New Testament in a Year

За прељубата

²⁷ „Познато ви е дека во Мојсеевиот Закон е заповедано:

,Не врши прељуба^[a]!‘ ²⁸ Јас, пак, ви велам дека секој што ќе погледне туѓа жена и во мислите ќе ја посака - во своето срце тој веќе извршил прељуба со неа! ²⁹ Ако, на пример, твоето десно око те наведува на грев - извади го и фрли го; подобро е за тебе да загубиш еден орган, одошто целото тело да ти заврши во пеколот. ³⁰ И ако, на пример, твојата десна рака те наведува на грев - отсечи ја и фрли ја; подобро е за тебе да загубиш еден орган, одошто целото тело да ти заврши во пеколот.“

За разводот

(Мт. 19:9; Мк. 10:11-12; Лк. 16:18) ³¹ „Во Мојсеевиот Закон беше заповедано и ова:

,Ако некој маж реши да се разведе од својата жена,

нека и даде потврда за развод^[b]‘.

³² Јас, пак, ви велам: ,Секој што се разведува од својата жена - освен ако таа извршила прељуба - ја наведува на прељуба; и секој што стапува во брак со разведена жена - извршува прељуба.‘“

За заклетвата

(Иса. 66:1; Јак. 5:12; Пс. 48:2; Кол. 4:6) ³³ „Познато ви е и тоа, дека во Мојсеевиот Закон на вашите предци им било заповедано вака: ,Не кршете ги своите заклетви; исполнувајте го тоа што сте го ветиле пред Господа!‘ ³⁴ Јас, пак, ви велам: ,Не заколнувајте се воопшто: ни во небото, зашто тоа е Божји престол; ³⁵ ни во Земјата, зашто таа е подножје на Неговите нозе; ни во Ерусалим, зашто тој град е на Великиот Цар; ³⁶ ни во својата сопствена глава, зашто не можете да создадете ни едно црно или бело влакно; ³⁷ кажете само ,Да‘ или ,Не‘; а секакво заколнување покрај ова е поттикнато од Злиот.‘“

За одмаздувањето

(Лк. 6:29-30; Рим. 12:7; 1Кор. 6:7; 1Пет. 3:9; 5Мојс. 15:8) ³⁸ „Познато ви е дека во Мојсеевиот Закон било заповедано вака:

,Око за око, заб за заб^[c].‘

³⁹ Јас, пак, ви велам: ,Не возвраќајте им на оние што ви прават зло! Ако некој те удри по едниот образ, сврти му го и другиот. ⁴⁰ Ако некој те тужи за да ти ја земе кошулата, дај му го и палтото. ⁴¹ Ако некој те присили да му ги носиш торбите еден километар, ти носи му ги два километри. ⁴² Кога некој ќе запроси нешто од тебе - дај му; и не одбивај човек што бара да позајми нешто од тебе.‘“

За непријателите

(Лк. 6:27-28, 32-36) ⁴³ „Познато ви е дека во Мојсеевиот Закон било заповедано и ова:

,Сакај ги своите ближни, а мрази ги своите непријатели^[d].‘

⁴⁴ Јас, пак, ви велам: ,Покажувајте љубов и спрема своите непријатели и молете се за доброто на оние што ве прогонуваат; ⁴⁵ на тој начин вие ќе се однесувате како деца на вашиот небесен Татко, чие сонце изгрева и за лошите и за добрите. Тој им испраќа дожд и на праведните и на неправедните. ⁴⁶ Зашто, ако ги сакате само оние кои вас ве сакаат, тогаш, каква награда очекувате за тоа? Та, зар не го прават тоа и подмитливите собирачи на данок^[e]!? ⁴⁷ И ако сте љубезни само спрема своите ближни, тогаш, по што се разликувате од другите луѓе? Та, тоа го прават и паганите! ⁴⁸ Вие треба да се однесувате совршено исто како што се однесува вашиот небесен Татко!‘“