे चूक आहे.
इस्राएलचे पापविमोचन नक्कीच
आपल्या परमेश्वर देवाकडून येईल.
24 त्या भयानक खोट्या देवाने बआल देवताने आमच्या वडिलांच्या
मालकीचे सर्व काही खाल्ले आहे.
त्या खोट्या दैवताने आमच्या पूर्वजांची मुले व मुली गिळली.
आमच्या तारुण्यापासून हे घडले.
त्या भयानक खोट्या देवाने आमच्या वडिलांच्या मेंढ्या आणि गुरे
आणि त्यांची कोकरे व वासरे घेतली.
25 लज्जेचे आपण अंथरुण करु या आणि
पांघरुणाने आपण शरीर झाकतो तशी लाज आपण पांघरु या.
आम्ही आमच्या परमेश्वर देवाविरुद्ध् जाऊन पाप केले.
आम्ही आणि आमच्या वडिलांनी पाप केले.
आम्ही लहान असल्यापासून परमेश्वर देवाच्या
आज्ञा पाळल्या नाहीत.
4 हा परमेश्वराचा संदेश आहे
“इस्राएल तुला परत यायचे असेल
तर माझ्याकडे परत ये.
तुझ्या मूर्ती फेकून दे.
माझ्यापासून दूर जाऊन भटकू नकोस.
2 तू ह्या गोष्टी केल्यास,
तर तू शपथ घेण्यासाठी माझे नाव वापरु शकशील.
‘परमेश्वर असे तो पर्यंत,’
असे तू म्हणू शकशील.
तू हे शब्द खऱ्या, प्रामाणिक आणि योग्य, तऱ्हेने वापरु शकशील.
तू ह्या गोष्टी केल्यास परमेश्वर राष्ट्रांना आशीर्वाद देईल.
ती राष्ट्रे परमेश्वराने केलेल्या
कृत्यांबद्दल बढाया मारतील.”
3 परमेश्वर यहूदा व यरुशलेम मधील लोकांना म्हणतो:
“तुमची शेते नांगरलेली नाहीत.
ती शेते नांगरा.
काट्यात बी पेरु नका.
4 परमेश्वराची माणसे व्हा.
तुमची ह्रदये बदला [b] यहुदातील आणि
यरुशलेममधील लोकांनो तुम्ही बदलला नाहीत,
तर मी खूप रागावेन.
माझा राग आगीप्रमाणे वेगाने पसरुन
तुम्हाला जाळून टाकील.
असे का घडेल?
तुम्ही केलेल्या दुष्कृंत्यांमुळे असे घडेल.”
उत्तरेकडून येणारे अरिष्ट
5 “यहूदाच्या लोकांना हा संदेश द्या.
यरुशलेममधील प्रत्येकाला सांगा:
‘सर्व देशभर रणशिंगे फुंका,’
मोठ्याने ओरडून सांगा,
‘एकत्र या.
सुरक्षिततेसाठी आपण सर्व मजबूत शहराकडे जाऊ या.’
6 खुणेचे ध्वज सियोनच्या दिशेने दाखवा.
जीव वाचविण्यासाठी पळा. वाट पाहू नका.
कारण मी उत्तरेकडून अरिष्ट आणीत आहे.
मी भयानक विध्वंस घडवून आणीत आहे.”
7 सिंह त्याच्या गुहेतून बाहेर आला आहे.
राष्ट्रांचा नाश करणाऱ्याने कूच करायला सुरवात केली आहे.
तुमच्या देशाचा नाश करण्यासाठी त्याने त्याचे घर सोडले आहे.
तुमच्या शहरांचा नाश होईल.
तेथे कोणीही शिल्लक राहणार नाही.
8 म्हणून शोकवस्त्रे घाला आणि मोठ्याने आक्रोश करा.
का? कारण परमेश्वर आमच्यावर रागावला आहे.
9 परमेश्वर म्हणतो, “हे घडत असताना,
राजा आणि त्याचे अधिकारी यांचा धीर सुटेल,
याजक घाबरतील,
संदेष्ट्यांना धक्का बसेल.”
10 नंतर, मी, यिर्मया, म्हणालो, “परमेश्वरा, माझ्या प्रभू तू यहुदातील आणि यरुशलेममधील लोकांना खरोखरच युक्तीने फसविलेस. ‘तू त्यांना म्हणालास की तुम्हाला शांती मिळेल.’ पण आता, तू तलवारीचे पातेच त्यांच्या नरड्याला लावीत आहेस.”
11 त्या वेळेला यहुदा व यरुशलेम येथील
लोकांना एक संदेश दिला जाईल.
“उजाड टेकड्यावरुन गरम वारा वाहतो.
तो वाळवंटातून माझ्या लोकांकडे वाहत येतो.
फोलकटापासून धान्य वेगळे करण्याकरिता शेतकरी ज्या वाऱ्याचा उपयोग करतात,
तसा हा सौम्य वारा नाही.”
12 हा वारा त्यापेक्षा जोराचा आहे
आणि तो माझ्याकडून येतो आता,
“मी यहुदाच्या लोकांविरुद्ध् माझा निकाल जाहीर करीन.”
13 पाहा! शत्रू ढगाप्रमाणे वर येतो.
त्याचे रथ वावटळीप्रमाणे दिसतात,
त्यांचे घोडे गरुडांपेक्षा वेगवान आहेत.
हे सर्व आपल्या दृष्टीने अतिशय वाईट आहे.
आपला विध्वंस झाला!
14 यरुशलेममधील लोकांनो, तुमच्या मनातील पाप धुवून टाका.
तुमची मने शुद्ध् करा.
मग तुम्ही वाचविले जाऊ शकता.
दुष्ट बेत करीत बसू नका.
15 ऐका! दान प्रांतातून दूताचा
आवाज येत आहे.
एफ्राईम ह्या टेकड्यांच्या देशातून
हा माणूस वाईट बातमी आणीत आहे.
16 “ही बातमी ह्या देशाला कथन करा.
यरुशलेमच्या लोकांत ही बातमी पसरवा दुरवरच्या देशांतून शत्रू येत आहेत.
यहुदाच्या विरुद्ध् ते युद्धाची घोषण करीत आहेत.
17 शेताचे रक्षण करण्यासाठी लोक शेताभोवती कडे करतात
तसा शत्रूने यरुशलेमला वेढा घातला आहे.
यहूदा, तू माझ्याविरुद्ध् गेलीस
म्हणून शत्रू तुझ्याविरुद्ध् चढाई करण्यास येत आहे.”
हा परमेश्वराचा संदेश आहे.
18 “तू ज्या तऱ्हेने राहिलीस आणि जी कर्मे केलीस.
त्यामुळे हे संकट तुझ्यावर आले.
तुझ्या पापाने तुझे जीवन कठीण केले.
तुझ्या पापी जीवनामुळे, तुझ्या अंतःकरणाला
खोल जखमा होऊन वेदना झाल्या.”
यिर्मयाचा आक्रोश
19 अरे रे! दु:खाने आणि काळजीने माझ्या पोटात खड्डा पडत आहे.
मी वेदनेने वाकत आहे.
मी खरच खूप घाबरलो आहे.
माझ्या ह्रदयात धडधडत आहे.
मी गप्प बसू शकत नाही का?
मी रणशिंग फुंकलेले ऐकले आहे.
रणशिंग सैनिकांना युद्धासाठी बोलावीत आहे.
20 अरिष्टामागून अरिष्ट येते.
संपूर्ण देशाचा नाश झाला.
अचानक माझ्या तंबूचा नाश झाला.
कनाती फाडल्या गेल्या.
21 परमेश्वरा, युद्धाची निशाणी मला किती काळ पाहिली पाहिजे?
किती वेळ मी रणशिंग ऐकले पाहिजे?
22 देव म्हणतो, “माझे लोक मूर्ख आहेत.
ते मला ओळखत नाहीत.
ती मूर्ख मुले आहेत
त्यांना समजत नाही.
दुष्कृत्ये करण्यात ते पटाईत आहेत
पण सत्कृत्ये कशी करावी त्यांना माहीत नाही.”
अरिष्ट येत आहे
23 मी पृथ्वीकडे पाहिले.
पृथ्वी उजाड आणि
अस्ताव्यस्त होती.
पृथ्वीवर काहीही नव्हते.
मी आकाशाकडे पाहिले त्याचा प्रकाश गेला होता. [c]
24 मी डोंगराकडे पाहिले ते कापत होते.
सर्व टेकड्या थरथरत होत्या.
25 मी पाहिले पण कोठेही माणसे नव्हती.
आकाशातील सर्व पक्षी दूर उडून गेले होते.
26 मी पाहिले आणि सुपीक जमिनीचे वाळवंट झाले.
त्या भूमीवरील सर्व शहरांचा नाश झाला.
परमेश्वराने हे घडविले.
परमेश्वराने आणि त्याच्या क्रोधाने हे घडवून आणले.
27 परमेश्वर पुढील गोष्टी सांगतो:
“संपूर्ण देशाचा नाश होईल.
(पण मी देशाचा संपूर्ण नाश करणार नाही.)
28 म्हणून देशातील लोक मृतांसाठी शोक करतील.
आकाश काळे होईल.
मी बोललो आहे ते बदलणार नाही.
मी निर्णय घेतला आहे आणि मी बदलणार नाही.”
29 यहुदातील लोक घोडेस्वारांचा व
धनुर्धरांचा आवाज ऐकतील आणि ते पळून जातील.
काही लोक गुहांतून लपतील काही झुडुपांत लपतील.
काही डोंगरकड्यांवर चढतील.
यहुदातील सर्व शहरे ओस पडतील.
तेथे कोणीही राहणार नाही.
30 यहूदा, तुझा नाश होत आला आहे.
मग आता तू काय करीत आहेस?
तुझा उत्तम लाल पोशाख तू का घालीत आहेस?
तुझे सोन्याचे दागिने तू का घालीत आहेस?
तू डोळ्यांचा साजशृंगार का करीत आहेस?
तू स्वतःला सुंदर बनवितेस
पण हे वेळेचा अपव्यय करणे आहे.
तुझे प्रियकर तुझा तिरस्कार करतात.
ते तुला ठार मारण्याचा प्रयत्न करीत आहेत.
31 स्त्री प्रसूतिवेदना होताना ओरडते, तसा आवाज मी ऐकतो.
पहिल्या बाळंतपणाच्या वेळेला स्त्री ज्याप्रमाणे किंकाळी फोडते, तशीच ती किंकाळी आहे.
हा सियोनकन्येचा आवाज आहे.
ती प्रार्थनेसाठी हात जोडत आहे.
ती म्हणत आहे, “हे देवा, मी चक्कर येऊन पडण्याच्या बेतात आहे.
खुन्यांनी मला घेरले आहे!”
यहुदाच्या लोकांचे पाप
5 परमेश्वर म्हणतो, “यरुशलेमच्या रस्त्यावरुन चाला. सभोवती पाहा आणि या गोष्टींचा विचार करा. नगरातील चव्हाटे शोधा. जो सत्याचा शोध घेतो, जो सच्चेपणाने वागतो असा एखादा सज्जन माणूस सापडू शकतो का ते पाहा. जर तुम्हाला एक तरी सज्जन व सत्यशील माणूस सापडला तरी मी यरुशलेमला क्षमा करीन. 2 लोक शपथ घेतात आणि म्हणतात, ‘परमेश्वर असेपर्यंत.’ पण ते काही त्यांच्या मनात नसते.”
3 हे परमेश्वरा, मला माहीत आहे की तुझ्या लोकांनी तुझ्याशी
एकनिष्ठपणे वागायला हवे आहे.
तू यहूदातील लोकांना चोपलेस
पण त्यांना काही वेदना झाल्या नाहीत.
तू त्यांचा नाश केलास,
पण त्यांनी धडा शिकण्यास नकार दिला.
ते फार दुराग्रही झालेत.
त्यांनी केलेल्या वाईट कृत्यांबद्दल त्यांना खेद वाटला नाही.
4 पण मी (यिर्मया) मनाशी म्हणालो,
“गरीब लोकच एवढे मूर्ख असले पाहिजेत.
परमेश्वराच्या चालीरिती ते शिकलेले नाहीत.
त्यांना, त्यांच्या देवाची शिकवण माहीत नाही.
5 म्हणून मी यहुदाच्या नेत्यांकडे जाऊन त्यांच्याशी बोलेन.
नेत्यांना परमेश्वराच्या चालीरिती नक्कीच माहीत असतात.
त्यांना त्यांच्या देवाचे नियम माहीत असतात.
ह्याची मला खात्री आहे!”
पण परमेश्वराच्या सेवेतून मुक्त होण्यासाठी
सर्व नेते एकत्र जमले होते.
6 ते देवाच्या विरुद्ध् गेले म्हणून जंगलातील सिंह त्यांच्यावर हल्ला करील.
जंगलातील लांडगा त्यांना ठार मारील.
चित्ता त्यांच्या शहराजवळ लपला आहे.
शहरातून बाहेर येणाऱ्या प्रत्येकाचे तो तुकडे तुकडे करील.
यहूदातील लोकांनी पुन्हा पापे केल्याने हे घडून येईल.
ते, अनेक वेळा, देवापासून दूर भटकत गेले आहेत.
7 देव म्हणाला, “यहूदा, मी तुला क्षमा करावी म्हणून तू मला एक तरी सबळ कारण सांग.
तुझ्या मुलांनी माझा त्याग केला.
त्यांनी मूर्तींपुढे शपथा वाहिल्या.
पण त्या मूर्ती म्हणजे खरे देव नव्हेत.
तुझ्या मुलांना पाहिजे ते सर्व मी दिले.
पण तरी त्यांनी माझा विश्वासघात केला.
त्यांनी आपला बराच वेळ वारांगनेबरोबर घालविला.
8 ते लोक, भरपूर खाद्य खाणाऱ्या व समागमाला तयार असणाऱ्या घोड्यांप्रमाणे आहेत.
शेजाऱ्याच्या बायकोला वासनेने हाका मारणाऱ्या घोड्यांप्रमाणे ते आहेत.
9 ह्या कर्मांबद्दल मी यहूदातील लोकांना शिक्षा करावी का?”
हा परमेश्वराकडून आलेला संदेश आहे.
“हो! अशा रीतीने जीवन जगणाऱ्या राष्ट्राला मी शिक्षा करीनच, हे तू जाणतेस.
त्यांच्या लायकीप्रमाणे मी त्यांना शिक्षा करीन.
10 “यहूदाच्या द्राक्षवेलींच्या रांगातून जा.
वेली तोडून टाका (पण त्यांचा संपूर्ण नाश करु नका)
त्यांच्या फांद्या तोडा.
का? ह्या फांद्या परमेश्वराच्या मालकीच्या नाहीत.
11 यहूदा व इस्राएल येथील घराणी, प्रत्येक बाबतीत,
माझा विश्वासघात करीत आली आहेत.”
हा परमेश्वराचा संदेश आहे.
12 “हे लोक परमेश्वराबद्दल खोटे बोलले.
ते म्हणाले आहेत, ‘परमेश्वर आम्हाला काही करणार नाही.
आमचे काही वाईट होणार नाही.
आमच्यावर हल्ला झालेला आम्ही कधी पाहणार नाही.
आम्ही कधी उपाशी राहणार नाही.’
13 खोटे संदेष्टे पोकळ वाऱ्या प्रमाणे आहेत.
देवाचे शब्द त्यांच्याजवळ नाहीत [d] त्यांचे वाईट होईल.”
14 सर्वशक्तिमान परमेश्वराने पुढील गोष्टी सांगितल्या.
“मी त्यांना शिक्षा करणार नाही असे ते लोक म्हणाले म्हणून,
यिर्मया, मी जे शब्द तुला देतो, ते आगीप्रमाणे असतील,
ते लोक लाकडाप्रमाणे असतील,
ती आग त्यांना पूर्णपणे जाळून टाकील.”
15 इस्राएलच्या वारसांनो हा परमेश्वराचा संदेश आहे.
“दूरवरच्या राष्ट्राला मी, तुमच्यावर हल्ला करण्यासाठी लवकरच आणीन.
ते शक्तिशाली राष्ट्र आहे.
ते प्राचीन राष्ट्र आहे.
त्या राष्ट्रांतील लोक तुम्हाला माहीत नसणारी भाषा बोलतात.
ते काय बोलतात ते तुम्ही समजू शकणार नाही.
16 त्यांचे भाते उघड्या थडग्यांप्रमाणे आहेत.
त्यांची सर्व माणसे शक्तिशाली सैनिक आहेत.
17 तुम्ही गोळा केलेले सर्व धान्य ते खातील.
ते तुमचे सर्व अन्न खाऊन टाकतील.
ते तुमच्या मुलामुलींना खाऊन टाकतील (त्यांचा नाश करतील) ते तुमची गुरे, शेळ्या, मेंढ्या खातील.
ते तुमची द्राक्षे आणि अंजिरे फस्त करतील.
त्यांच्या तलवारीच्या जोरावर ते तुमच्या मजबूत शहरांचा नाश करतील.
तुम्ही ज्या शहरांवर विसंबता ती भक्कम शहरे ते नष्ट करतील.”
18 “पण जेव्हा ते भयानक दिवस येतील.
हा परमेश्वराकडून आलेला संदेश आहे,
तेव्हा, यहूदा, मी तुझा संपूर्ण नाश करणार नाही.
19 यहूदाचे लोक तुला विचारतील,
‘यिर्मया, आमच्या परमेश्वर देवाने आमचे असे वाईट का केले?’
त्यांना पुढील उत्तर दे,
‘यहूदाच्या लोकांनो, तुम्ही परमेश्वराला सोडले
आणि तुमच्या देशात तुम्ही परक्या मूर्तींची सेवा केली.
तुम्ही असे वागलात म्हणून आता
तुम्ही परक्या देशात परक्यांचीच सेवा कराल.’”
20 परमेश्वर म्हणाला, “याकोबाच्या वंशजांना
आणि यहूदातील राष्ट्रांना हा संदेश द्या.
21 ऐका! तुम्हा मूर्खांना अक्कल नाही.
तुम्हाला डोळे असून दिसत नाही
कान असून ऐकू येत नाही.
22 खरोखर तुम्हाला माझी भिती वाटते.”
हा परमेश्वराचा संदेश आहे.
“माझ्यापुढे तुम्ही भीतीने थरथर कापावे.
समुद्राला सीमा असावी म्हणून समुद्रकिनारे निर्माण करणारा मी एकमेव आहे.
पाणी अखंड जागच्या जागी राहावे म्हणून मी असे केले.
लाटा कधी किनाऱ्यावर आक्रमण करतात.
पण त्या किनाऱ्याचा नाश करीत नाहीत.
लाटा गर्जना करीत कधी कधी आत येतात, पण त्या किनाऱ्याच्या बाहेर जाऊ शकत नाहीत.
23 पण यहूदाचे लोक दुराग्रही आहेत.
ते नेहमीच माझ्याविरुद्ध् जाण्यासाठी मार्ग आखत असतात.
ते माझ्यापासून दूर गेले आणि त्यांनी माझा त्याग केला.
24 यहूदातील लोक आपल्या मनाशी असे कधीही म्हणत नाहीत
‘आपण आपल्या परमेश्वर देवाला घाबरु या आणि त्याचा मान राखू या.
योग्य वेळेला तो आपल्याला आगोटीचा व वळवाचा पाऊस देतो.
योग्य वेळी आपल्याला कापणी करता येईल, ह्याची तो खात्री करुन घेतो.’
25 यहूदातील लोकांनो, तुम्ही पाप केलेत म्हणूनच पावसाळा व सुगीचा हंगाम आला नाही.
तुमच्या पापांनी परमेश्वराकडून मिळणाऱ्या ह्या चांगल्या गोष्टींचा आनंद तुमच्यापासून हिरावून घेतला आहे.
26 माझ्या माणसांत काही दुष्ट आहेत.
ते फासेपारध्यांप्रमाणे आहेत.
हे लोक जाळे पसरवितात,
पण पक्ष्यांना पकडण्या ऐवजी ते माणसांना पकडतात.
27 पक्ष्यांनी पिंजरे भरावेत तशी ह्या
दुष्टांची घरे कपटांनी भरलेली असतात.
त्यांच्या कपटांनी त्यांना श्रीमंत व शक्तिशाली बनविले.
28 त्यांनी केलेल्या दुष्कृत्यांमुळे ते पुष्ट व लठ्ठ झाले आहेत.
त्यांच्या दुष्कृत्यांना अंत नाही.
ते अनाथांच्या वतीने बोलणार नाहीत.
ते त्यांना मदत करणार नाहीत.
ते गरीब लोकांना योग्य न्याय मिळवून देणार नाहीत.
29 त्यांनी केलेल्या ह्या कर्मांबद्दल मी त्यांना शिक्षा करावी का?”
हा परमेश्वराकडून आलेला संदेश आहे.
“अशा राष्ट्राला मी शिक्षा करणार हे तुम्हाला माहीत आहे.
त्यांना योग्य ती शिक्षा मी करीन.”
30 परमेश्वर म्हणतो, “यहूदात भयानक
व धक्कादायक गोष्ट घडली आहे.
31 संदेष्टे खोटे सांगतात,
जे काम करण्यासाठी याजकांची निवड केली आहे, ते काम ते करणार नाहीत.
आणि माझ्या लोकांना हे आवडते!
पण तुमची शिक्षा जवळ
आल्यावर तुम्ही काय कराल?”
खोठ्या सिक्षकांविरुद्ध इशारा
4 आत्मा स्पष्ट म्हणतो की, नंतरच्या काळात काही जण विश्वास सोडतील, ते भविष्य सांगणारे आत्मे, जे फसविणारे आहेत त्यांच्याकडे लक्ष देतील, 2 आणि भूतापासून येणाऱ्या शिक्षणाकडे आणि ढोंगी फसविणाऱ्यां कडे लक्ष देतील. 3 ते लोकांना लग्न करण्यास मना करतात व काही अन्नपदार्थ टाळण्यासाठी सांगतात. जे विश्वासणारे आहेत, व ज्यांना सत्य माहीत आहे अशांनी उपकार मानून घेण्यासाठी देवाने ते निर्माण केले आहेत. 4 कारण देवाने केलेली प्रत्येक गोष्ट चांगली आहे व जर उपकार मानून आम्ही घेतो तर कोणतीही गोष्ट नाकारु नये. 5 कारण प्रत्येक वेळी ती देवाच्या शब्दाने आणि प्रार्थनेने पवित्र केली जाते.
ख्रिस्त येशूचा चांगला सेवक हो
6 तेव्हा बंधू, जर तू या गोष्टी ख्रिस्ती बंधुभगिनींना शिकविल्या, तर तू जो सत्यात व विश्वासात वाढलास व चांगल्या शिक्षणाला अनुसरलास तो तू ख्रिस्त येशूचा चांगला सेवक होशील. 7 परंतु देवहीन गोष्टी, ज्या म्हाताऱ्या स्त्रियांचे लक्षण आहे ते टाळ आणि स्वतःला सतत देवाच्या भक्तीमध्ये गुंतवण्याची सवय ठेव. 8 कारण शारीरिक शिकवणुकीला अल्प महत्त्व आहे पण देवाच्या सेवेला सर्व प्रकारे महत्त्व आहे, कारण ते सध्याच्या जीवनाविषयी आणि भविष्यातील जीवनाविषयी आशीर्वादाचे अभिवचन आहे. 9 हे सत्य वचन आहे जे सर्वथा स्वीकारावयास योग्य आहे. 10 म्हणून आम्ही जास्त काम करतो आणि धडपड करतो. कारण आम्ही, जो सर्व लोकांचा व विशेषेकरून जे विश्वास ठेवतात, अशा विश्वासणाऱ्यांचा विशेषकरुन तारणारा आहे त्या जिवंत देवावर आशा ठेवली आहे.
11 आज्ञा कर आणि या गोष्टी शिकव. 12 तू तरुण आहेस म्हणून कोणी तुला तुच्छ मानू नये. त्याऐवजी, विश्वासणाऱ्यांसाठी तू तुझ्या बोलण्याने, तुझ्या वागण्याने, तुझ्या प्रेम दर्शविण्याने, तुझ्या असलेल्या विश्वासाने व तुझ्या शुद्ध जीवनाने त्यांचा आदर्श हो.
13 मी येईपर्यंत लोकांमध्ये देवाचे वचन वाचण्यात, बोध करण्यात व शिकविण्यात स्वतःला वाहून घे. 14 जेव्हा वडीलजनांनी तुझ्यावर हात ठेवला त्यावेळी भविष्याच्या संदेशाचा परिणाम म्हणून तुला मिळालेली देणगी जी तुझ्यामध्ये आहे, त्याविषयी निष्काळजी राहू नको. 15 या सर्व गोष्टींकडे पूर्ण लक्ष दे, त्यात पूर्ण गढून जा. यासाठी की तुझी प्रगती सर्व लोकांना दिसून यावी. 16 आपणांकडे व आपल्या शिकवणुकीकडे लक्ष दे. त्यामध्ये टिकून राहा. कारण असे केल्याने तू स्वतःचे व जे तुझे ऐकतात, त्यांचे तारण करशील.
2006 by World Bible Translation Center