Old/New Testament

लेवी बंस क सहर

35 यहोवा मूसा स बात किहस। इ यरीहो क पार मोआब मँ यरदन घाटी मँ यरदन नदी क निचके रहा। यहोवा कहेस, ² “इस्राएल क लोगन स कहा कि ओनका आपन हींसा क देस मँ कछू सहर लेवी-बंस क लोगन क देइ चाही। इस्राएल क लोगन क सहर अउ ओकरे चारिहुँ कइँती क चरागाह लेवी-बंस क देइ चाही। ³ लेवी बंसी लोग ओन सहरन म रइहीं। अउ सब गोरुअन, अउ दूसर जनावर, जउन लेवी बंसी मनइयन क होइहीं, सहर क चारिहुँ कइँती क चरागाह मँ चरि सकिहीं। ⁴ तू पचे केतॅनी भुइयाँ लेवी बंसी मनइयन क देब्या? सहर क देवॉर स 1,500 फुट बाहेर सहर क पूरब मँ नापत जा ⁵ अउ सहर क दक्खिन मँ 3,000 फुट अउर सहर क पच्छिउँ मँ 3,000 फुट, पूर्व 3,000 फुट अउ उत्तर मँ 3,000 फुट उ सारी भुइयाँ लेवी बंसियन क होइ। उ भुइयाँ क बीच सहर होइ। ⁶ ओन सहरन मँ छ: सहर सरण क सहर होइहीं। जदि कउनो मनई कउनो क कतल कइ डावत ह तउ उ सुरच्छा बरे ओन सहरन मँ पराइ सकत ह। ओन छ: सहरन क अलावा तू लेवी बंसियन क बियालीस दूसर सहर देब्या। ⁷ इ तरह तू पचे कुल अरचालीस सहर लेवी बंसी लोगन क देब्या। तू पचे ओन सहरन क चारिहुँ कइँती भुइँया भी देब्या। ⁸ इस्राएल क बड़का परिवारन क भुइँया क बड़का भाग देइहीं। इस्राएल क नान्ह परिवारन क भुइँया क छोटा भाग देइहीं। सबहिं परिवार समूहन लेवी बंसी मनइयन क आपन सहरन मँ स कछू सहर देइहीं।”

⁹ तब यहोवा मूसा स बात किहेस। उ कहेस, ¹⁰ “मनइयन स इ कहा: तू पचे यरदन नदी क पार करब्या अउ कनान देस मँ जाब्या। ¹¹ तोहका ‘सरण-सहर’ बनावइ बरे सहरन क चुनइ चाही। जदि कउनो मनई सँजोग स कउनो क मारि डावत ह तउ इ सुरच्छा बरे इ सहरन मँ स कउनो मँ पराइके जाइ सकत ह। ¹² उ ओ कउनो मनई स बचा रही जउन मरे परिवार क होइ अउ ओका धरइ चाहत होइ। उ तब तलक सुरच्छित रही जब तलक अदालन मँ ओकरे बारे मँ फइसला नाहीं होइ जात। ¹³ अउ छ: सहर जेका तू चुनिहीं उ तोहार ‘सरण-नगर’ होइहीं। ¹⁴ ओन सहर मँ स तीन सहर यरदन नदी क पूरब मँ होइहीं। अउर तीन दूसर सहर कनान प्रदेस मँ यरदन नदी क पच्छिउँ मँ होइहीं। ¹⁵ उ सबइ सहर नागरिक लोगन, स्थाई निवासियन अउ अस्थाई निवासियन बरे सरण-ठउर होइहीं। कउनो भी मनई संजोग स कउनो क मारि डावत ह, इ कउनो एक सहर मँ पराइके जाइ सकत ह।

¹⁶ “जदि कउनो मनई कउनो क मारइ बरे लोहा क हथियार बइपरत ह तउ मनई क मरि जाइ चाही। ¹⁷ अउर जदि कउनो मनई एक पाथर उठावत ह अउ कउनो क मारि डावत ह तउ ओका भी मरइ चाही। पाथर उ आकार क होइ चाही जेका मनइयन क मारइ बरे अवसर बइपरा जात ह। ¹⁸ अगर कउनो मनई कउनो लकड़ी का प्रयोग करत ह अउ कउनो क मारि डावत ह तउ ओका मरइ चाही। लकड़ी एक हथियार क सेकेल मँ होइ चाही जेकर प्रयोग अक्सर लोग मनइयन क मारि डावइ बरे करत हीं। ¹⁹ मरे भए मनई क परिवार क निअम्बर उ हत्यारा क पाछा कइ सकत ह अउ ओका मार सकत ह।

^20-21 “कउनो मनई कउनो प हाथ स हमला कइ सकत ह अउ ओका मारि डाइ सकत ह। या कउनो मनई कउनो क धकियाइ सकत ह अउ ओका मारि डाइ सकत ह। या कउनो मनई कउनो प कछू बहाइ सकत ह अउ ओका मारि सकत ह। अगर उ मरवइया घिना स अइसा किहस तउ उ हत्यारा अहइ। उ मनई क मारि डावइ चाही। मरे भए परिवार क कउनो मनई उ हत्यारा क पाछा कइ सकत ह अउ ओका मार सकत ह।

²² “मुला जदि कउनो मनई संजोग स कउनो क मारि सकत ह। उ मनई उ मनई स घिना नाहीं करत रहा, उ होनी संजोग स होइ गइ। या कउनो मनई कछू लोकाइ सकत ह अउ संजोग स कउनो क मार सकत ह, उ मारइ क इरादा नाहीं किहे रहा। ²³ या कउनो मनई कउनो बड़वार पाथर बहाइ सकत ह। अउ उ पाथर कउनो अइसे मनई प भहराइ पड़इ जउन ओका न लखत होइ अउ उ ओका मारि डावइ। उ मनई कउनो क मारि डावइ क इरादा नाहीं किहे रहा। उ मृतक मनई बरे घिना नाहीं राखत रहा। इ सिरिफ संजोग स भवा रहा। ²⁴ जदि अइसा होइ तउ बिरादरी फइसला करी कि का कीन्ह जाइ। जाति बिरादर क अदालत इ फइसला देइ कि मृतक मनई क परिवार क निअँम्बर ओका मारि डाइ सकत ह। ²⁵ अगर अदालत क इ फइसला देइ क होइ कि उ जिअत रहइ तउ ओका आपन ‘सरण-सहर’ मइँ जाइ चाही। ओका हुवाँ तब तलक रहइ चाही जब तलक महा याजक मरि जाइ। इ महा याजक उहइ होइ चाही जेकर अभिसेक पवित्तर तेल स भवा होइ।

^26-27 “उ मनई क आपन ‘सरण-सहर’ क चउहद्दी स कबहुँ बाहेर नाहीं जाइ चाही। अगर उ सिमान पार करत ह अउ मृतक मनई क परिवार क निअम्बर ओका धरत ह अउ ओका मारि डावत ह तउ उ मनई हत्या क अपराधी नाहीं होत। ²⁸ उ मनई क जेका, जउन संजोग स कउनो क मारि डाएस ह, ‘सरण-सहर’ मँ महा याजक क मरि तलक रहइ सकत ह। महा याजक क मरइ क पाछे उ मनई आपन भूइँया क लउटि सकत ह। ²⁹ तू जउन कहुँ भी रहा इ नेमॅ तोहार आवइ वाले नसलन बरे कानून क तरह होइ जाब।

³⁰ “हत्तियारा क तबहिं मउत-सजा दीन्ह जाइ सकत ह। जब ओकरे बिरोध मँ एक स जियादा गवाही होइहीं। जदि एक ठु ही गवाह होइ तउ कउनो मनई क मउत क सजा नाहीं दीन्ह जाइ।

³¹ “जदि कउनो मनई हत्तियारा अहइ तउ ओका मारि डावइ चाही। धन क बदले ओका नाहीं छोड़ दीन्ह जाइ चाही। उ हत्तियारे क मार दीन्ह जाइ चाही।

³² “अगर कउनो मनई कउनो क मारेस अउ उ पराइके कउनो ‘सरण-सहर’ मँ गवा तउ घर लउटइ बरे ओसे धन जिन ल्या। उ मनई क उ नगर मँ तब तलक रहइ क पड़ी जब तलक महायाजक न मरइ।

³³ “भोले मनइयन क खून स आपन देस क जिन दुसित करा। जदि कउनो मनई कउनो क मारि डावत ह तउ इ अपराध क बदला इहइ अहइ कि उ मनई क मार दीन्ह जाइ। दूसर कउनो अइसा बदला उ जुर्म बरे नाहीं बा कि हत्तियारा क जान स मारि डावा जाइ। दूसर कउनो चारा नाहीं कि उ देस क अजाद कइ सकइ। ³⁴ मइँ यहोवा हउँ! मइँ इस्राएल क लोग क बीच तोहरे देस मँ सदा रहत रहबइ। मइँ उ देस मँ रहत रहब। एह बरे बे अपराधी मनइयन क खून स उ देस क दुसित जिन करा।”

सलोफाद क बिटियन क देस

36 मनस्से यूसुफ क पूत रहा। माकीर मनस्से क पूत रहा। गिलाद माकीर क पूत रहा। गिलाद परिवार क नेता मूसा अउ इस्राएल क परिवार समूहन क नेता लोगन स बात करइ गएन। ² उ पचे कहेन, “महोदय, यहोवा हमलोगन क लौटरी क आधार पइ भूइँया बाटइँ क हुकम दिहस ह। अउर महोदय, यहोवा हुकुम दिहस कि सलोफाद क भुइयाँ ओकरी बिटियन क मिलइ। सलोफाद हम लोगन क भाई रहा। ³ इ होइ सकत ह कि कउनो दूसर परिवार समूह क मनई सलोफाद क कउनो बिटिया स बियाह करइ। का उ भुइँया हमरे परिवारे स निकरि जाइ? का उ दूसरे परिवार समूह क मनई उ भुइँया क पाइ लेइहीं? का हम लोग उ भुइँया क खोइ देब जेका हम लोग लौटरी क आधार प पावा ह। ⁴ लोग आपन भुइँया बेचं-बिकिन सकत हीं। मुला जुबली क बरिस मँ सारी धरती उ परिवार समूह क लउटी जात ह जउन एकर असली मालिक होत ह। उ टेमॅ सलोफाद क बिटियन क भुइयाँ कउन पाई? अगर वइसा होत ह तउ हमार परिवार उ भुइयाँ क सदा न पाइ सकी।”

⁵ मूसा इस्राएल क लोगन क इ हुकुम दिहस। इ हुकुम यहोवा क रहन “युसूफ क परिवार समूह क इ सबइ मनई ठीक कहत हीं। ⁶ सलोफाद क बिटियन बरे इ हुकुम अहइ: जदि तू कउनो स बियाह करइ चाहति हउ तउ तोहका आपन परिवार समूह क कउनो मनई क संग बियाह करइ चाही। ⁷ इ तरह इस्राएल क लोगन मँ भुइयाँ एक परिवार समूह स दूसर परिवार समूह मँ नाहीं जाइ। हर एक इस्राएली आपन पुरखन क भुइँया क ही आपन लगे रखी। ⁸ अउर जदि कउनो बिटिया बाप क भुइँया पाइ जात ह तउ ओका आपन परिवार समूह मँ स ही कउनो क संग बियाह करइ चाही। इ तरह हर एक मनई उहइ भुइयाँ अपने लगे रखी जउन ओकरे पुरखन क रही। ⁹ इ तरह इस्राएल क लोगन मँ एक परिवार समूह स दूसर परिवार समूह मँ न जाइ। हर एक इस्राएली उ भुइँया रखी जउन ओकरे आपन पुरखन क रही।”

¹⁰ सलोफाद क बिटियन, मूसा दुआरा प्राप्त भवा यहोवा क हुकुम क पालन किहेस। ¹¹ एह बरे सलोफाद क बिटियन महला, तिर्सा, होग्ला, मिल्का अउ नोआ आपन चचेरा भाइयन क संग बियाह किहन। ¹² ओनकइ भतार मनस्से क परिवार समूह क रहेन। एह बरे ओनकइ भुइँया ओनके बाप क परिवार अउ परिवार समूह क बनी रही।

¹³ इ तरह उ सब कनून अउ हुकुम यरीहो क पार स यरदन नदी क किनारे मोआब इलाका मँ यहोवा मूसा क दिहे रहा। मूसा यहोवा क ओन कनूनन क अउ हुकुमन क इस्राएल क लोगन क दिहस।

तलाक क बारे मँ ईसू क उपदेस

(मत्ती 19:1-12)

10 फिन ईसू उ जगह छोड़ि दिहस अउर यहूदिया क पहँटा अउर यरदन नदी क पार गवा। फिन भीर प भीर ओकरे नगिचे आवइ लाग। जउसे ओकर रीति रही, ईसू ओनका उपदेस देइ लाग।

² अउर कछू फरीसियन ओकरे लगे आएन अउर उ सबइ ओसे पूछेन, “का इ कनून पुरुस क लिये नीक बाटइ कि उ आपन पत्नी क तलाक देइ दे?” उ सबइ ओसे ओका जाँचइ बरे पूछेन।

³ ईसू ओनका जबाव दिहेस, “मूसा तोहका का आदेस दिए बाटेन?”

⁴ उ सबइ कहेन, “मूसा पुरुस क एक ठु तलाक क त्याग पत्र लिखिवाइ आपन पत्नी क तलाक बरे हुकुम देहेस।”

⁵ ईसू ओनसे कहेस, “मूसा इ आदेस एह बरे लिखेस कि तू सबइ नासमुझ अहा। ⁶ सृस्टि क सुरुआत स, ‘परमेस्सर पुरुस अउर स्त्री बनाएस।’^{(A) 7} ‘एह बरे पुरुस आपन महतारी बाप क छोड़ि देइ अउर आपन पत्नी क संग रही।’ ^{(B) 8} दुइनउँ एक तन होइ जइहीं। तइसे उ दुइनउँ अलग नाहीं, मुला एक ठु अहइँ। ⁹ एह बरे जेकर परमेस्सर जोरि दिहे अहइँ, ओहका मनई क अलग नाहीं करइ चाही।”

¹⁰ जब उ सबइ गरवा मँ फिन स आएन, तउ चेलन ऍकरे बारे मँ ओसे पूछेन। ¹¹ अउर ईसू ओनसे पूछेस, “जउन आपन पत्नी क तलाक दइ देत ह, अउर दूसर स्त्री स बियाह करत ह, उ ओकरे खिलाफ व्यभिचार करत ह। ¹² अगर स्त्री आपन पति क तजि देत ह अउर दूसर पुरुस स बियाह करत ह, तो उ व्यभिचारी ह।”

ईसू बचन क आसीर्बाद बरे

(मत्ती 19:13-15; लूका 18:15-17)

¹³ फिन मनइयन गदेलन क ओकरे लगे लइ आवइ लागेन, इ नाते कि उ ओनका छुइ लेइ अउर आसीर्बाद देइ मुला चेलन ओनका फटकारि दिहन। ¹⁴ जब ईसू इ देखेस, उ कोहाय ग अउर उ ओनसे कहेस, “गदेलन क मोरे निअरे आवइ द्या। ओनका जिन रोका, इ नाते परमेस्सर क राज्य अइसन स नाता जोरत ह। ¹⁵ मइँ तोहका सच सच बतावत हउँ, जउन परमेस्सर क राज्य क गदेलन क नाईं सुआगत न करी, उ राज्य मँ कबहुँ न घुसी।” ¹⁶ ईसू आपन कोरा मँ गदेलन क उठाएस। उ आपन हथवा ओनके ऊपर धरेस अउर आसीर्बाद दिहेस।

ईसू स धनी मनई क सवाल

(मत्ती 19:16-30; लूका 18:18-30)

¹⁷ जइसे उ जात्रा प जाइ क रहा, एक मनई ओकरे लगे आइ अउर घुटुनवा टेकिके बोला अउ ओसे पूछेस, “उत्तम गुरु! अनन्त जीवन पावइ क हक बरे ओका का करइ क चाही?”

¹⁸ ईसू ओसे कहेस, “तू मोका उत्तम काहे कहत ह? सिरिफ परमेस्सर क छोड़िके कउनो उत्तम नाहीं। ¹⁹ तू आदेस क जानत ह। ‘जीउ जिन मारा, व्यभिचार जिन करा, चोरी जिन करा, झूठी गवाही जिन द्या, ठगी जिन करा, आपन महतारी बाप क इज्जत करा।’”

²⁰ उ मनई ओसे कहेस, “गुरु मइँ आपन लरिकइँ स इन सब बातन पर चलत आवत हउँ।”

²¹ ईसू ओका निहारेस। ओकरे बरे पिरेम भाउ रखेस अउर ओसे कहेस, “तोहमाँ ऍक बात क कमी अहइ जा अउर बेंचि आवा जउन तू धरे अहा। तब एक गरीबे क द्या। ओकरे बाद तू सरगे मँ खजाना रखब्या। तब्बई तू आवा अउर मोरे पाछे चला।”

²² अइसे बयान पर ओकर मुँह उतर गवा अउर निरास होइ के चला गवा। इ नाते कि उ धनवान रहा।

²³ ईसू चारिहुँ कइँती देखेस अउर आपन चेलन स कहेस, “केतना मुस्किल बाटइ ओनके बरे जउन धनी होइके परमेस्सर क राज्य मँ घुसइ चाहत अहइँ।”

²⁴ चेलन इ बचनन प अचरजि मँ परि गएन। तउ फिन ईसू ओनसे कहेस, “मोर गदेलन! परमेस्सर क राज्य मँ घुसब केतना मुस्किल अहइ। ²⁵ ऊँट क सुई क नोंके स घुसरब असान अहइ, बजाय एक धनी मनई क परमेस्सर क राज्य मँ जाब!”

²⁶ ओनका अउ जिआदा अचरज भवा, अउर आपुस मँ एक दुसरे स बतियाइ लागेन, “तब कउने क उद्धार होई?” ²⁷ ओनका लखत, ईसू कहेस, “मनई अइसा कबहुँ नाहीं कइ सकत, मुला इ परमेस्सर बरे अइसा नाहीं।”

²⁸ पतरस ओसे कहइ लाग, “देखा, हम सब कछू तजि दिहन अउर तोहरे पाछे होइ गएन!”

²⁹ ईसू कहेस, “मइँ तोसे सच सच कहत हउँ, कउनो अइसा नाहीं जउन मोरे बरे अउर सुसमाचार बरे घर-दुआर, भाइयन, बहिनियन, महतारी, बाप, गदेलन, खेत अउर क तजि देइ, ³⁰ जउन इ जुगे मँ घरन भाइयन, बहिनियन, महतारीयन, गदेलन अउर खेतन क संग सताव सउ गुना जिआदा न पाइ, अउर आवइवाला जुग मँ अनन्त जीवन। ³¹ मुला बहोत जने जउन आज सबते पाछे अहइँ, उ सबते पहिले होइहीं। जउन सबते पहिले अहइँ, उ सबइ पाछे होइहीं।”