Old/New Testament

⁵ “परमेस्सर महान अहइ मुला उ आम लोगन क तुच्छ नाहीं समुझत ह।
    परमेस्सर बहोत सामर्थी बाटइ अउ विवेक स पूर्ण बाटइ।
⁶ परमेस्सर दुट्ठ लोगन क जिअइ नाहीं देइ
    अउर परमेस्सर हमेसा गरीब लोगन क संग खरा बेउहार करत ह।
⁷ उ सबइ लोग जउन मुनासिब बेउहार करत हीं, परमेस्सर ओनकर धियान राखत ह।
    उ राजा लोगन क संग ओनका सिंहासन देत ह अउर उ पचे सदा आदर पावत हीं।
⁸ मुला अगर लोग सजा पावत होइँ अउर अउर बेड़ियन मँ जकरि गवा होइँ।
    अगर उ पचे पीरा भोगत रहत होइँ अउर संकटे मँ होइँ।
⁹ तउ परमेस्सर ओनका बताई कि उ पचे कउन सा बुरा करम किहेन ह।
    परमेस्सर ओनका बताई कि उ पचे पाप किहेन ह अउर उ पचे अहंकारी रहेन।
¹⁰ परमेस्सर ओनका ओकर चिताउनी सुनइ क मजबूर करी।
    उ ओनका पाप करइ स रोकइ खातिर आदेस देइ।
¹¹ जदि लाग परमेस्सर क सुनिहीं अउर ओकर अनुसरण करिहीं
    तउ परमेस्सर ओनका खुसहाल दिन आनन्दित बरिस देब्या।
¹² मुला अगर उ पचे परमेस्सर क आग्या क नकारिहीं
    तउ उ पचे बिना जाने ही मउत क दुनिया मँ चला जइहीं।

¹³ “अइसे लोग जेनका परमेस्सर क परवाह नाहीं अहइ उ पचे सदा कडुवाहट स भरा रहत हीं।
    हिआँ तलक कि जब परमेस्सर ओनका सजा देत ह, उ पचे परमेस्सर स सहारा पावइ क विनती नाहीं करतेन।
¹⁴ अइसे लोग जवान होत ही मरि जइहीं।
    उ पचे भ्रस्ट लोगन क संग सर्म स मरिहीं।
¹⁵ मुला परमेस्सर दुखिन लोगन क बचाब।
    परमेस्सर लोगन क जगावइ बरे विपत्ति पठवत ह ताकि लोग ओकर सुनइँ।

¹⁶ “सचमुच मँ परमेस्सर तोहार दुख-मुसीबत मँ तोहार मदद करइ चाहत ह।
    उ तोहार बोझन क दुर करइ चाहत ह जउन तोहका कुचरत ह।
    उ तोहार मेजे पइ भरपूर खइया रखइ चाहत ह।
¹⁷ किन्तु तू दोख, निर्णय अउर निआव क बातन स भरा भवा अहा!
¹⁸ अय्यूब, तू आपन किरोध क परमेस्सर बरे संका क कारण जिन बना द्या।
    मुक्ति क बड़ा मूल्य तोहका राह स दुर भटकावइ क कारण जिन बना दया।
¹⁹ तू इ जान ल्या कि न तउ जब तोहार समूचा धन
    अउर न ही तोहार सक्ती तोहार मदद कइ सकत ह।
²⁰ तू राति क अवाई क इच्छा जिन करा।
    जब लोग आपन ठउरन स गाइब हो जात ह।
²¹ अय्यूब बुरा करम करइ स तू होसियार रहा।
    तोह पइ मुसीबतन पठइ गइ अहइँ ताकि तू पापे क ग्रहण न करा।

²² “लखा, परमेस्सर क सक्ती ओेका महान बनावत ह।
    परमेस्सर सबहिं स महानतम सिच्छक अबइ।
²³ कउनो भी मनई परमेस्सर स नाहीं कह सकत ह कि का करब।
    कउनो भी परमेस्सर स नाहीं कहिं सकत, ‘परमेस्सर तू बुरा किहा ह।’
²⁴ परमेस्सर क कर्मन क बड़कइ करब तू जिन बिसरा।
    लोग गीत गाइके परमेस्सर क सबइ काम क बड़कइ किहेन ह।
²⁵ परमेस्सर क करम क हर कउनो मनई लखि सकत ह।
    दूर देसन क लोग ओन कर्मन क लखि सकत हीं।
²⁶ इ फुरइ अहइ कि परमेस्सर महान अहइ।
ओकरी महिमा क हम नाहीं समुझ सकित ह।
    परमेस्सर क उमर क बरिसन क गनती क कउनो गन नाहीं सकत।

²⁷ “परमेस्सर पानी क धरती स ऊपर उठावत ह
    अउर ओका बर्खा अउ कुहरा क रुप मँ बदल देत ह।
²⁸ परमेस्सर बादरन स लोगन पइ
    भरपूर पानी बरसावत ह।
²⁹ का कउनो मनइ इ ब्यान कइ सकत ह कि परमेस्सर कइसे बादरन क फैलावत ह,
    या ओकर घर, आकास मँ बिजुरि क गरज क समझ सकत ह
³⁰ लखा, परमेस्सर कइसे आपन बिजुरि क अकासे मँ चारिहुँ कइँती बिखेरत ह
    अउर कइसे समुझदार क गहिरे हींसा क ढाँपि लेत ह।
³¹ परमेस्सर रास्ट्रन क नियंत्रण मँ रखइ
    अउर ओनका भरपूर भोजन देइ बरे बादरन क उपयोग करत ह।
³² परमेस्सर आपन हाथे स बिजरी क पकरि लेत ह
    अउर जहाँ, उ चाहत ह, हुआँ बिजुरि क गिरइ क हुकुम देत ह।
³³ गर्जन लोगन क तूफाने क अवाइ क चिताउनी देत ह।
    इ गर्जन दिखावत ह कि इ दुस्टता क खिलाफ किरोध मँ अहइ।

37 “हे अय्यूब, जब एँन बातन क बारे मँ मइँ सोचत हउँ,
    मोर हिरदइ बड़े जोर स धक धक करत ह।
² हर कउनो सुनइ, परमेस्सर क वाणी बादर क गर्जन जइसी सुनाई देत ह।
    अनका गरजत भी ध्वनि क जउन परमेस्सर क मुँहे स आवति अहइ।
³ परमेस्सर आपन बिजुरी क सारे अकासे स होइके चमकइ क पठवत ह।
    उ सारी धरती क ऊपर चमका करत ह।
⁴ बिजुरी क कौंधइ क पाछे परमेस्सर क गर्जन भरी वाणी क सुना जाइ सकत ह।
    जब परमेस्सर आपन अदभुत वाणी क संग गरजत ह।
तब परमेस्सर क वाणी गरजत ह तउ बिजुरी कौधत ह तब।
⁵ परमेस्सर क गरजत भइ वाणी अदभुत अहइ।
    उ अइसे बड़े करम करत ह, जेनका हम समुझ नाहीं पावत अही।
⁶ परमेस्सर बर्फ स हुकुम देत ह,
    ‘तू धरती पइ गिरा’
अउर परमेस्सर बर्खा स कहत ह
    ‘तू धरती पइ जोर स बरसा।’
⁷ परमेस्सर अइसा एह बरे कहत ह कि सबहिं मनई जेनका उ बनाएस ह जान लेइ कि उ का कइ सकत ह।
    उ ओकर प्रमाण अहइ।
⁸ पसु आपन खोहन मँ पराइ जात हीं, अउर हुआँ ठहरा रहत हीं।
⁹ ओनका कमरन स आँधी आवत हीं,
    अउ हवा सर्दि मौसम लियावत ह।
¹⁰ परमेस्सर क साँस बर्फ बनवत ह,
    अउर समुद्दरन क जमाइ देत ह।
¹¹ परमेस्सर बादरन क जल स भरा करत ह,
    अउ बिजुरी क बादर क जरिये बिखेर देत ह।
¹² परमेस्सर बादरन क चारिहुँ कइँती मोड़ देत ह
    ताकि उ पचे उहइ कइ सकइ जेका उ ओनका करइ क हुकुम दिहेस ह उ पचे पूरी धरती पइ छाइ जात ह।
¹³ परमेस्सर लोगन क सजा देइ बरे कबहुँ बाढ़ लिआवत ह।
    कबहुँ आपन सहानुभूती देखावइ बरे बादरन क पठवत ह अउर धरती पइ पानी बरसावत ह।

¹⁴ “अय्यूब, तू छिन बरे रुका अउ सुना।
    रुक जा अउ सोचा ओन अदभुत कारजन क बारे मँ जेनका परमेस्सर किया करत ह।
¹⁵ अय्यूब, का तू जानत अहा कि परमेस्सर बादरन पइ कइसे काबू राखत ह?
    का तू जानत ह कि परमेस्सर आपन बिजुरी क काहे चमकावत ह?
¹⁶ का तू जानत ह कि आकास मँ बादर कइसे लटका रहत हीं?
    इ सबइ बादरन एक ठु उदाहरण अहइँ।
    परमेस्सर क गियान संपूर्ण अहइ अउर इ सबइ बादर परमेस्सर क अदभुत कारज अहइँ।
¹⁷ मुला अय्यूब, तू इ सबइ बातन क नाहीं जानत ह।
तू बस एँतना जानत अहा कि तोहका पसीना आवत ह अउर तोहार ओढ़ना तोहसे चिपका रहत हीं
    जब सब कछू आराम करत रहत होत ह अउर दक्खिन स गरम हवा बहत ह।
¹⁸ अय्यूब, का तू परमेस्सर क मदद आकास मण्डल क तानइ मँ
    अउर ओका झलकत भए दर्पण क नाई चमकावइ मँ कइ सकत अहा?

¹⁹ “अय्यूब, हमका बतावा कि हम परमेस्सर स का कहीं?
    हम ओसे कछू भी कहइ क सोच नाहीं पाइत काहेकि हम पर्याप्त कछू भी नाहीं जानित।
²⁰ का परमेस्सर क बतावा जाइ कि मइँ ओकरे खिलाफ बोलइ चाहत हउँ।
    इ वइसे ही होइ जइसे आपन विनास माँगबा।
²¹ लखा, कउनो भी मनई चमकत भए सूरज क नाहीं लख सकत ह।
    जब हवा बादरन क उड़ाइ देत ह ओकरे पाछे उ बहोतइ उज्जवर अउ चमचमात भवा होत ह।
²² अउ परमेस्सर भी ओकरे समान अबइ।
परमेस्सर क सुनहरी महिमा चमकत ह।
    परमेस्सर अदभुत महिमा क संग उत्तर कइँती स आवत ह।
²³ सर्वसक्तीमान परमेस्सर सचमुच महान अहइ, हम परमेस्सर क नाहीं जान सकित।
    परमेस्सर सदा ही लोगन क संग निआउ, अउ निस्पच्छ होइके बेउहार करत ह।
    उ कउनो लोग क संग ना इनसाफी क संग पीड़ा नाहीं देत ह।
²⁴ एह बरे लोग परमेस्सर क आदर करत हीं,
    मुला परमेस्सर ओन अभिमानी लोगन क आदर नाहीं देत ह जउन खुद क बुध्दिमान समुझत हीं।”