Old/New Testament

² “तू माझ्यासाठी आणखी थोडा धीर धर.
    देवाने मला आणखी बोलायला सांगितले आहे.
³ मी माझे ज्ञान सगळ्यांना वाटतो.
    देवाने मला निर्माण केले आणि देव न्यायी आहे हे मी सिध्द करेन.
⁴ ईयोब, मी खरे बोलत आहे
    आणि मी काय बोलतो आहे ते मला समजत आहे.

⁵ “देव अतिशय सामर्थ्यवान आहे,
    पण तो लोकांचा तिरस्कार करीत नाही.
    तो सामर्थ्यवान असून फार सूज्ञ आहे.
⁶ देव दुष्टांना जगू देणार नाही
    आणि तो गरीबांना नेहमीच न्यायाने वागवितो.
⁷ जे लोक योग्य रीतीने वागतात त्यांच्यावर देव नजर ठेवतो.
    तो चांगल्या लोकांना राज्य करु देतो.
    तो चांगल्यांना सदैव मान देतो.
⁸ म्हणून जर कुणाला शिक्षा झाली व त्यांना साखळदंडानी वा दोरीनी बांधून ठेवण्यात आले
    तर त्यांनी नक्कीच काही वाईट केले असणार.
⁹ आणि त्यांनी काय चूक केली ते देव त्यांना सांगेल.
    देव त्यांना सांगेल की त्यांनी पाप केले आहे.
    देव त्यांना ते गर्विष्ठ होते असे सांगेल.
¹⁰ देव त्या लोकांना त्याची ताकीद आणि सुधारणेच्या सूचना ऐकायला भाग पाडेल.
    तो त्यांना पाप न करण्याची आज्ञा देईल.
¹¹ जर त्या लोकांनी देवाचे ऐकले, त्याची आज्ञा मानली, तर देव त्यांना यशस्वी करेल.
    आणि ते त्यांचे आयुष्य सुखाने जगतील.
¹² परंतु जर त्यांनी देवाची आज्ञा पाळायचे नाकारले तर त्यांचा नाश होईल.
    त्यांना ज्ञान न होता मरण येईल.

¹³ “जे लोक देवाची पर्वा करीत नाहीत ते सदा कटू (रागावलेले) असतात.
    देवाने जरी त्यांना शिक्षा केली तरी ते देवाकडे मदत मागायला तयार नसतात.
¹⁴ ते लोक पुरुष वेश्यासारखे
    अगदी तरुणपणी मरतील.
¹⁵ परंतु देव दु:खी लोकांना त्यांच्या दु:खातून सोडवील.
    देव त्या दु:खाचा उपयोग लोकांना जागवण्यासाठी आणि त्यांनी त्याचे ऐकावे यासाठी करतो.

¹⁶ “ईयोब, देवाला तुला मदत करायची इच्छा आहे.
    तू तुझ्या दु:खातून बाहेर पडावेस असे देवाला वाटते.
तुझे आयुष्य साधे सरळ असावे अशी त्याची इच्छा आहे.
    तुझ्या जेवणाच्या टेबलावर अन्नाची रेलचेल असावी असे त्याला वाटते.
¹⁷ परंतु ईयोबा, आता तुला अपराधी ठरवण्यात आले आहे, म्हणून तुला दुष्टांप्रमाणे शिक्षा करण्यात आली.
¹⁸ ईयोबा, तू श्रीमंतीमुळे मूर्ख बनू नकोस.
    पैशामुळे तू आपला विचार बदलू नकोस.
¹⁹ आता तुझा पैसा तुझ्या कामी येणार नाही.
    आणि सामर्थ्यवान माणसे तुला मदत करणार नाहीत.
²⁰ आता रात्र होण्याची इच्छा मनी बाळगू नकोस.
    लोक रात्री पसार व्हायचा प्रयत्न करतात.
    आपण देवापासून लपून राहू शकू असे त्यांना वाटते.
²¹ ईयोबा, तू खूप त्रास भोगला आहेस पण म्हणून वाईटाची निवड करु नकोस.
    चूक न करण्याची दक्षता घे.

²² “देवाजवळ खूप शक्ती आहे.
    तो जागातला सगळ्यात मोठा गुरु आहे.
²³ काय करावे ते देवाला कुणी सांगू शकत नाही
    ‘देवा तू अयोग्य केलेस’ असे कुणी त्याला म्हणू शकत नाही.
²⁴ देवाने जे काही केले त्याबद्दल नेहमी त्याची स्तुती करायची आठवण ठेव.
    लोकांनी देवाच्या स्तुतीवर अनेक गाणी रचली आहेत.
²⁵ देवाने काय केले ते प्रत्येकाला दिसते.
    दूरदूरच्या देशांतील लोकांनाही देवाचे महान कार्य दिसतात.
²⁶ होय, देव महान आहे परंतु त्याची महानता आपल्याला कळत नाही.
    आणि देवाचे अस्तित्व कधीपासून आहे तेही आपल्याला माहीत नाही.

²⁷ “देव पृथ्वीवरुन पाणी घेऊन त्याचे धुके
    आणि पाऊस यात रुपांतर करतो.
²⁸ अशा रीतीने ढग पाऊस पाडतात
    आणि तो खूप लोकांवर पडतो.
²⁹ देव ढगांची पखरण कशी करतो
    किंवा आकाशात ढगांचा गडगडाट कसा होतो ते कुणाला कळत नाही.
³⁰ बघ, देव विजेला पृथ्वीवर सर्वदूर पाठवतो
    आणि समुद्राचा खोल भागही त्यात येतो.
³¹ देव त्याचा उपयोग राष्ट्रांना काबूत ठेवण्यासाठी करतो
    आणि त्यांना भरपूर अन्न देतो.
³² देव आपल्या हातांनी विजेला पकडतो
    आणि त्याला हवे तेथे पडण्याची तिला आज्ञा करतो.
³³ मेघांच्या गडगडाटामुळे वादळाची सूचना मिळते.
    जनावरांना सुध्दा वादळाची चाहूल लागते.

37 “गडगडाट व वीजा ह्यांची मला भिती वाटते.
    तेव्हा माझ्या ह्रदयाची धडधड वाढते.
² प्रत्येक जण लक्षपूर्वक ऐका! देवाचा आवाज गडगडाटासारखा वाटतो.
    देवाच्या मुखातून येणारा गडगडाटासारखा आवाज ऐका.
³ देव त्याच्या विजेला सर्व आकाशात चमकण्यासाठी पाठवतो.
    ती सर्व पृथ्वीभर चमकते.
⁴ वीज चमकते तेव्हा देव गडगडाटी आवाज काढतो.
    देव त्याच्या अद्भुत आवाजात गर्जतो.
वीज चमकल्यानंतर देवाची गर्जना ऐकू येते.
⁵ देवाचा गडगडाटी आवाज अद्भुत आहे.
    देव आपल्याला न कळणाऱ्या महान गोष्टी करत असतो.
⁶ देव ‘हिमाला पृथ्वीवर पडण्याची आज्ञा करतो.’
    देव ‘पावसाला पृथ्वीवर जोरात पड असे सांगतो.’
⁷ देवाने निर्माण केलेल्या सर्व लोकांना तो काय करु शकतो
    हे कळावे म्हणून देव या गोष्टी करतो हा त्याचा पुरावा आहे.
⁸ पशू त्यांच्या घरकुलात जातात आणि तेथेच राहतात.
⁹ दक्षिणेकडून चक्रीवादळ येते.
    उत्तरेकडून थंड वारे येतात.
¹⁰ देवाच्या नि:श्वासाने बर्फ होते
    आणि समुद्र गोठतो.
¹¹ देव ढगांना पाण्याने भरतो
    आणि तो ते पसरवतो.
¹² तो ढगांना सर्व पृथ्वीभर पसरण्याची आज्ञा करतो.
    देव जी आज्ञा देतो ती ढग पाळतात.
¹³ देव लोकांना शिक्षा करण्यासाठी ढग आणतो,
    पूर आणतो किंवा त्याचे प्रेम व्यक्त करण्यासाठी पाणी आणतो.

¹⁴ “ईयोबा, एक क्षणभर थांब आणि लक्ष दे.
    थांब आणि देव ज्या अद्भुत गोष्टी करतो त्यांचा विचार कर.
¹⁵ ईयोब, देव ढगांवर आपला अधिकार कसा गाजवतो ते तुला माहीत आहे का?
    तो विजेला कसे चमकावितो ते तुला माहीत आहे का?
¹⁶ ढग आकाशात कसे तरंगतात ते तुला कळते का?
    देव ज्या अद्भुत गोष्टी करतो त्याचे ढग हे केवळ एक उदाहरण आहे.
    आणि देवाला त्याबद्दल सारे माहीत आहे.
¹⁷ परंतु ईयोब तुला या गोष्टी माहीत नाहीत.
    तुला फक्त एवढेच माहीत आहे की दक्षिणेकडून गरम वारे वाहतात तेव्हा तुला घाम येतो,
    तुझे कपडे अंगाला चिकटतात आणि सगळे काही स्तब्ध असते.
¹⁸ ईयोब, तू देवाला आकाश पसरवण्यात
    आणि ते आरशाप्रमाणे करण्यात मदत करु शकशील का?

¹⁹ “ईयोब, देवाला आम्ही काय सांगायचे ते तू आम्हांला सांग.
    काय बोलावे ते आम्हाला कळत नाही कारण आम्हाला जास्त माहिती नाही.
²⁰ मला देवाशी बोलायचे आहे असे मी म्हणणार नाही.
    तसे म्हणणे म्हणजे स्वतःचा नाश करुन घेणे आहे.
²¹ माणूस सूर्याकडे बघू शकत नाही.
    वाऱ्याने ढग पळवून लावले की तो फार तेजस्वी आणि चकचकीत दिसतो.
²² आणि देवसुध्दा तसाच आहे.
    देवाची सुवर्णप्रभा दक्षिणेकडील पर्वतावरुन ^[a] चमकते.
    देवाच्या भोवती तेजोवलय असते.
²³ तो सर्वशक्तिमान देव महान आहे.
    आपण त्याला समजू शकत नाही.
तो सामर्थ्यवान आहे परंतु तो आपल्याशी चांगला आणि न्यायाने वागतो.
    देवाला आपल्याला त्रास द्यायची इच्छा नसते.
²⁴ म्हणूनच लोक देवाला मान देतात.
    परंतु देव आपल्या शहाणपणाचा अभिमान बाळगणाऱ्या लोकांना मान देत नाही.”