New Testament in a Year

7 По ова, Исус се движеше во границите на Галилеја. Тој повеќе не сакаше да се задржува во Јудеја, затоа што еврејските верски водачи сакаа да Го убијат. ² Наближуваше еврејскиот празник Сеници^[a]. ³ Неговите браќа Му рекоа: „Оди^[b] во Јудеја, за да можат Твоите следбеници да ги видат делата што ги вршиш! ⁴ Никој не дејствува во тајност, ако сака да стане познат. Штом ги правиш овие чуда, тогаш објави му се на светот!“ ⁵ (Зашто, ни Неговите браќа не веруваа во Него.)

⁶ Исус им одговори: „Се уште не е дојден вистинскиот момент за Мене, а за вас секое време е погодно. ⁷ Вас светот не може да ве мрази, а Мене Ме мрази, затоа што постојано му зборувам за неговите зли дела и гревови. ⁸ Одете вие на празникот. За Мене се уште не е погоден моментот да тргнам на овој празник во Ерусалим.“ ⁹ Тој го рече тоа, и остана во Галилеја.

Исус поучува во храмот

¹⁰ А кога Неговите браќа заминаа на празникот, тогаш и Исус се искачи во Ерусалим, но не јавно, туку скришно. ¹¹ Еврејските верски водачи, пак, Го бараа за време на празникот и прашуваа: „Каде е Тој?“

¹² Во толпата народ многу се шепотеше за Исус. Едни велеа дека е добар, а други велеа: „Тој го мами народот!“ ¹³ Но, никој не зборуваше јавно за Него, поради страв од еврејските верски водачи.

¹⁴ Кон средината на празникот, Исус се искачи во храмот и почна да поучува. ¹⁵ Тогаш еврејските верски водачи се зачудија и рекоа: „Од каде Му на Овој Човек такво знаење, кога никогаш не се школувал^[c]!?“

¹⁶ Исус, пак, им одговори: „Тоа што го проповедам не сум го измислил Јас, туку произлегува од Бога, Кој Ме испрати. ¹⁷ Тој што сака да ја извршува Божјата волја, ќе знае дали ова учење е од Бога, или Јас во Свое име зборувам. ¹⁸ Тој што зборува во свое име се обидува себеси да се прослави. Човекот, пак, што настојува да го прослави Оној што Го испратил, е чесен и во Него нема неправда. ¹⁹ Зар Мојсеј не ви го даде Божјиот закон? Па сепак, никој од вас не постапува според тој Закон, туку сакате да Ме убиете!“

²⁰ „Ти си полудел!“ - му одговорија од толпата - „Кој сака да те убие!?“

²¹ Исус им одговори: „Исцелив еден човек во сабота и сите се стаписавте! ²² Мојсеј ви го воспостави обрежувањето (не дека е од Мојсеј, туку од патријарсите е), и вие и во саботен ден ги обрежувате вашите синови. ²³ Штом вршите обрежување во саботен ден и сметате дека со тоа не се прекршува Законот на Мојсеј, тогаш зошто сте бесни на Мене поради тоа што исцелив^[d] човек во сабота!? ²⁴ Не судете површно, туку судете справедливо!“

Дали Исус е Месијата?

²⁵ Тогаш некои од жителите на Ерусалим рекоа: „Зар не е овој човекот што Го бараат за да Го убијат? ²⁶ А ете, Тој јавно зборува и никој ништо не Му вели! Можеби старешините сфатиле дека Тој е Месијата!? ²⁷ Но сите ние знаеме од каде е овој човек, а кога ќе дојде Месијата - никој нема да знае од каде е!“