Old/New Testament
दुट्ठ लोगन क आपन जिन्नगी बदलइ चाही
59 लखा, तोहार रच्छा बरे यहोवा क सक्ति काफी अहइ। जब तू मदद बरे ओका गोहरावत ह तउ उ तोहार सुन सकत ह। 2 किन्तु तोहार पचन्क पाप तू पचन्क परमेस्सर स अलग करत हीं अउर इहइ बरे उ तोहरे पचन्क तरफ स कान बन्द कइ लेत ह। 3 तोहार पचन्क हाथ गन्दा अहइँ, उ सबइ खून स सने भए अहइँ। तोहार पचन्क अँगुरियन अपराधन स भरी अहइँ। आपन मुँहे स तू पचे झूठ बोलत अहा। तोहार पचन्क जिभियन बुरी बातन करत हीं। 4 दूसर मनइ क बारे मँ कउनो मनई फुरइ नाहीं बोलत। लोग अदालत मँ एक दूसर क खिलाफ मुकद्दमा करत हीं। आपन मुकद्दमा जीतइ बरे उ पचे झूठे तर्कन पइ आसरा करत हीं। उ पचे एक दूसर क बारे मँ परस्पर झूठ बोलत हीं। उ पचे कस्ट क गर्भ मँ धारण करत हीं अउर बुराइयन क जनम देत हीं। 5 उ पचे सरप क बिख भरे अण्डन क समान बुराई क सेवत हीं। अगर ओनमाँ स तू एक अण्डा भी खाइ ल्या तउ तोहार मउत होइ जाइ अउर अगर तू ओनमाँ स एक अण्डा फोड़ द्या तउ एक जहरीला नाग बाहेर निकरि पड़इ।
लोग झूठ बोलत हीं। इ झूठ मकड़ी क जालन जइसी कपड़े नाहीं बन सकतेन। 6 ओन जालन स तू आपन क ढाँपि नाहीं सकतेन।
कछू लोग बदी करत हीं अउर आपन हाथन स दूसरन क नोस्कान पहोंचावत हीं। 7 अइसी लोग आपन गोड़न क प्रयोग बदी क लगे पहोंचइ बरे करत हीं। इ सबइ लोग निर्दोख मनइयन क मारि डावइ क जल्दी मँ रहत हीं। उ पचे बुरे विचारन मँ पड़े रहत हीं। उ पचे जहाँ जात हीं बिनास अउ बिध्वंस फइलावत हीं। 8 अइसे लोग सान्ति क मारग नाहीं जानतेन। ओनकर जिन्नगी मँ नेकी तउ होत ही नाहीं। ओनकर रास्तन ईमानदारी क नाहीं होतेन। कउनो भी मनई जउन ओनके जइसा जिन्नगी जिअत ह, आपन जिन्नगी मँ कबहुँ सान्ति नाहीं पाई।
इस्राएल क पापन स बिपत्ति क आउब
9 एह बरे परमेस्सर क निआव अउर मुक्ति हम स दूर अहइ।
हम प्रकास क बाट जोहत अही।
पर बस केवल अन्धकार फइला अहइ।
हमका चमकत प्रकास क आसा अहइ।
किन्तु हम अँधियारा मँ चलत अही।
10 हम अइसे लोग अही जेनके लगे आँखिन नाहीं अहइँ।
नेत्रहीन लोगन क तरह हम देवारन क टटोरित चलत अही।
हम ठोकर खात अही अउर गिर जात अही जइसे इ रात होइ।
दिन क प्रकास मँ भी
हम मुर्दन क भाँति गिर पड़ित ह।
11 हम सब बहोत दुःखी अही।
हम सब अइसे कराहत अही जइसे कउनो रीछ अउर कउनो कबूतर कराहत ह।
हम अइसे उ समय क बाट जोहत अही जब लोग निस्पच्छ होइहीं
किन्तु अबहिं तलक तउ कतहूँ भी नेकी नाहीं अहइ।
हम उद्धार क बाट जोहत अही
किन्तु उद्धार बहोत-बहोत दूर अहइ।
12 काहेकि हम आपन परमेस्सर क विरोध मँ बहोत पाप किहे अही।
हमार पाप बतावत हीं कि हम बहोत बुरे अही।
हमका एकर पता अहइ
कि हम एन बुरे करमन क करइ क अपराधी अही।
13 हम पाप किहे रहे
अउर हम आपन यहोवा स मुँह मोड़ लिहे रहे।
यहोवा स हम विमुख भए अउर ओका तजि दीन्ह।
हम बुरे करमन क जोजना बनाए रहे।
हम अइसी ओन बातन क जोजना बनाए रहे
जउन हमरे परमेस्सर क विरोध मँ रही।
हम पचे उ सबइ बातन सोचे रहे
अउर दूसरन क सतावइ क जोजना बनाए रहे।
14 हमसे नेकी क पाछे ढकेला गवा।
निस्पच्छता दूर ही खड़ी रही।
गलियन मँ सच्चाई गिर पड़ी रही
माना नगर मँ अच्छाई क प्रवेस नाहीं भवा।
15 सच्चाई चली गइ
अउर उ सबइ लोग लूटे गएन जउन भला करइ चाहत रहेन।
यहोवा हेरे रहा किन्तु कउनो भी,
कहीं भी अच्छाई न मिल पाई।
16 यहोवा हेर लखेस किन्तु ओका कउनो मनई नाहीं मिला जउन लोगन क संग खड़ा होइ
अउर ओनका सहारा देइ।
एह बरे खुद आपन सक्ति क अउर खुद आपन नेकी क प्रयोग किहस
अउर यहोवा लोगन क बचाइ लिहस।
17 यहोवा नेकी क कवच,
उद्धार क सिरस्त्रण (टोप),
दण्ड क वस्त्र,
अउर आपन मज़बूत पिरेम क चोगा पहिरेस।
18 यहोवा आपन दुस्मन पइ कोहान अहइ तउ यहोवा ओनका अइसा दण्ड देइ जइसा ओनका मिलइ चाही।
यहोवा आपन दुस्मनन स कोहान अहइ
तउ यहोवा सबहिं दूर-दूर क देसन क लोगन क सजा देइ।
यहोवा ओनका वइसा दण्ड देइ जइसा ओनका मिलइ चाही।
19 फुन पच्छिम क लोग यहोवा क नाम क आदर देइहीं
अउर पूरब क लोग यहोवा क महिमा स भय विम्हित होइ जइहीं।
यहोवा अइसे ही हाली आइ जाइ जइसे तेज नदी बहत भइ आइ जात ह।
इ उ तेज हवा क रप्तार सा होइ जेका यहोवा उ नदी क तूफान बहावइ बरे पठवत ह।
20 तब सिय्योन पर्वत पइ एक छुड़ावइवाला आइ।
उ याकूब क ओन लोगन क लगे आइ जउन पाप तउ किहे
रहेन, किन्तु जउन परमेस्सर कइँती लउटि आए रहेन।
यहोवा इ सबइ बातन क कहेस।
21 यहोवा कहत ह, “मइँ ओन लोगन क संग एक वाचा करब। मइँ बचन देत हउँ मोर आतिमा अउर मोरे सब्द जेनका मइँ तोहरे मुखे मँ रखत हउँ तोहका कबहुँ नाहीं छोड़िहीं। उ पचे तोर संतानन अउर तोहार बच्चन क बच्चन क संग रहिहीं। उ पचे आजु तोहरे साथ रहिहीं अउर सदा-सदा तोहरे साथ रहिहीं।”
परमेस्सर आवति अहइ
60 “हे यरूसलेम, हे मोर प्रकास, तू उठि जागा।
तोहार प्रकास (परमेस्सर) आवत रहा बाटइ।
यहोवा क मिहिमा तोहरे ऊपर चमकी।
2 आजु अँधियारा सारा जहान अउर ओकरे लोगन क ढक रखे अहइ।
मुला यहोवा क तेज परगट होइ
अउर तोहरे ऊपर चमकी।
ओकर तेज तोहरे ऊपर देखाई देइ।
3 उ समय सबहिं देस तोहरे प्रकास क लगे अइहीं।
राजा तोहरे भव्य तेज क लगे अइहीं।
4 आपन चारिहुँ कइँती लखा।
लखा, तोहरे चारिहुँ कइँती लोग एकट्ठा होत अहइँ अउर तोहरी सरण मँ आवत अहइँ।
इ सबइ सबहिं लोग तोहार पूत अहइँ जउन दूर बहोत दूर स आवत अहइँ
अउर ओनके संग तोहार बिटियन आवत अहइँ।
5 “अइसा भविस्स मँ होइ अउर अइसे समय मँ जब तू आपन लोगन क लखब्या
तब तोहार मुँह खुसी स चमक उठिहीं।
पहिले तू उत्तेजित होब्या किन्तु फुन आनन्दित होब्या।
समुद्र पार देसन क सारी
धन दौलत तोहरे समन्वा धरी होई।
तोहरे लगे देसन क सम्पत्तियन अइहीं।
6 मिद्यान अउर एपा देसन क ऊँटत क झुण्ड तोहार धरती क ढाँपि लेइहीं।
सिबा क देस स ऊँटन क लम्बी कतारन तोहरे हिआँ अइहीं।
उ पचे सोना अउर सुगन्ध लइहीं।
लोग यहोवा क खुसी क गीत गइहीं।
7 केदार क भेड़िन एकट्ठी कीन्ह जइहीं
अउर तोहका दइ दीन्ह जइहीं।
नबायोत क मेढ़न तोहरे बरे लिआवा जइही।
उ पचे मोर वेदी पइ स्वीकार करइ क लायक बलियन बनिहीं
अउर मइँ आपन अद्भुत मन्दिर
अउर जियादा सुन्नर बनाउबउँ।
8 एन लोगन क लखा!
इ सबइ तोहरे लगे जल्दी मँ आवत अहइँ जइसे मेघ अकास क जल्दी पार करत हीं।
इ सबइ अइसे देखात अहइँ जइसे आपन घोंसलन कइँती उड़त भए कपोत होइँ।
9 सुदूर देस मोरी प्रतीच्छा मँ अहउँ।
तर्सीस क बड़के बड़के जलयान जाइ क तत्पर अहइँ।
इ सबइ जलयान तोहरे संतानन क दूर-दूर देसन स लिआवइ क तत्पर अहइँ।
अउर एन जहाजन पइ ओनकर सुवर्ण ओनके संग आई अउर ओनकर चाँदी भी इ सबइ जहाज लिअइहीं।
अइसा एह बरे होइ कि तोहार परमेस्सर यहोवा क आदर होइ।
अइसा एह बरे होइ कि इस्राएल क पवित्तर अद्भुत काम करत ह।
10 दूसर देसन क संतानन तोहार ढ़ेवारन फुन उठइहीं
अउर ओनकर सासक तोहार सेवा करिहीं।
“जब मइँ तोहसे कोहान रहेउँ, मइँ तोहका दुःख दिहेउँ
किन्तु अब मोर इच्छा अहइ कि तोह पइ कृपालु बनउँ।
एह बरे मइँ तोहका चैन देबउँ।
11 तोहार दुआर हमेसा ही खुला रहिहीं।
उ सबइ दिन अथवा राति मँ कबहुँ बन्द नाहीं होइहीं।
देस अउर राजा तोहरे पास धन लिअइहीं।
12 कछू जाति अउर कछू राज्ज तोहार सेवा नाहीं करिहीं
किन्तु उ सबइ जातियन अउर राज्ज नस्ट होइ जइहीं।
13 लबानोन क सबहिं महा वस्तुअन तोहका अर्पित कीन्ह जइहीं।
लोग तोहरे लगे देवदार,
तालीसपत्र अउर सरन क बृच्छ लिअइहीं।
इ ठउर मोरे सिंहासन क समन्वा एक चौकी सा होइ
अउर मइँ एका बहोत मान देबउँ।
14 उ सबइ ही लोग जउन पहिले तोहका दुःख दिया करत रहेन,
तोहरे समन्वा निहुरिहीं।
उ सबइ ही लोग जउन तोहसे घिना करत रहेन,
तोहरे चरणन मँ निहुर जइहीं।
उ सबइ ही लोग तोहका कहिहीं,
‘यहोवा क नगर,’ ‘सिय्योन नगर इस्राएल क पवित्तर क बाटइ।’ नवा इस्राएल सान्ति क देस
15 “फुन तोहका अकेल्ला नाहीं छोड़ा जाइ।
फुन कबहुँ तोहसे घिना नाहीं होइ।
तू फुन स कबहुँ भी उजड़बिउ नाहीं।
तू महान रहबिउ, तू हमेसा अउर सर्वदा आनन्दित रहबिउ।
16 तोहार जरूरत क चिजियन तोहका जातियन प्रदान करिहीं।
इ एतना ही सहल होइ जइसे दूध मुँह बच्चा क महतारी क दूध मिलत ह।
वइसे ही तू सासकन क सम्पत्तियन ‘पिउबीउ।’
तब तोहका पता चली कि इ मइँ यहोवा हउँ जउन तोहार रच्छा करत ह।
तोहका पता चल जाइ कि उ याकूब क महामहिम तोहका बचावत ह।
17 “फिलहाल तोहरे पास ताँबा अहइ
परन्तु एकरी नगह मइँ तोहका सोना देब।
अबहिं तउ तोहरे लगे लोहा अहइ,
पर ओकर जगह तोहका चाँदी देब।
तोहार लकड़ी क जगह मइँ तोहका ताँबा देबउँ।
तोहार पाथरन क जगह तोहका लोहा देबउँ
अउर तोहका दण्ड देइ क जगह मइँ तोहका सुख चैन देबउँ।
जउन लोग अबहिं तोहका दुःख देत हीं उ सबइ ही लोग तोहरे बरे अइसा काम करिहीं जउन तोहका सुख देइहीं।
18 तोहरे देस मँ हिंसा अउर तोहरी सबइ सीमा मँ तबाही अउर बरबादी कबहुँ नाहीं सुनाई पड़ी।
तोहरे देस मँ लोग फुन कबहुँ तोहार वस्तुअन नाहीं चोरइहीं।
तू आपन परकोटन क नाउँ ‘उद्धार’ रखब्या
अउर तू आपन दुआरन क नाउँ ‘स्तुति’ रखब्या।
19 “दिन क समय मँ तोहरे बरे सूरज क प्रकास नाहीं होइ
अउर रात क समय मँ चाँद क प्रकास तोहार रोसनी नाहीं होइ।
काहेकि यहोवा ही सदैव तोहरे बरे प्रकास होइ।
तोहार परमेस्सर तोहार महिमा बनी।
20 तोहार ‘सूरज’ फुन कबहुँ भी नाहीं छुपी।
तोहार ‘चाँद’ कबहुँ भी करिआ नाहीं पड़ी।
काहेकि यहोवा क प्रकास सदा सर्वदा तोहरे बरे होइ
अउर तोहार दुःख क समय खतम होइ जाइ।
21 “तोहार सबहिं लोग उत्तिम बनिहीं।
ओनका सदा बरे धरती मिलि जाइ।
मइँ ओन लोगन क रचा ह।
उ सबइ अद्भुत पउधन
मोर आपन ही हाथन स लगाए भए अहइँ।
22 छोटा स छोटा भी बिसाल घराना बन जाइ।
छोटा स छोटा भी एक सक्तीसाली रास्ट्र बन जाइ।
जब उचित समय आइ,
मइँ यहोवा हाली ही आइ जाब
अउर मइँ इ सबइ बातन घटित कइ देबउँ।”
यहोवा क मुक्ति संदेस
61 यहोवा क सेवक कहत ह, “मोर सुआमी यहोवा मोहमाँ आपन आतिमा धरेस ह। उ मोका एक खास करइ बरे अभिसेक किहेस ह। उ मोका विनम्र लोगन क अच्छी खबर देइ बरे, टुटे हिरदइवालन क उत्साह बढ़ावइ बरे, बन्दी क आजाद करइ बरे, अउर कैदी क मुक्त करइ बरे पठएस ह। 2 उ समय क घोसणा करब जब यहोवा आपन करुणा परगट करी; उ समय क घोसणा करब जब हमार परमेस्सर दुस्टन क दण्ड देइ; दुःखी लोगन क पुचकारब; 3 सिय्योन क दुःखी लोगन क आदर देब (अबहिं तउ ओनके लगे बस राखी अहइ); सिय्योन क लोगन क खुसी क स्नेह प्रदान करब; (अबहिं तउ ओनके पास बस दुःख अहइ) सिय्योन क लोगन क परमेस्सर क स्तुति क गीत प्रदान करब (अबहिं तउ ओनके लगे बस ओनके दर्द अहइँ); सिय्योन क लोगन क उत्सव क ओढ़ना देब (अबहिं तउ ओनके लगे बस ओनकर दुःख ही अहइँ।) ओन लोगन क ‘उत्तिमता क बृच्छ’ क नाउँ देब; ओन लोगन क ‘यहोवा क अद्भुत बृच्छ क संज्ञा देब।’
4 “उ समय, ओन पुरान नगरन क जेनका उजाड़ दीन्ह गवा रहा, फुन स बसावा जाइ। ओन नगरन क वइसे ही नवा बनाइ दीन्ह जाइ जइसे उ पचे सुरु मँ रहेन। उ सबइ नगर जेनका बरिसन पहिले हटाइ दीन्ह गवा रहा, नवे जइसे बनाइ दीन्ह जइहीं।
5 “फुन तोहार पचन्क दुस्मन तोहरे पचन्क लगे अइहीं अउर तोहार पचन्क भेड़िन चरावा करिहीं। तोहार पचन्क सत्रुअन क सन्तानन तोहरे पचन्क खेतन अउर तोहरे पचन्क बगियन मँ काम किया करहीं। 6 तू पचे ‘यहोवा क याजक’ कहवउब्या। तू पचे ‘हमरे परमेस्सर क सहायक’ कहवउब्या। धरती क सबहिं देसन स आई भइ सम्पत्ति क तू प्राप्त करब्या अउर तू पचन्क इ बात क गर्व होइ कि उ तोहार सम्पत्ति अहइ।
7 “बीते समय मँ लोग तू पचन्क लज्जित करत रहेन अउर तोहरे पचन्क बारे मँ बुरी बुरी बातन बनावा करत रहेन। तू पचे एतना लजान रह्या जेतना अउर कउनो दूसर मनई नाहीं रहा। एह बरे तू पचे आपन धरती मँ दूसर लोगन स दुगुना हींसा प्राप्त होइ। तू पचे अइसी खुसी पउब्या जेकर कबहुँ अंत नाहीं होइ। 8 अइसा काहे घटित होइ? काहेकि मइँ यहोवा हउँ अउर मोका नेकी स पिरेम अहइ। मोका चोरी स अउर हर उ बात स, जउन अनुचित अहइ, घिना अहइ। एह बरे लोगन क, जउन ओनका मिलइ चाही, उ भुगतान मइँ देबउँ। आपन लोगन क संग सदा सदा बरे मइँ इ वाचा करत हउँ कि 9 सबहिं देसन क हर कउनो मनई मोर लोगन क जान जाइ। मोर जाति क बंसजन क हर कउनो जान पाइ। हर कउनो मनई जउन ओनका लखी, जान जाइ कि यहोवा ओनका आसीर्वाद देत अहइ।”
यहोवा क सेवक उद्धार अउर उत्तिमता लावत अहइ
10 “यहोवा मोका बहोत खुस करत ह।
मोर संपूर्ण व्यवितत्व परमेस्सर मँ टिका अहइ अउर खुसी मँ मगन अहइ।
यहोवा उद्धार क ओढ़ना स मोका ढाँपि लिहेस।
उ पचे अइसे ही भव्य अहइँ जइसे भव्य वस्त्र कउनो मनसेधू आपन सादी क मौके पइ पहिरत ह।
यहोवा मोका नेकी क चोगा स ढकि लिहेस ह।
इ चोगा वइसा ही सुन्नर अहइ जइसा सुन्नर कउनो नारी क विवाहे क वस्त्र होत ह।
11 धरती पउधन उगावत ह।
लोग बगियन मँ बिआ डावत हीं अउर उ बगिया ओन बिअन क उगावत ह।
वइसे ही यहोवा नेकी क उगाई।
इ तरह मोर सुआमी सबहिं जातियन क बीच स्तुति क बढ़ाई।”
हमरे बरे पराथना करा
3 भाइयो तथा बहिनियो, तोहे पचन क कछू अउर बात हमका बतावइ क बाटइ। हमरे करे पराथना करा कि पर्भू क उपदेस तेजी स फइलइ अउर महिमा पावई। जइसेन कि तोहे लोगन क बीच मँ भवा बा। 2 पराथना करा कि हम बुरे अउर दुस्ट मनइयन स दूर रही। (काहेकि सभन जने क तउ पर्भू मँ बिसवास नाहीं होत ह।)
3 मुला पर्भू तउ बिसवास स भरा अहइ। उ तोहार सक्ती बढ़ाई अउर तोहे सबन क ओह दुस्ट स बचाइ रखी। 4 हमका पर्भू मँ तोहार स्थिति क बारे मँ टृढ़ बिसवास बा। अउर हमका पूरा निस्चय बा कि हम तोहे जउन कछू करई क कहे हई, तू वइसेन ही करत अहई अउर करत रहब्या। 5 पर्भू तोहरे पचन क हिरदइ क परमेस्सर क पिरेम अउर मसीह क धैर्य भरा मजबूती कइँती आगे करइ।
करम क अनिवार्यता
6 भाइयो तथा बहिनियो, अब तोहे सबन क हमार पर्भू ईसू मसीह क नाउँ मँ इ हुकुम बा कि तू हर ओह भाइयन स दूर रहा जउन अइसेन जीवन जिअत ह जउन अनुचित चाल चलत अहइ। 7 मइँ इ ऍह बरे कहत हउँ काहेकि तू तउ खुदइ इ जानत बाट्या कि तोहे पचन क हमार अनुकरण कइसे करइ चाही काहेकि तोहरे बीच रहात भए हम कभउँ आलसी नाहीं रही। 8 हम बिना मूल चुकाए कीहीउँ स भोजन नाहीं ग्रहण कीन्ह, बल्कि जतन अउर मेरनत करत भए हम दिन रात काम मँ जुटा रहे ताकि तोहमाँ स कीहीउँ पर बोझ न पड़इ। 9 अइसा नाहीं अहइ कि हमका तोहसे सहायता लेइ क कउनउ अधिकार नाहीं बाटइ, बल्कि हम एह बरे कड़ी मेहनत करत अही ताकि तू ओकर अनुसरण कइ सका। 10 इही बरे हम जब तोहरे साथे रहे, हम तोहे पचन क इ हुकुम दिहे रहे, “अगर केउ काम न करइ चाहइ तउ उ खाना भी न खाइ।”
11 हमका अइसा बतावा गवा ह कि तोहरे बीच कछू अइसेन भी बाटेन जउन अइसेन जीवन जिअत हीं जउन ओनके अनुकूल नाहीं अहइ। उ कउनउ काम नाहीं करतेन, दुसरेन क बातन मँ टाँग अड़ावत हीं एहर-ओहर घूमत फिरत हीं। 12 अइसेन लोगन क हम पर्भू ईसू मसीह क नाउँ प समझावत हुकुम देत अही कि उ सान्ति क साथे आपन काम करइ अउर अपने कमाई क ही खाना खाइँ। 13 मुला भाइयो अउ बहिनियो! जहाँ तक तोहार बात बा, भलाई करत कभउँ न थका।
14 इ चिट्ठी क माध्यम स दीन्ह गए हमरे हुकुमन पर अगर केउ न चलइ त ओह मनई पर नजर रखा कि उ कउन बाटइ अउर ओनकर संगत स दूर रहा ताकि ओका सरम आवइ। 15 मुला ओनके साथे सत्रुअन जइसा व्यवहार न करा बल्कि भाई क समान ओका चेतावा।
चिठ्ठी समापन
16 अब सान्ति क पर्भू खुद तोहे सब समइ, सब तरह स सान्ति देइ। पर्भू तू सबके साथे रहा।
17 मइँ पौलुस खुद आपन लिखाई मँ इ नमस्कार लिखत हउँ। मइँ एह तरह सब चिट्ठी पर दसखत करत हउँ। मोरी लिखाई क सैली इहइ अहइ।
18 हमार पर्भू ईसू मसीह क अनुग्रह तोहे सभन पर बना रहइ।
Awadhi Bible: Easy-to-Read Version. Copyright © 2005 Bible League International.