Old/New Testament
तुरहियन क त्यौहार
29 “सातवाँ महीना क पहिले दिन एक खास बइठक होइ। तू सबइ उ दिन कउनो काम नाहीं करब्या। उ तुरही बजावइ क दिन अहइ। 2 तू पचे होमबलि चढ़उब्या। इ भेंटन यहोवा बरे सुहावनी सुगन्ध होइ। तू बेदोखे क एक साँड़ एक भेड़ा अउ एक-एक बरिस क सात मेमना चढ़उब्या। 3 तू पचे एपा क तीन दसवाँ हींसा तेल स सना भवा नीक आटा हरेक बर्धा क संग, अउ एपा क दुइ दसवाँ हींसा भेंड़ा क संग चढ़ाउब्या। 4 सात मेमना मँ स हरेक क संग एपा क दसवाँ हींसा आटा क भेंट चढ़उब्या। 5 एकरे अलावा पापबलि बरे एक बोकरा भी चढ़उब्या। इ तोहरे पापे क ढाँपी। 6 इ भेंटन नवा चन्द्रिमा भेंट अउ ओकरे अन्नबलि क अलावा होइ। अउर इ रोज क भेंट, एकर अन्नबलि अउ पयेबलि क अलावा होइहीं। इ नेम क मुताबिक कीन्ह जाइ चाही। एनका आगी बारइ चाही। इ यहोवा क बरे सुहावनी सुगन्ध होइ।
प्रायस्चित क दिन
7 “सतऍ महीना क दसवाँ दिन एक खास बइठक होइ। उ दिन तू उपवास रखब्या अउर तू कउनो काम नाहीं करब्या। 8 तू होमबलि भेंट करब्या। इ यहोवा बरे सुहावनी गन्ध होइ। तू बे दोखे क एक ठू साँड़ एक ठु भेड़ा अउ एक बरिस क सात मेमना भेंट चढ़उब्या। 9 हर एक बर्धा क संग जइतून क तेले स साना भवा एपा क तीन दसवाँ हींसा आटा, भेड़न क संग एपा क दुइ दसवाँ हींसा आटा। 10 अउ हर एक सातहु मेमना क संग एपा क दसवाँ हींसा आटा क भेंट चढ़उब्या। 11 तू एक बोकरा भी पापबलि क अलावा भेंट करब्या। इ पाप बरे प्रायस्चित क अतिरिक्त होइ। इ रोजाना क बलि, अन्नबलि अउ पयेबलि क अलावा भी होइ।
कुटीर क त्यौहार
12 “सतऍ महीना क पन्द्रहवाँ दिन एक खास बइठक होइ। इ कुटीर क त्यौहार होइ। तू उ दिना कउनो काम नाहीं करब्या। तू यहोवा बरे खास छुट्टी सात दिना तलक मनउब्या। 13 तू होमबलि चढ़उब्या। इ यहोवा बरे सुहावनी सुगन्ध होइ। तू तेरह बर्धा, दुइ भेड़ा अउ एक बरिस क चउदह मेमना चढ़उब्या। 14 तू तेरह बर्धा मँ स हर एक बरे जइतून क तेल क संग साना भवा एपा क तीन दसवाँ हींसा आटा, दुइनउँ भेड़न मँ स हर एक बरे एपा क दुइ दसवाँ हींसा 15 अउ चउदह भेड़न मँ स हर एक बरे एपा क दसवाँ हींसा आटा क भेंट चढ़उब्या। 16 तोहका एक ठु बोकरा भी पाप भेंट क रूप मँ अर्पित करइ चाही। इ रोजाना क भेंट अउ एकर अनाज अउ दाखरस भेंट क अलावा होइ।
17 “इ पवित्तर दिन क दूसरे दिन तोहका बारह बर्धा, दुइ भेड़ा अउ चउदह ऍक बरिस क मेमना चढ़ावइ चाही। इ सबइ बिना दोख क होइ चाही। 18 तोहका साँड़, भेड़ा अउ मेमना क संग गनती क मुताबिक तउले मँ अन्नबलि अउ पयेबलि भी चढ़ावइ चाही। 19 तोहका पापबलि क रूप मँ एक ठु बोकरा क भी भेंट चढ़ावइ चाही। इ रोजाना क भेंट अउ अन्न अउ पयेबलि क अलावा भेंट होइ।
20 “इ पवित्तर दिन क तीसर दिन तोहका बे दोखे क गियारह साँड़, दुइ भेड़ा अउ एक-एक बरिस क मेमना क भेंट चढ़ावइ चाही। 21 तोहका बर्धा, भेड़ा अउ मेमना क ठीक गनती क मुताबिक अन्न अउ पयेबलि चढ़ावइ चाही। 22 तोहका पापबलि क रूप मँ एक बोकरा क भी देइ चाही। इ रोजाना क भेंट अउ अन्नबलि अउ पयेबलि क अलावा भेंट होइ।
23 “इ पवित्तर दिन क चउथा दिन तोहका बे दोखि क दस साँड़, दुइ भेड़ा अउ एक-एक बरिस क चउदह मेमना भेंट चढ़ावइ चाही। इ सबइ बेदोख होइ चाही। 24 तोहका बर्धा, भेड़ा अउ मेमना क ठीक सख्याँ क मुताबिक अन्न अउ पयेबलि चढ़ावइ चाही। 25 तोहका पापबलि क रूप मँ एक बोकरा क भी च़ढ़ावइ चाही। इ रोजाना क भेंट अउ अन्नबलि अउ पेयबलि क अलावा होइ चाही।
26 “इ पवित्तर दिन क पँचए दिन तोहका बेदोख क नौ साँड़, दुइ भेड़ा अउ एक-एक बरिस क चउदह मेमना भेंट चढ़ावइ चाही। इ सबइ बेदोख होइ चाही। 27 तोहका बर्धा, भेड़ा अउ मेमना क ठीक संख्याँ क मुताबिक अन्न अउ पयेबलि चढ़ावइ चाही। 28 तोहका पापबलि क रूप मँ एक बोकरा क भी भेंट चढ़ावइ चाही। इ रोजाना क भेंट अउ अन्नबलि अउ पेयबलि क अलावा होइ चाही।
29 “इ पवित्तर दिन क छठऍ दिन तोहका बे दोखे क चउदह साँड़, दुइ भेड़ा अउ एक-एक बरिस क चउदह मेमना क भेंट चढ़ावइ चाही। 30 तोहका बर्धा, भेड़ा अउ मेमना क संग जेतँना होइ चाही उ मात्रा मँ अन्न अउ पयेबलि चढ़ावइ चाही। 31 तोहका पापबलि क रूप मँ एक बोकराँ क भी भेंट देइ चाही। इ रोजाना क भेंट अउ अन्नबलि अउर पयेबलि क अलावा भेंट होइ।
32 “इ पवित्तर दिन क सतऍ दिन तोहका बेदोख क सात साँड़, दुइ भेड़ा, अउ एक-एक बरिस क चउदह मेमना क भेंट चढ़ावइ चाही। 33 तोहका बर्धा, भेड़ा अउ मेमना क संग गनी भइ गनती मँ अन्न अउ पयेबलि चढ़ावइ चाही। 34 तोहका पापबलि क रूप मँ एक बोकरा क भी भेंट देइ चाही। इ रोजाना क भेंट अउ अन्नबलि तथा पयेबलि क अलावा भेंट होइ।
35 “इ पवित्तर दिन क अठवाँ दिन तोहका एक समापन बइठक करइ चाहीं। तोहका उ दिन कउनो काम नाहीं करइ चाही। 36 तू होमबलि अउ आगी क भेंट चढ़ावा। इ यहोवा बरे सुहावनी सुगंध होइ। तोहका बेदोखे क एक साँड़, एक भेड़ा अउ एक एक बरिस क सात मेमना भेंट मँ चढ़ावइ चाही। 37 तोहका साँड़, भेड़ा अउ भेड़ी क बच्चा बरे गनी भइ मात्रा मँ अन्न अउ पयेबलि देइ चाही। 38 तोहका पापबलि क रूप मँ एक बोकरा क भी भेंट देइ चाही। इ रोजाना क भेंट अउ अन्नबलि अउ पयेबलि क अलावा भेंट होइ चाही।
39 “उ सबइ तोहार खास दिन यहोवा क सम्मान बरे अहइ। तोहका एपा क दसवाँ हींसा ओन बचन भेंट, आपन स्वेच्छा भेंट, होमबलि, अन्नबलि, पयेबलि अउ मेलबलि क अलावा इ पवितर दिनन म मानइ चाहीं।”
40 मूसा इस्राएल क लोगन स ओन सबहिं बातन क कहेस जउन यहोवा ओका हुकुम दिहे रहा।
दीन्ह गवा खास बचन
30 मूसा सबहिं इस्राएली परिवार समूहन क नेता लोगन स बात किहेस। मूसा यहोवा क इ आदेस क बारे मँ ओनसे कहेस।
2 “अगर कउनो मनई परमेस्सर क खास बचन देइ चाहत ह या जदि उ मनई परमेस्सर क कछू खास न्यौछावर करइ क बचन देत ह तउ ओका वइसे ही करइ द्या। मुला ओन मनई क ठीक वइसेन ही करइ चाही जइसा उ बचन दिहे अहइ।
3 “होइ सकत ही कि कउनो जवान मेहरारु आपन पिता क घर रहत होइ जउन जवान अहइ। अउर उ मेहरारु यहोवा क कछू चढ़ावइ क बचन देत होइ। 4 अउर ओकर बाप इ बचन क बारे मँ सुनत ह अउर ओकर बरे (बचन क रद्द करइ बरे) कछू नाहीं कहत ह तउ उ जवान मेहरारू क बचन तउ जरुर पूरा कइ देइ चाही जेका करइ क उ बचन दिहे अहइ। 5 मुला अगर ओकर बाप ओकर दीन्ह गवा बचन क बारे मँ सुनिके ओका पूरा करइ स मना करत ह तउ उ मेहरारु क उ बचन पूरा नाहीं करइ चाही जेका उ बचन लिहेस ह। काहेकि ओकर बाप ओका रोकेस। एह बरे यहोवा ओका छिमा करिहीं।
6 “होइ सकत ह कि कउनो मेहरारु बात ही बातन मँ बे सोचे बिचारे कउनो किरिया खाइ लेत ह अउ पाछे ओकर बियाह होइ जात ह। 7 अउर भतार दीन्ह गवा बचन क बारे मँ सुनत ह अउ अउर ओकर (बचन क रद्द करइ) बरे कछू नाहीं कहत ह। तउ उ मेहरारु क आपन दीन्ह गवा बचन क मुताबिक काम क पूरा कइ लेइ चाही। 8 मुला जदि भतार दीन्ह गवा बचन क बारे मँ सुनत ह अउ ओका अंगीकार नाहीं करत ह तउ मेहरारु क दीन्ह गवा बचन क पूरा नाहीं करइ क पड़ी। ओकर भतार ओकर बचन रोकि दिहन-उ ओका कही गइ बात क पूरा नाहीं करइ दिहस। एह बरे यहोवा ओका छिमा करिहीं।
9 “कउनो राँड़ या तलाक दीन्ह गइ मेहरारु खास बचन दइ सकत ह। अगर उ अइसा करत ह तउ ओका आपन ठीक बचन क मुताबिक करइ चाही।
10 “एक बियाही मेहरारु यहोवा क कछू चढ़ावइ क बचन, या कछू स अपने आप क बचाइ क बचन दइ सकत ह। 11 अदि ओकर भतार दीन्ह गए बचन क बारे मँ सुनत ह अउ ओका आपन बचन क पूरा करइ देत ह तउ ओका ठीक आपन दीन्ह गए बचनन क मुताबिक ही उ काम करइ चाही। 12 मुला अगर ओकर भतार ओकर दीन्ह गए बचन क सुनत ह अउर ओका बचन पूरा करइ स मना कइ देत ह तउ ओका आपन दीन्ह गए बचन क मुताबिक उ काम पूरा नाहीं करइ क होइ। ऍकर कउनो महत्व न होइ काहे की उ का बचन दिहे रहा, ओकर भतार उ बचन क भगं कइ सकत ह। अगर ओकर भतार उ बचन क तोड़ देत ह तउ यहोवा ओका छिमा करिहीं। 13 एक बियाही मेहरारु यहोवा या परमेस्सर क कउनो खास बचन दइ सकत ह। भतार ओकरे बचन मँ स कउनो क रोक सकत ह या भतार उ बचन मँ स कउनो क पूरा करइ देइ सकत ह। 14 भतार आपन मेहरारु क कइसे बचन पूरा करइ देइ? अगर उ दीन्ह ग बचन क बारे मँ सुनत ह अउ ओनका रोकत नाहीं तउ मेहरारु क आपन दीन्ह ग बचन क मुताबिक काम क पूरा करइ चाही। 15 अगर भतार दीन्ह ग बचन क बारे मँ सुनत ह अउ ओकर पाछे ओका बचन पूरा करइ स रोकत ह तउ ओकर बचन तोड़इ क जिम्मेदारी भतार प होइ।”
16 इ सबइ हुकुम अहइ जेनका परमेस्सर मूसा क दिहेस। इ सब आदेस एक मनई अउ ओकरे मेहरारु क बारे मँ अहइँ अउ बाप अउ ओकरे बिटिया क बारे मँ अहइ जउन उ जवान मेहरारू रहइ अउ अपने बाप क घरे मँ रहत होइ।
इस्राएल मिदियनन क खिलाफ फुन हमला किहेस
31 यहोवा मूसा स बात किहेस। उ कहेस, 2 “‘मइँ इस्राएल क लोगन क संग मिद्यानी लोग जउन किहे बाटइँ, ओकरे बरे मइँ सजा देब।’ ओकरे पाछे मूसा तू मरि जाब्या।”
3 एह बरे मूसा मनइयन स बात किहेस। उ कहेस, “आपन कछू मनइयन क जुद्ध बरे तइयार करा। यहोवा ओन मनइयन क प्रयोग मिदयानी लोगन क सजा देइ मँ करिहीं। 4 अइसे 1,000 मनइयन क इस्राएल क परिवार समूहन स चुना। 5 इस्राएल क सबहिं परिवार समूहन स 12,000 सिपाही होइहीं।”
6 मूसा ओन 12,000 मनइयन क जुद्ध बरे पठाएस। उ याजक एलीआज़ार क पूत पनीहास क ओनके संग पठाएस। पनीहास आपन संग पवित्तर चीजन, सीगं अउ तुरहियन लइ लिहेस। 7 इस्राएल क लोग मिदियानी लोगन क नरसिंग वइसेन ही लड़ेन जइसा यहोवा मूसा क हुकुम दिहे रहा। उ पचे सबहिं मिद्यानी मनइयन क मारि डाएन। 8 जउन मनइयन क उ पचे मारि डाएन ओहमाँ एवी, रकैम, सूर, हूर अउ रेबा इ सबइ पाँच मिद्यानी राजा रहेन। उ पचे बेआँर क पूत बिलाम क भी तरवारे स मारि डाएस।
9 इस्राएल क लोग मिद्यानी मेहररुअन अउ गदेलन, ओनकइ सब भेड़ी, गइयन अउ सब चीजन क बन्दी बनाइ लिहन। 10 तब उ पचे ओनके सब डेरन मँ अउ सहरन मँ आगी लगाइ दिहन जहाँ उ पचे रहत रहेन। 11 उ पचे सब मनइयन अउ गोरुअन क लइ लिहन, 12 अउर ओनका मूसा, याजक एलीआज़ार अउ इस्राएल क सब लोगन क लगे लइ गएन। उ पचे ओन सबहिं इस्राएल क सिबिर मँ लाएन जेनका उ पचे हुवाँ पाइ लिहन। इस्राएल क लोग मोआब क समतल मँ बसा यरदन घाटी मँ सिबिर डाए रहेन। इ यरीहो क निचके यरदन नदी क पूरब कइँती रहा। 13 तब मूसा, याजक एलीआज़ार अउ मनइयन क नेता, सिपाहियन स मिलइ बरे डेरन स बाहेर गएन।
14 मूसा सेनापति लोगन प बहोत कोहान रहा। उ ओन 1,000 क फउज क संचालक लोगन अउ एक सौ क फउज क संचालक लोगन प कोहान रहा जउन जुद्ध स लौटिके आए रहेन। 15 मूसा ओनसे कहेस, “तू आदमी लोग मेहररुअन क काहे जिअत रहइ दिहा? 16 लखा इ अउरत ही रही जेकरे वजह स बिलाम क घरना मँ इस्राएलियन बरे समस्या पइदा भइन अउ पेऑर मँ यहोवा क खिलाफ होइ गएन जेहसे इस्राएल क मनइयन क महामारी भोगइ क पड़ी। 17 तउ अब मिद्यानी नर गदेलन क मारि डावा। अउर ओन सबहिं मिद्यानी मेहररुअन क मारि डावा जउन कउनो मनई क संग रही होइँ। ओन सब मेहररुअन क मारि डावा जेकर कउनो मनई क संग सारीरिक सम्बंध होइ। 18 तू सिरिफ ओन सबहिं बिटियन क जिअइ द्या जेकर कउनो मनई क संग सारीरिक सम्बंध नाहीं भइ। 19 तब एकर बाद तू सबइ सिपाहियन क जउन लोगन क मारेस या ल्हास क छुएस सात दिना तलक सिबिर क बाहर रहइ क पड़ी। तीसरे अउ सताएँ दिनन तू अउर तोहार बन्दी सुद्ध होब्या। 20 तोहका उहइ काम सातवें दिन फिर करइ क होइ। तोहका आपन सबहिं ओढ़ना धोवइ चाही। तोहका चाम क बनी हर चीज ऊनी अउ काठे क बनी चीजन क भी धोवइ चाही। तोहका सुद्ध होइ जाइ चाही।”
21 तब याजक एलीआज़ार सिपाहियन स कहेस कउन जुद्ध क लउटेस ह। उ कहेस, “इ उहइ नेम बाटेन जेका यहोवा मूसा क दिहे रहा। 22-23 मुला जउन चीजन आगी मँ डाइ जाइ सकत हीं ओकरे बारे मँ अलग-अलग नेमॅ अहइँ। तोहका सोना, चाँदी, काँसा, लोहा, टिन या सीसा क आगी मँ डावइ चाही। जब तू ओनका सुद्धीकरण बरे लाल गाय क राख मिला भवा पानी स धोवा उ सबइ सुद्ध होइ जइहीं। जदि चीजन आगी मँ न नाई जाइ सकइँ तउ तोहका ओनका पानी स धोवइ चाही। 24 सतऍ दिन तोहका आपन सारा ओढ़ना धोवइ चाही। जब तू सुद्ध होइ जाब्या। ओकरे बाद तू पचे सिबिर मँ आइ सकत ह।”
25 तब यहोवा मूसा स कहेस, 26 “मूसा तोहका याजक एलीआज़ार अउ सबहिं नेता लोगन क चाही कि तू पचे ओन बन्दियन, गोरुअन अउ सबहिं चीजन क गना जेनका फउजी लोग जुद्ध स लाए होइँ। 27 तब ओन सबहिं चिजियन क जुद्ध मँ भाग लेइ वालन आधा फउजी लोगन अउ बाकी आधा इस्राएल क मनइयन मँ बाँटि देइ चाही। 28 जउन सिपाही जुद्ध मँ भाग लेइ ग रहेन ओनसे ओन चीजन क कर ल्या। उ हींसा यहोवा क होइ। हर एक पाँच सौ चीजन मँ स एक यहोवा क हींसा होइ। एहमाँ मनई, गाय, गदहन अउ भेड़ी सामिल अहइँ। 29 जउन फउजी जुद्ध मँ जउन चीजन क पाएन ह, ओनका आधी हींसा कर क रूप मँ ल्या। तब ओन चीजन क (प्रति एक पाँच सौ मँ स एक) याजक एलीआज़ार क द्या। तब हींसा यहोवा क होइ। 30 अउर तब बाकी लोगन क आधा मँ स हर एक पचास चीजन मँ स एक चीज ल्या। एहमाँ मनई, गाय, गदहन, भेड़ी या दूसर जनावर सामिल बाटेन। इ हींसा लेवी बंसी मनइयन क द्या। काहे? काहेकी लेवी बंसी यहोवा क पवित्तर तम्बू क देखत रेखत हीं।”
31 इ तरह मूसा अउ एलीआज़ार उहइ किहन जउन मूसा क यहोवा क हुकुम रहा। 32 फउजी सिपाही 6,75,000 भेड़ीन, 33 बहत्तर हजार गोरु, 34 इक्सठ हजार गदहन, 35 बत्तीस हजार मेहररुअन लूटे रहेन। (इ सबइ अइसी मेहररुअन रहिन जेनकइ कउनो मनई क संग सारीरिक सम्बंध नाहीं रहा।) 36 जउन सिपाही जुद्ध मँ गए रहेन उ सबइ आपन हींसा क 3,37,500 भेड़िन क पाइ लिहन। 37 फउजियन स लीन्ह ग यहोवा क कर 675 भेंड़ रहा। 38 फउजियन क 36,000 गाइयन मिलि गएन। उ पचे बहत्तर यहोवा क दिहेन। 39 फउजी 30,500 गदहा पाइ गएन। उ पचे यहोवा क इकसठ दिहेन। 40 फउजियन क 16,000 मेहरारु मिलिन। उ सबइ यहोवा क बत्तीस दिहेन। 41 यहोवा क हुकुम क मुताबिक मूसा यहोवा बरे दीन्ह गइ ओन सारी भेंटन क याजक एलीआज़ार क दिहस।
42 तब मूसा मनइयन स मिला भवा आधा हींसा क गनेस। इ उ हींसा रहा जेका मूसा जुद्ध मँ जाइवालन फउजियन स लिहे रहा। 43 मनइयन 3,37,500 भेड़ी, 44 छत्तीस हजार गाइयन, 45 तीस हजार पाँच सौ गदहा 46 अउ 16,000 मेहरारु पाएन। 47 मूसा हर एक पचास चीजन प एक चीज यहोवा बरे लिहस। एहमा गोरु अउ मनई दुइनऊ सामिल रहेन। तब ओन चीजन क उ लेवी बंसी लोगन क दिहेस। काहेकि उ यहोवा क पवित्तर तम्बू क देखत रेखत रहेन। मूसा इ यहोवा क हुकुम क मुताबिक किहेस।
48 तब सेना क संचालक (1,000 सिपाहियन क सेनापति अउ एक सौ सिपाहियन क सेनापति) मूसा क निअरे गएन। 49 उ पचे मूसा स कहेन, “हम पचे आपन फउजियन क गना ह। हम पचन मँ स कउनो भी कम नाहीं अहइ। 50 एह बरे हम लोग हर एक ठु सिपाही स यहोवा क भेंट लइ आवत अही। हम पचे सोना क चीज बाजूबन्द, कड़ा, मुँदरी, बाली अउ हबेल लइ आवत अही। इ सब भेंट यहोवा क समन्वा हमार पाप बरे प्रायस्चित बरे होइ।”
51 एह बरे मूसा उ सबइ सोना क चीज लिहस अउ याजक एलीआज़ार क ओन चीजन्क दिहस। 52 एक हजार फउजियन क सेनापतियन अउ एक सौ मनइ क सेनापातियन जउन सोना बटोरेन ओकर वजन 16,750 सेकेल रहा। 53 हर एक फउजी लड़ाई मँ मिली भइ बाकी चीजन क हींसा अपने लगे रख लिहस। 54 मूसा अउ याजक एलीआज़ार एक हजार फउजियन क सेनापतियन अउर एक सौ मनइयन क सेनापातियन स सोना अंगीकार किहस। तब उ पचे सोना क मिलापवाला तम्बू मँ धरेस। इ भेंट एक यादगार क रूप मँ इस्राएल क लोगन बरे यहोवा क समन्वा रहिन।
9 अउर ईसू ओनसे कहेस, “मइँ सबन क सच सच बताउब, जउन हियाँ खड़ा अहइँ, ओहमाँ स कछू परमेस्सर क राज्य सक्ति क संग आवइ स पहिले देखिहीं अउर मरइ क अंजाद न करिहीं।”
मूसा अउर एलिय्याह क संग ईसू क दरसन देब
(मत्ती 17:1-13; लूका 9:28-36)
2 छः दिना पाछे ईसू सिरिफ पतरस, याकूब अउर यूहन्ना सबक संग लइके एक ऊँच पर्वत प खुद गवा। हुवाँ उ ओनके समन्वा आपन भेस बदल लिहस। 3 ओकर ओढ़ना चमचमाइ लागेन एकदम्मइ उजिअर। धरती प कउनो धोबी ओतना उजिअर ओसे जिआदा नाहीं धोइ सकत रहा। 4 एलिय्याह अउर मूसा भी ओनके संग परगट भएन। अउर उ सबइ ईसू स बतियात रहेन।
5 तब पतरस बोल उठा अउर ईसू स कहेस, “गुरु, इ भल भवा कि हम हियाँ अही। हमका तीन तम्बू लगावइ द्या, एक तोहरे बरे, एक ठु मूसा बरे अउर एक ठु एलिय्याह बरे।” 6 पतरस इ एह बरे कहेस जइसे उ जानत नाहीं रहा कि उ का बोली। इ तरह उ पचे डेराइ गएन।
7 एक बादर आवा अउर ओनका आपन छाया स ढाँकि लिहस। बदरा स एक आवाज कहत भइ होइ गइ, “इ मोर पियारा पूत अहइ। ओका सुना!”
8 अउर फउरन उ पचे चारिहुँ कइँती निहारेन। सिरिफ ईसू क छाँड़िके उ पचे कउनो क देखेन नाहीं।
9 जइसे उ सब पहाड़ स तरखाले उतरत रहेन, ईसू ओनका हुकुम दिहस कि कउनो क न बतावइँ जउन उ सब निहारेन ह, जब तलक मनई क पूत मरि गए लोगन्स जी न जाइ।
10 अउर उ सबइ इ बतिया क आपन जिअरा मँ छिपाइ रहेन मुला उ सबइ आपुस मँ सोचत बिचारत रहेन कि “मरिके जी उठब” क अरथ का बाटइ। 11 फिन उ पचे ईसू स पूछेन, “धरम सास्तिरियन काहे कहत हीं कि एलिय्याह सबस पहिले आई?”[a]
12 ईसू ओनसे कहेस, “हाँ! सब बातन क ठीक करइ बरे एलिय्याह सबन्स पहिले आवत ह। मुला इ काहे मनई क पूत क बारे मँ पवित्तर सास्तर अहइ कि उ बहोत स दुःख भुगुती अउर उ घिना स दुत्कार जाई। 13 मुला मइँ तू सबन क बतावत अही, एलिय्याह आइ चुका अहइ। जउन जउन उ पचे चाहेन, ओकरे साथ उ पचे वइसे किहन; जइसा ओकरे बारे मँ पवित्तर सास्तरन मँ बाटइ।”
ईसू बेरमिया लरिका क चंगा किहेस
(मत्ती 17:14-20; लूका 9:37-43a)
14 अउर जबहिं उ सबइ दूसर चेलन क लगे आएन तउ उ पचे एक भारी भीर क जमघट ओनके चारिहुँ कइँती देखेन कि धरम सास्तियिन ओनसे तहत्तुक करत रहेन। 15 जइसे ही सब मनइयन ओका निहारेन, उ पचे विस्मय मँ पड़ि गएन अउर ओका भेंटइ बरे ओकरे कइँती उ सबइ भागेन।
16 उ ओनसे पूछेस, “तू सबइ ओनसे काहे क बारे मँ विवाद करत ह?”
17 एह पइ एक मनई भिरिया स जबाव दिहस, “गुरु, मइँ आपन बेटवा तोहरे लगे लिआइ अही। ओह पइ एक ठु दुस्ट आतिमा सवारि अहइ, जउन ओका बोलावइ देत नाहीं। 18 जब कबहुँ दुस्ट आतिमा ऍका पकरि लेत ह, उ ऍका फेंकि देत ह अउर ऍकरे मुँहना स झागि निकारइ लगत ह। ओकरे बाद उ दँतवन क पीसत ह अउर उ अकड़ि जात ह। मइँ तोहरे चेलन स कह्यों कि ओका भगावा, मुला उ सबइ करि सकेन नाहीं।”
19 तबहिं ईसू जवाबे मँ ओनसे कहेस, “अरे! बिसवास न करइवाले मनइयो! कब तलक मइँ तोहरे लगे रइहउँ? कब ताई तोहरे लगे सहब? लरिकवा क मोरे लगे लिआवा।”
20 फिन उ सबइ लरिकवा क ओकरे लगे लेवाइ लिआएन। जबहिं दुस्ट आतिमा ईसू क देखेस। फउरन उ लोरिकवा क अइँठ दिहस। लरिकवा भुइँया प गिरि गवा अउर मुँहे स झाग निकारत चारिहुँ ओर लोटइ पोटइ लाग।
21 तब्बइ ईसू लरिका क बाप स पूछेस, “इ अइसा कब स लरिकवा क होत अहइ?”
तब बाप कहेस, “अइसा बचपन स होत आवत अहइ। 22 दुस्ट आतिमा ऍका कइउ दाई आगी मँ अउर कबहुँ पानी मँ मारइ खातिर नाइ देत ही। लेकिन का तू कछू कइ सकत ह? हम पइ दया करा अउर हमार मदद करा।”
23 ईसू ओसे कहेस, “तू कह्या जदि तू कछू कइ सका? जउन बिसवास करी, ओका बरे सब कछू होइ जाई।”
24 तुरंतहीं लरिका क बाप चिचिआन अउर कहेस, “मइँ जरूर बिसवास करत हउँ। तू हमार अबिसवास हटावा।”
25 जब ईसू देखेस कि भारी भीर ओकरे लगे निचकात अहइ, उ दुस्ट आतिमा क ललकारेस अउर ऍका कहेस, “ओ दुस्ट आतिमा! तू इ बचवा क गूँगा बहिरा करइवाली मइँ तोका हुकुम देत अही। ओसे बाहेर आव, ओहमाँ फिन स घुस जिन।”
26 तब उ दुस्ट आतिमा चिचिआन अउर लरिकवा क झपटिके अँइठेसि अउर ओसे बाहेर गइ। अइसन लगा कि लरिकवा मर गवा अहइ। बहुत स लोग कहेन, “उ मर गवा!” 27 फिन ईसू ओकर हाथ पकरि क उठाएस अउर ओका गोड़वन प खड़ा करेस अउ लरिका खड़ा होइ ग।
28 ओकरे पाछे उ घर मँ गवा अउर ओकर चेलन अकेल्ले मँ पूछेन, “काहे क हम दुस्ट आतिमा क भगाइ नाहीं सकेन?”
29 ऍह पइ ईसू जबाव दिहेस, “इ तरह दुस्ट आतिमा बगैर पराथना क बाहेर नाहीं आवत।”
Awadhi Bible: Easy-to-Read Version. Copyright © 2005 Bible League International.