Old/New Testament

दारा क आदेस

6 एह बरे राजा दारा अपने पहिले क राजा लोगन क लेखन क जाँच करइ क आदेस दिहस। उ सबइ लेख बाबेल मँ हुवइँ रखे रहेन जहाँ खजाना धरा गवा रहा, ² अहमत्ता क किले मँ एक दण्ड मँ चिपका गोल पत्रक मिला। (एकवतन मादे प्रान्त मँ अहइ।) उ दण्ड मँ लिपटे गोल पत्रक पइ जउन लिखा रहा, उ इ अहइ:

सरकारी टिप्पणी: ³ उ कुस्रू क राजा होइ क पहिले बरिस मँ कुस्रू यरूसलेम मँ परमेस्सर क मन्दिर क बरे एक ठू आदेस दिहस। आदेस इ रहा:

परमेस्सर क मन्दिर फुन स बनइ द्या। इ बलि भेंट करइ क जगह होइ। एकरी नेंव क बनइ द्या। मन्दिर साठ हाथ उँच अउ साठ हाथ चौड़ा होइ चाही। ⁴ एकर परकोटन मँ बिसाल पाथरन क तीन ठु कतारन अउर बिसाल काठे क सहतीरन क एक ठू कतार होइ चाही। मन्दिर क बनावइ क खर्च राजा क खजाने स कीन्ह जाइ चाही। ⁵ साथ ही साथ, परमेस्सर क मन्दिर क सोना अउ चाँदी क चिजियन ओकरे जगह पइ वापस रखी जाइ चाही। नबूकदनेस्सर ओन चिजियन क यरूसलेम क मन्दिर स लिहे रहा अउर ओनका बाबेल लिआए रहा। उ सबइ परमेस्सर क मन्दिर मँ वापस रख दीन्ह जाइ चाही।

⁶ एह बरे अब, मइँ दारा, फरात नदी क पच्छिम क पहँटन क सासन अधिकारी तत्तनै अउ सतर्बोजनै अउ उ प्रान्त क रहइवाले सबहिं अधिकारियन, तू पचन्क आदेस देत हउँ कि तू लोग यरूसलेम स दूर रहा। ⁷ समिकन क परेसान जिन करा। परमेस्सर क उ मन्दिर क काम क बन्द करइ क जतन जिन करा। यहूदा क राज्यपाल अउर यहूदा क बुर्जुगन क एनका फुन स बनावइ द्या। ओनका परमेस्सर क मन्दिर क उहइ जगह पइ फुन स बनावइ द्या जहाँ पहिले रहा।

⁸ अब मइँ एक आदेस देत हउँ कि तू पचन्क परमेस्सर क मन्दिर क बनावइ वाले यहूदा क बुजुर्गन बरे का करइ चाही: इमारत क लागत क भुगतान राजा क खजाने स होइ चाही। इ धन फरात नदी क पच्छिम क छेत्र क प्रान्तन स कर क रूप मँ इकट्ठा कीन्ह गवा रहा। इ सबइ काम हाली स करा, जेहसे काम रुकइ नाहीं। ⁹ ओन लोगन क उ सब द्या जेकर ओनका जरूरत होइ। जदि ओनका सरग क परमेस्सर क बलि क बरे जवान बर्धन, भेड़न या मेमनन क जरूरत पड़इ तउ ओनका उ सब कछू द्या। जदि यरूसलेम क याजक गोहूँ, नोन, दाखरस अउ तेल माँगइ तउ बिना भूल चूक क हर रोज इ सबइ चिजियन ओनका द्या। ¹⁰ इन चिजियन क ओनका द्या जेहसे उ पचे सरग क परमेस्सर क खुस करइवाली बलियन भेंट करइँ अउर राजा अउ ओकरे पूतन क कल्यान बरे पराथना करइँ।

¹¹ मइँ इ आदेस भी देत हउँ कि जदि कउनो मनई इ आदेस क बदलत ह तउ उ मनई क मकान स एक ठु काठे क कड़ी क निकार लेइ चाही अउ उ काठे क कड़ी क उ मनई क तने पइ घँसाइ देइ चाही अउ ओकरे घरे क तब तलक नस्ट कीन्ह जाइ चाही जब तलक कि उ पाथरन क ढेर न बनि जाइ।

¹² परमेस्सर यरूसलेम पइ आपन नाउँ अंकित करइ अउर मोका आसा अहइ कि परमेस्सर कउनो भी उ राजा या मनई क पराजित करी जउन इ आदेस क बदलइ क जतन करत ह। जदि कउनो यरूसलेम मँ इ मन्दिर क नस्ट करइ चाहत ह तउ मोका आसा अहइ कि परमेस्सर ओका नस्ट कइ देइ।

मइँ, दारा, इ आदेस दिहेउँ ह। इ आदेस क पालन हाली अउर पूर्ण रूप स होइ चाही।

मन्दिर क पूर्ण अउर समर्पित होब

¹³ एह बरे फरात नदी क पच्छिम पहँटा क प्रसासक तत्तनै, सतर्बोजनै अउर ओकरे संग क लोग राजा दारा क आदेस क पालन किहन। ओन लोगन आग्या क पालन हाली अउर पूर्ण रूप स किहन, ¹⁴ एह बरे यहूदी अग्रजन (प्रमुखन) निर्माण कार्य जारी रखेन अउर उ पचे सफल भएन काहेकि हग्गै नबी अउ इद्दो क पूत जकर्याह ओनका प्रोत्साहित किहस। ओन लोग मन्दिर क निर्माण कार्य पूरा कइ लिहन। इ इस्राएल क परमेस्सर क आदेस पालन करइ क बरे कीन्ह गवा। इ फारस क राजा लोगन, कुस्रू, दारा अउर अर्तछत्र जउन आदेस दिहे रहेन ओनकर पालन करइ बरे कीन्ह गवा। ¹⁵ मन्दिर क निर्माण अदर महीने क तीसरे दिन भवा। इ राजा दारा क सासन क छठएँ बरिस मँ भवा।

¹⁶ तब इस्राएल क लोग बहोत उल्लास क संग परमेस्सर क मन्दिर क समर्पण उत्सव मनाएन। याजक, लेवीबंसी अउर बन्धुवाई स वापस आए दूसर सबहिं लोग इ उत्सव मँ सामिल भएन।

¹⁷ उ पचे परमेस्सर क मन्दिर क इ तरह समर्पित किहन: उ पचे एक सौ बर्धन, दुइ सौ भेड़न अउर चार सौ मेमनन भेंट किहन अउर उ पचे पूरे इस्राएल क बरे पाप भेंट क रूप मँ बारह बोकरन भेंट किहन अर्थात इस्राएल क बारह परिवार समूह मँ स हर एक क बरे एक बोकरा भेंट किहन। ¹⁸ तब उ पचे यरुसलेम मँ मन्दिर मँ सेवा करइ क बरे याजकन अउ लेवी बंसियन क समूह बनाएन। इ सब उ पचे उहइ प्रकार किहन जउने प्रकार मूसा क किताबे मँ बतावा गवा ह।

फसह त्यौहार

¹⁹ पहिले महीने क चौदहवें दिन ओन यहूदियन फसह क त्यौहार मनाएन जउन बन्धुवाई स वापस लउटे रहेन। ²⁰ याजकन अउर लेवीबंसियन अपने क सुद्ध किहन। ओन सबहिं फसह क त्यौहार मनावइ क बरे अपने क स्वच्छ अउ तइयार किहन। उ पचे बन्धुवाई स लउटइवाले सबहिं यहूदियन क बरे फसह क त्यौहार क मेमने क मारेन। उ पचे इ अपने बरे अउर अपने याजकन बंधुअन क बरे किहन। ²¹ एह बरे बन्धुवाई स लउटे इस्राएल क सबहिं लोग फसह क त्यौहार क बलि खाएस अउर उ प्रदेस मँ रहइवाले दूसर सबइ लोग जउन अपने आप क ओन असुद्ध चिजियन स अलग हटिके सुद्ध कइ रहेन अउर जउन ओन लोगन मँ सामिल होइ रहेन, ओन लोग भी फसह क त्यौहार क भोजन मँ हींसा लिहन। ओन लोग इ एह बरे किहन ताकि उ पचे भी यहोवा इस्राएल क परमेस्सर क उपासना करइ सकइँ। ²² उ पचे अखमीरी रोटी क उत्सव सात दिन तलक बहोत जियादा खुसी स मनाएन। यहोवा ओनका बहोत खुस किहस काहेकि उ अस्सूर क राजा क बेउहार क बदल दिहे रहा। अस्सूर क राजा इस्राएल क परमेस्सर क मन्दिर क बनावइ मँ ओनकर मदद किहे रहा।

एज्रा यरूसलेम आवत ह

7 फारस क राजा अर्तछत्र क सासनकाल मँ एन सब बातन क होइ जाइ क पाछे एज्रा बाबेल स यरूसलेम आवा। एज्रा सरायाह क पूत रहा। सरायाह अजर्याह क पूत रहा। अजर्याह हिल्किय्याह क पूत रहा। ² हिल्किय्याह सल्लूम क पूत रहा। सल्लूम सादोक क पूत रहा। सादोक अहीतूब क पूत रहा। ³ अहीतूब अमर्याह क पूत रहा। अमर्याह अजर्याह क पूत रहा। अजर्याह मरार्थोत क पूत रहा। ⁴ मरायोत जरह्याह क पूत रहा। जरह्याह उज्जी क पूत रहा। उज्जी बुक्की क पूत रहा। ⁵ बुक्की अबीसू क पूत रहा। अबीसू पीनहास क पूत रहा। पीनहास एलीआज़र क पूत रहा। एलीआज़र महायाजक हारून क पूत रहा।

⁶ एज्रा बाबेल स यरूसलेम आवा। एज्रा एक लिपिक रहा। उ मूसा क नेमन क माहिर रहा। मूसा क नेम यहोवा इस्राएल क परमेस्सर क जरिये दीन्ह गवा रहा। राजा अर्तछत्र एज्रा क उ हर चीज़ दिहस जेका उ माँगेस काहेकि यहोवा परमेस्सर एज्रा क संग रहा। ⁷ इस्राएल क कछू लोग, अउर कछू याजकन, लेवियन, गायकन, दुआरपालन अउर मन्दिर क सेवकन एज्रा क संग आएन। उ पचे अर्तछत्र क सासनकाल क सतएँ बरिस यरूसलेम आएन। ⁸ एज्रा यरूसलेम मँ राजा अर्तछत्र क राज्जकाल क सतएँ बरिस क पाँचवें महीने मँ आवा। ⁹ एज्रा अउ ओकर समूह बाबेल क पहिले महीने क पहिले दिन यरूसलेम पहोंचा। यहोवा परमेस्सर एज्रा क संग रहा। ¹⁰ एज्रा आपन पूरा धियान यहोवा क नेमन क अध्ययन अउर ओनका पालन करइ मँ दिहस। एज्रा इस्राएल क लोगन क यहोवा क नेमन अउर आदेसन क सिच्छा देइ चाहत रहा।

राजा अर्तछत्र क एज्रा क पत्र

¹¹ एज्रा, एक ठु याजक अउर लिपिक रहा। इस्राएल क यहोवा क जरिये दीन्ह गए आदेसन अउर नेमन क बारे मँ उ काफी गियान रखत रहा। इ उ पत्र क प्रतिलिपि अहइ जेका राजा अर्तछत्र लिपिक एज्रा क दिहे रहा:

¹² राजा लोगन क राजा अर्तछत्र कइँती स याजक एज्रा क जउन सरग क परमेस्सर क नेमन क पिपिक अहइ:

सुभ-कामनाए!

¹³ मइँ इ आदेस देत हउँ: कउनो मनई जउन इस्राएल क अहइ, याजक अउर इस्राएल क लेवीबंसी जउन मोरे राज्ज मँ रहत ह अउर एज्रा क संग यरूसलेम जाइ चाहत ह, तोहार संग जाइ सकत ह।

¹⁴ एज्रा, मइँ अउर मोरे सात सलाहकार तू पचन्क पठवत हीं। तू पचन्क यहूदा अउर यरूसलेम क जाइ चाही। इ लखा कि तोहार लोग तोहरे परमेस्सर क नेमन क पालन कइसे करत अहइँ। तोहरे पचन्क लगे नेम अहइ।

¹⁵ मइँ अउ मोर सलाहकार इस्राएल क परमेस्सर क सोना चाँदी देत अहइँ। परमेस्सर क निवास यरूसलेम मँ अहइ। तू पचन्क इ सोना चाँदी अपने संग लइ जाइ चाही। ¹⁶ तू पचन्क बाबेल क सबहिं प्रान्तन स होइके जाइ चाही। लोगन अउर याजकन क स्वच्छा भेंट क संग सबइ सोना अउ चाँदी क बटोरा। इ सबइ भेंटन यरूसलेम मँ ओनके परमेस्सर क मन्दिर बरे अहइँ।

¹⁷ इ धने क उपयोग बर्धन, भेड़न अउ मेमनन बेसहइ मँ करा। ओन बलियन क संग जउन अन्न भेंट अउ पेय भेंट चढ़ाई जाब अहइँ, ओनका बेसहा। तब ओनका यरूसलेम मँ अपने परमेस्सर क मन्दिर क वेदी पइ बलि चढ़ावा। ¹⁸ ओकरे पाछे तू अउर दूसर यहूदी बचे भए सोने चाँदी क जइसा भी चाहा, खर्च कइ सकत ह। एकर उपयोग वइसे ही करा, जउन तोहरे परमेस्सर क खुस करइवाला होइ। ¹⁹ ओन सबहिं चिजियन क यरूसलेम क परमेस्सर क लगे लइ जा। उ सबइ चिजियन तोहरे परमेस्सर क मन्दिर मँ उपासना क बरे अहइँ। ²⁰ तू कउनो भी दूसर चिजियन लइ सकत ह जेनका तू अपने परमेस्सर क मन्दिर क बरे जरूरी समुझत अहा। राजा क खजाने क धन क उपयोग जउन कछू तू चाहत अहा ओकरे बेसहइ क बरे कइ सकत ह।

²¹ अब मइँ, राजा अर्तछत्र इ आदेस देत हउँ: मइँ ओन सबहिं लोगन क जउन फरात नदी क पच्छिमी पहँटा मँ राजा क कोसपाल अहइँ, आदेस देत हउँ कि उ पचे एज्रा क जउन कछू भी माँगइ देइँ। एज्रा सरग क परमेस्सर क नेमन क लिपिक अउर याजक अहइ। इ आदेस क हाली अउ पर्ण रूप स पालन करा। ²² एज्रा क एतना तलक दइ द्या: पौने चार टन चाँदी, छ: सौ बुसल गोहूँ, छ: सौ गैलन दाखरस, छ: सौ गैलन जइतून क तेल अउ ओतना नोन जेतना एज्रा चाहइ। ²³ सरग क परमेस्सर, एज्रा क जउने चीज क पावइ बरे आदेस द्या ओका तू पचन्क हाली अउर पूरी तरह स एज्रा क देइ चाही। सरग क परमेस्सर क मन्दिर क बरे इ सबइ सब चिजियन करा। हम नाहीं चाहित कि परमेस्सर मोरे राज्ज या मोरे पूतन पइ किरोधित होइ।

²⁴ मइँ चाहत हउँ कि तू लोगन क मालूम होइ कि याजकन, लेबियन, गायकन, दुआरपालन अउ परमेस्सर क मन्दिर क दूसर कर्मचारियन अउ सेवकन क कउनो भी तरह क कर देइ क बरे मजबूर करब, नेम क खिलाफत अहइ। ²⁵ एज्रा मइँ तोहका तोहरे परमेस्सर क जरिये प्राप्त बुद्धि क उपयोग अउ सरकारी अउर धार्मिक निआवअधीसन क चुनइ क अधिकार देत हउँ। इ सबइ लोग फरात नदी क पच्छिम मँ रहइवाले सबहिं लोगन क बरे निआवअधीस होइहीं। उ पचे ओन सबहिं लोगन क निआव करिहीं जउन तोहरे परमेस्सर क नेमन क जानत हीं। जदि कउनो मनई ओन नेमन क नाहीं जानत तउ उ पचे निआवअधीस ओका ओन नेमन क बतइहीं। ²⁶ जदि कउनो अइसा मनई जउन तोहरे परमेस्सर क नेमन या राजा क नेमन क पालन नाहीं करत होइ, तउ ओका जरूर दण्डित कीन्ह जाइ चाहीं। अपराध क अनुसार ओका मृत्य दण्ड, देस निकारी, ओकरी सम्पत्ति क जब्त करब या जेल मँ डावइ क सजा दीन्ह जाइ चाही।

एज्रा परमेस्सर क स्तुति करत ह

²⁷ हमरे पुरखन क परमेस्सर यहोवा क स्तुति करा। उ राजा क मन मँ इ सबइ बिचार डाएस कि उ यरूसलेम मँ यहोवा क मन्दिर क सम्मान करइ। ²⁸ यहोवा क राजा, ओकरे सलाहकारन अउर बड़के अधिकारियन क सामने मोह पइ आपन सच्चा पिरेम परगट किहा। यहोवा मोरे परमेस्सर मोरे संग रहा, एह बरे मइँ साहसी रहा अउर मइँ इस्राएल क प्रमुखन क अपने संग यरूसलेम जाइ बरे एकट्ठा किहेउँ।

एज्रा क संग लउटइवाले परिवार प्रमुखन क सूची

8 इ बाबेल स यरूसलेम लउटइवाले परिवार प्रमुखन अउर दूसर लोगन क सूची अहइ जउन मोरे (एज्रा) क संग लउटेन। हम लोग राजा अर्तछत्र क सासनकाल मँ यरूसलेम लउटेन। इ नाउँन क सूची अहइ:

यरूसलेम क वापसी

¹⁵ मइँ ओन सबहिं लोगन क अहवा कइँती बहइवाली नदी क लगे एक संग एकट्ठा होइ क बोलाएउँ। हम लोग हुवाँ तीन दिन तलक डेरा डाए। मोका इ पता लगा कि उ समूह मँ याजक रहेन, मुला कउनो लेवीबंसी नाहीं रहा। ¹⁶ तउ मइँ एन प्रमुखन क बोलाएउँ: एलीएजेर, अरीएल, समायाह, एलनातान, यारीब, एलनातान, नातान, जकर्याह अउ मसुल्लाम अउ मइँ योयारीब अउर एलनातान (इ सबइ लोग सिच्छक रहेन) क बोलाएस। ¹⁷ मइँ ओन मनइयन क इद्दो क लगे पठएउँ। इद्दो कासिप्या नगर क प्रमुख रहा। मइँ उ मनई क बताएउँ कि उ पचे इद्दो अउर ओकर सम्बंधियन स का कहइँ। ओकर सम्बंधी कासिप्या मँ मन्दिर क सेवक अहइँ। मइँ ओन लोगन क इद्दो क लगे पठएउँ जेहसे इद्दो परमेस्सर क मन्दिर मँ सेवा करइ क बरे हमरे लगे सेवकन क पठएस। ¹⁸ काहेकि परमेस्सर क कृपालु हाथ हमरे ऊपर रहेन। इद्दो क सम्बंधियन एन मनइयन क हम लोगन क लगे पठएस: महली क सन्तानन मँ स सेरेब्याह नाउँ क बुद्धिमान मनई। (महली लेवी क पूतन मँ स एक रहा। लेवी इस्राएल क पूतन मँ स एक रहा।) उ पचे हमरे लगे सेरेहब्याह अउर ओकरे पूतन क पठएस। इ सबइ सब मिलाइके उ परिवार स इ सबइ अट्ठारहे मनई रहेन। ¹⁹ उ पचे मरारी क सन्तानन मँ स हसब्याह अउर यसायाह क भी ओनकर बन्धुअन अउर ओनके पूतन क संग पठएस। उ परिवार स कुल मिलाइके बीस मनई रहेन। ²⁰ उ पचे मन्दिर क दुइ सौ बीस सेवक भी पठएन। ओनकर पुरखन उ सबइ लोग रहेन जेनका दाऊद अउ बड़के अधिकारियन लेवीबंसियन क मदद बरे चुने रहा। ओन सब क नाउँ सूची मँ लिखे भए रहेन।

²¹ हुवाँ अहवा नदी क लगे, मइँ घोसणा किहेउँ कि हमका उपवास रखइ चाही। हम क अपने क परमेस्सर क समन्वा बिनम्र बनावइ क बरे उपवास रखइ चाही। हम लोग परमेस्सर स अपने बरे, अपने बच्चन क बरे, अउर जउन चिजियन हमार रहिन, ओनके संग सुरच्छित जात्रा क बरे पराथना करइ चाहत रहे। ²² राजा अर्तछत्र अपनी जात्रा क समइ अपनी सुरच्छा बरे फउजी अउ घुड़सवारन क माँगइ मँ मइँ लजान रहेउँ। सड़किया पइ दुस्मन रहेन। मोरी लज्जा क कारण इ रहा कि हम राजा स कहि रखे रहे कि, “हमार परमेस्सर उ हर मनई स संग अहइ जउन ओह पइ बिस्सास करत ह अउर परमेस्सर उ हर मनई पइ किरोधित होत ह जउन ओहसे मुँह फेरि लेत ह।” ²³ एह बरे हम लोग अपनी जात्रा क बारे मँ उपवास रखे अउर परमेस्सर स पराथना कीन्ह। उ हम लोगन क पराथना सुनेस।

²⁴ तब मइँ याजकन मँ स बारह क नियुक्त किहेउँ जउन प्रमुख रहेन। मइँ सेरेब्याह, हसब्याह अउर ओनके दस भाइयन क चुनेउँ। ²⁵ मइँ चाँदी, सोना अउर दूसर चिजियन क तउलेउँ जउन हमरे परमेस्सर क मन्दिर क बरे दीन्ह गइ रहिन। मइँ एन चिजियन क ओन बारह याजकन क दिहेउँ जेनका मइँ नियुक्त किहे रहेउँ। राजा अर्तछत्र, ओकर सलाहकार, ओकर बड़के अधिकारियन अउर बाबेल मँ रहइवाले सबहिं इस्राएलियन परमेस्सर क मन्दिर क बरे ओन चिजियन क दिहन। ²⁶ मइँ एन सबहिं चिजियन क तउलेउँ। हुवाँ चाँदी पच्चीस टन रही। हुवाँ चाँदी क बर्तन व दूसर चिजियन रहिन। जेनकर वजन पौने चार किलोग्राम रहा। हुवाँ सोना पौने चार टन रहा। ²⁷ अउर मइँ ओनका बीस सोना क खोरन दिहेउँ। खोरन क वजन लगभग साढ़े आठ किलो रहा अउर मइँ ताँबा क चमकदार दूई ठु बरतन दिहस जउन कि सोना क समान कीमती रहा। ²⁸ तब मइँ ओन बारह याजकन स कहेउँ: “तू अउर इ सबइ चिजियन यहोवा क बरे पवित्र अहइँ। लोग इ चाँदी अउर सोना यहोवा तोहरे पचन्क पुरखन परमेस्सर क दिहन। ²⁹ एह बरे एनकर रच्छा होसियारी स करा। तू पचे एकरे बरे तब तलक जिम्मेदार अहा जब तलक तू पचे एका यरूसलेम मँ मन्दिर क प्रमुखन क नाहीं दइ देत्या। तू पचे एनका प्रमुख लेवीबंसियन क अउर इस्राएल क परिवार प्रमुखन क देब्या। उ सबइ ओन चिजियन क तउलिहीं अउर यरूसलेम मँ यहोवा क मन्दिर क कोठरियन मँ धरिहीं।”

³⁰ तउ ओन याजकन अउ लेवियन उ चाँदी, सोना अउर ओन बिसेस वस्तुअन क ग्रहण किहन जेनका एज्रा तउले रहा अउर ओनका यरूसलेम मँ परमेस्सर क मन्दिर मँ इ सबइ चिजियन लइ जाइ क बरे कहा गवा रहा।

³¹ पहिले महीने क बारहवें दिन हम लोग अहवा नदी क छोड़े अउर हम यरूसलेम कइँती चल पड़े। परमेस्सर हम लोगन क संग रहा अउर उ हमार रच्छा दुस्मनन अउ डाकूअन स पूरे रास्ते भर किहस। ³² तब हम यरूसलेम आइ पहोंचे। हम हुवाँ तीन दिन आरम कीन्ह। ³³ चउथे दिन हम परमेस्सर क मन्दिर क गए अउर चाँदी, सोना अउर बिसेस चिजियन क तउले। हम याजक ऊरीयाह क पूत मरेमोत क उ सबइ चिजियन दिहेन। पीनहास क पूत एलीआजर मरेमोत क संग रहा। अउर लेवीबंसी येसू क पूत योजाबाद अउर बिन्तूई क पूत नोअद्याह भी ओनके संग रहा। ³⁴ हम हर एक चीज गिने अउर ओनका तउले। तब हम उ समइ कुल वजन लिखे।

³⁵ तब ओन यहूदी लोग जउन बंधुवाई स आए रहेन, इस्राएल क परमेस्सर क होमबलि दिहन। उ पचे बारह बर्धन पूरे इस्राएल क बरे छियानबे भेड़न, सतहत्तर मेमनन अउ बारह बोकरन पाप भेंट बरे चढ़ाएन। इ सब यहोवा क बरे होमबलि रही।

³⁶ तब ओन लोग राजा अर्तछत्र क पत्र, राजकीय अधिपतियन अउ फरात क पच्छिम क छेत्र क प्रसासकन क दिहन। तब उ पचे इस्राएल क लोगन अउर मन्दिर क अपना समर्थन दिहन।

ईसू झील प परगट भवा

21 एकरे बाद झील तिबिरियास प ईसू अपने चेलन क समन्वा फिन खुदइ क परगट किहेस। उ खुदइ क इ तरीके परगट किहेस। ² समौन पतरस, थोमा (जउन जुड़ौधा कहवावा जात रहा) गलील क काना क नतनएल, जब्दी क बेटवन अउर ईसू क दुइ ठू चेलन हुवाँ इकट्ठा रहेन। ³ समौन पतरस ओनसे कहेस, “मइँ मछरी पकड़इ जात अही।”

उ पचे ओसे बोलेन, “हमहूँ पचे तोहरे साथे चलत अही।” उ सबेन्ह ओकरे साथे चल दिहेन अउर नाउ प बइठ गएन। मुला उ रात उ पचे कछू नाहीं पकड़ पाएन।

⁴ मुला तब तलक सबेर होइ गवा रहा। मुला चेलन क पता नाहीं चल पावा कि हुवाँ ईसू अहइ। ⁵ फिन ईसू ओनसे कहेस, “लड़को, तोहरे लगे कउनो मछरी अहइ?”

उ पचे जवाब दिहेन, “नाहीं।”

⁶ फिन उ कहेस, “नइया क दहिनी तरफ जाल फेंका तउ तोहका कछू मिली।” तउ उ पचे जाल फेंकिन मुला ऍतना जियादा मछरी रहिन कि फिन जाल क वापस नाहीं खींच पाएन।

⁷ फिन ईसू क पियारा चेला पतरस स कहेस, “इ तउ पर्भू अहइ।” जब समौन इ सुनेस कि पर्भू अहइ तउ उ आपन बाहेर पहिनइवाला कपरा कस लिहेस (काहेकि उ नंगा रहा।) अउर पानी मँ कूद पड़ा। ⁸ मुला दूसर चेलन मछरिअन स भरा जाल खींचत भए नाउ स किनारे आएन (काहेकि उ धरती स जियादा दूर नाहीं रहेन, ओनकाइ दूरी करीब सौ मीटर क रही।) ⁹ जब उ पचे किनारे आएन तउ हुवाँ जरत कोयलन क आग देखेन। ओकरे ऊपर मछरी अउर रोटी पकावइ क बरे रखी रही। ¹⁰ ईसू ओसे कहेस, “तू पचे जउन मछरी पकरे अहा, ओहमाँ स कछू लइ आवा।”

¹¹ फिन समौन पतरस नाउ प गवा अउर एक सौ तिरपन बड़ी मछरिअऩ स भरा जाल किनारे प खींच लिहेस। जाल मँ ऍतनी अधिक मछरी रहिन मुला जाल फटा नाहीं। ¹² ईसू ओनसे कहेस, “हियाँ आवा अउर खाना खा!” ओकरे चेलन मँ स कउनो क हिम्मत नाहीं परी कि ओसे पूछ सकइँ कि “तू कउन मनई अह्या?” काहेकि उ जान ग रहेन कि उ पर्भू अहीं। ¹³ ईसू आगे गवा। उ रोटी लिहेस अउर ओनका दइ दिहेस अउर इहइ तरह स मछरियन क दइ दिहेस।

¹⁴ अब इ तीसरी बार रहा जब कि मरे क बाद जी उठिके उ आपने चेलन क समन्वा परगट भवा।

ईसू क पतरस स बाचीत

¹⁵ जबहिं उ पचे भोजन कइ चुकेन तउ ईसू समौन पतरस स कहेस, “यूहन्ना क पूत समौन, जेतॅना पिरेम इ सबइ मोसे करत हीं, तू मोसे जियादा पिरेम करत अहा?”

पतरस ईसू स कहेस, “हाँ पर्भू, तू जानत अहा कि मइँ तोहसे पिरेम करत हऊँ।”

ईसू पतरस स कहेस, “मोरे मेमनन क रखवाली करा।”

¹⁶ उ ओसे दुसरी बार बोला, “यूहन्ना क बेटवा समौन, का तू मोसे पिरेम करत ह?”

पतरस ईसू स कहेस, “हाँ पर्भू, तू जानत अहा कि मइँ तोहसे पिरेम करित ह।”

ईसू पतरस स कहेस, “मोरी भेंड़न^[a] क देखभाल कर।”

¹⁷ ईसू फिन तीसरी दाईं पतरस स कहेस, “यूहन्ना क बेटवा समौन, का तू हमसे पिरेम करत ह?”

पतरस दुखी होइ गवा कि ईसू ओसे तीसरी दाईं पूछेस, “का तू मोसे पिरेम करत ह?” इ बरे पतरस ईसू स कहेस, “पर्भू तू सब कछू जानत ह, तू जानत अहा कि मइँ तोहसे पिरेम करित ह!”

ईसु ओसे कहेस, “मोरी भेड़न क चरावा। ¹⁸ मइँ तोहसे सत्य कहत अहउँ, जब तू जवान रह्या, तउ तू अपनी कमर प फेंटा कस क जहाँ चाहत रह्या, चला जात रह्या। मुला जब तू बुढ़ाइ जाब्या, तउ हाथ पसरब्या अउर कउनो दूसर तोहका बांधके जहाँ तू नाहीं जाइ चाहब्या, हुवाँ लइ जाई।” ¹⁹ (उ इ दरसावइ क बरे अइसा कहेस कि उ कउनो तरह क मउत स परमेस्सर क महिमा करी।) ऍतना कहिके उ ओसे कहेस, “मोरे पाछे चला आवा!”

²⁰ पतरस पाछे मुड़ा अउर देखेस कि उ चेलन जेहसे ईसू पिरेम करत रहा, ओनके पाछे आवत अहइ। (इ उहइ रहा जउन भोजन करत ओकरी छाती प झुकके पूछे रहा, “पर्भू, उ कउन अहइ, जउन तोहका धोखे स पकड़वाई?”) ²¹ जब पतरस ओका देखेस तउ उ ईसू स बोला, “पर्भू, एकर का होई?”

²² ईसू ओसे कहेस, “जदि मइँ इ चाही कि जब तलक मइँ आई, इ हिआँ रहइ, तउ तोहसे का मतलब? तू मोरे पाछे चला आवा!”

²³ इ तरह स इ बात भाइयन (मनवइयन) मँ हिआँ तलक फइल गइ कि उ चेला जेका ईसू पियार करत ह न मरी। ईसू इ नाहीं कहे रहा कि उ न मरी, बल्कि उ तउ ऍतना कहे रहा, “जदि मइँ चाही कि जब तलक मइँ आई, इ हिआँ रहइ तउ तोहसे का मतलब?”

²⁴ इहइ उ चेला अहइ जउन एकइ सबके साच्छी देत ह कि जउन इ सब बात लिखे अहइँ सब सही अहइँ।

²⁵ ईसू इहइ तरीके बहुत काम करेस। जदि एक एक कइके ओन सबका लिखा जात तउ मइँ सोचित ह कि जउन किताब लिखी जातिन, उ ऍतना जियादा होतिन कि पूरी धरती प न अमातिन।