◀ All Reading Plans / Old/New Testament / Job 22-24 Acts 11 (Awadhi Bible: Easy-to-Read Version)

Prev Day

July 2, 2003

Next Day

Use the calendar to view readings from this devotional.

July 2003
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

Old/New Testament

Each day includes a passage from both the Old Testament and New Testament.

Duration: 365 days

अय्यूब 22-24

एलीपज क जवाब

22 फुन तेमान क एलीपज जवाब देत भए कहेस।

²“परमेस्सर क कउनो भी मनई सहारा नाहीं दइ सकत,
    हिआँ तलक कि उ भी जउन बहोत बुद्धिमान मनई होइ परमेस्सर बरे हितकर नाहीं होइ सकत।
³अगर तू उहइ किहा जउन उचित रहा एहसे सर्वसक्तीमान परमेस्सर क आनन्द नाहीं मिली,
    अउर अगर तू खरा रहा हवा तउ एहसे ओका पछू नाहीं मिली।
⁴अय्यूब तोहका परमेस्सर काहे सजा देत ह अउर काहे तोह पइ दोख लगावत ह?
    का इ एह बरे कि तू भक्त अहा।
⁵नाहीं, इ सबइ एह बरे कि तू बहोत स पाप किहा ह, अय्यूब,
    तोहार पाप नाहीं रुकत अहइँ।
⁶अय्यूब, होइ सकत ह कि तू आपन कउनो भाई क कछू चिज बिना कउनो कारण क गिरवी रख सकत ह।
    होइ सकत ह कि तू कउनो दीन मनइ क ओढ़ना रख लिहे ह्वा अउर ओनका नंगा बना किहे हवा्।
⁷तू थके-माँदे लोगन क पानी नाहीं दिहा,
    तू भुखान मनइयन क भोजन नाहीं दिहा।
⁸अय्यूब, अगर तू सक्तीसाली अउ धनी रह्या, तू ओन लोगन क सहारा नाहीं दिहा।
    तू बड़का जमींदार अउ समरथ वाला मनई रह्या।
⁹मुला तू राँड़ अउरतन क बगइर कछू दिहे लउटाइ दिहा।
    अय्यूब, तू अनाथ गदेलन क लूट लिहा अउर ओनसे बुरा बेउहार किहा।
¹⁰एह बरे तोहरे चारिहुँ कइँती जाल बिछा भवा अहइँ
    अउर तोहका एकाएक आवत विपत्तियन डेरावत हीं।
¹¹एह बरे घना अँधियारा तोहका ढाँक लिहस ह
    अउर एह बरे बाढ़ क पानी तोहका लीलत बाटइ।

¹²“परमेस्सर अकास क सब स ऊँच हींसा मँ रहत ह।
    उ आपन जगह स सबन स ऊँच तारन क लखइ बरे खाले लखत ह।
¹³मुला अय्यूब, तू का करत ह, ‘परमेस्सर कछू नाहीं जानत,
    करिया बदरन स कइसे परमेस्सर हमका जाँच सकत ह
¹⁴धना बादर ओका छुपाइ लेइ हीं,
    एह बरे जब उ आकास क सबन ऊँच हींसा मँ बिचरत ह तउ हमका ऊपर अकासे स लखि नाहीं सकत।’

¹⁵“अय्यूब, तू उ ही पुरानी राह पइ
    जेन पइ दुस्ट लोग चला करत हीं, चलत अहा।
¹⁶आपन मउत क समइ स पहिले ही दुट्ठ लोग मर गएन।
    बाढ़ ओनका बहाइके लइ गइ रही।
¹⁷इ सबइ उहइ लोग अहइँ जउन परमेस्सर स कहत हीं, ‘हमका अकेल्ले तजि द्या।’
    उ पचे सोचेन कि ‘सर्वसक्तीमान परमेस्सर हमार कछू नाहीं कइ सकत ह।’
¹⁸मुला परमेस्सर ओन लोगन क कामयाब बनाएस ह अउर ओनका धनवान बनाइ दिहा।
    मुला मइँ उ ढंग स जेहसे दुस्ट सोचत हीं, अपनाइ नाहीं सकत हउँ।
¹⁹सज्जन जब बुरे लोगन क नास देखत हीं, तउ उ पचे खुस होत हीं।
    पाप स रहीत लोग दुस्टन पइ हँसत हीं, अउर कहा करत हीं।
²⁰‘हमार दुस्मन फुरइ नस्ट होइ गएन।
    आगी ओनके धने क बारि देत ह।’

²¹“अय्यूब, अब खुद क तू परमेस्सर क अर्पित कइ दया, तब तू सान्ति पउब्या।
    अगर तू अइसा करा तउ तू धन्य अउर कामयाब होइ जाब्या।
²²ओकर सीख अपनाइ ल्या
    अउर ओकरे सब्द आपन मने मँ सुरच्छित रखा।
²³अय्यूब, अगर तू फुन सर्वसक्तीमान परमेस्सर क लगे आवा तउ फिन स पहिले जइसा होइ जाइ।
    तोहका अपने घरे स पाप क बहोत दूर करइ चाही।
²⁴तोहका सोना क धूरि क नाई
    अउर ओफीर क सोना क नदी क तराई क चट्टान क नाई समझइ चाही।
²⁵तब सर्वसक्तीमान परमेस्सर तोहरे बरे सोना
    अउर चाँदी बन जाइ।
²⁶तब तू बहोत खुस होब्या अउर तोहका सुख मिली।
    परमेस्सर क समन्वा तू बिना कउनो सर्म क मूँड़ि उठाइ सकब्या।
²⁷जब तू ओकर बिनती करब्या तउ उ तोर सुना करी,
    जउन प्रतिग्या तू ओहसे किहे रह्या, तू ओका पूरा कइ सकब्या।
²⁸जउन कछू तू करब्या ओहमाँ तोहका कामयाबी मिली,
    तोहरे रास्ते पइ प्रकास चमकी।
²⁹परमेस्सर अहंकारी जन क लज्जित करी,
    मुला परमेस्सर नम्र मनई क रच्छा करी।
³⁰परमेस्सर जउन मनई भोला नाहीं अहइ ओकर भी रच्छा करी,
    तोहरे हाथन क सफाई स ओका उद्धार मिली।”

अय्यूब जवाब देत ह

23 फिन अय्यूब जवाब देत भए कहेस।

²“मइँ आजु भी बुरी, सिकाइत करत हउँ कि परमेस्सर मोका कर्री सजा देत अहइ,
    एह बरे मइँ सिकाइत करत रहत हउँ।
³कास! मइँ इ जान पावत कि ओका कहाँ हेरउँ।
    कास! मइँ इ जान पावत कि परमेस्सर क लगे कइसे जाउँ।
⁴मइँ आपन मुकद्मा क सफाई परमेस्सर क समन्वा पेस करब्य्।
    मइँ आपन क निर्दोख साबित करइ बरे बहस करब्या।
⁵मइँ इ जानइ चाहत हउँ कि परमेस्सर कइसे मोरे दलीलन क जवाब देत ह,
    तब मइँ परमेस्सर क जवाब समुझ पउतेउँ।
⁶का परमेस्सर आपन महासक्ती क संग मोरे खिलाफ होत?
    नाहीं! उ मोर सुनी।
⁷मइँ एक नेक मनई हउँ।
    परमेस्सर मोका आपन कहानी क कहइ देइ, तब मोर निआउ कत्ती परमेस्सर मोका अजाद कइ देइ।

⁸“मुला अगर मइँ पूरब क जाउँ तउ परमेस्सर हुआ नाहीं अहइ
    अउर अगर मइँ पच्छिउँ क जाउँ तउ भी परमेस्सर मोका नाहीं देखात ह।
⁹परमेस्सर जब उत्तर मँ छिपत ह^[a] तउ मइँ ओका देख नाहीं पावत हउँ।
    जब परमेस्सर दक्खिन क छिपत ह तउ भी उ मोका नाहीं देखात ह।
¹⁰मुला परमेस्सर मोरे हर चरण क लखत ह, जेका मइँ उठावत हउँ।
    जब उ मोर परीच्छा लइ उठी तउ उ लखी कि मोहमाँ कछू भी बुरा नाहीं अबइ,
    उ लखी कि मइँ खरा सोना जइसा अहउँ।
¹¹परमेस्सर जउन चाहत ह मइँ हमेसा उहइ पइ चलत हउँ
    मइँ कबहुँ भी परमेस्सर क राहे पइ चलइ स नाहीं रुकेहउँ।
¹²मइँ हमेसा उहइ बात करत हउँ जेनकर आसा परमेस्सर देत ह।
    मइँ आपन मुँहे क भोजन स जियादा परमेस्सर क मुँहे क सब्दन स पिरेम किहेउँ ह।

¹³“मुला परमेस्सर एक मन वाले अहा,
    अउर कउनो भी ओका बदल नाहीं बदलत।
    परमेस्सर जउन चाहत ह उहइ करत ह।
¹⁴परमेस्सर जउन भी जोजना मोरे विरोध मँ बनाइ लिहस ह उहइ करी,
    ओकरे लगे मोरे बरे अउर भी बहोत सारी जोजना अहइँ।
¹⁵एह बरे मइँ ओसे डेरात हउँ।
    एह बरे परमेस्सर मोका भयभीत करत ह।
¹⁶परमेस्सर मोर हिरदइ क दुर्बल करत ह अउर मोर हिम्मत टूट जात ह।
    सर्वसक्तीमान परमेस्सर मोका भयभीत करत ह।
¹⁷अगर तउ मोर मुहँ सघन अँधियारा ढकत ह
    तउ भी अँधियारा मोका चुप नाहीं कइ सकत ह।

24 “सर्वसक्तीमान परमेस्सर काहे नाहीं निआउ करइ बरे समइ मुकर्रर करत ह?
लोग जउन परमेस्सर क मानत हीं ओनका काहे निआउ क समइ क बेकार बाट जोहइ क पड़त ह?

²“लोग आपन धन दौलत क चीन्हन क, जउन ओकर चउहद्दी बतावत हीं, सरकावत रहत हीं ताकि आपन पड़ोसी क थोड़ी अउर धरती हड़प लेइँ।
    लोग पसु क चोराइ लेत हीं अउर ओनका दूसर चरागाहन मँ हाँक लइ जात हीं।
³अनाथ बच्चन क गदहन क उ पचे चोराइ लइ जात हीं।
    उ पचे राँड़ मेहरारुअन क बर्धन खोल लइ जात हीं जब तलक कि उ ओनकर कर्ज नाहीं चुकावत हीं।
⁴उ पचे दीन जन क मजबूर करत ही कि उ तजिके दूर हटि जाइके मजबूर होइ जात ह,
    एन दुस्टन स खुद क छुपावइ क।

⁵“उ सबइ दीन लोग ओन जंगली गदहन जइसे अहइँ जउन मरु भूमि मँ आपन चारा हेरा करत हीं।
    गरीबन अउ ओनकर बच्चन क मरुभूमि भोजन देत रहत ह।
⁶गरीब लोगन क कउनो दूसर क खेत मँ अनाज काटइ चाही।
    दुस्टन क अंगूरन क बगियन स बच भवा फलन उ पचे चुना करत हीं।
⁷दीन लोगन क बगइर ओढ़नन क सबइ रात बितावइ क होइ।
    सर्दी मँ ओनके लगे आपन क ढाँकइ बरे कछू नाहीं होइ।
⁸उ पचे बर्खा स पहाड़न मँ भिज गवा अहइँ, ओनका बड़की चट्टानन स लिपट क रहइ क होइ,
    काहेकि ओनके लगे कछू नाहीं जउन ओनका मौसम स बचाइ लेइ।
⁹बूरे लोग ओन गदेलन क जेकर बाप नाहीं अहइ ओनकर महतारी स छिन लेत हीं।
    उ पचे गरीब लोगन क आपन दास बनावत हीं।
¹⁰गरीब लोगन क लगे ओढ़ना नाहीं होत हीं।
यह बरे ओन लोगन क नंगा ही घूमइ क होइ।
    उ पचे दुस्टन क गठरी क भार ढोवत हीं, मुला फुन भी उ पचे भुखान रहत हीं।
¹¹गरीब लोग जइतून क तेल पेरिके निकारत हीं।
    उ पचे कुंडन मँ अगूर सूँदत हीं फुन भी उ पचे पिआसा रहत हीं।
¹²मरत भए लोग जउन आहें भरत हीं उ सबइ सहर मँ सुनाइ पड़त ह।
    सतावा भवा लोग सहारा क पुकारत हीं, मुला परमेस्सर नाहीं सुनत ह।

¹³“कछू अइसे लोग अहइँ जउन प्रकास क खिलाफ होत हीं।
    उ पचे नाहीं जानइ चाहत हीं कि परमेस्सर ओनसे का करवावइ चाहत ह।
    परमेस्सर क राह पइ उ पचे नाहीं चलत हीं।
¹⁴हत्यारा भिंसारे जाग जात ह गरीबन अउ जरुरतवाले लोगन क हत्या करत ह।
    उ राति मँ चोर क नाई बन जात ह।
¹⁵उ मनई जउन बिभिचार करत ह, रात आवइ क बाट जोहा करत ह,
    उ सोचत ह, ‘ओका कउनो नाहीं लखी’ अउर उ आपन मुँह ढाँपि लेत ह।
¹⁶दुटठ मनई जब रात मँ अँधेरा होत ह तउ सेंधे लगाइके घरे मँ घुसत हीं।
    मुला दिन मँ उ पचे आपन हि घरन मँ छुपा रहत हीं।
    उ पचे प्रकास स बचत हीं।
¹⁷ओन दुट्ठ लोग्गन क आँधियारा सबुह क नाई होत ह,
    उ पचे आतंक अउ आँधियारा क मीत होत हीं।

¹⁸“‘दुट्ठ लोग अइसे बाहइ दीन्ह जात हीं जइसे झाग बाढ़ क पानी पाइ।
    उ धरती अभीसाप स ढकी बा जेकर उ पचे मालिक अहइँ।
    कउनो भी अंगूर क बगियन मँ अंगुर जमा करइ बरे नाहीं जात ह।
¹⁹जइसे गरम व सूखा मौसम पिघलत बरफ क पानी क सोख लेत ह,
    वइसे ही दुस्ट लोग कब्र क जरिये लील जइहीं।
²⁰दुस्ट मनइयन मरइ क पाछे ओकर महतारी तलक ओका बिसरि जाइ।
    दुस्ट लोगन क देह क कीरा खाइ जइहीं।
कउनो भी ओन लोगन क याद नाहीं रखइहीं।
    दुस्ट जन गिरे भए बृच्छ क नाई नष्ट कीन्ह जइहीं।
²¹दुस्ट मनई बाँझ मेहरारुअन क सतावा करत हीं।
    उ पचे उ तरह क मेहरारु क दुःख देत हीं।
उ पचे कउनो भी राँड़ अउरत बरे
    दाया नाहीं देखाँवत हीं।
²²दुस्ट मनई आपन सक्ती क उपयोग बलसाली क नस्ट करइ बरे करत हीं।
    बुरे लोग सक्तीसाली होइ जइहीं मुला आपन ही जन्नगी क भरोसा नाहीं होइ
    कि उ पचे जियादा दिन जी पइहीं।
²³होइ सकत ह कि तनिक समइ बरे परमेस्सर सक्तीसाली क सुरच्छित रहइ देइ,
    मुला परमेस्सर सदा ओन पइ आँखी रखत ह।
²⁴दुस्ट मनई तनिक समइ बरे कामयाबी पाइ जात हीं, मुला फुन उ पचे नस्ट होइ जात हीं।
    दूसर लोगन क तरह उ पचे भी मुर्झा जात हीं अउर उदास होइ जात हीं।
    अनाजे क कटी भइ बाले क नाई उ पचे गिर जात हीं।’

²⁵“अगर इ सबइ बातन फुरइ नाहीं अहइँ
तउ कउन सिध्द कइ सकत ह कि मइँ झूठ कहेउँ ह?
कउन देखाँइ सकत ह कि मोर सब्द सत्तय नाहीं अहइँ?”

प्रेरितन क काम 11

पतरस क यरूसलेम लौटब

11 समूचइ यहूदिया मँ भाइयन अउर प्रेरितन सुनेन कि परमेस्सर क बचन गैर यहूदी भी मान लिहे अहइँ। ²तउ जब पतरस यरुसलेम पहोंचा तउ उ पचे जउन खतना क चाहत रहेन, ओकर नुक्ताचीनी किहेन। ³उ सबइ कहेन, “तू खतना क बिना मनइयन क घरे गवा अहा अउर तू ओनकइ संग खइया क खाया ह!”

⁴ऍह पइ पतरस सच जउन भवा रहा, ओका सुनावइ समुझावइ लाग। ⁵“मइँ याफा सहर मँ पराथना करत भवा समाधि मँ एक दर्सन कीन्ह। मइँ निहारेउँ कि एक बड़की चद्दर जइसी कउनो चीज खाले उतरत बा, ओका चारिहुँ कोना स धइके अकासे स धरती प उतारा जात अहइ। फिन उ उतरिके मोरे लगे आइ गइ। ⁶मइँ ओका धियान स लखेउँ कि ओहमाँ धरती क चौपाया जीव-जतुं, जंगली पसु रेंगइ वाला जीव अउर अकासे क पंछी रहेन। ⁷फिन मइँ एक अवाज सुनेउँ, जउन मोसे कहत रही, ‘पतरस उठा, मारा अउर खाइ ल्या।’

⁸“मुला मइँ कहेउँ, ‘पर्भू, निहचय रूप स तउ नाहीं, काहेकि मइँ कबहुँ भी कउनो तुच्छा या समइ क अनुसार कउनो बे पवित्तर अहार क नाहीं खाएउँ ह।’

⁹“अकास स दूसर दाई उ अवाज फिन कहेस, ‘जेका परमेस्सर पवित्तर बनएस ह, ओका तू अपवित्तर जिन समुझा।’

¹⁰“तीन दाई अइसा ही भवा। फिन उ सब अकास मँ वापिस उठाइ लीन्ह गवा। ¹¹उहइ समइ जहाँ मइँ ठहरा रहेउँ, उ घरे मँ तीन मनई आइ गएन। उ पचे मोरे लगे कैसरिया स पठवा ग रहेन। ¹²आतिमा मोका ओनकइ संग बेझिझके चला जाइ बरे कहेस। इ छ: भाई भी मोरे संग गएऩ। अउर हम पचे उ मनई क घरे मँ चला गए। ¹³उ हमका बताएस कि एक सरगदूत क आपन घरे मँ ठाड़ उ कइसे लखेस। जउऩ कहत रहा, ‘याफा पठइके पतरस कहावावइवाला समौन क बोलवाइ ल्या। ¹⁴उ तोहका बचन सुनाई जेहॅसे तोहार परिवार क उद्धार होइ।’

¹⁵“जब मइँ प्रबचन सुरु कीन्ह तब पवित्तर आतिमा ओन पइ उतरि आइ। ठीक वइसेन जइसे सुरू मँ हम पइ उतरी रही। ¹⁶फिन मोका पर्भू क कहा भवा बचन याद होइ गवा, ‘यूहन्ना पानी स बपतिस्मा देत रहा मुला तोहका पवित्तर आतिमा स बपतिस्मा दीन्ह जाइ।’ ¹⁷इ तरह जदि परमेस्सर ओनका ही उहइ बरदान दिहेस जेका उ जब हम पचे पर्भू ईसू मसीह मँ बिसवास कीन्ह, तब्बइ हमका दिहे रहा, तउ खिलाफत करइवाला मइँ कउन होत हउँ?”

¹⁸बिसवासी मनइयन जब इ सुनेन तउ उ पचे प्रस्न करब बंद कइ दिहेन। उ पचे परमेस्सर क महिमा करत भए कहइ लागेन, “अच्छा, तउ परमेस्सर गैर यहूदी मनइयन तलक क मनफिराववइ बरे उ औसर दिहेस ह, जउन जिन्नगी कइँती लइ जात ह।”

अन्ताकिया मँ सुसमाचार क अवाई

¹⁹उ पचे जउन स्तिफनुस क समइ मँ दीन्ह जात सबइ यातना क कारण तितराइ बितराइ ग रहेन, दूर-दूर तलक फीनीक, साइप्रस अउर अन्ताकिया तलक चलाग रहेन। इ पचे यहूदियन क तजिके कउनो अउर क सुसामाचार नाहीं सुनावत रहेन। ²⁰एनही बिसवासी मनइयन मँ स कछू साइप्रस क अउर कुरेनी क रहेन। तउ जब उ पचे अन्ताकिया आएन तउ यूनानियन क भी प्रबचन देत भए पर्भू ईसू क सुसमाचार सुनावइ लागेन। ²¹पर्भू क सक्ती ओनकइ संग रही। तउ एक बड़ा मनइयन क मजमा बिसवास धइके पर्भू कइँती मुड़ि गवा।

²²ऍकर खबर जब यरुसलेम मँ कलीसिया क काने तलक पहुँची तउ उ पचे बरनाबास क अन्ताकिया जाइके पठएऩ। ²³जब बरनाबास हुँवा पहोंचिके परमेस्सर क अनुग्रह क सकारथ होत लखेस तउ उ बहोत खुस भवा अउर उ ओन सबहिं क पर्भू बरे भक्ति भरा हिरदय स बिसवासी बनइ बरे हिम्मत देवॉएस। ²⁴काहेकि उ पवित्तर आतिमा अउर बिसवास स भरा भवा एक भरपूर उत्तिम मनई रहा। फिन पर्भू क संग एक बड़वार मनइयन क मजमा जुड़ गवा।

²⁵बरनाबास साऊल क हेरइ तरसुस क चला गवा। ²⁶फिन उ ओका हेरिके अन्ताकिया लइ आवा। पूरे साल भइ उ पचे कलीसिया स मिलत जुलत अउर बड़का मनइयन क मजमा क उपदेस देत रहेन। अन्ताकिया मँ सबन त पहिले ऍनही चेलन क “मसीही” कहा गवा।

²⁷इहइ समइ यरुसलेम स कछू नबी अन्ताकिया आएऩ। ²⁸ओनमाँ स अगबुस नाउँ क एक नबी खड़ा होइके पवित्तर आतिमा क जरिये इ भविस्सबाणी किहेस कि सारी दुनिया मँ एक खउफनाक अकाल पड़ी (क्लौदियुस क समइ इ अकाल पड़ा रहा।) ²⁹तब हर चेलन आपन ताकत देखिके यहूदिया क बसइयन बंधु क मदद बरे कछू पठवइ क ठान लिहेन। ³⁰तउ उ पचे अइसा ही किहेन अउर उ पचे बरनावास अउर साऊल क हाथ स यहूदिया मँ आपन बुजुर्गन क लगे उपहार पठएन।

Awadhi Bible: Easy-to-Read Version (ERV-AWA)